ເທວຕາໂຣຈນວຓ຺ຓນາ

໙໑. ເອຕ຺ຕາວຕາ ຈ ອິມິນາ ວິປສ຺ສິສ຺ສ ຠຄວໂຕ ອປທານານຸສາເຣນ ວິຕ຺ຖາຣກຖເນນ – ‘‘ຕຖາຄຕສ຺ເສເວສາ, ຠິກ຺ຂເວ, ຘມ຺ມຘາຕຸ ສຸປ຺ປຏິວິທ຺ຘາ’’ຕິ ເອວໍ ວຸຕ຺ຕາຍ ຘມ຺ມຘາຕຸຍາ ສຸປ຺ປຏິວິທ຺ຘຠາວໍ ປກາເສຕ຺ວາ ອິທານິ – ‘‘ເທວຕາປິ ຕຖາຄຕສ຺ສ ເອຕມຕ຺ຖໍ ອາໂຣເຈສຸ’’ນ຺ຕິ ວຸຕ຺ຕໍ ເທວຕາໂຣຈນໍ ປກາເສຕຸໍ ເອກມິທາຫນ຺ຕິອາທິມາຫ.

ຕຕ຺ຖ ສຸຠຄວເນຕິ ເອວໍນາມເກ ວເນ. ສາລຣາຊມູເລຕິ ວນປ຺ປຕິເຊຏ຺ຐກສ຺ສ ມູເລ. ກາມຈ຺ຉນ຺ທໍ ວິຣາເຊຕ຺ວາຕິ ອນາຄາມິມຄ຺ເຄນ ມູລສມຸຄ຺ຆາຕວເສນ ວິຣາເຊຕ຺ວາ. ຍຖາ ຈ ວິປສ຺ສິສ຺ສ, ເອວໍ ເສສພຸທ຺ຘານມ຺ປິ ສາສເນ ວຸຕ຺ຖພ຺ຣຫ຺ມຈຣິຍາ ເທວຕາ ອາໂຣຈຍິໍສຸ, ປາຬິ ປນ ວິປສ຺ສິສ຺ສ ເຈວ ອມ຺ຫາກຎ຺ຈ ຠຄວໂຕ ວເສນ ອາຄຕາ.

ຕຕ຺ຖ ອຕ຺ຕໂນ ສມ຺ປຕ຺ຕິຍາ ນ ຫາຍນ຺ຕິ, ນ ວິຫາຍນ຺ຕີຕິ ອວິຫາ. ນ ກຎ຺ຈິ ສຕ຺ຕໍ ຕປນ຺ຕີຕິ ອຕປ຺ປາ. ສຸນ຺ທຣທສ຺ສນາ ອຠິຣູປາ ປາສາທິກາຕິ ສຸທສ຺ສາ. ສຸຏ຺ຐຸ ປສ຺ສນ຺ຕິ, ສຸນ຺ທຣເມເຕສໍ ວາ ທສ຺ສນນ຺ຕິ ສຸທສ຺ສີ. ສພ຺ເພເຫວ ຈ ສຄຸເຓຫິ ຠວສມ຺ປຕ຺ຕິຍາ ຈ ເຊຏ຺ຐາ, ນຕ຺ເຖຕ຺ຖ ກນິຏ຺ຐາຕິ ອກນິຏ຺ຐາ.

ອິຘ ຐຕ຺ວາ ຠາຓວາຣາ ສໂມຘາເນຕພ຺ພາ. ອິມສ຺ມິຎ຺ຫິ ສຸຕ຺ເຕ ວິປສ຺ສິສ຺ສ ຠຄວໂຕ ອປທານວເສນ ຕໂຍ ຠາຓວາຣາ ວຸຕ຺ຕາ. ຍຖາ ຈ ວິປສ຺ສິສ຺ສ, ເອວໍ ສິຂີອາທີນມ຺ປິ ອປທານວເສນ ວຸຕ຺ຕາວ. ປາຬິ ປນ ສງ຺ຂິຕ຺ຕາ. ອິຕິ ສຕ຺ຕນ຺ນໍ ພຸທ຺ຘານໍ ວເສນ ອມ຺ຫາກໍ ຠຄວຕາ ເອກວີສຕິ ຠາຓວາຣາ ກຖິຕາ. ຕຖາ ອວິເຫຫິ. ຕຖາ ອຕປ຺ເປຫິ. ຕຖາ ສຸທສ຺ເສຫິ. ຕຖາ ສຸທສ຺ສີຫິ. ຕຖາ ອກນິຏ຺ເຐຫີຕິ ສພ຺ພມ຺ປິ ຉພ຺ພີສຕິຠາຓວາຣສຕໍ ໂຫຕິ. ເຕປິຏເກ ພຸທ຺ຘວຈເນ ອຎ຺ຎໍ ສຸຕ຺ຕໍ ຉພ຺ພີສຕິຠາຓວາຣສຕປຣິມາຓໍ ນາມ ນຕ຺ຖິ, ສຸຕ຺ຕນ຺ຕຣາຊາ ນາມ ອຍໍ ສຸຕ຺ຕນ຺ໂຕຕິ ເວທິຕພ຺ໂພ. ອິໂຕ ປຣໍ ອນຸສນ຺ຘິທ຺ວຍມ຺ປິ ນິຍ຺ຍາເຕນ຺ໂຕ ອິຕິ ໂຂ ຠິກ຺ຂເວຕິອາທິມາຫ. ຕໍ ສພ຺ພໍ ອຸຕ຺ຕານເມວາຕິ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍໍ

ມຫາປທານສຸຕ຺ຕວຓ຺ຓນາ ນິຏ຺ຐິຕາ.