໑໒. ມຫາປຣິວາຣວຄ຺ໂຄ

໑. ມຫາປຣິວາຣກຕ຺ເຖຣອປທານວຓ຺ຓນາ

ວິປສ຺ສີ ນາມ ຠຄວາຕິອາທິກໍ ອາຍສ຺ມໂຕ ມຫາປຣິວາຣກຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ອຸປ຺ປນ຺ນສມເຍ ຍກ຺ຂໂຍນິຍໍ ນິພ຺ພຕ຺ໂຕ ອເນກຍກ຺ຂສຕສຫສ຺ສປຣິວາໂຣ ເອກສ຺ມິໍ ຂຸທ຺ທກທີເປ ທິພ຺ພສຸຂມນຸຠວນ຺ໂຕ ວິຫຣຕິ. ຕສ຺ມິຎ຺ຈ ທີເປ ເຈຕິຍາຠິໂສຠິໂຕ ວິຫາໂຣ ອຕ຺ຖິ, ຕຕ຺ຖ ຠຄວາ ອຄມາສິ. ອຖ ໂສ ຍກ຺ຂເສນາຘິປຕິ ຕໍ ຠຄວນ຺ຕໍ ຕຕ຺ຖ ຄຕຠາວໍ ທິສ຺ວາ ທິພ຺ພວຕ຺ຖານິ ຄເຫຕ຺ວາ ຄນ຺ຕ຺ວາ ຠຄວນ຺ຕໍ ວນ຺ທິຕ຺ວາ ທິພ຺ພວຕ຺ເຖຫິ ປູເຊສິ, ສປຣິວາໂຣ ສຣຓມຄມາສິ. ໂສ ເຕນ ປຸຎ຺ຎກມ຺ເມນ ຕໂຕ ຈຸໂຕ ເທວໂລເກ ນິພ຺ພຕ຺ຕິຕ຺ວາ ຕຕ຺ຖ ຉ ກາມາວຈຣສຸຂມນຸຠວິຕ຺ວາ ຕໂຕ ຈຸໂຕ ມນຸສ຺ເສສຸ ອຄ຺ຄຈກ຺ກວຕ຺ຕິອາທິສຸຂມນຸຠວິຕ຺ວາ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໑-໒. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວິປສ຺ສີ ນາມ ຠຄວາຕິອາທິມາຫ. ຕຕ຺ຖ ວິເສສໍ ປຣມຕ຺ຖໍ ນິພ຺ພານໍ ປສ຺ສຕີຕິ ວິປສ຺ສີ, ວິວິເຘ ສຕິປຏ຺ຐານາທໂຍ ສຕ຺ຕຕິໍສໂພຘິປກ຺ຂິຍຘມ຺ເມ ປສ຺ສຕີຕິ ວາ ວິປສ຺ສີ, ວິວິເຘ ອເນກປ຺ປກາເຣ ໂພຘເນຍ຺ຍສຕ຺ເຕ ວິສຸໍ ວິສຸໍ ປສ຺ສຕີຕິ ວາ ວິປສ຺ສີ, ໂສ ວິປສ຺ສີ ຠຄວາ ທີປເຈຕິຍໍ ທີເປ ປູຊນີຍຏ຺ຐານໍ ວິຫາຣມຄມາສີຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ມຫາປຣິວາຣກຕ຺ເຖຣອປທານວຓ຺ຓນາ ສມຕ຺ຕາ.

໒. ສຸມງ຺ຄລຕ຺ເຖຣອປທານວຓ຺ຓນາ

ອຕ຺ຖທສ຺ສີ ຊິນວໂຣຕິອາທິກໍ ອາຍສ຺ມໂຕ ສຸມງ຺ຄລຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ເອກສ຺ມິໍ ຕຬາກສມີເປ ຣຸກ຺ຂເທວຕາ ຫຸຕ຺ວາ ນິພ຺ພຕ຺ຕິ. ຕສ຺ມິໍ ສມເຍ ຠຄວາ ວິຫາຣໂຕ ນິກ຺ຂມິຕ຺ວາ ນຫາຍິຕຸກາໂມ ຕສ຺ສ ຕຬາກສ຺ສ ຕີຣໍ ຄນ຺ຕ຺ວາ ຕຕ຺ຖ ນ຺ຫຕ຺ວາ ເອກຈີວໂຣ ຊລມາໂນ ພ຺ຣຫ຺ມາ ວິຍ ສູຣິໂຍ ວິຍ ສຸວຓ຺ຓພິມ຺ພໍ ວິຍ ອຏ຺ຐາສິ. ອຖ ໂສ ເທວປຸຕ຺ໂຕ ໂສມນສ຺ສຊາໂຕ ປຎ຺ຊລິໂກ ໂຖມນມກາສິ, ອຕ຺ຕໂນ ທິພ຺ພຄີຕຕູຣິເຍຫິ ອຸປຫາຣຎ຺ຈ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສມ຺ປຕ຺ຕິໂຍ ອນຸຠວິຕ຺ວາ ອປຣຠາເຄ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໑໑. ໂສ ປຈ຺ຉາ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຕ຺ຖທສ຺ສີ ຊິນວໂຣຕິອາທິມາຫ. ຕຕ຺ຖ ປຣມຕ຺ຖໍ ນິພ຺ພານໍ ທກ຺ຂຕິ ປສ຺ສຕີຕິ ອຕ຺ຖທສ຺ສີ, ອຖ ວາ ສພ຺ພສຕ຺ຕານໍ ຈຕຸຣາຣິຍສຈ຺ຈສງ຺ຂາຕໍ ອຕ຺ຖປໂຍຊນໍ ທສ຺ສນສີໂລຕິ ອຕ຺ຖທສ຺ສີ, ກິເລເສ ອຊິນິ ຊິນາຕິ ຊິນິສ຺ສຕີຕິ ຊິໂນ. ວຣິຕພ຺ໂພ ປຕ຺ເຖຕພ຺ໂພ ສພ຺ພສຕ຺ເຕຫີຕິ ວໂຣ, ອຕ຺ຖທສ຺ສີ ຊິໂນ ຈ ໂສ ວໂຣ ຈາຕິ ອຕ຺ຖທສ຺ສີ ຊິນວໂຣ. ໂລກເຊຏ຺ໂຐຕິ ລຸຊ຺ຊຕິ ປລຸຊ຺ຊຕີຕິ ໂລໂກ, ໂລກີຍຕິ ປສ຺ສີຍຕິ ພຸທ຺ຘາທີຫິ ປາຣປ຺ປຕ຺ໂຕຕິ ວາ ໂລໂກ, ໂລໂກ ຈ ໂລໂກ ຈ ໂລໂກ ຈາຕິ ໂລໂກ. ເອກເສສສມາສວເສນ ‘‘ໂລກາ’’ຕິ ວຕ຺ຕພ຺ເພ ‘‘ໂລໂກ’’ຕິ ວຸຕ຺ໂຕ. ໂລກສ຺ສ ເຊຏ຺ໂຐ ໂລກເຊຏ຺ໂຐ, ໂສ ໂລກເຊຏ຺ໂຐ ນຣາສໂຠຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ສຸມງ຺ຄລຕ຺ເຖຣອປທານວຓ຺ຓນາ ສມຕ຺ຕາ.

໓. ສຣຓຄມນິຍຕ຺ເຖຣອປທານວຓ຺ຓນາ

ອຸຠິນ຺ນໍ ເທວຣາຊູນນ຺ຕ຺ຍາທິກໍ ອາຍສ຺ມໂຕ ສຣຓຄມນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ອຸປ຺ປນ຺ນຸປ຺ປນ຺ນຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕເຣ ຠຄວຕິ ອຸປ຺ປນ຺ເນ ອຍໍ ຫິມວນ຺ເຕ ເທວຣາຊາ ຫຸຕ຺ວາ ນິພ຺ພຕ຺ຕິ, ຕສ຺ມິໍ ອປເຣນ ຍກ຺ຂເທວຣຎ຺ຎາ ສທ຺ຘິໍ ສງ຺ຄາມຕ຺ຖາຍ ອຸປຏ຺ຐິເຕ ທ຺ເວ ອເນກຍກ຺ຂສຫສ຺ສປຣິວາຣາ ຜລກາວຸຘາທິຫຕ຺ຖາ ສງ຺ຄາມຕ຺ຖາຍ ສມຸປພ຺ຍູຬ຺ຫາ ອເຫສຸໍ. ຕທາ ປທຸມຸຕ຺ຕໂຣ ຠຄວາ ເຕສຸ ສຕ຺ເຕສຸ ກາຣຸຎ຺ຎໍ ອຸປ຺ປາເທຕ຺ວາ ອາກາເສນ ຕຕ຺ຖ ຄນ຺ຕ຺ວາ ສປຣິວາຣານໍ ທ຺ວິນ຺ນໍ ເທວຣາຊູນໍ ຘມ຺ມໍ ເທເສສິ. ຕທາ ເຕ ສພ຺ເພ ຜລກາວຸຘານິ ຉຑ຺ເຑຕ຺ວາ ຠຄວນ຺ຕໍ ຄາຣວພຫຸມາເນນ ວນ຺ທິຕ຺ວາ ສຣຓມຄມໍສຸ. ເຕສໍ ອຍໍ ປຐມໍ ສຣຓມຄມາສິ. ໂສ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວຸທ຺ຘິມນ຺ວາຍ ສຕ຺ຖຣິ ປສນ຺ໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໒໐. ໂສ ອປຣຠາເຄ ປຸພ຺ພກຸສລໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຸຠິນ຺ນໍ ເທວຣາຊູນນ຺ຕິອາທິມາຫ. ຕຕ຺ຖ ສຸຈິໂລມຂຣໂລມອາຬວກກຸມ຺ຠີຣກຸເວຣາທໂຍ ວິຍ ນາມໂຄຕ຺ເຕນ ອປາກຏາ ທ຺ເວ ຍກ຺ຂຣາຊາໂນ ອຎ຺ຎາປເທເສນ ທສ຺ເສນ຺ໂຕ ‘‘ອຸຠິນ຺ນໍ ເທວຣາຊູນ’’ນ຺ຕິອາທິມາຫ. ສງ຺ຄາໂມ ສມຸປຏ຺ຐິໂຕຕິ ສໍ ສຸຏ຺ຐຸ ຄາໂມ ກລຫຕ຺ຖາຍ ອຸປຄມນນ຺ຕິ ສງ຺ຄາໂມ, ໂສ ສງ຺ຄາໂມ ສໍ ສຸຏ຺ຐຸ ອຸປຏ຺ຐິໂຕ, ເອກຏ຺ຐາເນ ອຸປຄນ຺ຕ຺ວາ ຐິໂຕຕິ ອຕ຺ໂຖ. ອໂຫສິ ສມຸປພ຺ຍູຬ຺ໂຫຕິ ສໍ ສຸຏ຺ຐຸ ອຸປສມີເປ ຣາສິຠູໂຕຕິ ອຕ຺ໂຖ.

໒໑. ສໍເວເຊສິ ມຫາຊນນ຺ຕິ ເຕສໍ ຣາສິຠູຕານໍ ຍກ຺ຂານໍ ອາກາເສ ນິສິນ຺ໂນ ຠຄວາ ຈຕຸສຈ຺ຈຘມ຺ມເທສນາຍ ສໍ ສຸຏ຺ຐຸ ເວເຊສິ, ອາທີນວທສ຺ສເນນ ຄຓ຺ຫາເປສິ ວິຎ຺ຎາເປສິ ໂພເຘສີຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ສຣຓຄມນິຍຕ຺ເຖຣອປທານວຓ຺ຓນາ ສມຕ຺ຕາ.

໔. ເອກາສນິຍຕ຺ເຖຣອປທານວຓ຺ຓນາ

ວຣຸໂຓ ນາມ ນາເມນາຕິອາທິກໍ ອາຍສ຺ມໂຕ ເອກາສນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ວຣຸໂຓ ນາມ ເທວຣາຊາ ຫຸຕ຺ວາ ນິພ຺ພຕ຺ຕິ. ໂສ ຠຄວນ຺ຕໍ ທິສ຺ວາ ປສນ຺ນມານໂສ ຄນ຺ຘມາລາທີຫິ ຄີຕວາທິເຕຫິ ຈ ອຸປຏ຺ຐຍມາໂນ ສປຣິວາໂຣ ປູເຊສິ. ຕໂຕ ອປຣຠາເຄ ຠຄວຕິ ປຣິນິພ຺ພຸເຕ ຕສ຺ສ ມຫາໂພຘິຣຸກ຺ຂໍ ພຸທ຺ຘທສ຺ສນໍ ວິຍ ສພ຺ພຕູຣິຍຕາຬາວຈເຣຫິ ສປຣິວາໂຣ ອຸປຫາຣມກາສິ. ໂສ ເຕນ ປຸຎ຺ເຎນ ຕໂຕ ກາລງ຺ກຕ຺ວາ ນິມ຺ມານຣຕິເທວໂລເກ ອຸປ຺ປຊ຺ຊິ. ເອວໍ ເທວສມ຺ປຕ຺ຕິມນຸຠວິຕ຺ວາ ມນຸສ຺ເສສຸ ຈ ມນຸສ຺ສຠູໂຕ ຈກ຺ກວຕ຺ຕິສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ວາ ສຕ຺ຖຸ ສາສເນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໓໑. ໂສ ປຈ຺ຉາ ສກກມ຺ມໍ ສຣິຕ຺ວາ ຕໍ ຕຖໂຕ ຎຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວຣຸໂຓ ນາມ ນາເມນາຕິອາທິມາຫ. ຕຕ຺ຖ ຍທາ ອຫໍ ສມ຺ໂພຘນຕ຺ຖາຍ ພຸທ຺ຘໍ ໂພຘິຎ຺ຈ ປູເຊສິໍ, ຕທາ ວຣຸໂຓ ນາມ ເທວຣາຊາ ອໂຫສິນ຺ຕິ ສມ຺ພນ຺ໂຘ.

໓໔. ຘຣຓີຣຸຫປາທປນ຺ຕິ ເອຕ຺ຖ ຣຸກ຺ຂລຕາປພ຺ພຕສຕ຺ຖຣຕນາທໂຍ ຘາເຣຕີຕິ ຘຣຓີ, ຕສ຺ມິໍ ຣຸຫຕິ ປຕິຏ຺ຐຫຕີຕິ ຘຣຓີຣຸໂຫ. ປາເທນ ປິວຕີຕິ ປາທໂປ, ສິຎ຺ຈິຕສິຎ຺ຈິໂຕທກໍ ປາເທນ ມູເລນ ປິວຕິ ຣຸກ຺ຂກ຺ຂນ຺ຘສາຂາວິຏເປຫິ ອາໂປຣສໍ ປຕ຺ຖຣິຍຕີຕິ ອຕ຺ໂຖ, ຕໍ ຘຣຓີຣຸຫປາທປໍ ໂພຘິຣຸກ຺ຂນ຺ຕິ ສມ຺ພນ຺ໂຘ.

໓໕. ສກກມ຺ມາຠິຣທ຺ໂຘຕິ ອຕ຺ຕໂນ ກຸສລກມ຺ເມນ ອຠິຣທ຺ໂຘ ປສນ຺ໂນ ອຸຕ຺ຕເມ ໂພຘິມ຺ຫິ ປສນ຺ໂນຕິ ສມ຺ພນ຺ໂຘ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ເອກາສນິຍຕ຺ເຖຣອປທານວຓ຺ຓນາ ສມຕ຺ຕາ.

໕. ສຸວຓ຺ຓປຸປ຺ຜິຍຕ຺ເຖຣອປທານວຓ຺ຓນາ

ວິປສ຺ສີ ນາມ ຠຄວາຕິອາທິກໍ ອາຍສ຺ມໂຕ ສຸວຓ຺ຓປຸປ຺ຜິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມຊິນວເຣສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ຐາເນ ຠູມຏ຺ຐກເທວປຸຕ຺ໂຕ ຫຸຕ຺ວາ ນິພ຺ພຕ຺ໂຕ ຕສ຺ສ ຠຄວໂຕ ຘມ຺ມໍ ສຸຕ຺ວາ ປສນ຺ນມານໂສ ຈຕູຫິ ສຸວຓ຺ຓປຸປ຺ເຜຫິ ປູເຊສິ. ຕານິ ປຸປ຺ຜານິ ອາກາເສ ສຸວຓ຺ຓວິຕານໍ ຫຸຕ຺ວາ ຉາເທສຸໍ, ສຸວຓ຺ຓປຠາ ຈ ພຸທ຺ຘສ຺ສ ສຣີຣປຠາ ຈ ເອກໂຕ ຫຸຕ຺ວາ ມຫາໂອຠາໂສ ອໂຫສິ. ໂສ ອຕິເຣກຕຣໍ ປສນ຺ໂນ ສກຠວນໍ ຄໂຕປິ ສຣຕິເຍວ. ໂສ ເຕນ ປຸຎ຺ຎກມ຺ເມນ ຕຸສິຕຠວນາທິສຸຄຕີສຸເຍວ ສໍສຣນ຺ໂຕ ທິພ຺ພສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຸ ຘມ຺ມເທສນໍ ສຸຕ຺ວາ ສາສເນ ອຸຣໍ ທຕ຺ວາ ປພ຺ພຊິໂຕ ນຈິຣສ຺ເສວ ອຣຫາ ອໂຫສິ.

໔໐. ໂສ ອປຣຠາເຄ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ອຕ຺ຕໂນ ປຸພ຺ພຈຣິຕາປທານໍ ປກາເສນ຺ໂຕ ວິປສ຺ສີ ນາມ ຠຄວາຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ.

໔໔. ປາໂມຊ຺ຊໍ ຊນຍິຕ຺ວານາຕິ ພລວປີຕິໍ ອຸປ຺ປາເທຕ຺ວາ ‘‘ປາໂມຊ຺ຊໍ ອາໂມທນາ ປໂມທນາ ຫາໂສ ປຫາໂສ ວິຕ຺ຕິ ໂອທຄ຺ຍໍ ອຕ຺ຕມນຕາ ຈິຕ຺ຕສ຺ສາ’’ຕິອາທີສຸ (ຘ. ສ. ໙, ໘໖; ມຫານິ. ໑) ວິຍ ອຕ຺ຕມນຕາ ສກຠາວໍ ອຸປ຺ປາເທຕ຺ວາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ສຸວຓ຺ຓປຸປ຺ຜິຍຕ຺ເຖຣອປທານວຓ຺ຓນາ ສມຕ຺ຕາ.

໖. ຈິຕກປູຊກຕ຺ເຖຣອປທານວຓ຺ຓນາ

ວສາມິ ຣາຊາຍຕເນຕິອາທິກໍ ອາຍສ຺ມໂຕ ຈິຕກປູຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕໂຕ ປຣໍ ອຸປ຺ປນ຺ນຸປ຺ປນ຺ນຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ສິຂິສ຺ສ ຠຄວໂຕ ກາເລ ຣາຊາຍຕນຣຸກ຺ຂເທວຕາ ຫຸຕ຺ວາ ນິພ຺ພຕ຺ໂຕ ອນ຺ຕຣນ຺ຕຣາ ເທວຕາຫິ ສທ຺ຘິໍ ຘມ຺ມໍ ສຸຕ຺ວາ ປສນ຺ໂນ ຠຄວຕິ ປຣິນິພ຺ພຸເຕ ສປຣິວາໂຣ ຄນ຺ຘທີປຘູປປຸປ຺ຜເຠຣິອາທີນິ ຄາຫາເປຕ຺ວາ ຠຄວໂຕ ອາຬຫນຏ຺ຐານໍ ຄນ຺ຕ຺ວາ ທີປາທີນິ ປູເຊຕ຺ວາ ອເນເກຫິ ຕູຣິເຍຫິ ອເນເກຫິ ວາທິເຕຫິ ຕໍ ປູເຊສິ. ຕໂຕ ປຏ຺ຐາຍ ສກຠວນໍ ອຸປວິຏ຺ໂຐປິ ຠຄວນ຺ຕເມວ ສຣິຕ຺ວາ ສມ຺ມຸຂາ ວິຍ ວນ຺ທຕິ. ໂສ ເຕເນວ ປຸຎ຺ເຎນ ເຕນ ຈິຕ຺ຕປ຺ປສາເທນ ຣາຊາຍຕນໂຕ ກາລໍ ກໂຕ ຕຸສິຕາທີສຸ ນິພ຺ພຕ຺ໂຕ ທິພ຺ພສມ຺ປຕ຺ຕິໍ ອນຸຠວິຕ຺ວາ ຕໂຕ ມນຸສ຺ເສສຸ ມນຸສ຺ສສມ຺ປຕ຺ຕິໍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຠຄວຕິ ອຸປ຺ປນ຺ນຈິຕ຺ຕປ຺ປສາໂທ ຠຄວໂຕ ສາສເນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໔໙. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ວສາມິ ຣາຊາຍຕເນຕິອາທິມາຫ. ຣາຊາຍຕເນຕິ ເທວຣາຊູນໍ ອາຍຕນໍ ຣາຊາຍຕນໍ, ຕສ຺ສ ຣຸກ຺ຂສ຺ສ ນາມເຘຍ຺ໂຍ ວາ. ປຣິນິພ຺ພຸເຕ ຠຄວຕີຕິ ປຣິສມນ຺ຕໂຕ ກິຎ຺ຈິ ອນວເສເສຕ຺ວາ ຂນ຺ຘປຣິນິພ຺ພານກາເລ ປຣິນິພ຺ພານສມເຍ ປຣິນິພ຺ພານປ຺ປຕ຺ຕສ຺ສ ສິຂິໂນ ໂລກພນ຺ຘຸໂນຕິ ສມ຺ພນ຺ໂຘ.

໕໐. ຈິຕກໍ ອຄມາສຫນ຺ຕິ ຈນ຺ທນາຄຣຸເທວທາຣຸກປ຺ປູຣຕກ຺ໂກລາທິສຸຄນ຺ຘທາຣູຫິ ຈິຕໍ ຣາສິຄຕນ຺ຕິ ຈິຕໍ, ຈິຕເມວ ຈິຕກໍ, ພຸທ຺ຘຄາຣເວນ ຈິຕກໍ ປູຊນຕ຺ຖາຍ ຈິຕກສ຺ສ ສມີປໍ ອຫໍ ອຄມາສິນ຺ຕິ ອຕ຺ໂຖ. ຕຕ຺ຖ ຄນ຺ຕ຺ວາ ກຕກິຈ຺ຈໍ ທສ຺ເສນ຺ໂຕ ຕູຣິຍໍ ຕຕ຺ຖ ວາເທຕ຺ວາຕິອາທິມາຫ. ຕໍ ສພ຺ພໍ ສຸວິຎ຺ເຎຍ຺ຍເມວາຕິ.

ຈິຕກປູຊກຕ຺ເຖຣອປທານວຓ຺ຓນາ ສມຕ຺ຕາ.

໗. ພຸທ຺ຘສຎ຺ຎກຕ຺ເຖຣອປທານວຓ຺ຓນາ

ຍທາ ວິປສ຺ສີ ໂລກຄ຺ໂຄຕິອາທິກໍ ອາຍສ຺ມໂຕ ພຸທ຺ຘສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ເອກສ຺ມິໍ ຠູມຏ຺ຐກວິມາເນ ເທວປຸຕ຺ໂຕ ຫຸຕ຺ວາ ນິພ຺ພຕ຺ຕິ. ຕທາ ວິປສ຺ສີ ຠຄວາ ອາຍຸສງ຺ຂາຣໍ ໂວສ຺ສຊ຺ຊິ. ອຖ ສກລທສສຫສ຺ສິໂລກຘາຕຸ ສສາຄຣປພ຺ພຕາ ປກມ຺ປິຕ຺ຖ. ຕທາ ຕສ຺ສ ເທວປຸຕ຺ຕສ຺ສ ຠວນມ຺ປິ ກມ຺ປິຕ຺ຖ. ຕສ຺ມິໍ ຂເຓ ໂສ ເທວປຸຕ຺ໂຕ ສໍສຍຊາໂຕ – ‘‘ກິໍ ນຸ ໂຂ ປຖວີກມ຺ປາຍ ນິພ຺ພຕ຺ຕີ’’ຕິ ຈິນ຺ເຕຕ຺ວາ ພຸທ຺ຘສ຺ສ ອາຍຸສງ຺ຂາຣໂວສ຺ສຊ຺ຊຠາວໍ ຎຕ຺ວາ ມຫາໂສກໍ ໂທມນສ຺ສໍ ອຸປ຺ປາເທສິ. ຕທາ ເວສ຺ສວໂຓ ມຫາຣາຊາ ອາຄນ຺ຕ຺ວາ ‘‘ມາ ຈິນ຺ຕຍິຕ຺ຖາ’’ຕິ ອສ຺ສາເສສິ. ໂສ ເທວປຸຕ຺ໂຕ ຕໂຕ ຈຸໂຕ ເຕນ ປຸຎ຺ເຎນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາສໍ ປຫາຍ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໕໗. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຍທາ ວິປສ຺ສີ ໂລກຄ຺ໂຄຕິອາທິມາຫ. ອາຍຸສງ຺ຂາຣໂມສ຺ສຊ຺ຊີຕິ ອາ ສມນ຺ຕໂຕ ຍຸໂນຕິ ປາເລຕິ ສຕ຺ເຕຕິ ອາຍຸ, ອາຍຸສ຺ສ ສງ຺ຂາໂຣ ຣາສິຠາໂວ ອາຍຸສງ຺ຂາໂຣ, ຕໍ ອາຍຸສງ຺ຂາຣໍ ໂອສ຺ສຊ຺ຊິ ປຣິຈ຺ຈຊິ ຊຫາສີຕິ ອຕ຺ໂຖ. ຕສ຺ມິໍ ອາຍຸສງ຺ຂາຣໂວສ຺ສຊ຺ຊເນ. ຊລເມຂລາສາຄໂຣທກເມຂລາສຫິຕາ ສກລທສສຫສ຺ສຈກ຺ກວາຬປຖວີ ກມ຺ປິຕ຺ຖາຕິ ສມ຺ພນ຺ໂຘ.

໕໘. ໂອຕຕໍ ວິຕ຺ຖຕໍ ມຍ຺ຫນ຺ຕິ ມຍ຺ຫໍ ຠວນໍ ໂອຕຕໍ ວິຕ຺ຖຕໍ ຈິຕ຺ຕໍ ວິຈິຕ຺ຕໍ ສຸຈິ ສຸປຣິສຸທ຺ຘໍ ຈິຕ຺ຕໍ ອເນເກຫິ ສຕ຺ຕຫິ ຣຕເນຫິ ວິຈິຕ຺ຕໍ ໂສຠມານໍ ປກມ຺ປິຕ຺ຖ ປກາເຣນ ກມ຺ປິຕ຺ຖາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ພຸທ຺ຘສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໘. ມຄ຺ຄສຎ຺ຎກຕ຺ເຖຣອປທານວຓ຺ຓນາ

ປທຸມຸຕ຺ຕຣພຸທ຺ຘສ຺ສາຕິອາທິກໍ ອາຍສ຺ມໂຕ ມຄ຺ຄສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕໂຕ ໂອຣໍ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຫິມວນ຺ເຕ ເທວປຸຕ຺ໂຕ ຫຸຕ຺ວາ ນິພ຺ພຕ຺ໂຕ ອຣຎ຺ຎໍ ຄນ຺ຕ຺ວາ ມຄ຺ຄມູຬ຺ຫານໍ ມຄ຺ຄໍ ຄເວສນ຺ຕານໍ ຕສ຺ສ ສາວການໍ ໂຠເຊຕ຺ວາ ມຄ຺ຄໍ ອາຈິກ຺ຂິ. ໂສ ເຕນ ປຸຎ຺ເຎນ ເທວມນຸສ຺ສສມ຺ປຕ຺ຕິມນຸຠວິຕ຺ວາ ອຸປ຺ປນ຺ນຸປ຺ປນ຺ນຠເວ ສພ຺ພຕ຺ຖ ອມູຬ຺ໂຫ ສຎ຺ຎວາ ອໂຫສິ. ອຖ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ຆຣາວາເສ ອນລ຺ລີໂນ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໖໖. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ປທຸມຸຕ຺ຕຣພຸທ຺ຘສ຺ສາຕິອາທິມາຫ. ສາວກາ ວນຈາຣິໂນຕິ ຠຄວໂຕ ວຸຕ຺ຕວຈນໍ ສມ຺ມາ ອາທເຣນ ສຸຓນ຺ຕີຕິ ສາວກາ, ອຖ ວາ ຠຄວໂຕ ເທສນານຸສາເຣນ ຎາຓໍ ເປເສຕ຺ວາ ສທ຺ຘມ຺ມໍ ສຸຓນ຺ຕີຕິ ສາວກາ. ວນຈາຣິໂນ ວເນ ວິຈຣຓກາ ສາວກາ ວິປ຺ປນຏ຺ຐາ ມຄ຺ຄມູຬ຺ຫາ ມຫາອຣຎ຺ເຎ ອນ຺ຘາວ ຈກ຺ຂຸວິຣຫິຕາວ ອນຸສຸຍ຺ຍເຣ ວິຈຣນ຺ຕີຕິ ສມ຺ພນ຺ໂຘ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ມຄ຺ຄສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໙. ປຈ຺ຈຸປຏ຺ຐານສຎ຺ຎກຕ຺ເຖຣອປທານວຓ຺ຓນາ

ອຕ຺ຖທສ຺ສິມ຺ຫິ ສຸຄເຕຕິອາທິກໍ ອາຍສ຺ມໂຕ ປຈ຺ຈຸປຏ຺ຐານສຎ຺ຎກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ຍກ຺ຂໂຍນິຍໍ ນິພ຺ພຕ຺ໂຕ ຠຄວຕິ ຘຣມາເນ ທສ຺ສນສ຺ສ ອລທ຺ຘຕ຺ຕາ ປຈ຺ຉາ ປຣິນິພ຺ພຸເຕ ມຫາໂສກປ຺ປຕ຺ໂຕ ວິຫາສິ. ຕທາ ຫິສ຺ສ ຠຄວໂຕ ສາຄໂຕ ນາມ ອຄ຺ຄສາວໂກ ອນຸສາສນ຺ໂຕ ຠຄວໂຕ ສາຣີຣິກຘາຕຸປູຊາ ຠຄວຕິ ຘຣມາເນ ກຕປູຊາ ວິຍ ຈິຕ຺ຕປ຺ປສາທວສາ ມຫປ຺ຜລໍ ຠວຕີ’’ຕິ ວຕ຺ວາ ‘‘ຖູປໍ ກໂຣຫີ’’ຕິ ນິໂຍຊິໂຕ ຖູປໍ ກາເຣສິ, ຕໍ ປູເຊຕ຺ວາ ຕໂຕ ຈຸໂຕ ເທວມນຸສ຺ເສສຸ ສກ຺ກຈກ຺ກວຕ຺ຕິສມ຺ປຕ຺ຕິມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ເອກສ຺ມິໍ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ສຕ຺ຖຣິ ປສີທິຕ຺ວາ ປພ຺ພຊິຕ຺ວາ ນຈິຣສ຺ເສວ ອຣຫາ ອໂຫສິ.

໗໒. ໂສ ອປຣຠາເຄ ອຕ຺ຕໂນ ປຸຎ຺ຎກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ອຕ຺ຖທສ຺ສິມ຺ຫິ ສຸຄເຕຕິອາທິມາຫ. ຕໍ ເຫຏ຺ຐາ ວຸຕ຺ຕເມວ. ຍກ຺ຂໂຍນິໍ ອຸປປຊ຺ຊິນ຺ຕິ ເອຕ຺ຖ ປນ ອຕ຺ຕໂນ ສກາສໍ ສມ຺ປຕ຺ຕສມ຺ປຕ຺ເຕ ຂາທນ຺ຕາ ຍນ຺ຕິ ຄຈ຺ຉນ຺ຕີຕິ ຍກ຺ຂາ, ຍກ຺ຂານໍ ໂຍນິ ຊາຕີຕິ ຍກ຺ຂໂຍນິ, ຍກ຺ຂໂຍນິຍໍ ນິພ຺ພຕ຺ໂຕຕິ ອຕ຺ໂຖ.

໗໓. ທຸລ຺ລທ຺ຘໍ ວຕ ເມ ອາສີຕິ ເມ ມຍາ ລທ຺ຘຍສໍ ທຸລ຺ລທ຺ຘໍ, ພຸທ຺ຘຠູຕສ຺ສ ສຕ຺ຖຸໂນ ສກ຺ກາຣໍ ອກຕຕ຺ຕາ ວິຣາເຘຕ຺ວາ ລທ຺ຘນ຺ຕິ ອຕ຺ໂຖ. ທຸປ຺ປຠາຕນ຺ຕິ ທຸຏ຺ຐຸ ປຠາຕໍ ຣຕ຺ຕິຍາ ປຠາຕກຣຓໍ, ມຍ຺ຫໍ ນ ສຸຏ຺ຐຸໍ ປຠາຕນ຺ຕິ ອຕ຺ໂຖ. ທຸຣຸຏ຺ຐິຕນ຺ຕິ ທຸອຸຏ຺ຐິຕໍ, ສູຣິຍສ຺ສ ອຸຄ຺ຄມນໍ ມຍ຺ຫໍ ທຸອຸຄ຺ຄມນນ຺ຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປຈ຺ຈຸປຏ຺ຐານສຎ຺ຎກຕ຺ເຖຣອປທານວຓ຺ຓນາ ສມຕ຺ຕາ.

໑໐. ຊາຕິປູຊກຕ຺ເຖຣອປທານວຓ຺ຓນາ

ຊາຍໍ ຕສ຺ສ ວິປສ຺ສິສ຺ສາຕິອາທິກໍ ອາຍສ຺ມໂຕ ຊາຕິປູຊກຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ໂຕ ວິຎ຺ຎຸຕໍ ປຕ຺ໂຕ ນກ຺ຂຕ຺ຕປາຐເກຫິ ວິປສ຺ສິໂພຘິສຕ຺ຕສ຺ສ ວຸຕ຺ຕລກ຺ຂຓນິມິຕ຺ຕໍ ສຸຕ຺ວາ ‘‘ອຍໍ ກິຣ ກຸມາໂຣ ພຸທ຺ໂຘ ຫຸຕ຺ວາ ສກລໂລກສ຺ສ ອຄ຺ໂຄ ເສຏ຺ໂຐ ສຸຕ຺ວາ ສພ຺ພສຕ຺ເຕ ສໍສາຣໂຕ ອຸທ຺ຘຣິສ຺ສຕີ’’ຕິ ສຸຕ຺ວາ ຕໍ ຠຄວນ຺ຕໍ ກຸມາຣກາເລເຍວ ພຸທ຺ຘສ຺ສ ວິຍ ມຫາປູຊມກາສິ. ປຈ຺ຉາ ກເມນ ກຸມາຣກາລໍ ຣາຊກຸມາຣກາລໍ ຣຊ຺ຊກາລນ຺ຕິ ກາລຕ຺ຕຍມຕິກ຺ກມ຺ມ ພຸທ຺ເຘ ຊາເຕປິ ມຫາປູຊໍ ກຕ຺ວາ ຕໂຕ ຈຸໂຕ ຕຸສິຕາທີສຸ ນິພ຺ພຕ຺ໂຕ ທິພ຺ພສຸຂມນຸຠວິຕ຺ວາ ປຈ຺ຉາ ມນຸສ຺ເສສຸ ຈກ຺ກວຕ຺ຕາທິມນຸສ຺ສສຸຂມນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸລເຄເຫ ນິພ຺ພຕ຺ໂຕ ສຕ຺ຕຏ຺ຐວສ຺ສກາເລເຍວ ຠຄວຕິ ປສນ຺ໂນ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ນຈິຣສ຺ເສວ ອຣຫາ ອໂຫສິ.

໘໒. ໂສ ອປຣຠາເຄ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ໂສມນສ຺ສຊາໂຕ ປຸພ຺ພຈຣິຕາປທານໍ ປກາເສນ຺ໂຕ ຊາຍໍ ຕສ຺ສ ວິປສ຺ສິສ຺ສາຕິອາທິມາຫ. ຕໍ ເຫຏ຺ຐາ ວຸຕ຺ຕຕ຺ຖເມວ.

໘໔. ເນມິຕ຺ຕານໍ ສຸຓິຕ຺ວານາຕິ ເອຕ຺ຖ ນິມິຕ຺ຕໍ ກາຣຓໍ ສຸຂທຸກ຺ຂປ຺ປຕ຺ຕິເຫຕຸໍ ຊານນ຺ຕີຕິ ເນມິຕ຺ຕາ, ເຕສໍ ເນມິຕ຺ຕານໍ ນກ຺ຂຕ຺ຕປາຐການໍ ວຈນໍ ສຸຓິຕ຺ວາຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ຊາຕິປູຊກຕ຺ເຖຣອປທານວຓ຺ຓນາ ສມຕ຺ຕາ.

ທ຺ວາທສມວຄ຺ຄວຓ຺ຓນາ ສມຕ຺ຕາ.