ວິມຸຕ຺ຕາຍຕນປຎ຺ຈກວຓ຺ຓນາ

໓໒໒. ວິມຸຕ຺ຕາຍຕນານີຕິ ວິມຸຈ຺ຈນກາຣຓານິ. ອຕ຺ຖປຏິສໍເວທິໂນຕິ ປາຬິອຕ຺ຖໍ ຊານນ຺ຕສ຺ສ. ຘມ຺ມປຏິສໍເວທິໂນຕິ ປາຬິໍ ຊານນ຺ຕສ຺ສ. ປາໂມຊ຺ຊນ຺ຕິ ຕຣຸຓປີຕິ. ປີຕີຕິ ຕຸຏ຺ຐາກາຣຠູຕາ ພລວປີຕິ. ກາໂຍຕິ ນາມກາໂຍ ປຏິປສ຺ສມ຺ຠຕິ. ສຸຂໍ ເວທຍຕີຕິ ສຸຂໍ ປຏິລຠຕິ. ຈິຕ຺ຕໍ ສມາຘິຍຕີຕິ ອຣຫຕ຺ຕຜລສມາຘິນາ ສມາຘິຍຕິ. ອຍຎ຺ຫິ ຕໍ ຘມ຺ມໍ ສຸຓນ຺ໂຕ ອາຄຕາຄຕຏ຺ຐາເນ ຌານວິປສ຺ສນາມຄ຺ຄຜລານິ ຊານາຕິ, ຕສ຺ສ ເອວໍ ຊານໂຕ ປີຕິ ອຸປ຺ປຊ຺ຊຕິ. ໂສ ຕສ຺ສາ ປີຕິຍາ ອນ຺ຕຣາ ໂອສກ຺ກິຕຸໍ ນ ເທນ຺ໂຕ ອຸປຈາຣກມ຺ມຏ຺ຐານິໂກ ຫຸຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓາຕິ. ຕໍ ສນ຺ຘາຍ ວຸຕ຺ຕໍ – ‘‘ຈິຕ຺ຕໍ ສມາຘິຍຕີ’’ຕິ. ເສເສສຸປິ ເອເສວ ນໂຍ. ອຍໍ ປນ ວິເສໂສ, ສມາຘິນິມິຕ຺ຕນ຺ຕິ ອຏ຺ຐຕິໍສາຍ ອາຣມ຺ມເຓສຸ ອຎ຺ຎຕໂຣ ສມາຘິເຍວ ສມາຘິນິມິຕ຺ຕໍ. ສຸຄ຺ຄຫິຕໍ ໂຫຕີຕິອາທີສຸ ອາຈຣິຍສນ຺ຕິເກ ກມ຺ມຏ຺ຐານໍ ອຸຄ຺ຄຓ຺ຫນ຺ເຕນ ສຸຏ຺ຐຸ ຄຫິຕໍ ໂຫຕິ. ສຸຏ຺ຐຸ ມນສິກຕນ຺ຕິ ສຸຏ຺ຐຸ ອຸປຘາຣິຕໍ. ສຸປ຺ປຏິວິທ຺ຘໍ ປຎ຺ຎາຍາຕິ ປຎ຺ຎາຍ ສຸຏ຺ຐຸ ປຈ຺ຈກ຺ຂໍ ກຕໍ. ຕສ຺ມິໍ ຘມ຺ເມຕິ ຕສ຺ມິໍ ກມ຺ມຏ຺ຐານປາຬິຘມ຺ເມ.

ວິມຸຕ຺ຕິປຣິປາຈນີຍາຕິ ວິມຸຕ຺ຕິ ວຸຈ຺ຈຕິ ອຣຫຕ຺ຕໍ, ຕໍ ປຣິປາເຈນ຺ຕີຕິ ວິມຸຕ຺ຕິປຣິປາຈນີຍາ. ອນິຈ຺ຈສຎ຺ຎາຕິ ອນິຈ຺ຈານຸປສ຺ສນາຎາເຓ ອຸປ຺ປນ຺ນສຎ຺ຎາ. ອນິຈ຺ເຈ ທຸກ຺ຂສຎ຺ຎາຕິ ທຸກ຺ຂານຸປສ຺ສນາຎາເຓ ອຸປ຺ປນ຺ນສຎ຺ຎາ. ທຸກ຺ເຂ ອນຕ຺ຕສຎ຺ຎາຕິ ອນຕ຺ຕານຸປສ຺ສນາຎາເຓ ອຸປ຺ປນ຺ນສຎ຺ຎາ. ປຫານສຎ຺ຎາຕິ ປຫານານຸປສ຺ສນາຎາເຓ ອຸປ຺ປນ຺ນສຎ຺ຎາ. ວິຣາຄສຎ຺ຎາຕິ ວິຣາຄານຸປສ຺ສນາຎາເຓ ອຸປ຺ປນ຺ນສຎ຺ຎາ.

‘‘ອິເມ ໂຂ ອາວຸໂສ’’ຕິອາທິ ວຸຕ຺ຕນເຍເນວ ໂຍເຊຕພ຺ພໍ. ອິຕິ ຉພ຺ພີສຕິຍາ ປຎ຺ຈການໍ ວເສນ ຕິໍສສຕປຎ຺ເຫ ກເຖນ຺ໂຕ ເຖໂຣ ສາມຄ຺ຄິຣສໍ ທສ຺ເສສີຕິ.

ປຎ຺ຈກວຓ຺ຓນາ ນິຏ຺ຐິຕາ.