ອຣິຍວາສທສກວຓ຺ຓນາ

໓໔໘. ອຣິຍວາສາຕິ ອຣິຍາ ເອວ ວສິໍສຸ ວສນ຺ຕິ ວສິສ຺ສນ຺ຕິ ເອເຕສູຕິ ອຣິຍວາສາ. ປຎ຺ຈງ຺ຄວິປ຺ປຫີໂນຕິ ປຎ຺ຈຫິ ອງ຺ເຄຫິ ວິປ຺ປຍຸຕ຺ໂຕວ ຫຸຕ຺ວາ ຂີຓາສໂວ ອວສິ ວສຕິ ວສິສ຺ສຕີຕິ ຕສ຺ມາ ອຍໍ ປຎ຺ຈງ຺ຄວິປ຺ປຫີນຕາ, ອຣິຍສ຺ສ ວາສຕ຺ຕາ ອຣິຍວາໂສຕິ ວຸຕ຺ໂຕ. ເອສ ນໂຍ ສພ຺ພຕ຺ຖ.

ເອວໍ ໂຂ, ອາວຸໂສ, ຠິກ຺ຂຸ ຉຬງ຺ຄສມນ຺ນາຄໂຕ ໂຫຕີຕິ ຉຬງ຺ຄຸເປກ຺ຂາຍ ສມນ຺ນາຄໂຕ ໂຫຕິ. ຉຬງ຺ຄຸເປກ຺ຂາ ນາມ ເກຕິ? ຎາຓາທໂຍ. ‘‘ຎາຓ’’ນ຺ຕິ ວຸຕ຺ເຕ ກິຣິຍໂຕ ຈຕ຺ຕາຣິ ຎາຓສມ຺ປຍຸຕ຺ຕຈິຕ຺ຕານິ ລພ຺ຠນ຺ຕິ. ‘‘ສຕຕວິຫາໂຣ’’ຕິ ວຸຕ຺ເຕ ອຏ຺ຐ ມຫາຈິຕ຺ຕານິ. ‘‘ຣຊ຺ຊນທຸສ຺ສນໍ ນຕ຺ຖີ’’ຕິ ວຸຕ຺ເຕ ທສ ຈິຕ຺ຕານິ ລພ຺ຠນ຺ຕິ. ໂສມນສ຺ສໍ ອາເສວນວເສນ ລພ຺ຠຕິ.

ສຕາຣກ຺ເຂນ ເຈຕສາຕິ ຂີຓາສວສ຺ສ ຫິ ຕີສຸ ທ຺ວາເຣສຸ ສພ຺ພກາລໍ ສຕິ ອາຣກ຺ຂກິຈ຺ຈໍ ສາເຘຕິ. ເຕເນວສ຺ສ ‘‘ຈຣໂຕ ຈ ຕິຏ຺ຐໂຕ ຈ ສຸຕ຺ຕສ຺ສ ຈ ຊາຄຣສ຺ສ ຈ ສຕຕໍ ສມິຕໍ ຎາຓທສ຺ສນໍ ປຈ຺ຈຸປຏ຺ຐິຕໍ ໂຫຕີ’’ຕິ ວຸຈ຺ຈຕິ.

ປຸຖຸສມຓພ຺ຣາຫ຺ມຓານນ຺ຕິ ພຫູນໍ ສມຓພ຺ຣາຫ຺ມຓານໍ. ເອຕ຺ຖ ຈ ສມຓາຕິ ປພ຺ພຊ຺ຊຸປຄຕາ. ພ຺ຣາຫ຺ມຓາຕິ ໂຠວາທິໂນ. ປຸຖຸປຈ຺ເຈກສຈ຺ຈານີຕິ ພຫູນິ ປາເຏກ຺ກສຈ຺ຈານິ, ອິທເມວ ທສ຺ສນໍ ສຈ຺ຈໍ, ອິທເມວ ທສ຺ສນໍ ສຈ຺ຈນ຺ຕິ ເອວໍ ປາຏິເຍກ຺ກໍ ຄຫິຕານິ ພຫູນິ ສຈ຺ຈານີຕິ ອຕ຺ໂຖ. ນຸນ຺ນານີຕິ ນິຫຕານິ. ປຓຸນ຺ນານີຕິ ສຸຏ຺ຐຸ ນິຫຕານິ. ຈຕ຺ຕານີຕິ ວິສ຺ສຏ຺ຐານິ. ວນ຺ຕານີຕິ ວມິຕານິ. ມຸຕ຺ຕານີຕິ ຉິນ຺ນພນ຺ຘນານິ ກຕານິ. ປຫີນານີຕິ ປຊຫິຕານິ. ປຏິນິສ຺ສຏ຺ຐານີຕິ ຍຖາ ນ ປຸນ ຈິຕ຺ຕໍ ອາຣຸຫນ຺ຕິ, ເອວໍ ປຏິນິສ຺ສຊ຺ຊິຕານິ. ສພ຺ພາເນວ ຕານິ ຄຫິຕຄ຺ຄຫຓສ຺ສ ວິສ຺ສຏ຺ຐຠາວເວວຈນານິ.

ສມວຍສຏ຺ເຐສໂນຕິ ເອຕ຺ຖ ອວຍາຕິ ອນູນາ. ສຏ຺ຐາຕິ ວິສ຺ສຏ຺ຐາ. ສມ຺ມາ ອວຍາ ສຏ຺ຐາ ເອສນາ ອສ຺ສາຕິ ສມວຍສຏ຺ເຐສໂນ. ສມ຺ມາ ວິສ຺ສຏ຺ຐສພ຺ພເອສໂນຕິ ອຕ຺ໂຖ. ຣາຄາ ຈິຕ຺ຕໍ ວິມຸຕ຺ຕນ຺ຕິອາທີຫິ ມຄ຺ຄສ຺ສ ກິຈ຺ຈນິປ຺ຜຕ຺ຕິ ກຖິຕາ.

ຣາໂຄ ເມ ປຫີໂນຕິອາທີຫິ ປຈ຺ຈເວກ຺ຂຓາຍ ຜລໍ ກຖິຕໍ.