ປາຕິໂມກ຺ຂສໍວຣວຓ຺ຓນາ

໓໖໔. ຕໂຕ ຕໍ ປຸຈ຺ຉນ຺ໂຕ ກຖໍ ປຏິປນ຺ໂນ ປນ, ມາຣິສາຕິອາທິມາຫ. ຕຕ຺ຖ ປາຕິໂມກ຺ຂສໍວຣາຍາຕິ ອຸຕ຺ຕມເຊຏ຺ຐກສີລສໍວຣາຍ. ກາຍສມາຈາຣມ຺ປີຕິອາທິ ເສວິຕພ຺ພກາຍສມາຈາຣາທິວເສນ ປາຕິໂມກ຺ຂສໍວຣທສ຺ສນຕ຺ຖໍ ວຸຕ຺ຕໍ. ສີລກຖາ ຈ ນາເມສາ ກມ຺ມປຖວເສນ ວາ ປຓ຺ຓຕ຺ຕິວເສນ ວາ ກເຖຕພ຺ພາ ໂຫຕິ.

ຕຕ຺ຖ ກມ຺ມປຖວເສນ ກເຖນ຺ເຕນ ອເສວິຕພ຺ພກາຍສມາຈາໂຣ ຕາວ ປາຓາຕິປາຕອທິນ຺ນາທານມິຈ຺ຉາຈາເຣຫິ ກເຖຕພ຺ໂພ. ປຓ຺ຓຕ຺ຕິວເສນ ກເຖນ຺ເຕນ ກາຍທ຺ວາເຣ ປຎ຺ຎຕ຺ຕສິກ຺ຂາປທວີຕິກ຺ກມວເສນ ກເຖຕພ຺ໂພ. ເສວິຕພ຺ພກາຍສມາຈາໂຣ ປາຓາຕິປາຕາທິເວຣມຓີຫິ ເຈວ ກາຍທ຺ວາເຣ ປຎ຺ຎຕ຺ຕສິກ຺ຂາປທອວີຕິກ຺ກເມນ ຈ ກເຖຕພ຺ໂພ. ອເສວິຕພ຺ພວຈີສມາຈາໂຣ ມຸສາວາທາທິວຈີທຸຈ຺ຈຣິເຕນ ເຈວ ວຈີທ຺ວາເຣ ປຎ຺ຎຕ຺ຕສິກ຺ຂາປທວີຕິກ຺ກເມນ ຈ ກເຖຕພ຺ໂພ. ເສວິຕພ຺ພວຈີສມາຈາໂຣ ມຸສາວາທາທິເວຣມຓີຫິ ເຈວ ວຈີທ຺ວາເຣ ປຎ຺ຎຕ຺ຕສິກ຺ຂາປທອວີຕິກ຺ກເມນ ຈ ກເຖຕພ຺ໂພ.

ປຣິເຍສນາ ປນ ກາຍວາຈາຫິ ປຣິເຍສນາເຍວ. ສາ ກາຍວຈີສມາຈາຣຄຫເຓນ ຄຫິຕາປິ ສມານາ ຍສ຺ມາ ອາຊີວຏ຺ຐມກສີລໍ ນາມ ເອຕສ຺ມິຎ຺ເຎວ ທ຺ວາຣທ຺ວເຍ ອຸປ຺ປຊ຺ຊຕິ, ນ ອາກາເສ, ຕສ຺ມາ ອາຊີວຏ຺ຐມກສີລທສ຺ສນຕ຺ຖໍ ວິສຸໍ ວຸຕ຺ຕາ. ຕຕ຺ຖ ນເສວິຕພ຺ພປຣິເຍສນາ ອນຣິຍປຣິເຍສນາຍ ກເຖຕພ຺ພາ. ເສວິຕພ຺ພປຣິເຍສນາ ອຣິຍປຣິເຍສນາຍ. ວຸຕ຺ຕຎ຺ເຫຕໍ –

‘‘ທ຺ເວມາ, ຠິກ຺ຂເວ, ປຣິເຍສນາ ອນຣິຍາ ຈ ປຣິເຍສນາ, ອຣິຍາ ຈ ປຣິເຍສນາ. ກຕມາ ຈ, ຠິກ຺ຂເວ, ອນຣິຍາ ປຣິເຍສນາ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຊາຕິຘມ຺ໂມ ສມາໂນ ຊາຕິຘມ຺ມໍເຍວ ປຣິເຍສຕິ, ອຕ຺ຕນາ ຊຣາຘມ຺ໂມ, ພ຺ຍາຘິຘມ຺ໂມ, ມຣຓຘມ຺ໂມ, ໂສກຘມ຺ໂມ, ສໍກິເລສຘມ຺ໂມ ສມາໂນ ສໍກິເລສຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ຊາຕິຘມ຺ມໍ ວເທຖ? ປຸຕ຺ຕຠຣິຍໍ, ຠິກ຺ຂເວ, ຊາຕິຘມ຺ມໍ, ທາສິທາສໍ ຊາຕິຘມ຺ມໍ ອເຊຬກໍ ຊາຕິຘມ຺ມໍ, ກຸກ຺ກຸຏສູກຣໍ ຊາຕິຘມ຺ມໍ, ຫຕ຺ຖິຄວາສ຺ສວຬວໍ ຊາຕິຘມ຺ມໍ, ຊາຕຣູປຣຊຕໍ ຊາຕິຘມ຺ມໍ. ຊາຕິຘມ຺ມາ ເຫເຕ, ຠິກ຺ຂເວ, ອຸປຘໂຍ, ເອຕ຺ຖາຍໍ ຄຖິໂຕ ມຸຈ຺ຉິໂຕ ອຊ຺ຌາປນ຺ໂນ ອຕ຺ຕນາ ຊາຕິຘມ຺ໂມ ສມາໂນ ຊາຕິຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ຊຣາຘມ຺ມໍ ວເທຖ? ປຸຕ຺ຕຠຣິຍໍ, ຠິກ຺ຂເວ, ຊຣາຘມ຺ມໍ…ເປ… ຊຣາຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ພ຺ຍາຘິຘມ຺ມໍ ວເທຖ? ປຸຕ຺ຕຠຣິຍໍ, ຠິກ຺ຂເວ, ພ຺ຍາຘິຘມ຺ມໍ, ທາສິທາສໍ ພ຺ຍາຘິຘມ຺ມໍ, ອເຊຬກໍ, ກຸກ຺ກຸຏສູກຣໍ, ຫຕ຺ຖິຄວາສ຺ສວຬວໍ ພ຺ຍາຘິຘມ຺ມໍ. ພ຺ຍາຘິຘມ຺ມາ ເຫເຕ, ຠິກ຺ຂເວ, ອຸປຘໂຍ, ເອຕ຺ຖາຍໍ ຄຖິໂຕ ມຸຈ຺ຉິໂຕ ອຊ຺ຌາປນ຺ໂນ ອຕ຺ຕນາ ພ຺ຍາຘິຘມ຺ໂມ ສມາໂນ ພ຺ຍາຘິຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ມຣຓຘມ຺ມໍ ວເທຖ? ປຸຕ຺ຕຠຣິຍໍ, ຠິກ຺ຂເວ, ມຣຓຘມ຺ມໍ…ເປ… ມຣຓຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ໂສກຘມ຺ມໍ ວເທຖ? ປຸຕ຺ຕຠຣິຍໍ…ເປ… ໂສກຘມ຺ມໍເຍວ ປຣິເຍສຕິ.

ກິຎ຺ຈ, ຠິກ຺ຂເວ, ສໍກິເລສຘມ຺ມໍ ວເທຖ…ເປ… ຊາຕຣູປຣຊຕໍ ສໍກິເລສຘມ຺ມໍ. ສໍກິເລສຘມ຺ມາ, ເຫເຕ, ຠິກ຺ຂເວ, ອຸປຘໂຍ, ເອຕ຺ຖາຍໍ ຄຖິໂຕ ມຸຈ຺ຉິໂຕ ອຊ຺ຌາປນ຺ໂນ ອຕ຺ຕນາ ສໍກິເລສຘມ຺ໂມ ສມາໂນ ສໍກິເລສຘມ຺ມໍເຍວ ປຣິເຍສຕິ. ອຍໍ, ຠິກ຺ຂເວ, ອນຣິຍາ ປຣິເຍສນາຕິ (ມ. ນິ. ໑.໒໗໔).

ອປິຈ ກຸຫນາທິວເສນ ປຎ຺ຈວິຘາ, ອໂຄຈຣວເສນ ຉພ຺ພິຘາ ເວຊ຺ຊກມ຺ມາທິວເສນ ເອກວີສຕິວິຘາ, ເອວໍ ປວຕ຺ຕາ ສພ຺ພາປິ ອເນສນາ ອນຣິຍປຣິເຍສນາເຍວາຕິ ເວທິຕພ຺ພາ.

‘‘ກຕມາ ຈ, ຠິກ຺ຂເວ, ອຣິຍາ ປຣິເຍສນາ? ອິຘ, ຠິກ຺ຂເວ, ເອກຈ຺ໂຈ ອຕ຺ຕນາ ຊາຕິຘມ຺ໂມ ສມາໂນ ຊາຕິຘມ຺ເມ ອາທີນວໍ ວິທິຕ຺ວາ ອຊາຕໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ, ອຕ຺ຕນາ ຊຣາຘມ຺ໂມ, ພ຺ຍາຘິ, ມຣຓ, ໂສກ, ສໍກິເລສຘມ຺ໂມ ສມາໂນ ສໍກິເລສຘມ຺ເມ ອາທີນວໍ ວິທິຕ຺ວາ ອສໍກິລິຏ຺ຐໍ ອນຸຕ຺ຕຣໍ ໂຍຄກ຺ເຂມໍ ນິພ຺ພານໍ ປຣິເຍສຕິ. ອຍໍ ອຣິຍາ ປຣິເຍສນາຕິ (ມ. ນິ. ໑.໒໗໕).

ອປິຈ ປຎ຺ຈ ກຸຫນາທີນິ ຉ ອໂຄຈເຣ ເອກວີສຕິວິຘຎ຺ຈ ອເນສນໍ ວຊ຺ເຊຕ຺ວາ ຠິກ຺ຂາຈຣິຍາຍ ຘມ຺ເມນ ສເມນ ປຣິເຍສນາປິ ອຣິຍປຣິເຍສນາເຍວາຕິ ເວທິຕພ຺ພາ.

ເອຕ຺ຖ ຈ ໂຍ ໂຍ ‘‘ນ ເສວິຕພ຺ໂພ’’ຕິ ວຸຕ຺ໂຕ, ໂສ ໂສ ປຸພ຺ພຠາເຄ ປາຓາຕິປາຕາທີນໍ ສມ຺ຠາຣປຣິເຍສນາປໂຍຄກຣຓຄມນກາລໂຕ ປຏ຺ຐາຍ ນ ເສວິຕພ຺ໂພວ. ອິຕໂຣ ອາທິໂຕ ປຏ຺ຐາຍ ເສວິຕພ຺ໂພ, ອສກ຺ໂກນ຺ເຕນ ຈິຕ຺ຕມ຺ປິ ອຸປ຺ປາເທຕພ຺ພໍ. ອປິຈ ສງ຺ຆເຠທາທີນໍ ອຕ຺ຖາຍ ປຣກ຺ກມນ຺ຕານໍ ເທວທຕ຺ຕາທີນໍ ວິຍ ກາຍສມາຈາໂຣ ນ ເສວິຕພ຺ໂພ, ທິວສສ຺ສ ທ຺ວຕ຺ຕິກ຺ຂຕ຺ຕຸໍ ຕິຓ຺ຓໍ ຣຕນານໍ ອຸປຏ຺ຐານຄມນາທິວເສນ ປວຕ຺ໂຕ ຘມ຺ມເສນາປຕິມຫາໂມຄ຺ຄລ຺ລານຕ຺ເຖຣາທີນໍ ວິຍ ກາຍສມາຈາໂຣ ເສວິຕພ຺ໂພ. ຘນຸຄ຺ຄຫເປສນາທິວເສນ ວາຈໍ ຠິນ຺ທນ຺ຕານໍ ເທວທຕ຺ຕາທີນໍ ວິຍ ວຈີສມາຈາໂຣ ນ ເສວິຕພ຺ໂພ, ຕິຓ຺ຓໍ ຣຕນານໍ ຄຸຓກິຕ຺ຕນາທິວເສນ ປວຕ຺ໂຕ ຘມ຺ມເສນາປຕິມຫາໂມຄ຺ຄລ຺ລານຕ຺ເຖຣາທີນໍ ວິຍ ວຈີສມາຈາໂຣ ເສວິຕພ຺ໂພ. ອນຣິຍປຣິເຍສນໍ ປຣິເຍສນ຺ຕານໍ ເທວທຕ຺ຕາທີນໍ ວິຍ ປຣິເຍສນາ ນ ເສວິຕພ຺ພາ, ອຣິຍປຣິເຍສນເມວ ປຣິເຍສນ຺ຕານໍ ຘມ຺ມເສນາປຕິມຫາໂມຄ຺ຄລ຺ລານຕ຺ເຖຣາທີນໍ ວິຍ ປຣິເຍສນາ ເສວິຕພ຺ພາ.

ເອວໍ ປຏິປນ຺ໂນ ໂຂຕິ ເອວໍ ອເສວິຕພ຺ພໍ ກາຍວຈີສມາຈາຣໍ ປຣິເຍສນຎ຺ຈ ປຫາຍ ເສວິຕພ຺ພານໍ ປາຣິປູຣິຍາ ປຏິປນ຺ໂນ, ເທວານມິນ຺ທ, ຠິກ຺ຂຸ ປາຕິໂມກ຺ຂສໍວຣາຍ ອຸຕ຺ຕມເຊຏ຺ຐກສີລສໍວຣຕ຺ຖາຍ ປຏິປນ຺ໂນ ນາມ ໂຫຕີຕິ ຠຄວາ ຂີຓາສວສ຺ສ ອາຄມນີຍປຸພ຺ພຠາຄປຏິປທໍ ກເຖສິ.