ໂສມນສ຺ສປຏິລາຠກຖາວຓ຺ຓນາ

໓໖໘. ເວທປຏິລາຠນ຺ຕິ ຕຸຏ຺ຐິປຏິລາຠໍ. ເທວາສຸຣສງ຺ຄາໂມຕິ ເທວານຎ຺ຈ ອສຸຣານຎ຺ຈ ສງ຺ຄາໂມ. ສມຸປພ຺ຍູຬ຺ໂຫຕິ ສມາປນ຺ໂນ ນລາເຏນ ນລາຏໍ ປຫຣຓາກາຣປ຺ປຕ຺ໂຕ ວິຍ. ເອເຕສໍ ກິຣ ກທາຈິ ມຫາສມຸທ຺ທປິຏ຺ເຐ ສງ຺ຄາໂມ ໂຫຕິ ຕຕ຺ຖ ປນ ເຉທນວິຊ຺ຌນາທີຫິ ອຎ຺ຎມຎ຺ຎໍ ຆາໂຕ ນາມ ນຕ຺ຖິ, ທາຣຸເມຓ຺ຑກຍຸທ຺ຘໍ ວິຍ ຊຍປຣາຊຍມຕ຺ຕເມວ ໂຫຕິ. ກທາຈິ ເທວາ ຊິນນ຺ຕິ, ກທາຈິ ອສຸຣາ. ຕຕ຺ຖ ຍສ຺ມິໍ ສງ຺ຄາເມ ເທວາ ປຸນ ອປຈ຺ຈາຄມນາຍ ອສຸເຣ ຊິນິໍສຸ, ຕໍ ສນ຺ຘາຍ ຕສ຺ມິໍ ໂຂ ປນ ຠນ຺ເຕຕິອາທິມາຫ. ອຸຠຍເມຕນ຺ຕິ ອຸຠຍໍ ເອຕໍ. ທຸວິຘມ຺ປິ ໂອຊໍ ເອຕ຺ຖ ເທວໂລເກ ເທວາເຍວ ປຣິຠຸຎ຺ຊິສ຺ສນ຺ຕີຕິ ເອວມສ຺ສ ອາວຊ຺ຊນ຺ຕສ຺ສ ພລວປີຕິໂສມນສ຺ສໍ ອຸປ຺ປຊ຺ຊິ. ສທຓ຺ຑາວຈໂຣຕິ ສທຓ຺ຑາວຈຣໂກ, ທຓ຺ຑຄ຺ຄຫເຓນ ສຕ຺ຖຄ຺ຄຫເຓນ ສທ຺ຘິໍ ອໂຫສິ, ນ ນິກ຺ຂິຕ຺ຕທຓ຺ຑສຕ຺ໂຖຕິ ທສ຺ເສຕິ. ເອກນ຺ຕນິພ຺ພິທາຍາຕິ ເອກນ຺ເຕເນວ ວຏ຺ເຏ ນິພ຺ພິນ຺ທນຕ຺ຖາຍາຕິ ສພ຺ພໍ ມຫາໂຄວິນ຺ທສຸຕ຺ເຕ ວຸຕ຺ຕເມວ.

໓໖໙. ປເວເທສີຕິ ກເຖສິ ທີເປສິ. ອິເຘວາຕິ ອິມສ຺ມິຎ຺ເຎວ ໂອກາເສ. ເທວຠູຕສ຺ສ ເມ ສໂຕຕິ ເທວສ຺ສ ເມ ສໂຕ. ປຸນຣາຍຸ ຈ ເມ ລທ຺ໂຘຕິ ປຸນ ອຎ຺ເຎນ ກມ຺ມວິປາເກນ ເມ ຊີວິຕໍ ລທ຺ຘນ຺ຕິ, ອິມິນາ ອຕ຺ຕໂນ ຈຸຕຠາວໍ ເຈວ ອຸປປນ຺ນຠາວຎ຺ຈ ອາວິກໂຣຕິ.

ທິວິຍາ ກາຍາຕິ ທິພ຺ພາ ອຕ຺ຕຠາວາ. ອາຍຸໍ ຫິຕ຺ວາ ອມານຸສນ຺ຕິ ທິພ຺ພໍ ອາຍຸໍ ຊຫິຕ຺ວາ. ອມູຬ຺ໂຫ ຄພ຺ຠເມສ຺ສາມີຕິ ນິຍຕຄຕິກຕ຺ຕາ ອມູຬ຺ໂຫ ຫຸຕ຺ວາ. ຍຕ຺ຖ ເມ ຣມຕີ ມໂນຕິ ຍຕ຺ຖ ເມ ມໂນ ຣມິສ຺ສຕິ, ຕຕ຺ເຖວ ຂຕ຺ຕິຍກຸລາທີສຸ ຄພ຺ຠໍ ອຸປຄຈ຺ຉິສ຺ສາມີຕິ ສຕ຺ຕກ຺ຂຕ຺ຕຸໍ ເທເວ ຈ ມານຸເສ ຈາຕິ ອິມມຕ຺ຖໍ ທີເປຕິ.

ຎາເຍນ ວິຫຣິສ຺ສາມີຕິ ມນຸສ຺ເສສຸ ອຸປປນ຺ໂນປິ ມາຕຣໍ ຊີວິຕາ ໂວໂຣປນາທີນໍ ອຠພ຺ພຕ຺ຕາ ຎາເຍນ ກາຣເຓນ ສເມນ ວິຫຣິສ຺ສາມີຕິ ອຕ຺ໂຖ.

ສມ຺ໂພຘິ ເຈ ຠວິສ຺ສຕີຕິ ອິທໍ ສກທາຄາມິມຄ຺ຄໍ ສນ຺ຘາຍ ວທຕິ, ສເຈ ສກທາຄາມີ ຠວິສ຺ສາມີຕິ ທີເປຕິ. ອຎ຺ຎາຕາ ວິຫຣິສ຺ສາມີຕິ ອຎ຺ຎາຕາ ອາຊານິຕຸກາໂມ ຫຸຕ຺ວາ ວິຫຣິສ຺ສາມິ. ສ຺ເວວ ອນ຺ໂຕ ຠວິສ຺ສຕີຕິ ໂສ ເອວ ເມ ມນຸສ຺ສໂລເກ ອນ຺ໂຕ ຠວິສ຺ສຕີຕິ.

ປຸນ ເທໂວ ຠວິສ຺ສາມິ, ເທວໂລກສ຺ມິໍ ອຸຕ຺ຕໂມຕິ ປຸນ ເທວໂລກສ຺ມິໍ ອຸຕ຺ຕໂມ ສກ຺ໂກ ເທວານມິນ຺ໂທ ຠວິສ຺ສາມີຕິ ວທຕິ.

ອນ຺ຕິເມ ວຕ຺ຕມານມ຺ຫີຕິ ອນ຺ຕິເມ ຠເວ ວຕ຺ຕມາເນ. ໂສ ນິວາໂສ ຠວິສ຺ສຕີຕິ ເຍ ເຕ ອາຍຸນາ ຈ ປຎ຺ຎາຍ ຈ ອກນິຏ຺ຐາ ເຊຏ຺ຐກາ ສພ຺ພເທເວຫິ ປຓີຕຕຣາ ເທວາ, ອວສາເນ ເມ ໂສ ນິວາໂສ ຠວິສ຺ສຕິ. ອຍໍ ກິຣ ຕໂຕ ສກ຺ກຕ຺ຕຠາວໂຕ ຈຸໂຕ ຕສ຺ມິໍ ອຕ຺ຕຠາເວ ອນາຄາມິມຄ຺ຄສ຺ສ ປຏິລທ຺ຘຕ຺ຕາ ອຸທ຺ຘໍໂສໂຕ ອກນິຏ຺ຐຄາມີ ຫຸຕ຺ວາ ອວິຫາທີສຸ ນິພ຺ພຕ຺ຕນ຺ໂຕ ອວສາເນ ອກນິຏ຺ເຐ ນິພ຺ພຕ຺ຕິສ຺ສຕິ. ຕໍ ສນ຺ຘາຍ ເອວມາຫ. ເອສ ກິຣ ອວິເຫສຸ ກປ຺ປສຫສ຺ສໍ ວສິສ຺ສຕິ, ອຕປ຺ເປສຸ ທ຺ເວ ກປ຺ປສຫສ຺ສານິ, ສຸທສ຺ເສສຸ ຈຕ຺ຕາຣິ ກປ຺ປສຫສ຺ສານິ, ສຸທສ຺ສີສຸ ອຏ຺ຐ, ອກນິຏ຺ເຐສຸ ໂສຬສາຕິ ເອກຕິໍສ ກປ຺ປສຫສ຺ສານິ ພ຺ຣຫ຺ມອາຍຸໍ ອນຸຠວິສ຺ສຕິ. ສກ຺ໂກ ເທວຣາຊາ ອນາຖປິຓ຺ຑິໂກ ຄຫປຕິ ວິສາຂາ ມຫາອຸປາສິກາຕິ ຕໂຍປິ ຫິ ອິເມ ເອກປ຺ປມາຓອາຍຸກາ ເອວ, ວຏ຺ຏາຠິຣຕສຕ຺ຕາ ນາມ ເອເຕຫິ ສທິສາ ສຸຂຠາຄິໂນ ນາມ ນຕ຺ຖິ.

໓໗໐. ອປຣິໂຍສິຕສງ຺ກປ຺ໂປຕິ ອນິຏ຺ຐິຕມໂນຣໂຖ. ຍສ຺ສຸ ມຎ຺ຎາມິ ສມເຓຕິ ເຍ ຈ ສມເຓ ປວິວິຕ຺ຕວິຫາຣິໂນຕິ ມຎ຺ຎາມິ.

ອາຣາຘນາຕິ ສມ຺ປາທນາ. ວິຣາຘນາຕິ ອສມ຺ປາທນາ. ນ ສມ຺ປາຍນ຺ຕີຕິ ສມ຺ປາເທຕ຺ວາ ກເຖຕຸໍ ນ ສກ຺ໂກນ຺ຕິ.

ອາທິຈ຺ຈພນ຺ຘຸນນ຺ຕິ ອາທິຈ຺ໂຈປິ ໂຄຕມໂຄຕ຺ໂຕ, ຠຄວາປິ ໂຄຕມໂຄຕ຺ໂຕ, ຕສ຺ມາ ເອວມາຫ. ຍໍ ກໂຣມສີຕິ ຍໍ ປຸພ຺ເພ ພ຺ຣຫ຺ມຸໂນ ນມກ຺ກາຣໍ ກໂຣມ. ສມໍ ເທເວຫີຕິ ເທເວຫິ ສທ຺ຘິໍ, ອິໂຕ ປຏ຺ຐາຍ ອິທານິ ອມ຺ຫາກໍ ພ຺ຣຫ຺ມຸໂນ ນມກ຺ກາຣກຣຓໍ ນຕ຺ຖີຕິ ທສ຺ເສຕິ. ສາມໍ ກໂຣມາຕິ ນມກ຺ກາຣໍ ກໂຣມ.

໓໗໑. ປຣາມສິຕ຺ວາຕິ ຕຸຏ຺ຐຈິຕ຺ໂຕ ສຫາຍໍ ຫຕ຺ເຖນ ຫຕ຺ຖມ຺ຫິ ປຫຣນ຺ໂຕ ວິຍ ປຖວິໍ ປຫຣິຕ຺ວາ, ສກ຺ຂິຠາວຕ຺ຖາຍ ວາ ປຫຣິຕ຺ວາ ‘‘ຍຖາ ຕ຺ວໍ ນິຈ຺ຈໂລ, ເອວມຫໍ ຠຄວຕີ’’ຕິ. ອຊ຺ຌິຏ຺ຐປຎ຺ຫາຕິ ອຊ຺ເຌສິຕປຎ຺ຫາ ປຕ຺ຖິຕປຎ຺ຫາ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍໍ

ສກ຺ກປຎ຺ຫສຸຕ຺ຕວຓ຺ຓນາ ນິຏ຺ຐິຕາ.