ມຫາຊນກາຍອນຸປພ຺ພຊ຺ຊາວຓ຺ຓນາ

໕໕. ສຸຕ຺ວານ ເຕສນ຺ຕິ ເຕສໍ ຈຕຸຣາສີຕິຍາ ປາຓສຫສ຺ສານໍ ສຸຕ຺ວາ ເອຕທໂຫສິ. ໂອຣໂກຕິ ອູນໂກ ລາມໂກ. ອນຸປພ຺ພຊິໍສູຕິ ອນຸປພ຺ພຊິຕານິ. ກສ຺ມາ ປເນຕ຺ຖ ຍຖາ ປຣໂຕ ຂຓ຺ຑຕິສ຺ສານໍ ອນຸປພ຺ພຊ຺ຊາຍ – ‘‘ພນ຺ຘຸມຕິຍາ ຣາຊຘານິຍາ ນິກ຺ຂມິຕ຺ວາ’’ຕິ ວຸຕ຺ຕໍ, ເອວໍ ນ ວຸຕ຺ຕນ຺ຕິ? ນິກ຺ຂມິຕ຺ວາ ສຸຕຕ຺ຕາ. ເອເຕ ກິຣ ສພ຺ເພປິ ວິປສ຺ສິສ຺ສ ກຸມາຣສ຺ສ ອຸປຏ຺ຐາກປຣິສາວ, ເຕ ປາໂຕວ ອຸປຏ຺ຐານໍ ອາຄນ຺ຕ຺ວາ ກຸມາຣໍ ອທິສ຺ວາ ປາຕຣາສຕ຺ຖາຍ ຄນ຺ຕ຺ວາ ຠຸຕ຺ຕປາຕຣາສາ ອາຄມ຺ມ ‘‘ກຸຫິໍ ກຸມາໂຣ’’ຕິ ປຸຈ຺ຉິຕ຺ວາ ‘‘ອຸຍ຺ຍານຠູມິໍ ຄໂຕ’’ຕິ ສຸຕ຺ວາ ‘‘ຕຕ຺ເຖວ ນໍ ທກ຺ຂິສ຺ສາມາ’’ຕິ ນິກ຺ຂມນ຺ຕາ ນິວຕ຺ຕມານໍ ສາຣຖິໍ ທິສ຺ວາ – ‘‘ກຸມາໂຣ ປພ຺ພຊິໂຕ’’ຕິ ຈສ຺ສ ວຈນໍ ສຸຕ຺ວາ ສຸຕຏ຺ຐາເນເຍວ ສພ຺ພາຠຣຓານິ ໂອມຸຎ຺ຈິຕ຺ວາ ອນ຺ຕຣາປຓໂຕ ກາສາວປີຕານິ ວຕ຺ຖານິ ອາຫຣາເປຕ຺ວາ ເກສມສ຺ສຸໍ ໂອຫາເຣຕ຺ວາ ປພ຺ພຊິໍສຸ. ອິຕິ ນຄຣໂຕ ນິກ຺ຂມິຕ຺ວາ ພຫິນຄເຣ ສຸຕຕ຺ຕາ ເອຕ຺ຖ – ‘‘ພນ຺ຘຸມຕິຍາ ຣາຊຘານິຍາ ນິກ຺ຂມິຕ຺ວາ’’ຕິ ນ ວຸຕ຺ຕໍ.

ຈາຣິກໍ ຈຣຕີຕິ ຄຕຄຕຏ຺ຐາເນ ມຫາມຓ຺ຑປໍ ກຕ຺ວາ ທານໍ ສຊ຺ເຊຕ຺ວາ ອາຄມ຺ມ ສ຺ວາຕນາຍ ນິມນ຺ຕິໂຕ ຊນສ຺ສ ອາຍາຈິຕຠິກ຺ຂເມວ ປຏິຄ຺ຄຓ຺ຫນ຺ໂຕ ຈຕ຺ຕາໂຣ ມາເສ ຈາຣິກໍ ຈຣິ.

ອາກິຓ຺ໂຓຕິ ອິມິນາ ຄເຓນ ປຣິວຸໂຕ. ອຍໍ ປນ ວິຕກ຺ໂກ ໂພຘິສຕ຺ຕສ຺ສ ກທາ ອຸປ຺ປນ຺ໂນຕິ? ສ຺ເວ ວິສາຂປຸຓ຺ຓມາ ຠວິສ຺ສຕີຕິ ຈາຕຸທ຺ທສີທິວເສ. ຕທາ ກິຣ ໂສ – ‘‘ຍເຖວ ມໍ ອິເມ ປຸພ຺ເພ ຄິຫິຠູຕໍ ປຣິວາເຣຕ຺ວາ ຈຣນ຺ຕິ, ອິທານິປິ ຕເຖວ, ກິໍ ອິມິນາ ຄເຓນາ’’ຕິ ຄຓສງ຺ຄຓິກາຍ ອຸກ຺ກຓ຺ຐິຕ຺ວາ ‘‘ອຊ຺ເຊວ ຄຈ຺ຉາມີ’’ຕິ ຈິນ຺ເຕຕ຺ວາ ປຸນ ‘‘ອຊ຺ຊ ອເວລາ, ສເຈ ອິທານິ ຄມິສ຺ສາມິ, ສພ຺ເພວ ອິເມ ຊານິສ຺ສນ຺ຕິ, ສ຺ເວວ ຄມິສ຺ສາມີ’’ຕິ ຈິນ຺ເຕສິ. ຕໍ ທິວສຎ຺ຈ ອຸຣຸເວລຄາມສທິເສ ຄາເມ ຄາມວາສິໂນ ສ຺ວາຕນາຍ ນິມນ຺ຕຍິໍສຸ. ເຕ ຈຕຸຣາສີຕິສຫສ຺ສານມ຺ປິ ເຕສໍ ປພ຺ພຊິຕານໍ ມຫາປຸຣິສສ຺ສ ຈ ປາຍາສເມວ ປຏິຍາທຍິໍສຸ. ອຖ ມຫາປຸຣິໂສ ປຸນທິວເສ ຕສ຺ມິໍເຍວ ຄາເມ ເຕຫິ ປພ຺ພຊິເຕຫິ ສທ຺ຘິໍ ຠຕ຺ຕກິຈ຺ຈໍ ກຕ຺ວາ ວສນຏ຺ຐານເມວ ອຄມາສິ. ຕຕ຺ຖ ເຕ ປພ຺ພຊິຕາ ມຫາປຸຣິສສ຺ສ ວຕ຺ຕໍ ທສ຺ເສຕ຺ວາ ອຕ຺ຕໂນ ອຕ຺ຕໂນ ຣຕ຺ຕິຏ຺ຐານທິວາຏ຺ຐານານິ ປວິຏ຺ຐາ. ໂພຘິສຕ຺ໂຕປິ ປຓ຺ຓສາລໍ ປວິສິຕ຺ວາ ນິສິນ຺ໂນ.

‘‘ຐິເຕ ມຊ຺ຌນ຺ຫິເກ ກາເລ, ສນ຺ນິສີເວສຸ ປກ຺ຂິສຸ;

ສຓເຕວ ພ຺ຣຫາຣຎ຺ຎໍ, ຕໍ ຠຍໍ ປຏິຠາຕິ ມ’’ນ຺ຕິ. (ສໍ. ນິ. ໑.໑໕);

ເອວຣູເປ ອວິເວກາຣາມານໍ ຠຍກາເລ ສພ຺ພສຕ຺ຕານໍ ສທຣຖກາເລເຍວ – ‘‘ອຍໍ ກາໂລ’’ຕິ ນິກ຺ຂມິຕ຺ວາ ປຓ຺ຓສາລາຍ ທ຺ວາຣໍ ປິທຫິຕ຺ວາ ໂພຘິມຓ຺ຑາຠິມຸໂຂ ປາຍາສິ. ອຎ຺ຎທາປິ ຈ ຕສ຺ມິໍ ຐາເນ ວິຈຣນ຺ໂຕ ໂພຘິມຓ຺ຑໍ ປສ຺ສຕິ, ນິສີທິຕຸໍ ປນສ຺ສ ຈິຕ຺ຕໍ ນ ນມິຕປຸພ຺ພໍ. ຕໍ ທິວສໍ ປນສ຺ສ ຎາຓໍ ປຣິປາກຄຕໍ, ຕສ຺ມາ ອລງ຺ກຕໍ ໂພຘິມຓ຺ຑໍ ທິສ຺ວາ ອາໂຣຫນຕ຺ຖາຍ ຈິຕ຺ຕໍ ອຸປ຺ປນ຺ນໍ. ໂສ ທກ຺ຂິຓທິສາຠາເຄນ ອຸປຄມ຺ມ ປທກ຺ຂິຓໍ ກຕ຺ວາ ປຸຣຕ຺ຖິມທິສາຠາເຄ ຈຸທ຺ທສຫຕ຺ຖໍ ປລ຺ລງ຺ກໍ ປຎ຺ຎເປຕ຺ວາ ຈຕຸຣງ຺ຄວີຣິຍໍ ອຘິຏ຺ຐຫິຕ຺ວາ – ‘‘ຍາວ ພຸທ຺ໂຘ ນ ໂຫມິ, ນ ຕາວ ອິໂຕ ວຸຏ຺ຐຫາມີ’’ຕິ ປຏິຎ຺ຎໍ ກຕ຺ວາ ນິສີທິ. ອິທມສ຺ສ ວູປກາສໍ ສນ຺ຘາຍ – ‘‘ເອໂກວ ຄຓມ຺ຫາ ວູປກຏ຺ໂຐ ວິຫາສີ’’ຕິ ວຸຕ຺ຕໍ.

ອຎ຺ເຎເນວ ຕານີຕິ ເຕ ກິຣ ສາຍໍ ໂພຘິສຕ຺ຕສ຺ສ ອຸປຏ຺ຐານໍ ອາຄນ຺ຕ຺ວາ ປຓ຺ຓສາລໍ ປຣິວາເຣຕ຺ວາ ນິສິນ຺ນາ ‘‘ອຕິວິກາໂລ ຊາໂຕ, ອຸປຘາເຣຖາ’’ຕິ ວຕ຺ວາ ປຓ຺ຓສາລໍ ວິວຣິຕ຺ວາ ຕໍ ອປສ຺ສນ຺ຕາປິ ‘‘ກຸຫິໍ ຄໂຕ’’ຕິ ນານຸພນ຺ຘິໍສຸ, ‘‘ຄຓວາເສ ນິພ຺ພິນ຺ໂນ ເອໂກ ວິຫຣິຕຸກາໂມ ມຎ຺ເຎ ມຫາປຸຣິໂສ, ພຸທ຺ຘຠູຕໍເຍວ ນໍ ປສ຺ສິສ຺ສາມາ’’ຕິ ວຕ຺ວາ ອນ຺ໂຕຊມ຺ພຸທີປາຠິມຸຂາ ຈາຣິກໍ ປກ຺ກນ຺ຕາ.