ກມ຺ມາຣປຸຕ຺ຕຈຸນ຺ທວຕ຺ຖຸວຓ຺ຓນາ

໑໘໙. ກມ຺ມາຣປຸຕ຺ຕສ຺ສາຕິ ສຸວຓ຺ຓກາຣປຸຕ຺ຕສ຺ສ. ໂສ ກິຣ ອຑ຺ໂຒ ມຫາກຸຏຸມ຺ພິໂກ ຠຄວໂຕ ປຐມທສ຺ສເນເນວ ໂສຕາປນ຺ໂນ ຫຸຕ຺ວາ ອຕ຺ຕໂນ ອມ຺ພວເນ ວິຫາຣໍ ກາຣາເປຕ຺ວາ ນິຍ຺ຍາເຕສິ. ຕໍ ສນ຺ຘາຍ ວຸຕ຺ຕໍ – ‘‘ອມ຺ພວເນ’’ຕິ.

ສູກຣມທ຺ທວນ຺ຕິ ນາຕິຕຣຸຓສ຺ສ ນາຕິຊິຓ຺ຓສ຺ສ ເອກເຊຏ຺ຐກສູກຣສ຺ສ ປວຕ຺ຕມໍສໍ. ຕໍ ກິຣ ມຸທຸ ເຈວ ສິນິທ຺ຘຎ຺ຈ ໂຫຕິ, ຕໍ ປຏິຍາທາເປຕ຺ວາ ສາຘຸກໍ ປຈາເປຕ຺ວາຕິ ອຕ຺ໂຖ. ເອເກ ຠຓນ຺ຕິ – ‘‘ສູກຣມທ຺ທວນ຺ຕິ ປນ ມຸທຸໂອທນສ຺ສ ປຎ຺ຈໂຄຣສຍູສປາຈນວິຘານສ຺ສ ນາເມຕໍ, ຍຖາ ຄວປານໍ ນາມ ປາກນາມ’’ນ຺ຕິ. ເກຈິ ຠຓນ຺ຕິ – ‘‘ສູກຣມທ຺ທວໍ ນາມ ຣສາຍນວິຘິ, ຕໍ ປນ ຣສາຍນສຕ຺ເຖ ອາຄຈ຺ຉຕິ, ຕໍ ຈຸນ຺ເທນ – ‘ຠຄວໂຕ ປຣິນິພ຺ພານໍ ນ ຠເວຍ຺ຍາ’ຕິ ຣສາຍນໍ ປຏິຍຕ຺ຕ’’ນ຺ຕິ. ຕຕ຺ຖ ປນ ທ຺ວິສຫສ຺ສທີປປຣິວາເຣສຸ ຈຕູສຸ ມຫາທີເປສຸ ເທວຕາ ໂອຊໍ ປກ຺ຂິປິໍສຸ.

ນາຫໍ ຕນ຺ຕິ ອິມໍ ສີຫນາທໍ ກິມຕ຺ຖໍ ນທຕິ? ປຣູປວາທໂມຈນຕ຺ຖໍ. ອຕ຺ຕນາ ປຣິຠຸຕ຺ຕາວເສສໍ ເນວ ຠິກ຺ຂູນໍ, ນ ມນຸສ຺ສານໍ ທາຕຸໍ ອທາສິ, ອາວາເຏ ນິຂຓາເປຕ຺ວາ ວິນາເສສີຕິ ຫິ ວຕ຺ຕຸກາມານໍ ອິທໍ ສຸຕ຺ວາ ວຈໂນກາໂສ ນ ຠວິສ຺ສຕີຕິ ປເຣສໍ ອຸປວາທໂມຈນຕ຺ຖໍ ສີຫນາທໍ ນທຕີຕິ.

໑໙໐. ຠຸຕ຺ຕສ຺ສ ຈ ສູກຣມທ຺ທເວນາຕິ ຠຸຕ຺ຕສ຺ສ ອຸທປາທິ, ນ ປນ ຠຸຕ຺ຕປຈ຺ຈຍາ. ຍທິ ຫິ ອຠຸຕ຺ຕສ຺ສ ອຸປ຺ປຊ຺ຊິສ຺ສຖ, ອຕິຂໂຣ ຠວິສ຺ສຕິ. ສິນິທ຺ຘໂຠຊນໍ ຠຸຕ຺ຕຕ຺ຕາ ປນສ຺ສ ຕນຸເວທນາ ອໂຫສິ. ເຕເນວ ປທສາ ຄນ຺ຕຸໍ ອສກ຺ຂິ. ວິເຣຈມາໂນຕິ ອຠິຓ຺ຫໍ ປວຕ຺ຕໂລຫິຕວິເຣຈໂນວ ສມາໂນ. ອໂວຈາຕິ ອຕ຺ຕນາ ປຕ຺ຖິຕຏ຺ຐາເນ ປຣິນິພ຺ພານຕ຺ຖາຍ ເອວມາຫ. ອິມາ ປນ ຘມ຺ມສງ຺ຄາຫກຕ຺ເຖເຣຫິ ຐປິຕຄາຖາໂຍຕິ ເວທິຕພ຺ພາ.