໑໓. ເສເຣຍ຺ຍວຄ຺ໂຄ

໑. ເສເຣຍ຺ຍກຕ຺ເຖຣອປທານວຓ຺ຓນາ

ອຊ຺ຌາຍໂກ ມນ຺ຕຘໂຣຕິອາທິກໍ ອາຍສ຺ມໂຕ ເສເຣຍ຺ຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕໂຕ ປເຣສຸ ອຕ຺ຕຠາວສຫສ຺ເສສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ຕິຓ຺ຓໍ ເວທານໍ ປາຣໍ ຄນ຺ຕ຺ວາ ອິຕິຫາສາທິສກລພ຺ຣາຫ຺ມຓຘມ຺ເມສຸ ໂກຏິປ຺ປຕ຺ໂຕ ເອກສ຺ມິໍ ທິວເສ ອພ຺ໂຠກາເສ ສປຣິວາໂຣ ຐິໂຕ ຠຄວນ຺ຕໍ ທິສ຺ວາ ປສນ຺ນມານໂສ ເສເຣຍ຺ຍປຸປ຺ຜໍ ຄເຫຕ຺ວາ ອາກາເສ ຂິປນ຺ໂຕ ປູເຊສິ. ຕານິ ປຸປ຺ຜານິ ອາກາເສ ວິຕານໍ ຫຸຕ຺ວາ ສຕ຺ຕາຫໍ ຐຕ຺ວາ ປຈ຺ຉາ ອນ຺ຕຣຘາຍິໍສຸ. ໂສ ຕໍ ອຈ຺ຉຣິຍໍ ທິສ຺ວາ ອຕີວ ປສນ຺ນມານໂສ ເຕເນວ ປີຕິໂສມນສ຺ເສນ ກາລໍ ກຕ຺ວາ ຕຸສິຕາທີສຸ ນິພ຺ພຕ຺ໂຕ ຕຕ຺ຖ ທິພ຺ພສຸຂມນຸຠວິຕ຺ວາ ຕໂຕ ມນຸສ຺ສສຸຂມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປາປຸຓິຕ຺ວາ ປຸພ຺ພວາສນາພເລນ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑. ໂສ ອປຣຠາເຄ ປຸຣາກຕກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຊ຺ຌາຍໂກ ມນ຺ຕຘໂຣຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ.

໓. ເສເຣຍ຺ຍກໍ ຄເຫຕ຺ວານາຕິ ສິຣິເສ ຠວໍ ຊາຕິປຸປ຺ຜໍ ເສເຣຍ຺ຍໍ, ເສເຣຍ຺ຍເມວ ເສເຣຍ຺ຍກໍ, ຕໍ ເສເຣຍ຺ຍກໍ ຄເຫຕ຺ວານາຕິ ສມ຺ພນ຺ໂຘ. ຠຄວຕິ ປສນ຺ໂນ ຊາຕິສຸມນມກຸຬຈມ຺ປກາທີນິ ປຸປ຺ຜານິ ປຕິຏ຺ຐເປຕ຺ວາ ປູເຊຕຸໍ ກາລໍ ນຕ຺ຖິຕາຍ ຕຕ຺ຖ ສມ຺ປຕ຺ຕໍ ຕໍ ເສເຣຍ຺ຍກໍ ປຸປ຺ຜໍ ຄເຫຕ຺ວາ ປູເຊສິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ເສເຣຍ຺ຍກຕ຺ເຖຣອປທານວຓ຺ຓນາ ສມຕ຺ຕາ.

໒. ປຸປ຺ຜຖູປິຍຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ປຸປ຺ຜຖູປິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິພຸທ຺ຘສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສກສິປ຺ເປ ນິປ຺ຜຕ຺ຕິໍ ປຕ຺ໂຕ ຕຕ຺ຖ ສາຣໍ ອປສ຺ສນ຺ໂຕ ເຄຫໍ ປຫາຍ ຫິມວນ຺ຕໍ ປວິສິຕ຺ວາ ອຕ຺ຕນາ ສຫຄເຕຫິ ປຎ຺ຈສິສ຺ສສຫສ຺ເສຫິ ສທ຺ຘິໍ ປຎ຺ຈາຠິຎ຺ຎາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ກຸກ຺ກຸຣນາມປພ຺ພຕສມີເປ ປຓ຺ຓສາລໍ ກາເຣຕ຺ວາ ປຏິວສຕິ. ຕທາ ພຸທ຺ຘຸປ຺ປາທຠາວໍ ສຸຕ຺ວາ ສິສ຺ເສຫິ ສຫ ພຸທ຺ຘສ຺ສ ສນ຺ຕິກໍ ຄນ຺ຕຸກາໂມ ເກນຈິ ພ຺ຍາຘິນາ ປີຬິໂຕ ປຓ຺ຓສາລໍ ປວິສິຕ຺ວາ ສິສ຺ສສນ຺ຕິກາ ພຸທ຺ຘສ຺ສານຸຠາວໍ ລກ຺ຂຓຎ຺ຈ ສຸຕ຺ວາ ປສນ຺ນມານໂສ ຫິມວນ຺ຕໂຕ ຈມ຺ປກາໂສກຕິລກເກຏກາທ຺ຍເນເກ ປຸປ຺ເຜ ອາຫຣາເປຕ຺ວາ ຖູປໍ ກຕ຺ວາ ພຸທ຺ຘໍ ວິຍ ປູເຊຕ຺ວາ ກາລໍ ກຕ຺ວາ ພ຺ຣຫ຺ມໂລກູປໂຄ ອໂຫສິ. ອຖ ເຕ ສິສ຺ສາ ຕສ຺ສ ອາຬຫນໍ ກຕ຺ວາ ພຸທ຺ຘສນ຺ຕິກໍ ຄນ຺ຕ຺ວາ ຕໍ ປວຕ຺ຕິໍ ອາໂຣເຈສຸໍ. ອຖ ຠຄວາ ພຸທ຺ຘຈກ຺ຂຸນາ ໂອໂລເກຕ຺ວາ ອນາຄຕໍສຎາເຓນ ປາກຏີກຣຓມກາສິ. ໂສ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ປຸພ຺ພວາສນາພເລນ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑໐. ອຖ ໂສ ອຕ຺ຕໂນ ປຸພ຺ພກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ. ກຸກ຺ກຸໂຣ ນາມ ປພ຺ພໂຕຕິ ປພ຺ພຕສ຺ສ ສິຂຣໍ ກຸກ຺ກຸຣາກາເຣນ ສຸນຂາກາເຣນ ສຓ຺ຐິຕຕ຺ຕາ ‘‘ກຸກ຺ກຸຣປພ຺ພໂຕ’’ຕິ ສງ຺ຂ຺ຍໍ ຄໂຕ, ຕສ຺ສ ສມີເປ ປຓ຺ຓສາລໍ ກຕ຺ວາ ປຎ຺ຈຕາປສສຫສ຺ເສຫິ ສຫ ວສມາໂນຕິ ອຕ຺ໂຖ. ນຍານຸສາເຣນ ເສສໍ ສພ຺ພໍ ອຸຕ຺ຕານຕ຺ຖເມວາຕິ.

ປຸປ຺ຜຖູປິຍຕ຺ເຖຣອປທານວຓ຺ຓນາ ສມຕ຺ຕາ.

໓. ປາຍສທາຍກຕ຺ເຖຣອປທານວຓ຺ຓນາ

ສຸວຓ຺ຓວຓ຺ໂຓ ສມ຺ພຸທ຺ໂຘຕິອາທິກໍ ອາຍສ຺ມໂຕ ປາຍສທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ວິຠວສມ຺ປນ຺ເນ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ຆຣາວາສໍ ວສນ຺ໂຕ ຫຕ຺ຖິອສ຺ສຘນຘຎ຺ຎສຕ຺ຕຣຕນາທິວິຠວສມ຺ປນ຺ໂນ ສທ຺ຘາສມ຺ປນ຺ໂນ ກມ຺ມຜລໍ ສທ຺ທຫິຕ຺ວາ ສຫສ຺ສມຕ຺ຕາ ສຸວຓ຺ຓປາຕິໂຍ ກາເຣຕ຺ວາ ຕສ຺ມິໍ ຂີຣປາຍສສຫສ຺ສສ຺ສ ປູເຣຕ຺ວາ ຕາ ສພ຺ພາ ຄາຫາເປຕ຺ວາ ສິມ຺ພລິວນໍ ອຄມາສິ. ຕສ຺ມິໍ ສມເຍ ວິປສ຺ສີ ຠຄວາ ຉພ຺ພຓ຺ຓຣໍສິໂຍ ວິສ຺ສຊ຺ເຊຕ຺ວາ ອາກາເສ ຈງ຺ກມໍ ມາເປຕ຺ວາ ຈງ຺ກມຕິ. ໂສ ປນ ເສຏ຺ຐິ ຕໍ ອຈ຺ຉຣິຍໍ ທິສ຺ວາ ອຕີວ ປສນ຺ໂນ ປາຕິໂຍ ຐເປຕ຺ວາ ວນ຺ທິຕ຺ວາ ອາໂຣເຈສິ ປຏິຄ຺ຄຫຓາຍ. ອຖ ຠຄວາ ອນຸກມ຺ປໍ ອຸປາທາຍ ປຏິຄ຺ຄເຫສິ, ປຏິຄ຺ຄເຫຕ຺ວາ ຈ ປນ ຕສ຺ສ ໂສມນຸສ຺ສຸປ຺ປາທນຕ຺ຖໍ ສຫສ຺ສມຕ຺ເຕຫິ ຠິກ຺ຂຸສງ຺ເຆຫິ ສທ຺ຘິໍ ປຣິຠຸຎ຺ຊິ, ຕທວເສສໍ ອເນກສຫສ຺ສຠິກ຺ຂູ ປຣິຠຸຎ຺ຊິໍສຸ. ໂສ ເຕນ ປຸຎ຺ເຎນ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໒໖. ໂສ ອປຣຠາເຄ ອຕ຺ຕໂນ ກຸສລໍ ປຈ຺ຈເວກ຺ຂມາໂນ ຕໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ສຸວຓ຺ຓວຓ຺ໂຓ ສມ຺ພຸທ຺ໂຘຕິອາທິມາຫ. ຕໍ ເຫຏ຺ຐາ ວຸຕ຺ຕເມວ.

໒໘. ຈງ຺ກມໍ ສຸສມາຣູຬ຺ໂຫຕິ ຈທິນນ຺ໂຕ ປທວິກ຺ເຂປໍ ກໂຣນ຺ໂຕ ກມຕິ ຄຈ຺ຉຕີຕິ ຈງ຺ກມໍ, ຈງ຺ກມສ຺ສ ປທວິກ຺ເຂປສ຺ສ ອາຘາຣຠູຕປຖວິປເທໂສ ຈງ຺ກມໍ ນາມາຕິ ອຕ຺ໂຖ, ເອຕໍ ຈງ຺ກມໍສຸ ວິເສເສນ ອາຣູຬ຺ໂຫຕິ ສມ຺ພນ຺ໂຘ. ອມ຺ພເຣ ອນິລາຍເນຕິ ວຣີຍຕິ ຉາທິຍຕິ ອເນນາຕິ ວຣໍ, ນ ພຣນ຺ຕິ ອມ຺ພຣໍ, ເສຕວຕ຺ຖສທິສໍ ອາກາສນ຺ຕິ ອຕ຺ໂຖ. ນຕ຺ຖິ ນິລີຍນໍ ໂຄປນໍ ເອຕ຺ຖາຕິ ອນິລໍ, ອາ ສມນ຺ຕໂຕ ຍນ຺ຕິ ຄຈ຺ຉນ຺ຕິ ອເນນ ອິທ຺ຘິມນ຺ໂຕຕິ ອາຍນໍ, ອນິລຎ຺ຈ ຕໍ ອາຍນຎ຺ເຈຕິ ອນິລາຍນໍ, ຕສ຺ມິໍ ອມ຺ພເຣ ອນິລາຍເນ ຈງ຺ກມໍ ມາປຍິນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປາຍສທາຍກຕ຺ເຖຣອປທານວຓ຺ຓນາ ສມຕ຺ຕາ.

໔. ຄນ຺ໂຘທກິຍຕ຺ເຖຣອປທານວຓ຺ຓນາ

ນິສຊ຺ຊ ປາສາທວເຣຕິອາທິກໍ ອາຍສ຺ມໂຕ ຄນ຺ໂຘທກິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ນິພ຺ພານູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສີຠຄວໂຕ ກາເລ ເສຏ຺ຐິກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ມຫທ຺ຘໂນ ມຫາໂຠໂຄ ທິພ຺ພສຸຂມນຸຠວນ຺ໂຕ ວິຍ ມນຸສ຺ສສຸຂມນຸຠວນ຺ໂຕ ເອກສ຺ມິໍ ທິວເສ ປາສາທວເຣ ນິສິນ຺ໂນ ໂຫຕິ. ຕທາ ຠຄວາ ສຸວຓ຺ຓມຫາເມຣຸ ວິຍ ວີຖິຍາ ວິຈຣຕິ, ຕໍ ວິຈຣມານໍ ຠຄວນ຺ຕໍ ທິສ຺ວາ ປສນ຺ນມານໂສ ຄນ຺ຕ຺ວາ ວນ຺ທິຕ຺ວາ ສຸຄນ຺ໂຘທເກນ ຠຄວນ຺ຕໍ ໂອສິຎ຺ຈມາໂນ ປູເຊສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາເສນ ອນລ຺ລີໂນ ສຕ຺ຖຸ ສນ຺ຕິເກ ປພ຺ພຊິຕ຺ວາ ກມ຺ມຏ຺ຐານໍ ຄເຫຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ.

໓໕. ໂສ ອປຣຠາເຄ ອຕ຺ຕໂນ ປຸພ຺ພກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ນິສຊ຺ຊ ປາສາທວເຣຕິອາທິມາຫ. ຕຕ຺ຖ ປາສາໂທຕິ ປສາທໍ ໂສມນສ຺ສໍ ຊເນຕິ ອຸປ຺ປາເທຕີຕິ ປາສາໂທ, ມາລາກມ຺ມຈິຕ຺ຕກມ຺ມສຸວຓ຺ຓກມ຺ມາທ຺ຍເນກວິຈິຕ຺ຕໍ ທິສ຺ວາ ຕຕ຺ຖ ປວິຏ຺ຐານໍ ຊນານໍ ປສາທໍ ຊນຍຕີຕິ ອຕ຺ໂຖ. ປາສາໂທ ຈ ໂສ ປຕ຺ເຖຕພ຺ພຏ຺ເຐນ ວໂຣ ຈາຕິ ປາສາທວໂຣ, ຕສ຺ມິໍ ປາສາທວເຣ ນິສຊ຺ຊ ນິສີທິຕ຺ວາ ວິປສ຺ສິໍ ຊິນວຣໍ ອທ຺ທສນ຺ຕິ ສມ຺ພນ຺ໂຘ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ຄນ຺ໂຘທກິຍຕ຺ເຖຣອປທານວຓ຺ຓນາ ສມຕ຺ຕາ.

໕. ສມ຺ມຸຂາຖວິກຕ຺ເຖຣອປທານວຓ຺ຓນາ

ຊາຍມາເນ ວິປສ຺ສິມ຺ຫີຕິອາທິກໍ ອາຍສ຺ມໂຕ ສມ຺ມຸຂາຖວິກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ສຕ຺ຕວສ຺ສິກກາເລເຍວ ສກສິປ຺ເປ ນິປ຺ຜຕ຺ຕິໍ ປຕ຺ໂຕ ຆຣາວາສໍ ສຓ຺ຐເປຕ຺ວາ ວສນ຺ໂຕ ວິປສ຺ສິມ຺ຫິ ໂພຘິສຕ຺ເຕ ອຸປ຺ປນ຺ເນ ສພ຺ພພຸທ຺ຘານໍ ລກ຺ຂຓານິ ເວທຕ຺ຕເຍ ທິສ຺ສມານານິ ຕານິ ຣາຊປ຺ປມຸຂສ຺ສ ຊນກາຍສ຺ສ ວິປສ຺ສີໂພຘິສຕ຺ຕສ຺ສ ລກ຺ຂຓຎ຺ຈ ພຸທ຺ຘຠາວຎ຺ຈ ພ຺ຍາກຣິຕ຺ວາ ຊນານໍ ມານສໍ ນິພ຺ພາເປສິ, ອເນການິ ຈ ຖຸຕິວຈນານິ ນິເວເທສິ. ໂສ ເຕນ ກຸສລກມ຺ເມນ ຉ ກາມາວຈຣສມ຺ປຕ຺ຕິໂຍ ອນຸຠວິຕ຺ວາ ມນຸສ຺ເສສຸ ຈ ຈກ຺ກວຕ຺ຕິສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ. ກຕກຸສລນາເມນ ສມ຺ມຸຂາຖວິກຕ຺ເຖໂຣຕິ ປາກໂຏ.

໔໑. ໂສ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຊາຍມາເນ ວິປສ຺ສິມ຺ຫີຕິອາທິມາຫ. ວິປສ຺ສິມ຺ຫິ ສມ຺ມາສມ຺ພຸທ຺ເຘ ຊາຍມາເນ ອຸປ຺ປຊ຺ຊມາເນ ມາຕຸກຸຈ຺ຉິໂຕ ນິກ຺ຂນ຺ເຕ ອຫໍ ປາຕຸຠູຕໍ ນິມິຕ຺ຕໍ ກາຣຓໍ ພຸທ຺ຘຠາວສ຺ສ ເຫຕຸໍ ພ຺ຍາກຣິໍ ກເຖສິໍ, ອເນການິ ອຈ຺ຉຣິຍານິ ປາກຏານິ ອກາສິນ຺ຕິ ອຕ຺ໂຖ. ເສສໍ ວຸຕ຺ຕນຍານຸສາເຣນ ສຸວິຎ຺ເຎຍ຺ຍເມວາຕິ.

ສມ຺ມຸຂາຖວິກຕ຺ເຖຣອປທານວຓ຺ຓນາ ສມຕ຺ຕາ.

໖. ກຸສຸມາສນິຍຕ຺ເຖຣອປທານວຓ຺ຓນາ

ນຄເຣ ຘຎ຺ຎວຕິຍາຕິອາທິກໍ ອາຍສ຺ມໂຕ ກຸສຸມາສນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ມຫທ຺ຘໂນ ມຫາໂຠໂຄ ຕິຓ຺ຓໍ ເວທານໍ ປາຣໍ ຄໂຕ ພ຺ຣາຫ຺ມຓສິປ຺ເປສຸ ໂກຏິປ຺ປຕ຺ໂຕ ສກປຣສມຍກຸສໂລ ມາຕາປິຕໂຣ ປູເຊຕຸກາໂມ ປຎ຺ຈ ອຸປ຺ປລກລາເປ ອຕ຺ຕໂນ ສມີເປ ຐເປຕ຺ວາ ນິສິນ຺ໂນ ຠິກ຺ຂຸສງ຺ຆປຣິວຸຕໍ ວິປສ຺ສິໍ ຠຄວນ຺ຕໍ ອາຄຈ຺ຉນ຺ຕໍ ທິສ຺ວາ ນີລປີຕາທິຆນພຸທ຺ຘຣສ຺ມິໂຍ ຈ ທິສ຺ວາ ປສນ຺ນມານໂສ ອາສນໍ ປຎ຺ຎາເປຕ຺ວາ ຕຕ຺ຖ ຕານິ ປຸປ຺ຜານິ ສນ຺ຖຣິຕ຺ວາ ຠຄວນ຺ຕໍ ຕຕ຺ຖ ນິສີທາເປຕ຺ວາ ສກຆເຣ ມາຕຸ ອຕ຺ຖາຍ ປຏິຍຕ຺ຕານິ ສພ຺ພານິ ຂາທນີຍໂຠຊນີຍານິ ຄເຫຕ຺ວາ ສປຣິວາຣໍ ຠຄວນ຺ຕໍ ສຫຕ຺ເຖນ ສນ຺ຕປ຺ເປນ຺ໂຕ ໂຠເຊສິ. ໂຠຊນາວສາເນ ເອກໍ ອຸປ຺ປລຫຕ຺ຖໍ ອທາສິ. ເຕນ ໂສມນສ຺ສຊາໂຕ ປຕ຺ຖນໍ ອກາສິ. ຠຄວາປິ ອນຸໂມທນໍ ກຕ຺ວາ ປກາມິ. ໂສ ເຕນ ປຸຎ຺ເຎນ ເທວມນຸສ຺ເສສຸ ທ຺ເວ ສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ວິຠວສມ຺ປນ຺ເນ ເອກສ຺ມິໍ ກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ໂຠຄຍເສຫິ ວຑ຺ຒິໂຕ ກາເມສຸ ອາທີນວໍ ທິສ຺ວາ ຆຣາວາສໍ ປຫາຍ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໖໕. ໂສ ອປຣຠາເຄ ປຸພ຺ເພ ກຕກຸສລໍ ປຸພ຺ເພນິວາສຎາເຓນ ສຣິຕ຺ວາ ໂສມນສ຺ສປ຺ປຕ຺ໂຕ ປຸພ຺ພຈຣິຕາປທານໍ ປກາເສນ຺ໂຕ ນຄເຣ ຘຎ຺ຎວຕິຍາຕິອາທິມາຫ. ຘຎ຺ຎານໍ ປຸຎ຺ຎວນ຺ຕານໍ ຂຕ຺ຕິຍພ຺ຣາຫ຺ມຓຄຫປຕິມຫາສາລານໍ ອເນເກສໍ ກຸລານໍ ອາກຣຕ຺ຕາ ຘຎ຺ຎວຕີ, ອຖ ວາ ມຸຕ຺ຕາມຓິອາທິສຕ຺ຕຣຕນານໍ ສຕ຺ຕວິຘຘຎ຺ຎານໍ ອຸປໂຠຄປຣິໂຠຄານໍ ອາກຣຕ຺ຕາ ຘຎ຺ຎວຕີ, ອຖ ວາ ຘຎ຺ຎານໍ ພຸທ຺ຘປຈ຺ເຈກພຸທ຺ຘຂີຓາສວານໍ ວສນຏ຺ຐານໍ ອາຣາມວິຫາຣາທີນໍ ອາກຣຕ຺ຕາ ຘຎ຺ຎວຕີ, ຕສ຺ສາ ຘຎ຺ຎວຕິຍາ. ນຄຣນ຺ຕິ ປຕ຺ເຖນ຺ຕິ ເອຕ຺ຖ ອຸປໂຠຄປຣິໂຠຄຕ຺ຖິກາ ຊນາຕິ ນຄຣໍ, ນ ຄຈ຺ຉຕີຕິ ວາ ນຄໍ, ຣາຊຍຸວຣາຊມຫາມຕ຺ຕາທີນໍ ວສນຏ຺ຐານໍ. ນຄໍ ຣາຕິ ອາທທາຕິ ຄຓ຺ຫາຕີຕິ ນຄຣໍ, ຣາຊາທີນໍ ວສນຏ຺ຐານສມູຫຠູຕໍ ປາກາຣປຣິຂາທີຫິ ປຣິກ຺ຂິຕ຺ຕໍ ປຣິຈ຺ຉິນ຺ນຏ຺ຐານໍ ນຄຣໍ ນາມາຕິ ອຕ຺ໂຖ. ນຄເຣ ຍທາ ອຫໍ ວິປສ຺ສິສ຺ສ ຠຄວໂຕ ສນ຺ຕິເກ ພ຺ຍາກຣຓໍ ອລຠິໍ, ຕທາ ຕສ຺ມິໍ ຘຎ຺ຎວຕິຍາ ນຄເຣ ພ຺ຣາຫ຺ມໂຓ ອໂຫສິນ຺ຕິ ສມ຺ພນ຺ໂຘ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ກຸສຸມາສນິຍຕ຺ເຖຣອປທານວຓ຺ຓນາ ສມຕ຺ຕາ.

໗. ຜລທາຍກຕ຺ເຖຣອປທານວຓ຺ຓນາ

ອຊ຺ຌາຍໂກ ມນ຺ຕຘໂຣຕິອາທິກໍ ອາຍສ຺ມໂຕ ຜລທາຍກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນເກສຸ ຠເວສຸ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ເວທຕ຺ຕຍາທິສກສິປ຺ເປສຸ ປາຣປ຺ປຕ຺ໂຕ ອເນເກສໍ ພ຺ຣາຫ຺ມຓສຫສ຺ສານິໍ ປາໂມກ຺ໂຂ ອາຈຣິໂຍ ສກສິປ຺ປານໍ ປຣິໂຍສານໍ ອທິສ຺ວາ ຕຕ຺ຖ ຈ ສາຣໍ ອປສ຺ສນ຺ໂຕ ຆຣາວາສໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕສ຺ສ ອວິທູເຣ ອສ຺ສມໍ ກາເຣຕ຺ວາ ສຫ ສິສ຺ເສຫິ ວາສໍ ກປ຺ເປສິ, ຕສ຺ມິໍ ສມເຍ ປທຸມຸຕ຺ຕໂຣ ຠຄວາ ຠິກ຺ຂາຍ ຈຣມາໂນ ຕສ຺ສານຸກມ຺ປາຍ ຕໍ ປເທສໍ ສມ຺ປາປຸຓິ. ຕາປໂສ ຠຄວນ຺ຕໍ ທິສ຺ວາ ປສນ຺ນມານໂສ ອຕ຺ຕໂນ ອຕ຺ຖາຍ ປຸຏເກ ນິກ຺ຂິປິຕ຺ວາ ຣຸກ຺ຂຄ຺ເຄ ລຄ຺ຄິຕານິ ມຘຸຣານິ ປທຸມຜລານິ ມຘຸນາ ສຫ ອທາສິ. ຠຄວາ ຕສ຺ສ ໂສມນສ຺ສຸປ຺ປາທນຕ຺ຖໍ ປສ຺ສນ຺ຕສ຺ເສວ ປຣິຠຸຎ຺ຊິຕ຺ວາ ອາກາເສ ຐິໂຕ ຜລທານານິສໍສໍ ກເຖຕ຺ວາ ປກ຺ກາມິ.

໗໕. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ວິຠວສມ຺ປນ຺ເນ ເອກສ຺ມິໍ ກຸລເຄເຫ ນິພ຺ພຕ຺ໂຕ ສຕ຺ຕວສ຺ສິໂກເຍວ ອຣຫຕ຺ຕໍ ປຕ຺ວາ ປຸພ຺ເພ ກຕກຸສລກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຊ຺ຌາຍໂກ ມນ຺ຕຘໂຣຕິອາທິມາຫ. ຕຕ຺ຖ ອຊ຺ເຌຕິ ຈິນ຺ເຕຕີຕິ ອຊ຺ຌາຍິ, ອຊ຺ຌາຍິເຍວ ອຊ຺ຌາຍໂກ. ເອຕ຺ຖ ຫິ ອກາໂຣ ‘‘ປຏິເສເຘ ວຸທ຺ຘິຕພ຺ຠາເວ…ເປ… ອກາໂຣ ວິຣຫປ຺ປເກ’’ຕິ ເອວໍ ວຸຕ຺ເຕສຸ ທສສຸ ອຕ຺ເຖສຸ ຕພ຺ຠາເວ ວຕ຺ຕຕິ. ສິສ຺ສານໍ ສວນຘາຣຓາທິວເສນ ຫິຕໍ ອຊ຺ເຌຕິ ຈິນ຺ເຕຕິ ສຊ຺ຌາຍໍ ກໂຣຕີຕິ ອຊ຺ຌາຍໂກ, ຈິນ຺ຕໂກຕິ ອຕ຺ໂຖ. ອາຈຣິຍສ຺ສ ສນ຺ຕິເກ ອຸຄ຺ຄຫິຕໍ ສພ຺ພໍ ມນ຺ຕໍ ມເນນ ຘາເຣຕິ ປວຕ຺ເຕຕີຕິ ມນ຺ຕຘໂຣ. ຕິຓ຺ຓໍ ເວທານ ປາຣຄູຕິ ເວທໍ ວຸຈ຺ຈຕິ ຎາຓໍ, ເວເທນ ເວທິຕພ຺ພາ ພຸຊ຺ຌິຕພ຺ພາຕິ ເວທາ, ອິຣຸເວທຍຊຸເວທສາມເວທສງ຺ຂາຕາ ຕໂຍ ຄນ຺ຖາ, ເຕສໍ ເວທານໍ ປາຣໍ ປຣິໂຍສານໍ ໂກຏິໍ ຄໂຕ ປຕ຺ໂຕຕິ ປາຣຄູ. ເສສໍ ປາກຏເມວາຕິ

ຜລທາຍກຕ຺ເຖຣອປທານວຓ຺ຓນາ ສມຕ຺ຕາ.

໘. ຎາຓສຎ຺ຎິກຕ຺ເຖຣອປທານວຓ຺ຓນາ

ປພ຺ພເຕ ຫິມວນ຺ຕມ຺ຫີຕິອາທິກໍ ອາຍສ຺ມໂຕ ຎາຓສຎ຺ຎິກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕສ຺ມິໍ ຕສ຺ມິໍ ອຸປ຺ປນ຺ນຸປ຺ປນ຺ເນ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວຸທ຺ຘິປ຺ປຕ຺ໂຕ ຆຣາວາສໍ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕສ຺ສ ອວິທູເຣ ປພ຺ພຕນ຺ຕເຣ ປຓ຺ຓສາລໍ ກາເຣຕ຺ວາ ປຎ຺ຈາຠິຎ຺ຎາອຏ຺ຐສມາປຕ຺ຕິໂຍ ນິພ຺ພຕ຺ເຕຕ຺ວາ ວສນ຺ໂຕ ເອກທິວສໍ ປຣິສຸທ຺ຘໍ ປຓ຺ຑຣໍ ປຸລິນຕລໍ ທິສ຺ວາ ‘‘ອີທິສາ ປຣິສຸທ຺ຘາ ພຸທ຺ຘາ, ອີທິສໍວ ປຣິສຸທ຺ຘໍ ພຸທ຺ຘຎາຓ’’ນ຺ຕິ ພຸທ຺ຘຎ຺ຈ ຕສ຺ສ ຎາຓຎ຺ຈ ອນຸສ຺ສຣິ ໂຖເມສິ ຈ.

໘໔. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສາສເນ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປຕ຺ໂຕ ປຸພ຺ເພ ກຕປຸຎ຺ຎໍ ອນຸສ຺ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ‘‘ປພ຺ພເຕ ຫິມວນ຺ຕມ຺ຫີ’’ຕິອາທິມາຫ. ປຸລິນໍ ໂສຠນໍ ທິສ຺ວາຕິ ປຣິປຸຓ຺ຓກຕໍ ວິຍ ປຸລາກາເຣນ ປຣິໂສຘິຕາກາເຣນ ປວຕ຺ຕໍ ຐິຕນ຺ຕິ ປຸລິນໍ, ໂສຠນໍ ວາລຸກໍ ທິສ຺ວາ ເສຏ຺ຐໍ ພຸທ຺ຘໍ ອນຸສ຺ສຣິນ຺ຕິ ອຕ຺ໂຖ. ເສສໍ ສຸວິຎ຺ເຎຍ຺ຍເມວາຕິ.

ຎາຓສຎ຺ຎິກຕ຺ເຖຣອປທານວຓ຺ຓນາ ສມຕ຺ຕາ.

໙. ຄຓ຺ຐິປຸປ຺ຜິຍຕ຺ເຖຣອປທານວຓ຺ຓນາ

ສຸວຓ຺ຓວຓ຺ໂຓ ສມ຺ພຸທ຺ໂຘຕິອາທິກໍ ອາຍສ຺ມໂຕ ຄຓ຺ຐິປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອເນກາສຸ ຊາຕີສຸ ກຕປຸຎ຺ຎສຎ຺ຈໂຍ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ກຸລເຄເຫ ນິພ຺ພຕ຺ໂຕ ອຸປໂຠຄປຣິໂຠເຄຫິ ອນູໂນ ເອກທິວສໍ ວິປສ຺ສິໍ ຠຄວນ຺ຕໍ ສຄຓໍ ທິສ຺ວາ ປສນ຺ນມານໂສ ລາຊາປຎ຺ຈເມຫິ ປຸປ຺ເຜຫິ ປູເຊສິ. ໂສ ເຕເນວ ຈິຕ຺ຕປ຺ປສາເທນ ຍາວຕາຍຸກໍ ຐຕ຺ວາ ຕໂຕ ເທວໂລເກ ນິພ຺ພຕ຺ໂຕ ທິພ຺ພສມ຺ປຕ຺ຕິໍ ອນຸຠວິຕ຺ວາ ອປຣຠາເຄ ມນຸສ຺ເສສຸ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ເອກສ຺ມິໍ ກຸລເຄເຫ ນິພ຺ພຕ຺ໂຕ ສທ຺ຘາຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ.

໙໑. ໂສ ເອກທິວສໍ ປຸພ຺ເພ ກຕປຸຎ຺ຎໍ ສຣິຕ຺ວາ ໂສມນສ຺ສຊາໂຕ ‘‘ອິມິນາ ກຸສເລນາຫໍ ນິພ຺ພານໍ ປຕ຺ໂຕ’’ຕິ ປຸພ຺ພຈຣິຕາປທານໍ ປກາເສນ຺ໂຕ ສຸວຓ຺ຓວຓ຺ໂຓ ສມ຺ພຸທ຺ໂຘຕິອາທິມາຫ. ຕໍ ສພ຺ພໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ຄຓ຺ຐິປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໑໐. ປທຸມປູຊກຕ຺ເຖຣອປທານວຓ຺ຓນາ

ຫິມວນ຺ຕສ຺ສາວິທູເຣຕິອາທິກໍ ອາຍສ຺ມໂຕ ປທຸມປູຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສກສິປ຺ເປ ນິປ຺ຜຕ຺ຕິໍ ປຕ຺ວາ ຕຕ຺ຖ ສາຣໍ ອປສ຺ສນ຺ໂຕ ພຸທ຺ຘຸປ຺ປຕ຺ຕິໂຕ ປຸເຣຕຣໍ ອຸປ຺ປນ຺ນຕ຺ຕາ ໂອວາທານຸສາສນໍ ອລຠິຕ຺ວາ ຆຣາວາສໍ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ຫິມວນ຺ຕສ຺ສ ອວິທູເຣ ໂຄຕມກໍ ນາມ ປພ຺ພຕໍ ນິສ຺ສາຍ ອສ຺ສມໍ ກາເຣຕ຺ວາ ປຎ຺ຈາຠິຎ຺ຎາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕຕ຺ວາ ຌານສຸເຂເນວ ວິຫາສິ. ຕທາ ປທຸມຸຕ຺ຕໂຣ ຠຄວາ ພຸທ຺ໂຘ ຫຸຕ຺ວາ ສຕ຺ເຕ ສໍສາຣໂຕ ອຸທ຺ຘຣນ຺ໂຕ ຕສ຺ສານຸກມ຺ປາຍ ຫິມວນ຺ຕໍ ອຄມາສິ. ຕາປໂສ ຠຄວນ຺ຕໍ ທິສ຺ວາ ປສນ຺ນມານໂສ ສກສິສ຺ເສ ສມາເນຕ຺ວາ ເຕຫິ ປທຸມປຸປ຺ຜານິ ອາຫຣາເປຕ຺ວາ ປູເຊສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸລເຄເຫ ນິພ຺ພຕ຺ໂຕ ສທ຺ໂຘ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໙໗. ໂສ ອຕ຺ຕໂນ ປຸຎ຺ຎກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຫິມວນ຺ຕສ຺ສາວິທູເຣຕິອາທິມາຫ. ໂຄຕໂມ ນາມ ປພ຺ພໂຕຕິ ອເນເກສໍ ຍກ຺ຂເທວຕານໍ ອາວາສຠາເວນ ອຘິຏ຺ຐານວເສນ ໂຄຕມສ຺ສ ຠວນຕ຺ຕາ ໂຄຕໂມຕິ ປາກໂຏ ອໂຫສິ. ປວຕ຺ຕຕິ ຕິຏ຺ຐຕີຕິ ປພ຺ພໂຕ. ນາຄຣຸກ຺ເຂຫິ ສຎ຺ຉນ຺ໂນຕິ ຣຸຫຕິ ຕິຏ຺ຐຕີຕິ ຣຸກ຺ໂຂ. ອຖ ວາ ປຖວິໍ ຂນນ຺ໂຕ ອຸທ຺ຘໍ ຣຸຫຕີຕິ ຣຸກ຺ໂຂ, ນານາ ອເນກປ຺ປກາຣາ ຈມ຺ປກກປ຺ປູຣນາຄອຄຣຸຈນ຺ທນາທໂຍ ຣຸກ຺ຂາຕິ ນານາຣຸກ຺ຂາ, ເຕຫິ ນານາຣຸກ຺ເຂຫິ ສຎ຺ຉນ຺ໂນ ປຣິກິຓ຺ໂຓ ໂຄຕໂມ ປພ຺ພໂຕຕິ ສມ຺ພນ຺ໂຘ. ມຫາຠູຕຄຓາລໂຍຕິ ຠວນ຺ຕິ ຊາຍນ຺ຕິ ອຸປ຺ປຊ຺ຊນ຺ຕິ ວຑ຺ຒນ຺ຕິ ຈາຕິ ຠູຕາ, ມຫນ຺ຕາ ຈ ເຕ ຠູຕາ ຈາຕິ ມຫາຠູຕາ, ມຫາຠູຕານໍ ຄໂຓ ສມູໂຫຕິ ມຫາຠູຕຄໂຓ, ມຫາຠູຕຄຓສ຺ສ ອາລໂຍ ປຕິຏ຺ຐາຕິ ມຫາຠູຕຄຓາລໂຍ.

໙໘. ເວມຊ຺ຌມ຺ຫິ ຈ ຕສ຺ສາສີຕິ ຕສ຺ສ ໂຄຕມສ຺ສ ປພ຺ພຕສ຺ສ ເວມຊ຺ເຌ ອພ຺ຠນ຺ຕເຣ ອສ຺ສໂມ ອຠິນິມ຺ມິໂຕ ນິປ຺ຜາທິໂຕ ກໂຕຕິ ອຕ຺ໂຖ. ເສສໍ ອຸຕ຺ຕານເມວາຕິ.

ປທຸມປູຊກຕ຺ເຖຣອປທານວຓ຺ຓນາ ສມຕ຺ຕາ.

ເຕຣສມວຄ຺ຄວຓ຺ຓນາ ສມຕ຺ຕາ.