໓-໘. ປິຓ຺ໂຑລຠາຣທ຺ວາຊຕ຺ເຖຣອປທານວຓ຺ຓນາ

ປທຸມຸຕ຺ຕໂຣ ນາມ ຊິໂນຕິອາທິກໍ ອາຍສ຺ມໂຕ ປິຓ຺ໂຑລຠາຣທ຺ວາຊສ຺ສ ອປທານໍ. ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍານິ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ກາເລ ສີຫໂຍນິຍໍ ນິພ຺ພຕ຺ຕິຕ຺ວາ ປພ຺ພຕປາເທ ຄຸຫາຍໍ ວິຫາສິ. ຠຄວາ ຕສ຺ສ ອນຸຄ຺ຄຫໍ ກາຕຸໍ ໂຄຈຣາຍ ປກ຺ກນ຺ຕກາເລ ຕສ຺ສ ສຍນຄຸຫໍ ປວິສິຕ຺ວາ ນິໂຣຘໍ ສມາປຊ຺ຊິຕ຺ວາ ນິສີທິ. ສີໂຫ ໂຄຈຣໍ ຄເຫຕ຺ວາ ນິວຕ຺ໂຕ ຄຸຫທ຺ວາເຣ ຐຕ຺ວາ ຠຄວນ຺ຕໍ ທິສ຺ວາ ຫຏ຺ຐຕຸຏ຺ໂຐ ຊລຊຖລຊປຸປ຺ເຜຫິ ປູຊໍ ກຕ຺ວາ ຈິຕ຺ຕໍ ປສາເທນ຺ໂຕ ຠຄວໂຕ ອາຣກ຺ຂຓຕ຺ຖາຍ ອຎ຺ເຎ ວາຬມິເຄ ອປເນຕຸໍ ຕີສຸ ເວລາສຸ ສີຫນາທໍ ນທນ຺ໂຕ ພຸທ຺ຘຄຕາຍ ສຕິຍາ ອຏ຺ຐາສິ. ຍຖາ ປຐມທິວເສ, ເອວໍ ສຕ຺ຕາຫໍ ປູເຊສິ. ຠຄວາ ‘‘ສຕ຺ຕາຫຈ຺ຈເຍນ ນິໂຣຘາ ວຸຏ຺ຐຫິຕ຺ວາ ວຏ຺ຏິສ຺ສຕິ ອິມສ຺ສ ເອຕ຺ຕໂກ ອຸປນິສ຺ສໂຍ’’ຕິ ຕສ຺ສ ປສ຺ສນ຺ຕສ຺ເສວ ອາກາສໍ ປກ຺ຂນ຺ທິຕ຺ວາ ວິຫາຣເມວ ຄໂຕ.

ສີໂຫ ພຸທ຺ຘວິໂຍຄທຸກ຺ຂໍ ອຘິວາເສຕຸໍ ອສກ຺ໂກນ຺ໂຕ ກາລໍ ກຕ຺ວາ ຫໍສວຕີນຄເຣ ມຫາໂຠຄກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ນຄຣວາສີຫິ ສທ຺ຘິໍ ວິຫາຣໍ ຄນ຺ຕ຺ວາ ສຕ຺ຖຸ ຘມ຺ມເທສນໍ ສຸຕ຺ວາ ປສນ຺ໂນ ສຕ຺ຕາຫໍ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ມຫາທານໍ ປວຕ຺ເຕຕ຺ວາ ຍາວຊີວໍ ປຸຎ຺ຎານິ ກຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອມ຺ຫາກໍ ຠຄວໂຕ ກາເລ ໂກສມ຺ພິຍໍ ຣຎ຺ໂຎ ອຸເທນສ຺ສ ປຸໂຣຫິຕສ຺ສ ປຸຕ຺ໂຕ ຫຸຕ຺ວາ ນິພ຺ພຕ຺ຕິ. ຠາຣທ຺ວາໂຊຕິສ຺ສ ນາມໍ ອໂຫສິ. ໂສ ວຍປ຺ປໂຕ ຕໂຍ ເວເທ ອຸຄ຺ຄເຫຕ຺ວາ ປຎ຺ຈ ມາຓວກສຕານິ ມນ຺ເຕ ວາເຈນ຺ໂຕ ມຫຄ຺ຆສຠາເວນ ອນນຸຣູປາຈາຣຕ຺ຕາ ເຕຫິ ປຣິຈ຺ຈຕ຺ໂຕ ຣາຊຄຫໍ ຄນ຺ຕ຺ວາ ຠຄວໂຕ ຠິກ຺ຂຸສງ຺ຆສ຺ສ ຈ ລາຠສກ຺ກາຣໍ ທິສ຺ວາ ສາສເນ ປພ຺ພຊິຕ຺ວາ ໂຠຊເນ ອມຕ຺ຕຎ຺ຎູ ຫຸຕ຺ວາ ວິຫຣຕິ. ສຕ຺ຖາຣາ ອຸປາເຍນ ມຕ຺ຕຎ຺ຎຸຕາຍ ປຕິຏ຺ຐາເປນ຺ໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ຉຬຠິຎ຺ໂຎ ອໂຫສິ. ຉຬຠິຎ຺ໂຎ ປນ ຫຸຕ຺ວາ ຠຄວໂຕ ສມ຺ມຸຂາ ‘‘ຍໍ ສາວເກຫິ ປຕ຺ຕພ຺ພໍ, ຕໍ ມຍາ ອນຸປ຺ປຕ຺ຕ’’ນ຺ຕິ, ຠິກ຺ຂຸສງ຺ເຆ ຈ ‘‘ຍສ຺ສ ມຄ຺ເຄ ວາ ຜເລ ວາ ກງ຺ຂາ ອຕ຺ຖິ, ໂສ ມໍ ປຸຈ຺ຉຕູ’’ຕິ ສີຫນາທໍ ນທິ. ເຕນ ຕໍ ຠຄວາ – ‘‘ເອຕທຄ຺ຄໍ, ຠິກ຺ຂເວ, ມມ ສາວການໍ ຠິກ຺ຂູນໍ ສີຫນາທິການໍ ຍທິທໍ ປິຓ຺ໂຑລຠາຣທ຺ວາໂຊ’’ຕິ (ອ. ນິ. ໑.໑໘໘, ໑໙໕) ເອຕທຄ຺ເຄ ຐເປສິ.

໖໑໓. ເອວໍ ເອຕທຄ຺ຄໍ ຐານໍ ປຕ຺ວາ ປຸພ຺ເພ ກຕປຸຎ຺ຎສມ຺ຠາຣໍ ສຣິຕ຺ວາ ໂສມນສ຺ສວເສນ ອຕ຺ຕໂນ ປຸຎ຺ຎກມ຺ມາປທານໍ ວິຠາເວນ຺ໂຕ ປທຸມຸຕ຺ຕໂຣຕິອາທິມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕວ. ປຸຣໂຕ ຫິມວນ຺ຕສ຺ສາຕິ ຫິມາລຍປພ຺ພຕໂຕ ປຸພ຺ພທິສາຠາເຄຕິ ອຕ຺ໂຖ. ຈິຕ຺ຕກູເຏ ວສີ ຕທາຕິ ຍທາ ອຫໍ ສີໂຫ ມິຄຣາຊາ ຫຸຕ຺ວາ ຫິມວນ຺ຕປພ຺ພຕສມີເປ ວສາມິ, ຕທາ ປທຸມຸຕ຺ຕໂຣ ນາມ ສຕ຺ຖາ ອເນເກຫິ ຈ ໂອສເຘຫິ, ອເນເກຫິ ຈ ຣຕເນຫິ ຈິຕ຺ຕວິຈິຕ຺ຕຕາຍ ຈິຕ຺ຕກູເຏ ຈິຕ຺ຕປພ຺ພຕສິຂເຣ ວສີຕິ ສມ຺ພນ຺ໂຘ.

໖໑໔. ອຠີຕຣູໂປ ຕຕ຺ຖາສິນ຺ຕິ ອຠີຕສຠາໂວ ນິພ຺ຠຍສຠາໂວ ມິຄຣາຊາ ຕຕ຺ຖ ອາສິໍ ອໂຫສິນ຺ຕິ ອຕ຺ໂຖ. ຈຕຸກ຺ກໂມຕິ ຈຕູຫິ ທິສາຫິ ກໂມ ຄນ຺ຕຸໍ ສມຕ຺ໂຖ. ຍສ຺ສ ສທ຺ທໍ ສຸຓິຕ຺ວານາຕິ ຍສ຺ສ ມິຄຣຎ຺ໂຎ ສີຫນາທໍ ສຸຕ຺ວາ ພຫຸຊ຺ຊນາ ພຫຸສຕ຺ຕາ ວິກ຺ຂມ຺ຠນ຺ຕິ ວິເສເສນ ຂມ຺ຠນ຺ຕິ ຠາຍນ຺ຕິ.

໖໑໕. ສຸຜຸລ຺ລໍ ປທຸມໍ ຄຍ຺ຫາຕິ ຠຄວຕິ ປສາເທນ ສຸປຸປ຺ຜິຕປທຸມປຸປ຺ຜໍ ຑໍສິຕ຺ວາ. ນຣາສຠໍ ນຣານໍ ອາສຠໍ ອຸຕ຺ຕມໍ ເສຏ຺ຐໍ ສມ຺ພຸທ຺ຘໍ ອຸປຄຈ຺ຉິໍ, ສມີປໍ ອຄມິນ຺ຕິ ອຕ຺ໂຖ. ວຸຏ຺ຐິຕສ຺ສ ສມາຘິມ຺ຫາຕິ ນິໂຣຘສມາປຕ຺ຕິໂຕ ວຸຏ຺ຐິຕສ຺ສ ພຸທ຺ຘສ຺ສ ຕໍ ປຸປ຺ຜໍ ອຠິໂຣປຍິໍ ປູເຊສິນ຺ຕິ ອຕ຺ໂຖ.

໖໑໖. ຈຕຸທ຺ທິສໍ ນມສ຺ສິຕ຺ວາຕິ ຈຕູສຸ ທິສາສຸ ນມສ຺ສິຕ຺ວາ ສກໍ ຈິຕ຺ຕໍ ອຕ຺ຕໂນ ຈິຕ຺ຕໍ ປສາເທຕ຺ວາ ອາທເຣນ ປຕິຏ຺ຐເປຕ຺ວາ ສີຫນາທໍ ອຠີຕນາທໍ ອນທິໍ ໂຆເສສິນ຺ຕິ ອຕ຺ໂຖ.

໖໑໗. ຕໂຕ ພຸທ຺ເຘນ ທິນ຺ນພ຺ຍາກຣຓໍ ປກາເສນ຺ໂຕ ປທຸມຸຕ຺ຕໂຣຕິອາທິມາຫ. ຕໍ ອຸຕ຺ຕານຕ຺ຖເມວ.

໖໑໘. ວທຕໍ ເສຏ຺ໂຐຕິ ‘‘ມຍໍ ພຸທ຺ຘາ, ມຍໍ ພຸທ຺ຘາ’’ຕິ ວທນ຺ຕານໍ ອຎ຺ຎຕິຕ຺ຖິຍານໍ ເສຏ຺ໂຐ ອຸຕ຺ຕໂມ ພຸທ຺ໂຘ ອາຄໂຕຕິ ສມ຺ພນ຺ໂຘ. ຕສ຺ສ ອາຄຕສ຺ສ ຠຄວໂຕ ຕໍ ຘມ຺ມໍ ໂສສ຺ສາມ ສຸຓິສ຺ສາມາຕິ ອຕ຺ໂຖ.

໖໑໙. ເຕສໍ ຫາສປເຣຕານນ຺ຕິ ຫາເສຫິ ໂສມນສ຺ເສຫິ ປເຣຕານໍ ອຠິຠູຕານໍ ສມນ຺ນາຄຕານໍ ເຕສໍ ເທວມນຸສ຺ສານໍ. ໂລກນາຍໂກຕິ ໂລກສ຺ສ ນາຍໂກ ສຄ຺ຄໂມກ຺ຂສມ຺ປາປໂກ ມມ ສທ຺ທໍ ມຍ຺ຫໍ ສີຫນາທໍ ປກິຕ຺ເຕສິ ປກາເສສິ ກເຖສິ, ທີຆທສ຺ສີ ອນາຄຕກາລທສ຺ສີ ມຫາມຸນິ ມຸນີນມນ຺ຕເຣ ມຫນ຺ໂຕ ມຸນິ. ເສສຄາຖາ ສຸວິຎ຺ເຎຍ຺ຍເມວ.

໖໒໒. ນາເມນ ປທຸໂມ ນາມ ຈກ຺ກວຕ຺ຕີ ຫຸຕ຺ວາ ຈຕຸສຏ຺ຐິຍາ ຊາຕິຍາ ອິສ຺ສຣິຍໍ ອິສ຺ສຣຠາວໍ ຣຊ຺ຊໍ ກາຣຍິສ຺ສຕີຕິ ອຕ຺ໂຖ.

໖໒໓. ກປ຺ປສຕສຫສ຺ສມ຺ຫີຕິ ສາມ຺ຍຕ຺ເຖ ຠຸມ຺ມວຈນໍ, ກປ຺ປສຕສຫສ຺ສານໍ ປຣິໂຍສາເນຕິ ອຕ຺ໂຖ.

໖໒໔. ປກາສິເຕ ປາວຈເນຕິ ເຕນ ໂຄຕເມນ ຠຄວຕາ ປິຏກຕ຺ຕເຍ ປກາສິເຕ ເທສິເຕຕິ ອຕ຺ໂຖ. ພ຺ຣຫ຺ມພນ຺ຘຸ ຠວິສ຺ສຕີຕິ ຕທາ ໂຄຕມສ຺ສ ຠຄວໂຕ ກາເລ ອຍໍ ສີໂຫ ມິຄຣາຊາ ພ຺ຣາຫ຺ມຓກຸເລ ນິພ຺ພຕ຺ຕິສ຺ສຕີຕິ ອຕ຺ໂຖ. ພ຺ຣຫ຺ມຎ຺ຎາ ອຠິນິກ຺ຂມ຺ມາຕິ ພ຺ຣາຫ຺ມຓກຸລໂຕ ນິກ຺ຂມິຕ຺ວາ ຕສ຺ສ ຠຄວໂຕ ສາສເນ ປພ຺ພຊິສ຺ສຕີຕິ ສມ຺ພນ຺ໂຘ.

໖໒໕. ປຘານປຫິຕຕ຺ໂຕຕິ ວີຣິຍກຣຓຕ຺ຖໍ ເປສິຕຈິຕ຺ໂຕ. ອຸປຘິສງ຺ຂາຕານໍ ກິເລສານໍ ອຠາເວນ ນິຣຸປຘິ. ກິເລສທຣຖານໍ ອຠາເວນ ອຸປສນ຺ໂຕ. ສພ຺ພາສເວ ສກລາສເວ ປຣິຎ຺ຎາຍ ປຫາຍ ອນາສໂວ ນິກ຺ກິເລໂສ ນິພ຺ພາຍິສ຺ສຕິ ຂນ຺ຘປຣິນິພ຺ພາເນນ ນິພ຺ພຸໂຕ ຠວິສ຺ສຕີຕິ ອຕ຺ໂຖ.

໖໒໖. ວິຊເນ ປນ຺ຕເສຍ຺ຍມ຺ຫີຕິ ຊນສມ຺ພາຘຣຫິເຕ ທູຣາຣຎ຺ຎເສນາສເນຕິ ອຕ຺ໂຖ. ວາຬມິຄສມາກຸເລຕິ ກາຬສີຫາທີຫິ ຈຓ຺ຑມິຄສງ຺ເຄຫິ ອາກຸເລ ສໍກິຓ຺ເຓຕິ ອຕ຺ໂຖ. ເສສໍ ວຸຕ຺ຕຕ຺ຖເມວາຕິ.

ປິຓ຺ໂຑລຠາຣທ຺ວາຊຕ຺ເຖຣອປທານວຓ຺ຓນາ ສມຕ຺ຕາ.