໓-໙. ຂທິຣວນິຍຕ຺ເຖຣອປທານວຓ຺ຓນາ

ຄງ຺ຄາ ຠາຄີຣຖີ ນາມາຕິອາທິກໍ ອາຍສ຺ມໂຕ ຂທິຣວນິຍຕ຺ເຖຣສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ຫໍສວຕີນຄເຣ ຕິຕ຺ຖນາວິກກຸເລ ນິພ຺ພຕ຺ຕິຕ຺ວາ ມຫາຄງ຺ຄາຍ ປຍາຄຕິຕ຺ເຖ ຕິຕ຺ຖນາວາຍ ກມ຺ມໍ ກໂຣນ຺ໂຕ ເອກທິວສໍ ສສາວກສງ຺ຆໍ ຠຄວນ຺ຕໍ ຄງ຺ຄາຕີຣໍ ອຸປຄຕໍ ທິສ຺ວາ ປສນ຺ນມານໂສ ນາວາສງ຺ຆາຏໍ ໂຍເຊຕ຺ວາ ມຫນ຺ເຕນ ປູຊາສກ຺ກາເຣນ ປຣຕີຣໍ ປາເປຕ຺ວາ ອຎ຺ຎຕຣໍ ຠິກ຺ຂຸໍ ສຕ຺ຖາຣາ ອາຣຎ຺ຎການໍ ຠິກ຺ຂູນໍ ອຄ຺ຄຏ຺ຐາເນ ຐປິຍມານໍ ທິສ຺ວາ ຕໍ ຐານນ຺ຕຣໍ ປຕ຺ເຖຕ຺ວາ ຠຄວໂຕ ຠິກ຺ຂຸສງ຺ຆສ຺ສ ຈ ມຫາທານໍ ປວຕ຺ເຕຕ຺ວາ ປຓິຘານໍ ອກາສິ. ຠຄວາ ຕສ຺ສ ປຕ຺ຖນາຍ ອວຎ຺ຌຠາວໍ ພ຺ຍາກາສິ.

ໂສ ຕໂຕ ປຏ຺ຐາຍ ປຸຎ຺ຎານິ ອຸປຈິນນ຺ໂຕ ເທວມນຸສ຺ເສສຸ ສໍສຣນ຺ໂຕ ອຸຠຍສມ຺ປຕ຺ຕິໂຍ ອນຸຠວິຕ຺ວາ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ນາລກຄາເມ ຣູປສາຣິຍາ ນາມ ພ຺ຣາຫ຺ມຓິຍາ ກຸຈ຺ຉິມ຺ຫິ ນິພ຺ພຕ຺ຕິ. ຕໍ ວຍປ຺ປຕ຺ຕໍ ມາຕາປິຕໂຣ ຆຣພນ຺ຘເນນ ພນ຺ຘິຕຸກາມາ ຫຸຕ຺ວາ ຕສ຺ສ ອາໂຣເຈສຸໍ. ໂສ ສາຣິປຸຕ຺ຕຕ຺ເຖຣສ຺ສ ປພ຺ພຊິຕຠາວໍ ສຸຕ຺ວາ ‘‘ມຍ຺ຫໍ ເຊຏ຺ຐຠາຕາ ອຍ຺ໂຍ ອຸປຕິສ຺ໂສ ອິມໍ ວິຠວໍ ຉຑ຺ເຑຕ຺ວາ ປພ຺ພຊິໂຕ, ເຕນ ວນ຺ຕໍ ເຂຬປິຓ຺ຑໍ ກຖາຫໍ ອນຸຠວິສ຺ສາມີ’’ຕິ ຊາຕສໍເວໂຄ ປາສໍ ອນຸປຄຈ຺ຉມານມິໂຄ ວິຍ ຎາຕເກ ວຎ຺ເຈຕ຺ວາ ເຫຕຸສມ຺ປຕ຺ຕິຍາ ໂຈທິຍມາໂນ ຠິກ຺ຂູນໍ ສນ຺ຕິກໍ ຄນ຺ຕ຺ວາ ຘມ຺ມເສນາປຕິໂນ ກນິຏ຺ຐຠາວໍ ນິເວເທຕ຺ວາ ອຕ຺ຕໂນ ປພ຺ພຊ຺ຊາຍ ຉນ຺ທໍ ອາໂຣເຈສິ. ຠິກ຺ຂູ ຕໍ ປພ຺ພາເຊຕ຺ວາ ປຣິປຸຓ຺ຓວີສຕິວສ຺ສໍ ອຸປສມ຺ປາເທຕ຺ວາ ກມ຺ມຏ຺ຐາເນ ນິໂຍເຊສຸໍ. ໂສ ກມ຺ມຏ຺ຐານໍ ຄເຫຕ຺ວາ ຂທິຣວນໍ ປວິສິຕ຺ວາ ວິສ຺ສມນ຺ໂຕ ຆເຏນ຺ໂຕ ວາຍມນ຺ໂຕ ຎາຓສ຺ສ ປຣິປາກໍ ຄຕຕ຺ຕາ ນຈິຣສ຺ເສວ ຉຬຠິຎ຺ໂຎ ອຣຫາ ອໂຫສິ. ໂສ ອຣຫາ ຫຸຕ຺ວາ ສຕ຺ຖາຣໍ ຘມ຺ມເສນາປຕິຎ຺ຈ ວນ຺ທິຕຸໍ ເສນາສນໍ ສໍສາເມຕ຺ວາ ປຕ຺ຕຈີວຣມາທາຍ ນິກ຺ຂມິຕ຺ວາ ອນຸປຸພ຺ເພນ ສາວຕ຺ຖິໍ ປຕ຺ວາ ເຊຕວນໍ ປວິສິຕ຺ວາ ສຕ຺ຖາຣໍ ຘມ຺ມເສນາປຕິຎ຺ຈ ວນ຺ທິຕ຺ວາ ກຕິປາຫໍ ເຊຕວເນ ວິຫາສິ. ອຖ ນໍ ສຕ຺ຖາ ອຣິຍຄຓມຊ຺ເຌ ນິສິນ຺ໂນ ອາຣຎ຺ຎການໍ ຠິກ຺ຂູນໍ ອຄ຺ຄຏ຺ຐາເນ ຐເປສິ – ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ອາຣຎ຺ຎການໍ ຍທິທໍ ເຣວໂຕ’’ຕິ (ອ. ນິ. ໑.໑໙໘, ໒໐໓).

໖໒໘. ເອວໍ ເອຕທຄ຺ຄຏ຺ຐານໍ ປຕ຺ວາ ອຕ຺ຕໂນ ປຸພ຺ພກມ຺ມໍ ສຣິຕ຺ວາ ປີຕິໂສມນສ຺ສວເສນ ປຸພ຺ພຈຣິຕາປທານໍ ປກາເສນ຺ໂຕ ຄງ຺ຄາ ຠາຄີຣຖີຕິອາທິມາຫ. ຕຕ຺ຖ ຄງ຺ຄາຕິ ຄາຍມານາ ໂຆສໍ ກຸຣຸມານາ ຄຈ຺ຉຕີຕິ ຄງ຺ຄາ. ອຖ ວາ ໂຄ ວຸຈ຺ຈຕິ ປຖວີ, ຕສ຺ມິໍ ຄຕາ ປວຕ຺ຕາຕິ ຄງ຺ຄາ. ອໂນຕຕ຺ຕທຫໍ ຕິກ຺ຂຕ຺ຕຸໍ ປທກ຺ຂິຓໍ ກຕ຺ວາ ຄຕຏ຺ຐາເນ ອາວຏ຺ຏຄງ຺ຄາຕິ ຈ ປພ຺ພຕມຕ຺ຖເກນ ຄຕຏ຺ຐາເນ ພຫລຄງ຺ຄາຕິ ຈ ຕິຣຈ຺ຉານປພ຺ພຕໍ ວິຊ຺ຌິຕ຺ວາ ຄຕຏ຺ຐາເນ ອຸມງ຺ຄຄງ຺ຄາຕິ ຈ ຕໂຕ ພຫລປພ຺ພຕໍ ປຫຣິຕ຺ວາ ປຎ຺ຈໂຍຊນໍ ອາກາເສນ ຄຕຏ຺ຐາເນ ອາກາສຄງ຺ຄາຕິ ຈ ຕສ຺ສາ ປຕິຕຏ຺ຐານໍ ຠິນ຺ທິຕ຺ວາ ຊາຕໍ ປຎ຺ຈ ໂຍຊນໍ ໂປກ຺ຂຣຓີກູລໍ ຠິນ຺ທິຕ຺ວາ ຕຕ຺ຖ ປນ ປຎ຺ຈງ຺ຄຸລິ ວິຍ ປຎ຺ຈ ຘາຣາ ຫຸຕ຺ວາ ຄງ຺ຄາ ຍມຸນາ ສຣຠູ ມຫີ ອຈິຣວຕີຕິ ປຎ຺ຈ ນາມາ ຫຸຕ຺ວາ ຊມ຺ພຸທີປໍ ປຎ຺ຈ ຠາຄໍ ປຎ຺ຈ ໂກຏ຺ຐາສໍ ກຕ຺ວາ ປຎ຺ຈ ຠາເຄ ປຎ຺ຈ ໂກຏ຺ຐາເສ ອິຕາ ຄຕາ ປວຕ຺ຕາຕິ ຠາຄີຣຖີ. ຄງ຺ຄາ ຈ ສາ ຠາຄີຣຖີ ເຈຕິ ຄງ຺ຄາຠາຄີຣຖີ. ‘‘ຠາຄີຣຖີ ຄງ຺ຄາ’’ຕິ ວຕ຺ຕພ຺ເພ ຄາຖາພນ຺ຘສຸຂຕ຺ຖໍ ປຸພ຺ພຈຣິຍວເສນ ວຸຕ຺ຕນ຺ຕິ ທຏ຺ຐພ຺ພໍ. ຫິມວນ຺ຕາ ປຠາວິຕາຕິ ສຕ຺ເຕ ຫິໍສຕິ ສີເຕນ ຫນຕິ ມເຖຕິ ອາໂລເຬຕີຕິ ຫິໂມ, ຫິໂມ ອສ຺ສ ອຕ຺ຖີຕິ ຫິມວາ, ຕໂຕ ຫິມວນ຺ຕໂຕ ປຏ຺ຐາຍ ປຠາວິຕາ ປວຕ຺ຕາ ສນ຺ທມານາຕິ ຫິມວນ຺ຕປຠາວິຕາ. ກຸຕິຕ຺ເຖ ນາວິໂກ ອາສິນ຺ຕິ ຕສ຺ສາ ຄງ຺ຄາຍ ຈຓ຺ຑໂສຕສມາປນ຺ເນ ວິສມຕິຕ຺ເຖ ເກວຏ຺ຏກຸເລ ອຸປ຺ປນ຺ໂນ ນາວິໂກ ອາສິໍ ອໂຫສິນ຺ຕິ ອຕ຺ໂຖ. ໂອຣິເມ ຈ ຕຣິໍ ອຫນ຺ຕິ ສມ຺ປຕ຺ຕສມ຺ປຕ຺ຕມນຸສ຺ເສ ປາຣິມາ ຕີຣາ ໂອຣິມໍ ຕີຣໍ ອຫໍ ຕຣິໍ ຕາເຣສິນ຺ຕິ ອຕ຺ໂຖ.

໖໒໙. ປທຸມຸຕ຺ຕໂຣ ນາຍໂກຕິ ທ຺ວິປທານໍ ອຸຕ຺ຕໂມ ສຕ຺ເຕ ນິພ຺ພານໍ ນາຍໂກ ປາປນໂກ ປທຸມຸຕ຺ຕຣພຸທ຺ໂຘ ມມ ປຸຎ຺ຎສມ຺ປຕ຺ຕິໍ ນິປ຺ຜາເທນ຺ໂຕ. ວສີສຕສຫສ຺ເສຫິ ຂີຓາສວສຕສຫສ຺ເສຫິ ຄງ຺ຄາໂສຕໍ ຕຣິຕຸໍ ຕິຕ຺ຖໍ ປຕ຺ໂຕຕິ ສມ຺ພນ຺ໂຘ.

໖໓໐. ພຫູ ນາວາ ສມາເນຕ຺ວາຕິ ສມ຺ປຕ຺ຕໍ ຕໍ ສມ຺ມາສມ຺ພຸທ຺ຘໍ ທິສ຺ວາ ວຑ຺ຒກີຫິ ສຸຏ຺ຐຸ ສງ຺ຂຕໍ ກຕໍ ນິປ຺ຜາທິຕໍ ພຫູ ນາວາໂຍ ສມາເນຕ຺ວາ ທ຺ເວ ທ຺ເວ ນາວາໂຍ ເອກໂຕ ກຕ຺ວາ ຕສ຺ສາ ນາວາຍ ອຸປຣິ ມຓ຺ຑປຉທນໍ ກຕ຺ວາ ນຣາສຠໍ ປທຸມຸຕ຺ຕຣສມ຺ພຸທ຺ຘໍ ປຏິມານິໍ ປູເຊສິນ຺ຕິ ອຕ຺ໂຖ.

໖໓໑. ອາຄນ຺ຕ຺ວານ ຈ ສມ຺ພຸທ຺ໂຘຕິ ເອວໍ ສງ຺ຆຏິຕາຍ ນາວາຍ ຕຕ຺ຖ ອາຄນ຺ຕ຺ວານ ຕຎ຺ຈ ນາວກໍ ນາວມຸຕ຺ຕມໍ ອາຣຸຫີຕິ ສມ຺ພນ຺ໂຘ. ວາຣິມຊ຺ເຌ ຐິໂຕ ສຕ຺ຖາຕິ ນາວມາຣູຬ຺ໂຫ ສຕ຺ຖາ ຄງ຺ຄາຊລມຊ຺ເຌ ຐິໂຕ ສມາໂນ ອິມາ ໂສມນສ຺ສປຏິສໍຍຸຕ຺ຕຄາຖາ ອຠາສຖ ກເຖສີຕິ ສມ຺ພນ຺ໂຘ.

໖໓໒. ໂຍ ໂສ ຕາເຣສິ ສມ຺ພຸທ຺ຘນ຺ຕິ ໂຍ ໂສ ນາວິໂກ ຄງ຺ຄາໂສຕາຍ ສມ຺ພຸທ຺ຘໍ ອຕາເຣສິ. ສງ຺ຆຎ຺ຈາປິ ອນາສວນ຺ຕິ ນ ເກວລເມວ ສມ຺ພຸທ຺ຘໍ ຕາເຣສິ, ອນາສວໍ ນິກ຺ກິເລສໍ ສງ຺ຆຎ຺ຈາປິ ຕາເຣສີຕິ ອຕ຺ໂຖ. ເຕນ ຈິຕ຺ຕປສາເທນາຕິ ເຕນ ນາວາປາຊນກາເລ ອຸປ຺ປນ຺ເນນ ໂສມນສ຺ສສຫຄຕຈິຕ຺ຕປສາເທນ ເທວໂລເກ ຉສຸ ກາມສຄ຺ເຄສຸ ຣມິສ຺ສຕິ ທິພ຺ພສມ຺ປຕ຺ຕິໍ ອນຸຠວິສ຺ສຕີຕິ ອຕ຺ໂຖ.

໖໓໓. ນິພ຺ພຕ຺ຕິສ຺ສຕິ ເຕ ພ຺ຍມ຺ຫນ຺ຕິ ເທວໂລເກ ອຸປ຺ປນ຺ນສ຺ສ ເຕ ຕຸຍ຺ຫໍ ພ຺ຍມ຺ຫໍ ວິມານໍ ສຸກຕໍ ສຸຏ຺ຐຸ ນິພ຺ພຕ຺ຕໍ ນາວສຓ຺ຐິຕໍ ນາວາສຓ຺ຐານໍ ນິພ຺ພຕ຺ຕິສ຺ສຕິ ປາຕຸຠວິສ຺ສຕີຕິ ອຕ຺ໂຖ. ອາກາເສ ປຸປ຺ຜຉທນນ຺ຕິ ນາວາຍ ອຸປຣິມຓ຺ຑປກຕກມ຺ມສ຺ສ ນິສ຺ສນ຺ເທນ ສພ຺ພທາ ຄຕຄຕຏ຺ຐາເນ ອາກາເສ ປຸປ຺ຜຉທນໍ ຘາຣຍິສ຺ສຕີຕິ ສມ຺ພນ຺ໂຘ.

໖໓໔. ອຏ຺ຐປຎ຺ຎາສກປ຺ປມ຺ຫີຕິ ອິໂຕ ປຸຎ຺ຎກຣຓກາລໂຕ ປຏ຺ຐາຍ ອຏ຺ຐປຓ຺ຓາສກປ຺ປໍ ອຕິກ຺ກມິຕ຺ວາ ນາເມນ ຕາຣໂກ ນາມ ຈກ຺ກວຕ຺ຕີ ຂຕ຺ຕິໂຍ ຈາຕຸຣນ຺ໂຕ ຈຕູສຸ ທີເປສຸ ອິສ຺ສໂຣ ວິຊິຕາວີ ຊິຕວນ຺ໂຕ ຠວິສ຺ສຕີຕິ ສມ຺ພນ຺ໂຘ. ເສສຄາຖາ ອຸຕ຺ຕານຕ຺ຖາວ.

໖໓໗. ເຣວໂຕ ນາມ ນາເມນາຕິ ເຣວຕີນກ຺ຂຕ຺ເຕນ ຊາຕຕ຺ຕາ ‘‘ເຣວໂຕ’’ຕິ ລທ຺ຘນາໂມ ພ຺ຣຫ຺ມພນ຺ຘຸ ພ຺ຣາຫ຺ມຓປຸຕ຺ຕຠູໂຕ ຠວິສ຺ສຕິ ພ຺ຣາຫ຺ມຓກຸເລ ອຸປ຺ປຊ຺ຊິສ຺ສຕີຕິ ອຕ຺ໂຖ.

໖໓໙. ນິພ຺ພາຍິສ຺ສຕິນາສໂວຕິ ນິກ຺ກິເລໂສ ຂນ຺ຘປຣິນິພ຺ພາເນນ ນິພ຺ພາຍິສ຺ສຕິ.

໖໔໐. ວີຣິຍໍ ເມ ຘຸຣໂຘຣຍ຺ຫນ຺ຕິ ເອວໍ ປທຸມຸຕ຺ຕເຣນ ຠຄວຕາ ພ຺ຍາກໂຕ ອຫໍ ກເມນ ປາຣມິຕາໂກຏິໍ ປຕ຺ວາ ເມ ມຍ຺ຫໍ ວີຣິຍໍ ອສິຖິລວີຣິຍໍ ຘຸຣໂຘຣຍ຺ຫໍ ຘຸຣວາຫໍ ຘຸຣາຘາຣໍ ໂຍເຄຫິ ເຂມສ຺ສ ນິພ຺ຠຍສ຺ສ ນິພ຺ພານສ຺ສ ອຘິວາຫນໍ ອາວຫນໍ ອໂຫສີຕິ ອຕ຺ໂຖ. ຘາເຣມິ ອນ຺ຕິມໍ ເທຫນ຺ຕິ ອິທານາຫໍ ສມ຺ມາສມ຺ພຸທ຺ຘສາສເນ ປຣິໂຍສານສຣີຣໍ ຘາເຣມີຕິ ສມ຺ພນ຺ໂຘ.

ໂສ ອປຣຠາເຄ ອຕ຺ຕໂນ ຊາຕຄາມໍ ຄນ຺ຕ຺ວາ ‘‘ຈາລາ, ອຸປຈາລາ, ສີສູປຈາລາ’’ຕິ ຕິສ຺ສນ຺ນໍ ຠຄິນີນໍ ປຸຕ຺ເຕ ‘‘ຈາລາ, ອຸປຈາລາ, ສີສູປຈາລາ’’ຕິ ຕໂຍ ຠາຄິເນຍ຺ເຍ ອາເນຕ຺ວາ ປພ຺ພາເຊຕ຺ວາ ກມ຺ມຏ຺ຐາເນ ນິໂຍເຊສິ. ເຕ ກມ຺ມຏ຺ຐານໍ ອນຸຍຸຕ຺ຕາ ວິຫຣິໍສຸ.

ຕສ຺ມິຎ຺ຈ ສມເຍ ເຖຣສ຺ສ ໂກຈິເທວ ອາພາໂຘ ອຸປ຺ປນ຺ໂນ, ຕໍ ສຸຕ຺ວາ ສາຣິປຸຕ຺ຕຕ຺ເຖໂຣ – ‘‘ເຣວຕສ຺ສ ຄິລານປຸຈ຺ຉນໍ ອຘິຄມປຸຈ຺ຉນຎ຺ຈ ກຣິສ຺ສາມີ’’ຕິ ອຸປຄຎ຺ຉິ. ເຣວຕຕ຺ເຖໂຣ ຘມ຺ມເສນາປຕິໍ ທູຣໂຕວ ອາຄຈ຺ຉນ຺ຕໍ ທິສ຺ວາ ເຕສໍ ສາມເຓຣານໍ ສຕຸປ຺ປາທວເສນ ໂອວທິຍມາໂນ ຈາເລຕິຄາຖໍ ອຠາສິຕ຺ຖ. ຕຕ຺ຖ ຈາເລ ອຸປຈາເລ ສີສູປຈາເລຕິ ເຕສໍ ອາລປນໍ. ຈາລາ, ອຸປຈາລາ, ສີສູປຈາລາຕິ ຫິ ອິຕ຺ຖິລິງ຺ຄວເສນ ລທ຺ຘນາມາ ຕໂຍ ທາຣກາ ປພ຺ພຊິຕາປິ ຕຖາ ໂວຫຣິຍ຺ຍນ຺ຕິ. ‘‘ຈາລີ, ອຸປຈາລີ, ສີສູປຈາລີຕິ ເຕສໍ ນາມານີ’’ຕິ ຈ ວທນ຺ຕິ. ຍທຕ຺ຖໍ ‘‘ຈາເລ’’ຕິອາທິນາ ອາມນ຺ຕນໍ ກຕໍ, ຕໍ ທສ຺ເສນ຺ໂຕ ‘‘ປຕິສ຺ສຕາ ນຸ ໂຂ ວິຫຣຖາ’’ຕິ ວຕ຺ວາ ຕຕ຺ຖ ກາຣຓໍ ອາຫ – ‘‘ອາຄໂຕ ໂວ ວາລໍ ວິຍ ເວຘີ’’ຕິ. ປຕິສ຺ສຕາຕິ ປຕິສ຺ສຕິກາ. ໂຂຕິ ອວຘາຣເຓ. ອາຄໂຕຕິ ອາຄຎ຺ຉິ. ໂວຕິ ຕຸມ຺ຫາກໍ. ວາລໍ ວິຍ ເວຘີຕິ ວາລເວຘິ ວິຍ. ອຍຎ຺ເຫຕ຺ຖ ສງ຺ເຂປຕ຺ໂຖ – ຕິກ຺ຂຊວນນິພ຺ເພຘິກປຎ຺ຎຕາຍ ວາລເວຘິຣູໂປ ສຕ຺ຖຸກປ຺ໂປ ຕຸມ຺ຫາກໍ ມາຕຸລຕ຺ເຖໂຣ ອາຄໂຕ, ຕສ຺ມາ ສມຓສຎ຺ຎໍ ອຸປຏ຺ຐເປຕ຺ວາ ສຕິສມ຺ປຊຎ຺ຎຍຸຕ຺ຕາ ເອວ ຫຸຕ຺ວາ ວິຫຣຖ, ຍຖາຘິຄເຕ ວິຫາເຣ ອປ຺ປມຕ຺ຕາ ຠວຖາຕິ.

ຕໍ ສຸຕ຺ວາ ເຕ ສາມເຓຣາ ຘມ຺ມເສນາປຕິສ຺ສ ປຈ຺ຈຸຄ຺ຄມນາທິວຕ຺ຕໍ ກຕ຺ວາ ອຸຠິນ຺ນໍ ມາຕຸລຕ຺ເຖຣານໍ ປຏິສນ຺ຖາຣເວລາຍໍ ນາຕິທູເຣ ສມາຘິໍ ສມາປຊ຺ຊິຕ຺ວາ ນິສີທິໍສຸ. ຘມ຺ມເສນາປຕິ ເຣວຕຕ຺ເຖເຣນ ສທ຺ຘິໍ ປຏິສນ຺ຖາຣໍ ກຕ຺ວາ ອຸຏ຺ຐາຍາສນາ ເຕ ສາມເຓເຣ ອຸປສງ຺ກມິ. ເຕ ຕຖາ ກາລປຣິຈ຺ເຉທສ຺ສ ກຕຕ຺ຕາ ເຖເຣ ອຸປສງ຺ກມນ຺ເຕ ອຸຏ຺ຐຫິຕ຺ວາ ວນ຺ທິຕ຺ວາ ອຏ຺ຐໍສຸ. ເຖໂຣ – ‘‘ກຕຣກຕຣວິຫາເຣນ ວິຫຣຖາ’’ຕິ ປຸຈ຺ຉິຕ຺ວາ ເຕຫິ ‘‘ອິມາຍ ອິມາຍາ’’ຕິ ວຸຕ຺ເຕ ທາຣເກປິ ເອວໍ ວິເນນ຺ໂຕ – ‘‘ມຍ຺ຫໍ ຠາຕິໂກ ສຈ຺ຈວາທີ ວຕ ຘມ຺ມສ຺ສ ອນຸຘມ຺ມຈາຣິ’’ນ຺ຕິ ເຖຣໍ ປສໍສນ຺ໂຕ ປກ຺ກາມິ. ເສສເມຕ຺ຖ ອຸຕ຺ຕານຕ຺ຖເມວາຕິ.

ຂທິຣວນິຍຕ຺ເຖຣອປທານວຓ຺ຓນາ ສມຕ຺ຕາ.