໑໔. ໂສຠິຕວຄ຺ໂຄ

໑. ໂສຠິຕຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ໂສຠິຕຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ເອກທິວສໍ ສຕ຺ຖາຣາ ຘມ຺ເມ ເທສິຍມາເນ ໂສມນສ຺ເສນ ປສນ຺ນມານໂສ ນານປ຺ປກາເຣຫິ ໂຖເມສິ. ໂສ ເຕເນວ ໂສມນສ຺ເສນ ກາລໍ ກຕ຺ວາ ເທເວສຸ ນິພ຺ພຕ຺ໂຕ ຕຕ຺ຖ ທິພ຺ພສຸຂໍ ອນຸຠວິຕ຺ວາ ມນຸສ຺ເສສຸ ຈ ມນຸສ຺ສສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ສຕ຺ຕວສ຺ສິໂກວ ປພ຺ພຊິຕ຺ວາ ນຈິຣສ຺ເສວ ຉຬຠິຎ຺ໂຎ ອຣຫາ ອໂຫສິ.

໑. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕໂຣ ນາມ ຊິໂນຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ສຸວິຎ຺ເຎຍ຺ຍເມວາຕິ.

ໂສຠິຕຕ຺ເຖຣອປທານວຓ຺ຓນາ ສມຕ຺ຕາ.

໒. ສຸທສ຺ສນຕ຺ເຖຣອປທານວຓ຺ຓນາ

ວິຕ຺ຖຕາຍ ນທີຕີເຣຕິອາທິກໍ ອາຍສ຺ມໂຕ ສຸທສ຺ສນຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ກຕປຸຎ຺ຎູປຈໂຍ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ສຓ຺ຐເປຕ຺ວາ ວສນ຺ໂຕ ວິຕ຺ຖຕາຍ ນາມ ຄງ຺ຄາຍ ສມີເປ ປິລກ຺ຂຸຜລິຕໍ ປຣິເຍສນ຺ໂຕ ຕສ຺ສາ ຕີເຣ ນິສິນ຺ນໍ ຊລມານອຄ຺ຄິສິຂໍ ອິວ ສິຂິໍ ສມ຺ມາສມ຺ພຸທ຺ຘໍ ທິສ຺ວາ ປສນ຺ນມານໂສ ເກຕກີປຸປ຺ຜໍ ວຓ຺ເຏເນວ ຉິນ຺ທິຕ຺ວາ ປູເຊນ຺ໂຕ ເອວມາຫ – ‘‘ຠນ຺ເຕ, ເຍນ ຎາເຓນ ຕ຺ວໍ ເອວໍ ມຫານຸຠາໂວ ສພ຺ພຎ຺ຎຸພຸທ຺ໂຘ ຊາໂຕ, ຕໍ ຎາຓໍ ອຫໍ ປູເຊມີ’’ຕິ. ອຖ ຠຄວາ ອນຸໂມທນມກາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ຊາໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑໐. ໂສ ອຕ຺ຕໂນ ກຕກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິຕ຺ຖຕາຍ ນທີຕີເຣຕິອາທິມາຫ. ຕຕ຺ຖ ວິຕ຺ຖຕາຍາຕິ ວິຕ຺ຖຣຕິ ປຕ຺ຖຣຕິ ວິຕ຺ຖິຓ຺ຓາ ໂຫຕີຕິ ວິຕ຺ຖຕາ, ນທນ຺ຕິ ສທ຺ທໍ ກໂຣນ຺ຕິ ອິຕາ ຄຕາ ປວຕ຺ຕາຕິ ນທີ, ນທິໍ ຕຣນ຺ຕາ ເອຕໍ ປຕ຺ວາ ຕິຓ຺ຓາ ນາມ ໂຫນ຺ຕີຕິ ຕີຣໍ, ຕສ຺ສາ ວິຕ຺ຖຕາຍ ນທິຍາ ຕີເຣ ຕີຣສມີເປຕິ ອຕ຺ໂຖ. ເກຕກິໍ ປຸປ຺ຜິຕໍ ທິສ຺ວາຕິ ກຸຈ຺ຉິຕາກາເຣນ ຄຓ຺ຫນ຺ຕານໍ ຫຕ຺ຖໍ ກຓ຺ຑໂກ ຉິນ຺ທຕິ ວິຊ຺ຌຕີຕິ ເກຕໍ, ເກຕສ຺ສ ເອສາ ເກຕກີປຸປ຺ຜໍ, ຕໍ ທິສ຺ວາ ວຓ຺ຏໍ ຉິນ຺ທິຕ຺ວາຕິ ສມ຺ພນ຺ໂຘ.

໑໑. ສິຂິໂນ ໂລກພນ຺ຘຸໂນຕິ ສິຂີ ວຸຈ຺ຈຕິ ອຄ຺ຄິ, ສິຂີສທິສາ ນີລປີຕາທິເຠທາ ຊລມານາ ຉພ຺ພຓ຺ຓຆນຣໍສິໂຍ ຍສ຺ສ ໂສ ສິຂີ, ໂລກສ຺ສ ສກລໂລກຕ຺ຕຍສ຺ສ ພນ຺ຘຸ ຎາຕໂກຕິ ໂລກພນ຺ຘຸ, ຕສ຺ສ ສິຂິໂນ ໂລກພນ຺ຘຸໂນ ເກຕກີປຸປ຺ຜໍ ວຓ຺ເຏ ຉິນ຺ທິຕ຺ວາ ປູເຊສິນ຺ຕິ ສມ຺ພນ຺ໂຘ. ເສສໍ ອຸຕ຺ຕານຕ຺ຖເມວາຕິ.

ສຸທສ຺ສນຕ຺ເຖຣອປທານວຓ຺ຓນາ ສມຕ຺ຕາ.

໓. ຈນ຺ທນປູຊນກຕ຺ເຖຣອປທານວຓ຺ຓນາ

ຈນ຺ທຠາຄານທີຕີເຣຕິອາທິກໍ ອາຍສ຺ມໂຕ ຈນ຺ທນປູຊນກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ຫິມວນ຺ເຕ ຈນ຺ທຠາຄານທິຍາ ສມີເປ ກິນ຺ນຣໂຍນິຍໍ ນິພ຺ພຕ຺ໂຕ ປຸປ຺ຜຠກ຺ໂຂ ປຸປ຺ຜນິວສໂນ ຈນ຺ທນອຄຣຸອາທີສຸ ຄນ຺ຘວິຠູສິໂຕ ຫິມວນ຺ເຕ ຠຸມ຺ມເທວຕາ ວິຍ ອຸຍ຺ຍານກີຬຊລກີຬາທິອເນກສຸຂໍ ອນຸຠວນ຺ໂຕ ວາສໍ ກປ຺ເປສິ. ຕທາ ອຕ຺ຖທສ຺ສີ ຠຄວາ ຕສ຺ສານຸກມ຺ປາຍ ຫິມວນ຺ຕໍ ຄນ຺ຕ຺ວາ ອາກາສໂຕ ໂອຣຸຍ຺ຫ ສງ຺ຆາຏິໍ ປຎ຺ຎາເປຕ຺ວາ ນິສີທິ. ໂສ ກິນ຺ນໂຣ ຕໍ ຠຄວນ຺ຕໍ ວິຊ຺ໂຊຕມານໍ ຕຕ຺ຖ ນິສິນ຺ນໍ ທິສ຺ວາ ປສນ຺ນມານໂສ ສຸຄນ຺ຘຈນ຺ທເນນ ປູເຊສິ. ຕສ຺ສ ຠຄວາ ອນຸໂມທນໍ ອກາສິ.

໑໗. ໂສ ເຕນ ປຸຎ຺ເຎນ ເຕນ ໂສມນສ຺ເສນ ຍາວຕາຍຸກໍ ຐຕ຺ວາ ຕໂຕ ຈຸໂຕ ເທວໂລເກ ນິພ຺ພຕ຺ໂຕ ອປຣາປຣໍ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈກ຺ກວຕ຺ຕິຣຊ຺ຊປເທສຣຊ຺ຊສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຈນ຺ທຠາຄານທີຕີເຣຕິອາທິມາຫ. ຕຕ຺ຖ ຈນ຺ທໍ ມນໍ ຣຸຈິໍ ອຊ຺ຌາສຍໍ ຎຕ຺ວາ ວິຍ ຊາໂຕຕິ ຈນ຺ໂທ. ຈນ຺ທມຓ຺ຑເລນ ປສນ຺ນນິມ຺ມໂລທເກນ ອຸໂຠສຸ ປສ຺ເສສຸ ມຸຕ຺ຕາທລສທິສສນ຺ຖຣຘວລປຸລິນຕເລນ ຈ ສມນ຺ນາຄຕຕ຺ຕາ ຈນ຺ເທນ ຠາຄາ ສທິສາຕິ ຈນ຺ທຠາຄາ, ຕສ຺ສາ ຈນ຺ທຠາຄາຍ ນທິຍາ ຕີເຣ ສມີເປຕິ ອຕ຺ໂຖ. ເສສໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ສຸວິຎ຺ເຎຍ຺ຍເມວາຕິ.

ຈນ຺ທນປູຊນກຕ຺ເຖຣອປທານວຓ຺ຓນາ ສມຕ຺ຕາ.

ອຏ຺ຐມຠາຓວາຣວຓ຺ຓນາ ສມຕ຺ຕາ.

໔. ປຸປ຺ຜຈ຺ຉທນິຍຕ຺ເຖຣອປທານວຓ຺ຓນາ

ສຸນນ຺ໂທ ນາມ ນາເມນາຕິອາທິກໍ ອາຍສ຺ມໂຕ ປຸປ຺ຜຈ຺ຉທນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສກສິປ຺ເປສຸ ນິປ຺ຜຕ຺ຕິໍ ປຕ຺ໂຕ ມຫາໂຠໂຄ ມຫາຍໂສ ທານາຠິຣໂຕ ອໂຫສິ. ເອກທິວສໍ ໂສ ‘‘ສກລຊມ຺ພຸທີເປ ອິເມ ຍາຈກາ ນາມ ‘ອຫໍ ທານໍ ນ ລທ຺ໂຘສ຺ມີ’ຕິ ວຕ຺ຕຸໍ ມາ ລຠນ຺ຕູ’’ຕິ ມຫາທານໍ ສຊ຺ເຊສິ. ຕທາ ປທຸມຸຕ຺ຕໂຣ ຠຄວາ ສປຣິວາໂຣ ອາກາເສນ ຄຈ຺ຉຕິ. ພ຺ຣາຫ຺ມໂຓ ຕໍ ທິສ຺ວາ ປສນ຺ນຈິຕ຺ໂຕ ສກສິສ຺ເສ ປກ຺ໂກສາເປຕ຺ວາ ປຸປ຺ຜານິ ອາຫຣາເປຕ຺ວາ ອາກາເສ ອຸກ຺ຂິປິຕ຺ວາ ປູເຊສິ. ຕານິ ສກລນຄຣໍ ຉາເທຕ຺ວາ ສຕ຺ຕ ທິວສານິ ອຏ຺ຐໍສຸ.

໒໖. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສຸຂໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ເອກສ຺ມິໍ ກຸລເຄເຫ ນິພ຺ພຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ຂຸຣຄ຺ເຄເຍວ ອຣຫຕ຺ຕໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸນນ຺ໂທ ນາມ ນາເມນາຕິອາທິມາຫ. ຕໍ ເຫຏ຺ຐາ ວຸຕ຺ຕນຍຕ຺ຕາ ສຸວິຎ຺ເຎຍ຺ຍເມວາຕິ.

ປຸປ຺ຜຈ຺ຉທນິຍຕ຺ເຖຣອປທານວຓ຺ຓນາ ສມຕ຺ຕາ.

໕. ຣໂຫສຎ຺ຎກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ຣໂຫສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ເອກສ຺ມິໍ ພຸທ຺ຘສຸຎ຺ຎກາເລ ມຊ຺ຌິມເທເສ ພ຺ຣາຫ຺ມຓກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສກສິປ຺ເປສຸ ນິປ຺ຜຕ຺ຕິໍ ປຕ຺ວາ ຕຕ຺ຖ ສາຣໍ ອປສ຺ສນ຺ໂຕ ເກວລໍ ອຸທຣໍ ປູເຣຕ຺ວາ ໂກຘມທມານາທໂຍ ອກຸສເລເຍວ ທິສ຺ວາ ຆຣາວາສໍ ປຫາຍ ຫິມວນ຺ຕໍ ປວິສິຕ຺ວາ ອິສິປພ຺ພຊ຺ຊໍ ປພ຺ພຊິຕ຺ວາ ອເນກຕາປສສຕປຣິວາໂຣ ວສຠປພ຺ພຕສມີເປ ອສ຺ສມໍ ມາເປຕ຺ວາ ຕີຓິ ວສ຺ສສຫສ຺ສານິ ຫິມວນ຺ເຕເຍວ ວສມາໂນ ‘‘ອຫໍ ເອຕ຺ຕການໍ ສິສ຺ສານໍ ອາຈຣິໂຍຕິ ສມ຺ມໂຕ ຄຣຸຏ຺ຐານິໂຍ ຄຣຸກາຕພ຺ໂພ ວນ຺ທນີໂຍ, ອາຈຣິໂຍ ເມ ນຕ຺ຖີ’’ຕິ ໂທມນສ຺ສປ຺ປຕ຺ໂຕ ເຕ ສພ຺ເພ ສິສ຺ເສ ສນ຺ນິປາເຕຕ຺ວາ ພຸທ຺ຘານໍ ອຠາເວ ນິພ຺ພານາຘິຄມາຠາວໍ ປກາເສຕ຺ວາ ສຍໍ ເອກໂກ ຣໂຫ ວິເວກຏ຺ຐາເນວ ນິສິນ຺ໂນ ພຸທ຺ຘສ຺ສ ສມ຺ມຸຂາ ນິສິນ຺ໂນ ວິຍ ພຸທ຺ຘສຎ຺ຎໍ ມນສິ ກຣິຕ຺ວາ ພຸທ຺ຘາຣມ຺ມຓໍ ປີຕິໍ ອຸປ຺ປາເທຕ຺ວາ ສາລາຍໍ ປລ຺ລງ຺ກໍ ອາຠຸຊິຕ຺ວາ ນິສິນ຺ໂນ ກາລໍ ກຕ຺ວາ ພ຺ຣຫ຺ມໂລເກ ນິພ຺ພຕ຺ຕິ.

໓໔. ໂສ ຕຕ຺ຖ ຌານສຸເຂນ ຈິຣໍ ວສິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ກາເມສຸ ອນລ຺ລີໂນ ສຕ຺ຕວສ຺ສິໂກ ປພ຺ພຊິຕ຺ວາ ຂຸຣຄ຺ເຄເຍວ ອຣຫຕ຺ຕໍ ປຕ຺ວາ ຉຬຠິຎ຺ໂຎ ຫຸຕ຺ວາ ປຸພ຺ເພນິວາສຎາເຓນ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ສຎ຺ຊາຕໂສມນສ຺ໂສ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ວສໂຠ ນາມ ປພ຺ພໂຕຕິ ຫິມວນ຺ຕປພ຺ພຕໍ ວິນາ ເສສປພ຺ພຕານໍ ອຸຈ຺ຈຕຣຠາເວນ ເສຏ຺ຐຕຣຠາເວນ ວສໂຠຕິ ສງ຺ຂໍ ຄໂຕ ປພ຺ພໂຕຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ຣໂຫສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໖. ຈມ຺ປກປຸປ຺ຜິຍຕ຺ເຖຣອປທານວຓ຺ຓນາ

ກຓິກາຣໍວ ໂຊຕນ຺ຕນ຺ຕິອາທິກໍ ອາຍສ຺ມໂຕ ຈມ຺ປກປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ເວສ຺ສຠຸສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສກສິປ຺ເປສຸ ນິປ຺ຜຕ຺ຕິໍ ປຕ຺ວາ ຕຕ຺ຖ ສາຣໍ ອປສ຺ສນ຺ໂຕ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ວນນ຺ຕເຣ ວສນ຺ໂຕ ເວສ຺ສຠຸໍ ຠຄວນ຺ຕໍ ອຸທ຺ທິສ຺ສ ສິສ຺ເສຫິ ອານີເຕຫິ ຈມ຺ປກປຸປ຺ເຜຫິ ປູເຊສິ. ຠຄວາ ອນຸໂມທນໍ ອກາສິ. ໂສ ເຕເນວ ກຸສເລນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປາປຸຓິຕ຺ວາ ປຸພ຺ພວາສນາພເລນ ຆຣາວາເສ ອນລ຺ລີໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໑. ໂສ ອປຣຠາເຄ ອຕ຺ຕໂນ ປຸພ຺ພປຸຎ຺ຎກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ກຓິກາຣໍວ ໂຊຕນ຺ຕນ຺ຕິອາທິມາຫ. ຕຕ຺ຖ ກຓິກາຣນ຺ຕິ ສກລປຕ຺ຕປລາສານິ ປຣິຠຊ຺ຊ ປາເຕຕ຺ວາ ປຸປ຺ຜຄຫຓສມເຍ ກຓ຺ຓິກາພທ຺ໂຘ ຫຸຕ຺ວາ ປຸປ຺ຜມກຸຬານໍ ຄຫຓໂຕ ກຓ຺ຓິກາກາເຣນ ປກໂຕຕິ ກຓິກາໂຣ, ‘‘ກຓ຺ຓິກາໂຣ’’ຕິ ວຕ຺ຕພ຺ເພ ນິຣຸຕ຺ຕິນເຍນ ເອກສ຺ສ ປຸພ຺ພ ຓ-ກາຣສ຺ສ ໂລປໍ ກຕ຺ວາ ‘‘ກຓິກາຣ’’ນ຺ຕິ ວຸຕ຺ຕນ຺ຕິ ທຏ຺ຐພ຺ພໍ. ຕໍ ປຸປ຺ຜິຕໍ ກຓິກາຣຣຸກ຺ຂໍ ອິວ ໂຊຕນ຺ຕໍ ພຸທ຺ຘໍ ອທ຺ທສນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ຈມ຺ປກປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໗. ອຕ຺ຖສນ຺ທສ຺ສກຕ຺ເຖຣອປທານວຓ຺ຓນາ

ວິສາລມາເຬ ອາສີໂນຕິອາທິກໍ ອາຍສ຺ມໂຕ ອຕ຺ຖສນ຺ທສ຺ສກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ອຕ຺ຕຠາເວສຸ ກຕປຸຎ຺ຎູປຈໂຍ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວຸທ຺ຘິມນ຺ວາຍ ສກສິປ຺ເປສຸ ນິປ຺ຜຕ຺ຕິໍ ປຕ຺ໂຕ ຕຕ຺ຖ ສາຣໍ ອປສ຺ສນ຺ໂຕ ເຄຫໍ ປຫາຍ ຫິມວນ຺ຕໍ ຄນ຺ຕ຺ວາ ຣມຓີເຍ ຐາເນ ປຓ຺ຓສາລໍ ກຕ຺ວາ ປຏິວສຕິ, ຕທາ ສຕ຺ຕານຸກມ຺ປາຍ ຫິມວນ຺ຕມາຄຕໍ ປທຸມຸຕ຺ຕຣຠຄວນ຺ຕໍ ທິສ຺ວາ ປສນ຺ນມານໂສ ປຎ຺ຈງ຺ຄສມນ຺ນາຄໂຕ ວນ຺ທິຕ຺ວາ ຖຸຕິວຈເນຫິ ໂຖເມສິ. ໂສ ເຕນ ປຸຎ຺ເຎນ ຍາວຕາຍຸກໍ ກຕ຺ວາ ກາລງ຺ກຕ຺ວາ ພ຺ຣຫ຺ມໂລກູປໂຄ ອໂຫສິ. ໂສ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ອຣຫຕ຺ຕໍ ປາປຸຓິ.

໔໗. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິສາລມາເຬ ອາສີໂນຕິອາທິມາຫ. ຕຕ຺ຖ ວິສາລມາເຬຕິ ວິສາລໍ ປຕ຺ຖຏໍ ວິຕ຺ຖິຓ຺ຓໍ ມຫນ຺ຕໍ ມາຬໍ ວິສາລມາຬໍ, ຕສ຺ມິໍ ວິສາລມາເຬ ອາສີໂນ ນິສິນ຺ໂນ ອຫໍ ໂລກນາຍກໍ ອທ຺ທສນ຺ຕິ ສມ຺ພນ຺ໂຘ. ເຕສໍ ສຸວິຎ຺ເຎຍ຺ຍເມວາຕິ.

ອຕ຺ຖສນ຺ທສ຺ສກຕ຺ເຖຣອປທານວຓ຺ຓນາ ສມຕ຺ຕາ.

໘. ເອກປສາທນິຍຕ຺ເຖຣອປທານວຓ຺ຓນາ

ນາຣໂທ ອິຕິ ເມ ນາມນ຺ຕິອາທິກໍ ອາຍສ຺ມໂຕ ເອກປສາທນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນກາສຸ ຊາຕີສຸ ກຕກຸສໂລ ອຕ຺ຖທສ຺ສິສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ເກສໂວຕິ ປາກໂຏ ຫຸຕ຺ວາ ວິຎ຺ຎຸຕໍ ປຕ຺ວາ ຆຣາວາສໍ ປຫາຍ ປພ຺ພຊິຕ຺ວາ ວສນ຺ໂຕ ເອກທິວສໍ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ນມານໂສ ອຎ຺ຊລິໍ ປຄ຺ຄຍ຺ຫ ອຕິວິຍ ປີຕິໂສມນສ຺ສຊາໂຕ ປກ຺ກາມິ. ໂສ ຍາວຕາຍຸກໍ ຐຕ຺ວາ ເຕເນວ ໂສມນສ຺ເສນ ກາລໍ ກຕ຺ວາ ເທເວສຸ ນິພ຺ພຕ຺ໂຕ ຕຕ຺ຖ ທິພ຺ພສມ຺ປຕ຺ຕິໍ ອນຸຠວິຕ຺ວາ ມນຸສ຺ເສສຸ ອຸປ຺ປນ຺ໂນ ຕຕ຺ຖ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ອຎ຺ຎຕຣສ຺ມິໍ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໕໕. ໂສ ອປຣຠາເຄ ອຕ຺ຕໂນ ກຕກຸສລກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນາຣໂທ ອິຕິ ເມ ນາມນ຺ຕິອາທິມາຫ. ຕຕ຺ຖ ນາຣໂທຕິ ຊາຕິວເສນ ສຸທ຺ຘສຣີຣຕ຺ຕາ ນຕ຺ຖິ ຣໂຊ ຘູລິ ມລໍ ເອຕສ຺ສາຕິ ນາຣໂທ, ຊ-ກາຣສ຺ສ ທ-ກາຣໍ ກຕ຺ວາ ນາຣໂທຕິ ກຸລທຕ຺ຕິກໍ ນາມໍ. ເກສໂວຕິ ກິສວຈ຺ຉໂຄຕ຺ເຕ ຊາຕຕ຺ຕາ ເກສໂວ ນາຣທເກສໂວ ອິຕິ ມໍ ຊນາ ວິທູ ຊານນ຺ຕີຕິ ອຕ຺ໂຖ. ເສສໍ ປາກຏເມວາຕິ.

ເອກປສາທນິຍຕ຺ເຖຣອປທານວຓ຺ຓນາ ສມຕ຺ຕາ.

໙. ສາລປຸປ຺ຜທາຍກຕ຺ເຖຣອປທານວຓ຺ຓນາ

ມິຄຣາຊາ ຕທາ ອາສິນ຺ຕິອາທິກໍ ອາຍສ຺ມໂຕ ສາລປຸປ຺ຜທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ກຕກຸສລສຎ຺ຈໂຍ ເກນຈິ ກມ຺ມຈ຺ຉິທ຺ເທນ ຫິມວນ຺ເຕ ສີຫໂຍນິຍໍ ນິພ຺ພຕ຺ໂຕ ອເນກສີຫປຣິວາໂຣ ວິຫາສິ. ຕທາ ສິຂີ ຠຄວາ ຕສ຺ສານຸກມ຺ປາຍ ຫິມວນ຺ຕໍ ອຄມາສິ. ສີໂຫ ຕໍ ອຸປຄຕໍ ທິສ຺ວາ ປສນ຺ນມານໂສ ສາຂາຠງ຺ເຄນ ສກຓ຺ຓິກສາລປຸປ຺ຜໍ ຄເຫຕ຺ວາ ປູເຊສິ. ຠຄວາ ຕສ຺ສ ອນຸໂມທນໍ ອກາສິ.

໖໐. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຣິ ປສນ຺ໂນ ປພ຺ພຊິຕ຺ວາ ອຣຫຕ຺ຕໍ ປຕ຺ໂຕ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ມິຄຣາຊາ ຕທາ ອາສິນ຺ຕິອາທິມາຫ. ຕຕ຺ຖ ມຣຓໍ ຄຈ຺ຉນ຺ຕີຕິ ມິຄາ, ອຖ ວາ ຆາສໍ ມຄ຺ຄນ຺ຕິ ຄເວສນ຺ຕີຕິ ມິຄາ, ມິຄານໍ ຣາຊາ ມິຄຣາຊາ. ສກລຈຕຸປ຺ປທານໍ ຣາຊຠາເວ ສຕິປິ ຄາຖາພນ຺ຘສຸຂຕ຺ຖໍ ມິເຄ ອາທິໍ ກຕ຺ວາ ມິຄຣາຊາຕິ ວຸຕ຺ຕໍ. ຍທາ ຠຄວນ຺ຕໍ ທິສ຺ວາ ສປຸປ຺ຜໍ ສາລສາຂໍ ຠຎ຺ຊິຕ຺ວາ ປູເຊສິໍ, ຕທາ ອຫໍ ມິຄຣາຊາ ອໂຫສິນ຺ຕິ ອຕ຺ໂຖ.

໖໒. ສໂກສໍ ປຸປ຺ຜມາຫຣິນ຺ຕິ ສກຓ຺ຓິກໍ ສາລປຸປ຺ຜໍ ອາຫຣິໍ ປູເຊສິນ຺ຕິ ອຕ຺ໂຖ. ເສສໍ ອຸຕ຺ຕານຕ຺ຖເມວາຕິ.

ສາລປຸປ຺ຜທາຍກຕ຺ເຖຣອປທານວຓ຺ຓນາ ສມຕ຺ຕາ.

໑໐. ປິຍາລຜລທາຍກຕ຺ເຖຣອປທານວຓ຺ຓນາ

ປໂຣຘໂກ ຕທາ ອາສິນ຺ຕິອາທິກໍ ອາຍສ຺ມໂຕ ປິຍາລຜລທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ເນສາທກຸເລ ນິພ຺ພຕ຺ໂຕ ຫິມວນ຺ເຕ ເອກສ຺ມິໍ ປພ຺ຠາເຣ ມິເຄ ວຘິຕ຺ວາ ຊີວິກໍ ກປ຺ເປຕ຺ວາ ວສຕິ. ຕສ຺ມິໍ ກາເລ ຕຕ຺ຖ ຄຕໍ ສິຂິໍ ຠຄວນ຺ຕໍ ທິສ຺ວາ ປສນ຺ນມານໂສ ສາຍໍ ປາຕໍ ນມສ຺ສມາໂນ ກຎ຺ຈິ ເທຍ຺ຍຘມ຺ມໍ ອປສ຺ສນ຺ໂຕ ມຘຸຣານິ ປິຍາລຜລານິ ອຸຈ຺ຈິນິຕ຺ວາ ອທາສິ. ຠຄວາ ຕານິ ປຣິຠຸຎ຺ຊິ. ໂສ ເນສາໂທ ພຸທ຺ຘາຣມ຺ມຓາຍ ປີຕິຍາ ນິຣນ຺ຕຣໍ ຜຸຏ຺ຐສຣີໂຣ ປາປກມ຺ເມ ວິຣຕ຺ຕຈິຕ຺ໂຕ ມູລຜລາຫາໂຣ ນຈິຣສ຺ເສວ ກາລໍ ກຕ຺ວາ ເທວໂລເກ ນິພ຺ພຕ຺ຕິ.

໖໖. ໂສ ຕຕ຺ຖ ທິພ຺ພສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈ ອເນກວິຘສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ຄຫປຕິກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ຕຕ຺ຖ ອນຠິຣໂຕ ເຄຫໍ ປຫາຍ ສຕ຺ຖຸ ສນ຺ຕິເກ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ໂຕ ອຕ຺ຕໂນ ກຕຜລທານກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປໂຣຘໂກ ຕທາ ອາສິນ຺ຕິອາທິມາຫ. ຕຕ຺ຖ ຍທາ ອຫໍ ປິຍາລຜລໍ ທຕ຺ວາ ຈິຕ຺ຕໍ ປສາເທສິໍ, ຕທາ ອຫໍ ປໂຣຘໂກ ອາສິນ຺ຕິ ສມ຺ພນ຺ໂຘ. ປໂຣຘໂກຕິ ປຣສຕ຺ຕໂຣຘໂກ ວິເຫສໂກ. ‘‘ປຣໂຣຘໂກ’’ຕິ ວຕ຺ຕພ຺ເພ ປຸພ຺ພສ຺ສ ຣ-ກາຣສ຺ສ ໂລປໍ ກຕ຺ວາ ‘‘ປໂຣຘໂກ’’ຕິ ວຸຕ຺ຕໍ.

໖໙. ປຣິຈາຣິໍ ວິນາຍກນ຺ຕິ ຕໍ ນິພ຺ພານປາປກໍ ສຕ຺ຖາຣໍ, ‘‘ຠນ຺ເຕ, ອິມໍ ຜລໍ ປຣິຠຸຎ຺ຊຖາ’’ຕິ ປວາຣິໍ ນິມນ຺ເຕສິໍ ອາຣາເຘສິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ປິຍາລຜລທາຍກຕ຺ເຖຣອປທານວຓ຺ຓນາ ສມຕ຺ຕາ.

ຈຸທ຺ທສມວຄ຺ຄວຓ຺ຓນາ ສມຕ຺ຕາ.