ທ຺ວຕ຺ຕິໍສມຫາປຸຣິສລກ຺ຂຓວຓ຺ຓນາ

໓໓. ອທ຺ທສ ໂຂຕິ ທຸກູລຈຸມ຺ພຏເກ ນິປຊ຺ຊາເປຕ຺ວາ ອານີຕໍ ອທ຺ທສ. ມຫາປຸຣິສສ຺ສາຕິ ຊາຕິໂຄຕ຺ຕກຸລປເທສາທິວເສນ ມຫນ຺ຕສ຺ສ ປຸຣິສສ຺ສ. ທ຺ເວ ຄຕິໂຍຕິ ທ຺ເວ ນິຏ຺ຐາ, ທ຺ເວ ນິປ຺ຜຕ຺ຕິໂຍ. ອຍຎ຺ຫິ ຄຕິສທ຺ໂທ – ‘‘ປຎ຺ຈ ໂຂ ອິມາ, ສາຣິປຸຕ຺ຕ, ຄຕິໂຍ’’ຕິ (ມ. ນິ. ໑.໑໕໓) ເອຕ຺ຖ ນິຣຍາທິເຠທາຍ ສຕ຺ເຕຫິ ຄນ຺ຕພ຺ພຄຕິຍາ ວຕ຺ຕຕິ. ‘‘ອິເມສໍ ໂຂ ອຫໍ ຠິກ຺ຂູນໍ ສີລວນ຺ຕານໍ ກລ຺ຍາຓຘມ຺ມານໍ ເນວ ຊານາມິ ອາຄຕິໍ ວາ ຄຕິໍ ວາ’’ຕິ (ມ. ນິ. ໑.໕໐໘) ເອຕ຺ຖ ອຊ຺ຌາສເຍ. ‘‘ນິພ຺ພານໍ ອຣຫໂຕ ຄຕີ’’ຕິ (ປຣິ. ໓໓໙) ເອຕ຺ຖ ປຏິສ຺ສຣເຓ. ‘‘ອປິ ຈ ຕ຺ຍາຫໍ ພ຺ຣຫ຺ເມ ຄຕິຎ຺ຈ ປຊານາມິ, ຊຸຕິຎ຺ຈ ປຊານາມິ ເອວໍມຫິທ຺ຘິໂກ ພໂກ ພ຺ຣຫ຺ມາ’’ຕິ (ມ. ນິ. ໑.໕໐໓) ເອຕ຺ຖ ນິປ຺ຜຕ຺ຕິຍໍ ວຕ຺ຕຕິ. ສ຺ວາຍມິຘາປິ ນິປ຺ຜຕ຺ຕິຍໍ ວຕ຺ຕຕີຕິ ເວທິຕພ຺ໂພ. ອນຎ຺ຎາຕິ ອຎ຺ຎາ ຄຕິ ນິປ຺ຜຕ຺ຕິ ນາມ ນຕ຺ຖິ.

ຘມ຺ມິໂກຕິ ທສກຸສລຘມ຺ມສມນ຺ນາຄໂຕ ອຄຕິຄມນວິຣຫິໂຕ. ຘມ຺ມຣາຊາຕິ ອິທໍ ປຸຣິມປທສ຺ເສວ ເວວຈນໍ. ຘມ຺ເມນ ວາ ລທ຺ຘຣຊ຺ຊຕ຺ຕາ ຘມ຺ມຣາຊາ. ຈາຕຸຣນ຺ໂຕຕິ ປຸຣຕ຺ຖິມສມຸທ຺ທາທີນໍ ຈຕຸນ຺ນໍ ສມຸທ຺ທານໍ ວເສນ ຈຕຸຣນ຺ຕາຍ ປຖວິຍາ ອິສ຺ສໂຣ. ວິຊິຕາວີຕິ ວິຊິຕສງ຺ຄາໂມ. ຊນປໂທ ອສ຺ມິໍ ຖາວຣິຍໍ ຖິຣຠາວໍ ປຕ຺ໂຕຕິ ຊນປທຕ຺ຖາວຣິຍປ຺ປຕ຺ໂຕ. ຈຓ຺ຑສ຺ສ ຫິ ຣຎ຺ໂຎ ພລິທຓ຺ຑາທີຫິ ໂລກໍ ປີຬຍໂຕ ມນຸສ຺ສາ ມຊ຺ຌິມຊນປທໍ ຉຑ຺ເຑຕ຺ວາ ປພ຺ພຕສມຸທ຺ທຕີຣາທີນິ ນິສ຺ສາຍ ປຈ຺ຈນ຺ເຕ ວາສໍ ກປ຺ເປນ຺ຕິ. ອຕິມຸທຸກສ຺ສ ຣຎ຺ໂຎ ໂຈເຣຫິ ສາຫສິກຘນວິໂລປປີຬິຕາ ມນຸສ຺ສາ ປຈ຺ຈນ຺ຕໍ ປຫາຍ ຊນປທມຊ຺ເຌ ວາສໍ ກປ຺ເປນ຺ຕິ, ອິຕິ ເອວຣູເປ ຣາຊິນິ ຊນປໂທ ຖິຣຠາວໍ ນ ປາປຸຓາຕິ. ອິມສ຺ມິໍ ປນ ກຸມາເຣ ຣຊ຺ຊໍ ກາຣຍມາເນ ເອຕສ຺ສ ຊນປໂທ ປາສາຓປິຏ຺ຐິຍໍ ຐເປຕ຺ວາ ອໂຍປຏ຺ເຏນ ປຣິກ຺ຂິຕ຺ໂຕ ວິຍ ຖິໂຣ ຠວິສ຺ສຕີຕິ ທສ຺ເສນ຺ໂຕ – ‘‘ຊນປທຕ຺ຖາວຣິຍປ຺ປຕ຺ໂຕ’’ຕິ ອາຫໍສຸ.

ສຕ຺ຕຣຕນສມນ຺ນາຄໂຕຕິ ເອຕ຺ຖ ຣຕິຊນນຏ຺ເຐນ ຣຕນໍ. ອປິຈ –

‘‘ຈິຕ຺ຕີກຕໍ ມຫຄ຺ຆຎ຺ຈ, ອຕຸລໍ ທຸລ຺ລຠທສ຺ສນໍ;

ອໂນມສຕ຺ຕປຣິໂຠຄໍ, ຣຕນໍ ເຕນ ວຸຈ຺ຈຕິ’’.

ຈກ຺ກຣຕນສ຺ສ ຈ ນິພ຺ພຕ຺ຕກາລໂຕ ປຏ຺ຐາຍ ອຎ຺ຎໍ ເທວຏ຺ຐານໍ ນາມ ນ ໂຫຕິ, ສພ຺ເພ ຄນ຺ຘປຸປ຺ຜາທີຫິ ຕສ຺ເສວ ປູຊຎ຺ຈ ອຠິວາທນາທີນິ ຈ ກໂຣນ຺ຕີຕິ ຈິຕ຺ຕີກຕຏ຺ເຐນ ຣຕນໍ. ຈກ຺ກຣຕນສ຺ສ ຈ ເອຕ຺ຕກໍ ນາມ ຘນໍ ອຄ຺ຆຕີຕິ ອຄ຺ໂຆ ນຕ຺ຖິ, ອິຕິ ມຫຄ຺ຆຏ຺ເຐນາປິ ຣຕນໍ. ຈກ຺ກຣຕນຎ຺ຈ ອຎ຺ເຎຫິ ໂລເກ ວິຊ຺ຊມານຣຕເນຫິ ອສທິສນ຺ຕິ ອຕຸລຏ຺ເຐນາປິ ຣຕນໍ. ຍສ຺ມາ ຈ ປນ ຍສ຺ມິໍ ກປ຺ເປ ພຸທ຺ຘາ ອຸປ຺ປຊ຺ຊນ຺ຕິ, ຕສ຺ມິໍເຍວ ຈກ຺ກວຕ຺ຕິໂນ ອຸປ຺ປຊ຺ຊນ຺ຕິ, ພຸທ຺ຘາ ຈ ກທາຈິ ກຣຫຈິ ອຸປ຺ປຊ຺ຊນ຺ຕິ, ຕສ຺ມາ ທຸລ຺ລຠທສ຺ສນຏ຺ເຐນາປິ ຣຕນໍ. ຕເທຕໍ ຊາຕິຣູປກຸລອິສ຺ສຣິຍາທີຫິ ອໂນມສ຺ສ ອຸຬາຣສຕ຺ຕສ຺ເສວ ອຸປ຺ປຊ຺ຊຕິ, ນ ອຎ຺ຎສ຺ສາຕິ ອໂນມສຕ຺ຕປຣິໂຠຄຏ຺ເຐນາປິ ຣຕນໍ. ຍຖາ ຈກ຺ກຣຕນໍ, ເອວໍ ເສສານິປີຕິ. ອິເມຫິ ສຕ຺ຕຫິ ຣຕເນຫິ ປຣິວາຣຠາເວນ ເຈວ ສພ຺ພໂຠຄູປກຣຓຠາເວນ ຈ ສມນ຺ນາຄໂຕຕິ ສຕ຺ຕຣຕນສມນ຺ນາຄໂຕ.

ອິທານິ ເຕສໍ ສຣູປໂຕ ທສ຺ສນຕ຺ຖໍ ຕສ຺ສິມານີຕິອາທິ ວຸຕ຺ຕໍ. ຕຕ຺ຖ ຈກ຺ກຣຕນນ຺ຕິອາທີສຸ ອຍໍ ສງ຺ເຂປາຘິປ຺ປາໂຍ – ທ຺ເວສຫສ຺ສທີປປຣິວາຣານໍ ຈຕຸນ຺ນໍ ມຫາທີປານໍ ສິຣິວິຠວໍ ຄເຫຕ຺ວາ ທາຕຸໍ ສມຕ຺ຖໍ ຈກ຺ກຣຕນໍ ປາຕຸຠວຕິ. ຕຖາ ປຸເຣຠຕ຺ຕເມວ ສາຄຣປຣິຍນ຺ຕໍ ປຖວິໍ ອນຸສໍຍາຍນສມຕ຺ຖໍ ເວຫາສງ຺ຄມໍ ຫຕ຺ຖິຣຕນໍ, ຕາທິສເມວ ອສ຺ສຣຕນໍ, ຈຕຸຣງ຺ຄສມນ຺ນາຄເຕ ອນ຺ຘກາເຣ ໂຍຊນປ຺ປມາຓໍ ອນ຺ຘກາຣໍ ວິຘມິຕ຺ວາ ອາໂລກທສ຺ສນສມຕ຺ຖໍ ມຓິຣຕນໍ, ຉພ຺ພິຘໂທສວິວຊ຺ຊິຕໍ ມນາປຈາຣິ ອິຕ຺ຖິຣຕນໍ, ໂຍຊນປ຺ປມາເຓ ອນ຺ໂຕປຖວິຄຕໍ ນິຘິໍ ທສ຺ສນສມຕ຺ຖໍ ຄຫປຕິຣຕນໍ, ອຄ຺ຄມເຫສິຍາ ກຸຈ຺ຉິມ຺ຫິ ນິພ຺ພຕ຺ຕິຕ຺ວາ ສກລຣຊ຺ຊມນຸສາສນສມຕ຺ຖໍ ເຊຏ຺ຐປຸຕ຺ຕສງ຺ຂາຕໍ ປຣິຓາຍກຣຕນໍ ປາຕຸຠວຕິ.

ປໂຣສຫສ຺ສນ຺ຕິ ອຕິເຣກສຫສ຺ສໍ. ສູຣາຕິ ອຠີຣຸກາ. ວີຣງ຺ຄຣູປາຕິ ວີຣານໍ ອງ຺ຄໍ ວີຣງ຺ຄໍ, ວີຣິຍສ຺ເສຕໍ ນາມໍ, ວີຣງ຺ຄໍ ຣູປເມເຕສນ຺ຕິ ວີຣງ຺ຄຣູປາ, ວີຣິຍຊາຕິກາ ວີຣິຍສຠາວາ ວີຣິຍມຍາ ອກິລາສຸໂນ ອເຫສຸໍ. ທິວສມ຺ປິ ຍຸຊ຺ຌນ຺ຕາ ນ ກິລມນ຺ຕີຕິ ວຸຕ຺ຕໍ ໂຫຕິ. ສາຄຣປຣິຍນ຺ຕນ຺ຕິ ຈກ຺ກວາຬປພ຺ພຕໍ ສີມໍ ກຕ຺ວາ ຐິຕສມຸທ຺ທປຣິຍນ຺ຕໍ. ອທຓ຺ເຑນາຕິ ເຍ ກຕາປຣາເຘ ສຕ຺ເຕ ສຕມ຺ປິ ສຫສ຺ສມ຺ປິ ຄຓ຺ຫນ຺ຕິ, ເຕ ຘນທຓ຺ເຑນ ຣຊ຺ຊໍ ກາເຣນ຺ຕິ. ເຍ ເຉຊ຺ຊເຠຊ຺ຊໍ ອນຸສາສນ຺ຕິ, ເຕ ສຕ຺ຖທຓ຺ເຑນ. ອຍໍ ປນ ທຸວິຘມ຺ປິ ທຓ຺ຑໍ ປຫາຍ ອທຓ຺ເຑນ ອຊ຺ຌາວສຕິ. ອສຕ຺ເຖນາຕິ ເຍ ເອກໂຕຘາຣາທິນາ ສຕ຺ເຖນ ປຣໍ ວິເຫສນ຺ຕິ, ເຕ ສຕ຺ເຖນ ຣຊ຺ຊໍ ກາເຣນ຺ຕິ ນາມ. ອຍໍ ປນ ສຕ຺ເຖນ ຂຸທ຺ທມກ຺ຂິກາຍປິ ປິວນມຕ຺ຕໍ ໂລຫິຕໍ ກສ຺ສຈິ ອນຸປ຺ປາເທຕ຺ວາ ຘມ຺ເມເນວ – ‘‘ເອຫິ ໂຂ ມຫາຣາຊາ’’ຕິ ເອວໍ ປຏິຣາຊູຫິ ສມ຺ປຏິຈ຺ຉິຕາຄມໂນ ວຸຕ຺ຕປ຺ປກາຣໍ ປຖວິໍ ອຠິວິຊິນິຕ຺ວາ ອຊ຺ຌາວສຕິ, ອຠິຠວິຕ຺ວາ ສາມີ ຫຸຕ຺ວາ ວສຕີຕິ ອຕ຺ໂຖ.

ເອວໍ ເອກໍ ນິປ຺ຜຕ຺ຕິໍ ກເຖຕ຺ວາ ທຸຕິຍໍ ກເຖຕຸໍ ສເຈ ໂຂ ປນາຕິອາທິ ວຸຕ຺ຕໍ. ຕຕ຺ຖ ຣາຄໂທສໂມຫມານທິຏ຺ຐິກິເລສຕຓ຺ຫາສງ຺ຂາຕໍ ຉທນໍ ອາວຣຓໍ ວິວຏໍ ວິທ຺ຘໍສິຕໍ ວິວຏກໍ ເອເຕນາຕິ ວິວຏຈ຺ຉໂທ. ‘‘ວິວຏ຺ຏຈ຺ຉທາ’’ຕິປິ ປາໂຐ, ອຍເມວ ອຕ຺ໂຖ.

໓໕. ເອວໍ ທຸຕິຍໍ ນິປ຺ຜຕ຺ຕິໍ ກເຖຕ຺ວາ ຕາສໍ ນິມິຕ຺ຕຠູຕານິ ລກ຺ຂຓານິ ທສ຺ເສຕຸໍ ອຍຎ຺ຫິ, ເທວ, ກຸມາໂຣຕິອາທິ ວຸຕ຺ຕໍ. ຕຕ຺ຖ ສຸປ຺ປຕິຏ຺ຐິຕປາໂທຕິ ຍຖາ ອຎ຺ເຎສໍ ຠູມິຍໍ ປາທໍ ຐເປນ຺ຕານໍ ອຄ຺ຄປາທຕລໍ ວາ ປຓ຺ຫິ ວາ ປສ຺ສໍ ວາ ປຐມໍ ຜຸສຕິ, ເວມຊ຺ເຌ ວາ ປນ ຉິທ຺ທໍ ໂຫຕິ, ອຸກ຺ຂິປນ຺ຕານໍ ອຄ຺ຄຕລາທີສຸ ເອກໂກຏ຺ຐາໂສວ ປຐມໍ ອຸຏ຺ຐຫຕິ, ນ ເອວມສ຺ສ. ອສ຺ສ ປນ ສຸວຓ຺ຓປາທຸກຕລມິວ ເອກປ຺ປຫາເຣເນວ ສກລໍ ປາທຕລໍ ຠູມິໍ ຜຸສຕິ, ເອກປ຺ປຫາເຣເນວ ຠູມິໂຕ ອຸຏ຺ຐຫຕິ. ຕສ຺ມາ ອຍໍ ສຸປ຺ປຕິຏ຺ຐິຕປາໂທ.

ຈກ຺ການີຕິ ທ຺ວີສຸ ປາທຕເລສຸ ທ຺ເວ ຈກ຺ການິ, ເຕສໍ ອຣາ ຈ ເນມິ ຈ ນາຠິ ຈ ປາຬິຍໍ ວຸຕ຺ຕາວ. ສພ຺ພາກາຣປຣິປູຣານີຕິ ອິມິນາ ປນ ອຍໍ ວິເສໂສ ເວທິຕພ຺ໂພ, ເຕສໍ ກິຣ ຈກ຺ການໍ ປາທຕລສ຺ສ ມຊ຺ເຌ ນາຠິ ທິສ຺ສຕິ, ນາຠິປຣິຈ຺ຉິນ຺ນາ ວຏ຺ຏເລຂາ ທິສ຺ສຕິ, ນາຠິມຸຂປຣິກ຺ເຂປປຏ຺ໂຏ ທິສ຺ສຕິ, ປນາຬິມຸຂໍ ທິສ຺ສຕິ, ອຣາ ທິສ຺ສນ຺ຕິ, ອເຣສຸ ວຏ຺ຏິເລຂາ ທິສ຺ສນ຺ຕິ, ເນມິມຓິກາ ທິສ຺ສນ຺ຕິ. ອິທໍ ຕາວ ປາຬິຍໍ ອາຄຕເມວ. ສມ຺ພຫຸລວາໂຣ ປນ ອນາຄໂຕ, ໂສ ເອວໍ ທຏ຺ຐພ຺ໂພ – ສຕ຺ຕິ, ສິຣິວຈ຺ໂຉ, ນນ຺ທິ, ໂສວຕ຺ຕິໂກ, ວຏໍສໂກ, ວຑ຺ຒມານກໍ, ມຈ຺ຉຍຸຄຬໍ, ຠທ຺ທປີຐໍ, ອງ຺ກຸສໂກ, ປາສາໂທ, ໂຕຣຓໍ, ເສຕຈ຺ຉຕ຺ຕໍ, ຂຄ຺ໂຄ, ຕາລວຓ຺ຏໍ, ໂມຣຫຕ຺ຖໂກ, ວາຬພີຊນີ, ອຸຓ຺ຫີສໍ, ມຓິ, ປຕ຺ໂຕ, ສຸມນທາມໍ, ນີລຸປ຺ປລໍ, ຣຕ຺ຕຸປ຺ປລໍ, ເສຕຸປ຺ປລໍ, ປທຸມໍ, ປຸຓ຺ຑຣີກໍ, ປຸຓ຺ຓຆໂຏ, ປຸຓ຺ຓປາຕິ, ສມຸທ຺ໂທ, ຈກ຺ກວາໂຬ, ຫິມວາ, ສິເນຣຸ, ຈນ຺ທິມສູຣິຍາ, ນກ຺ຂຕ຺ຕານິ, ຈຕ຺ຕາໂຣ ມຫາທີປາ, ທ຺ວິປຣິຕ຺ຕທີປສຫສ຺ສານິ, ອນ຺ຕມໂສ ຈກ຺ກວຕ຺ຕິຣຎ຺ໂຎ ປຣິສໍ ອຸປາທາຍ ສພ຺ໂພ ຈກ຺ກລກ຺ຂຓສ຺ເສວ ປຣິວາໂຣ.

ອາຍຕປຓ຺ຫີຕິ ທີຆປຓ຺ຫິ, ປຣິປຸຓ຺ຓປຓ຺ຫີຕິ ອຕ຺ໂຖ. ຍຖາ ຫິ ອຎ຺ເຎສໍ ອຄ຺ຄປາໂທ ທີໂຆ ໂຫຕິ, ປຓ຺ຫິມຕ຺ຖເກ ຊງ຺ຆາ ປຕິຏ຺ຐາຕິ, ປຓ຺ຫິໍ ຕຈ຺ເຉຕ຺ວາ ຐປິຕາ ວິຍ ໂຫຕິ, ນ ເອວໍ ມຫາປຸຣິສສ຺ສ. ມຫາປຸຣິສສ຺ສ ປນ ຈຕູສຸ ໂກຏ຺ຐາເສສຸ ທ຺ເວ ໂກຏ຺ຐາສາ ອຄ຺ຄປາໂທ ໂຫຕິ, ຕຕິເຍ ໂກຏ຺ຐາເສ ຊງ຺ຆາ ປຕິຏ຺ຐາຕິ, ຈຕຸຕ຺ຖໂກຏ຺ຐາເສ ອາຣຄ຺ເຄນ ວຏ຺ເຏຕ຺ວາ ຐປິຕາ ວິຍ ຣຕ຺ຕກມ຺ພລເຄຓ຺ຑຸກສທິສາ ປຓ຺ຫິ ໂຫຕິ.

ທີຆງ຺ຄຸລີຕິ ຍຖາ ອຎ຺ເຎສໍ ກາຈິ ອງ຺ຄຸລິໂຍ ທີຆາ ໂຫນ຺ຕິ, ກາຈິ ຣສ຺ສາ, ນ ເອວໍ ມຫາປຸຣິສສ຺ສ. ມຫາປຸຣິສສ຺ສ ປນ ມກ຺ກຏສ຺ເສວ ທີຆາ ຫຕ຺ຖປາທງ຺ຄຸລິໂຍ ມູເລ ຖູລາ, ອນຸປຸພ຺ເພນ ຄນ຺ຕ຺ວາ ອຄ຺ເຄ ຕນຸກາ, ນິຍ຺ຍາສເຕເລນ ມທ຺ທິຕ຺ວາ ວຏ຺ຏິຕຫຣິຕາລວຏ຺ຏິສທິສາ ໂຫນ຺ຕິ. ເຕນ ວຸຕ຺ຕໍ – ‘‘ທີຆງ຺ຄຸລີ’’ຕິ.

ມຸທຸຕລຸນຫຕ຺ຖປາໂທຕິ ສປ຺ປິມຓ຺ເຑ ໂອສາເຣຕ຺ວາ ຐປິຕໍ ສຕວາຣວິຫຕກປ຺ປາສປຏລໍ ວິຍ ມຸທຸ. ຍຖາ ຈ ອິທານິ ຊາຕມຕ຺ຕສ຺ສ, ເອວໍ ວຸຑ຺ຒກາເລປິ ມຸທຸຕລຸນາເຍວ ຠວິສ຺ສນ຺ຕິ, ມຸທຸຕລຸນາ ຫຕ຺ຖປາທາ ເອຕສ຺ສາຕິ ມຸທຸຕລຸນຫຕ຺ຖປາໂທ.

ຊາລຫຕ຺ຖປາໂທຕິ ນ ຈມ຺ເມນ ປຏິພທ຺ຘອງ຺ຄຸລນ຺ຕໂຣ. ເອທິໂສ ຫິ ຜຓຫຕ຺ຖໂກ ປຸຣິສໂທເສນ ອຸປຫໂຕ ປພ຺ພຊ຺ຊໍ ນ ປຏິລຠຕິ. ມຫາປຸຣິສສ຺ສ ປນ ຈຕສ຺ໂສ ຫຕ຺ຖງ຺ຄຸລິໂຍ ປຎ຺ຈປິ ປາທງ຺ຄຸລິໂຍ ເອກປ຺ປມາຓາ ໂຫນ຺ຕິ, ຕາສໍ ເອກປ຺ປມາຓຕາຍ ຍວລກ຺ຂຓໍ ອຎ຺ຎມຎ຺ຎໍ ປຏິວິຊ຺ຌິຕ຺ວາ ຕິຏ຺ຐຕິ. ອຖສ຺ສ ຫຕ຺ຖປາທາ ກຸສເລນ ວຑ຺ຒກິນາ ໂຍຊິຕຊາລວາຕປານສທິສາ ໂຫນ຺ຕິ. ເຕນ ວຸຕ຺ຕໍ – ‘‘ຊາລຫຕ຺ຖປາໂທ’’ຕິ.

ອຸທ຺ຘໍ ປຕິຏ຺ຐິຕໂຄປ຺ຜກຕ຺ຕາ ອຸສ຺ສງ຺ຂາ ປາທາ ອສ຺ສາຕິ ອຸສ຺ສງ຺ຂປາໂທ. ອຎ຺ເຎສຎ຺ຫິ ປິຏ຺ຐິປາເທ ໂຄປ຺ຜກາ ໂຫນ຺ຕິ, ເຕນ ເຕສໍ ປາທາ ອາຓິພທ຺ຘາ ວິຍ ພທ຺ຘາ ໂຫນ຺ຕິ, ນ ຍຖາສຸຂໍ ປຣິວຏ຺ຏນ຺ຕິ, ຄຈ຺ຉນ຺ຕານໍ ປາທຕລານິປິ ນ ທິສ຺ສນ຺ຕິ. ມຫາປຸຣິສສ຺ສ ປນ ອາຣຸຫິຕ຺ວາ ອຸປຣິ ໂຄປ຺ຜກາ ປຕິຏ຺ຐຫນ຺ຕິ, ເຕນສ຺ສ ນາຠິໂຕ ປຏ຺ຐາຍ ອຸປຣິມກາໂຍ ນາວາຍ ຐປິຕສຸວຓ຺ຓປຏິມາ ວິຍ ນິຈ຺ຈໂລ ໂຫຕິ, ອໂຘກາໂຍວ ອິຎ຺ຊຕິ, ສຸເຂນ ປາທາ ປຣິວຏ຺ຏນ຺ຕິ, ປຸຣໂຕປິ ປຈ຺ຉໂຕປິ ອຸຠຍປສ຺ເສສຸປິ ຐຕ຺ວາ ປສ຺ສນ຺ຕານໍ ປາທຕລານິ ປຎ຺ຎາຍນ຺ຕິ, ນ ຫຕ຺ຖີນໍ ວິຍ ປຈ຺ຉໂຕເຍວ.

ເອຓິຊງ຺ໂຆຕິ ເອຓິມິຄສທິສຊງ຺ໂຆ ມໍສຸສ຺ສເທນ ປຣິປຸຓ຺ຓຊງ຺ໂຆ, ນ ເອກໂຕ ພທ຺ຘປິຓ຺ຑິກມໍໂສ, ສມນ຺ຕໂຕ ສມສຓ຺ຐິເຕນ ມໍເສນ ປຣິກ຺ຂິຕ຺ຕາຫິ ສຸວຏ຺ຏິຕາຫິ ສາລິຄພ຺ຠຍວຄພ຺ຠສທິສາຫິ ຊງ຺ຆາຫິ ສມນ຺ນາຄໂຕຕິ ອຕ຺ໂຖ.

ອໂນນມນ຺ໂຕຕິ ອນມນ຺ໂຕ, ເອເຕນສ຺ສ ອຂຸຊ຺ຊອວາມນຠາໂວ ທີປິໂຕ. ອວເສສຊນາ ຫິ ຂຸຊ຺ຊາ ວາ ໂຫນ຺ຕິ ວາມນາ ວາ. ຂຸຊ຺ຊານໍ ອຸປຣິມກາໂຍ ອປຣິປຸຓ຺ໂຓ ໂຫຕິ, ວາມນານໍ ເຫຏ຺ຐິມກາໂຍ. ເຕ ອປຣິປຸຓ຺ຓກາຍຕ຺ຕາ ນ ສກ຺ໂກນ຺ຕິ ອໂນນມນ຺ຕາ ຊຓ຺ຓຸການິ ປຣິມຊ຺ຊິຕຸໍ. ມຫາປຸຣິໂສ ປນ ປຣິປຸຓ຺ຓອຸຠຍກາຍຕ຺ຕາ ສກ຺ໂກຕິ.

ໂກໂສຫິຕວຕ຺ຖຄຸຍ຺ໂຫຕິ ອຸສຠວາຣຓາທີນໍ ວິຍ ສຸວຓ຺ຓປທຸມກຓ຺ຓິກສທິເສຫິ ໂກເສຫິ ໂອຫິຕໍ ປຏິຈ຺ຉນ຺ນໍ ວຕ຺ຖຄຸຍ຺ຫໍ ອສ຺ສາຕິ ໂກໂສຫິຕວຕ຺ຖຄຸຍ຺ໂຫ. ວຕ຺ຖຄຸຍ຺ຫນ຺ຕິ ວຕ຺ເຖນ ຄຸຫິຕພ຺ພໍ ອງ຺ຄຊາຕໍ ວຸຈ຺ຈຕິ.

ສຸວຓ຺ຓວຓ຺ໂຓຕິ ຊາຕິຫິງ຺ຄຸລເກນ ມຊ຺ຊິຕ຺ວາ ທີປິທາຐາຍ ຆໍສິຕ຺ວາ ເຄຣຸກປຣິກມ຺ມໍ ກຕ຺ວາ ຐປິຕຆນສຸວຓ຺ຓຣູປສທິໂສຕິ ອຕ຺ໂຖ. ເອເຕນສ຺ສ ຆນສິນິທ຺ຘສຓ຺ຫສຣີຣຕໍ ທສ຺ເສຕ຺ວາ ຉວິວຓ຺ຓທສ຺ສນຕ຺ຖໍ ກຎ຺ຈນສນ຺ນິຠຕ຺ຕໂຈຕິ ວຸຕ຺ຕໍ. ປຸຣິມສ຺ສ ວາ ເວວຈນເມຕໍ.

ຣໂຊຊລ຺ລນ຺ຕິ ຣໂຊ ວາ ມລໍ ວາ. ນ ອຸປລິມ຺ປຕີຕິ ນ ລຄ຺ຄຕິ ປທຸມປລາສໂຕ ອຸທກພິນ຺ທຸ ວິຍ ວິວຏ຺ຏຕິ. ຫຕ຺ຖໂຘວນາທີນິ ປນ ອຸຕຸຄ຺ຄຫຓຕ຺ຖາຍ ເຈວ ທາຍການໍ ປຸຎ຺ຎຜລຕ຺ຖາຍ ຈ ພຸທ຺ຘາ ກໂຣນ຺ຕິ, ວຕ຺ຕສີເສນາປິ ຈ ກໂຣນ຺ຕິເຍວ. ເສນາສນໍ ປວິສນ຺ເຕນ ຫິ ຠິກ຺ຂຸນາ ປາເທ ໂຘວິຕ຺ວາ ປວິສິຕພ຺ພນ຺ຕິ ວຸຕ຺ຕເມຕໍ.

ອຸທ຺ຘຄ຺ຄໂລໂມຕິ ອາວຏ຺ຏປຣິໂຍສາເນ ອຸທ຺ຘຄ຺ຄານິ ຫຸຕ຺ວາ ມຸຂໂສຠໍ ອຸລ຺ໂລກຍມານານິ ວິຍ ຐິຕານິ ໂລມານິ ອສ຺ສາຕິ ອຸທ຺ຘຄ຺ຄໂລໂມ.

ພ຺ຣຫ຺ມຸຊຸຄຕ຺ໂຕຕິ ພ຺ຣຫ຺ມາ ວິຍ ອຸຊຸຄຕ຺ໂຕ, ອຸຊຸເມວ ອຸຄ຺ຄຕທີຆສຣີໂຣ ຠວິສ຺ສຕິ. ເຍຠຸຍ຺ເຍນ ຫິ ສຕ຺ຕາ ຂນ຺ເຘ ກຏິຍໍ ຊາຓູສູຕິ ຕີສຸ ຐາເນສຸ ນມນ຺ຕິ, ເຕ ກຏິຍໍ ນມນ຺ຕາ ປຈ຺ຉໂຕ ນມນ຺ຕິ, ອິຕເຣສຸ ທ຺ວີສຸ ຐາເນສຸ ປຸຣໂຕ. ທີຆສຣີຣາ ປນ ເອເກ ປສ຺ສວງ຺ກາ ໂຫນ຺ຕິ, ເອເກ ມຸຂໍ ອຸນ຺ນເມຕ຺ວາ ນກ຺ຂຕ຺ຕານິ ຄຓຍນ຺ຕາ ວິຍ ຈຣນ຺ຕິ, ເອເກ ອປ຺ປມໍສໂລຫິຕາ ສູລສທິສາ ໂຫນ຺ຕິ, ເອເກ ປຸຣໂຕ ປພ຺ຠາຣາ ໂຫນ຺ຕິ, ປເວຘມານາ ຄຈ຺ຉນ຺ຕິ. ອຍໍ ປນ ອຸຊຸເມວ ອຸຄ຺ຄນ຺ຕ຺ວາ ທີຆປ຺ປມາໂຓ ເທວນຄເຣ ອຸສ຺ສິຕສຸວຓ຺ຓໂຕຣຓໍ ວິຍ ຠວິສ຺ສຕີຕິ ທີເປນ຺ຕິ. ຍຖາ ເຈຕໍ, ເອວໍ ຍໍ ຍໍ ຊາຕມຕ຺ຕສ຺ສ ສພ຺ພໂສ ອປຣິປຸຓ຺ຓໍ ມຫາປຸຣິສລກ຺ຂຓໍ ໂຫຕິ, ຕໍ ຕໍ ອາຍຕິໍ ຕຖາຠາວິຕໍ ສນ຺ຘາຍ ວຸຕ຺ຕນ຺ຕິ ເວທິຕພ຺ພໍ.

ສຕ຺ຕຸສ຺ສໂທຕິ ທ຺ເວ ຫຕ຺ຖປິຏ຺ຐິໂຍ ທ຺ເວ ປາທປິຏ຺ຐິໂຍ ທ຺ເວ ອໍສກູຏານິ ຂນ຺ໂຘຕິ ອິເມສຸ ສຕ຺ຕສຸ ຐາເນສຸ ປຣິປຸຓ຺ໂຓ ມໍສຸສ຺ສໂທ ອສ຺ສາຕິ ສຕ຺ຕຸສ຺ສໂທ. ອຎ຺ເຎສໍ ປນ ຫຕ຺ຖປາທປິຏ຺ຐາທີສຸ ສິຣາຊາລໍ ປຎ຺ຎາຍຕິ, ອໍສກູຏກ຺ຂນ຺ເຘສຸ ອຏ຺ຐິໂກຏິໂຍ. ເຕ ມນຸສ຺ສາ ເປຕາ ວິຍ ຂາຍນ຺ຕິ, ນ ຕຖາ ມຫາປຸຣິໂສ, ມຫາປຸຣິໂສ ປນ ສຕ຺ຕສຸ ຐາເນສຸ ປຣິປຸຓ຺ຓມໍສຸສ຺ສທຕ຺ຕາ ນິຄູຬ຺ຫສິຣາຊາເລຫິ ຫຕ຺ຖປິຏ຺ຐາທີຫິ ວຏ຺ເຏຕ຺ວາ ສຸຏ຺ຐປິຕສຸວຓ຺ຓາຬິງ຺ຄສທິເສນ ຂນ຺ເຘນ ສິລາຣູປກໍ ວິຍ ຂາຍຕິ, ຈິຕ຺ຕກມ຺ມຣູປກໍ ວິຍ ຈ ຂາຍຕິ.

ສີຫສ຺ສ ປຸພ຺ພທ຺ຘໍ ວິຍ ກາໂຍ ອສ຺ສາຕິ ສີຫປຸພ຺ພທ຺ຘກາໂຍ. ສີຫສ຺ສ ຫິ ປຸຣຕ຺ຖິມກາໂຍວ ປຣິປຸຓ຺ໂຓ ໂຫຕິ, ປຈ຺ຉິມກາໂຍ ອປຣິປຸຓ຺ໂຓ. ມຫາປຸຣິສສ຺ສ ປນ ສີຫສ຺ສ ປຸພ຺ພທ຺ຘກາໂຍ ວິຍ ສພ຺ໂພ ກາໂຍ ປຣິປຸຓ຺ໂຓ. ໂສປິ ສີຫສ຺ເສວ ຕຕ຺ຖ ຕຕ຺ຖ ວິນຕຸນ຺ນຕາທິວເສນ ທຸສ຺ສຓ຺ຐິຕວິສຓ຺ຐິໂຕ ນ ໂຫຕິ, ທີຆຍຸຕ຺ຕຏ຺ຐາເນ ປນ ທີໂຆ, ຣສ຺ສຖູລກິສປຸຖຸລອນຸວຏ຺ຏິຕຍຸຕ຺ຕຏ຺ຐາເນສຸ ຕຖາວິໂຘວ ໂຫຕິ. ວຸຕ຺ຕຎ຺ເຫຕໍ ຠຄວຕາ –

‘‘ມນາປິເຍວ ໂຂ, ຠິກ຺ຂເວ, ກມ຺ມວິປາເກ ປຈ຺ຈຸປຏ຺ຐິເຕ ເຍຫິ ອງ຺ເຄຫິ ທີເຆຫິ ໂສຠຕິ, ຕານິ ອງ຺ຄານິ ທີຆານິ ສຓ຺ຐນ຺ຕິ. ເຍຫິ ອງ຺ເຄຫິ ຣສ຺ເສຫິ ໂສຠຕິ, ຕານິ ອງ຺ຄານິ ຣສ຺ສານິ ສຓ຺ຐນ຺ຕິ. ເຍຫິ ອງ຺ເຄຫິ ຖູເລຫິ ໂສຠຕິ, ຕານິ ອງ຺ຄານິ ຖູລານິ ສຓ຺ຐນ຺ຕິ. ເຍຫິ ອງ຺ເຄຫິ ກິເສຫິ ໂສຠຕິ, ຕານິ ອງ຺ຄານິ ກິສານິ ສຓ຺ຐນ຺ຕິ. ເຍຫິ ອງ຺ເຄຫິ ປຸຖຸເລຫິ ໂສຠຕິ, ຕານິ ອງ຺ຄານິ ປຸຖຸລານິ ສຓ຺ຐນ຺ຕິ. ເຍຫິ ອງ຺ເຄຫິ ວຏ຺ເຏຫິ ໂສຠຕິ, ຕານິ ອງ຺ຄານິ ວຏ຺ຏານິ ສຓ຺ຐນ຺ຕີ’’ຕິ.

ອິຕິ ນານາຈິຕ຺ເຕນ ປຸຎ຺ຎຈິຕ຺ເຕນ ຈິຕ຺ຕິໂຕ ທສຫິ ປາຣມີຫິ ສຊ຺ຊິໂຕ ມຫາປຸຣິສສ຺ສ ອຕ຺ຕຠາໂວ, ໂລເກ ສພ຺ພສິປ຺ປິໂນ ວາ ສພ຺ພອິທ຺ຘິມນ຺ໂຕ ວາ ປຕິຣູປກມ຺ປິ ກາຕຸໍ ນ ສກ຺ໂກນ຺ຕິ.

ຈິຕນ຺ຕຣໍໂສຕິ ອນ຺ຕຣໍສໍ ວຸຈ຺ຈຕິ ທ຺ວິນ຺ນໍ ໂກຏ຺ຏານໍ ອນ຺ຕຣໍ, ຕໍ ຈິຕໍ ປຣິປຸຓ຺ຓໍ ອນ຺ຕຣໍສໍ ອສ຺ສາຕິ ຈິຕນ຺ຕຣໍໂສ. ອຎ຺ເຎສຎ຺ຫິ ຕໍ ຐານໍ ນິນ຺ນໍ ໂຫຕິ, ທ຺ເວ ປິຏ຺ຐິໂກຏ຺ຏາ ປາຏິເຍກ຺ກາ ປຎ຺ຎາຍນ຺ຕິ. ມຫາປຸຣິສສ຺ສ ປນ ກຏິໂຕ ປຏ຺ຐາຍ ມໍສປຏລໍ ຍາວ ຂນ຺ຘາ ອຸຄ຺ຄມ຺ມ ສມຸສ຺ສິຕສຸວຓ຺ຓຜລກໍ ວິຍ ປິຏ຺ຐິໍ ຉາເທຕ຺ວາ ປຕິຏ຺ຐິຕໍ.

ນິຄ຺ໂຣຘປຣິມຓ຺ຑໂລຕິ ນິຄ຺ໂຣໂຘ ວິຍ ປຣິມຓ຺ຑໂລ. ຍຖາ ປຎ຺ຎາສຫຕ຺ຖຕາຍ ວາ ສຕຫຕ຺ຖຕາຍ ວາ ສມກ຺ຂນ຺ຘສາໂຂ ນິຄ຺ໂຣໂຘ ທີຆໂຕປິ ວິຕ຺ຖາຣໂຕປິ ເອກປ຺ປມາໂຓວ ໂຫຕິ, ເອວໍ ກາຍໂຕປິ ພ຺ຍາມໂຕປິ ເອກປ຺ປມາໂຓ. ຍຖາ ອຎ຺ເຎສໍ ກາໂຍ ທີໂຆ ວາ ໂຫຕິ ພ຺ຍາໂມ ວາ, ນ ເອວໍ ວິສມປ຺ປມາໂຓຕິ ອຕ຺ໂຖ. ເຕເນວ ຍາວຕກ຺ວສ຺ສ ກາໂຍຕິອາທິ ວຸຕ຺ຕໍ. ຕຕ຺ຖ ຍາວຕໂກ ອສ຺ສາຕິ ຍາວຕກ຺ວສ຺ສ.

ສມວຏ຺ຏກ຺ຂນ຺ໂຘຕິ ສມວຏ຺ຏິຕກ຺ຂນ຺ໂຘ. ຍຖາ ເອເກ ໂກຎ຺ຈາ ວິຍ ຈ ພກາ ວິຍ ຈ ວຣາຫາ ວິຍ ຈ ທີຆຄລາ ວງ຺ກຄລາ ປຸຖຸລຄລາ ຈ ໂຫນ຺ຕິ, ກຖນກາເລ ສິຣາຊາລໍ ປຎ຺ຎາຍຕິ, ມນ຺ໂທ ສໂຣ ນິກ຺ຂມຕິ, ນ ເອວໍ ມຫາປຸຣິສສ຺ສ. ມຫາປຸຣິສສ຺ສ ປນ ສຸວຏ຺ຏິຕສຸວຓ຺ຓາຬິງ຺ຄສທິໂສ ຂນ຺ໂຘ ໂຫຕິ, ກຖນກາເລ ສິຣາຊາລໍ ນ ປຎ຺ຎາຍຕິ, ເມຆສ຺ສ ວິຍ ຄຊ຺ຊິໂຕ ສໂຣ ມຫາ ໂຫຕິ.

ຣສຄ຺ຄສຄ຺ຄີຕິ ເອຕ຺ຖ ຣສໍ ຄສນ຺ຕິ ຫຣນ຺ຕີຕິ ຣສຄ຺ຄສາ. ຣສຫຣຓີນເມຕໍ ອຘິວຈນໍ, ຕາ ອຄ຺ຄາ ອສ຺ສາຕິ ຣສຄ຺ຄສຄ຺ຄີ. ມຫາປຸຣິສສ຺ສ ກິຣ ສຕ຺ຕຣສຫຣຓີສຫສ຺ສານິ ອຸທ຺ຘຄ຺ຄານິ ຫຸຕ຺ວາ ຄີວາຍເມວ ປຏິມຸກ຺ການິ. ຕິລຜລມຕ຺ໂຕປິ ອາຫາໂຣ ຊິວ຺ຫຄ຺ເຄ ຐປິໂຕ ສພ຺ພກາຍໍ ອນຸຜຣຕິ. ເຕເນວ ມຫາປຘານໍ ປທຫນ຺ຕສ຺ສ ເອກຕຓ຺ຑຸລາທີຫິປິ ກຬາຍຍູສປສຕມຕ຺ເຕນາປິ ກາຍສ຺ສ ຍາປນໍ ອໂຫສິ. ອຎ຺ເຎສໍ ປນ ຕຖາ ອຠາວາ ນ ສກລໍ ກາຍໍ ໂອຊາ ຜຣຕິ. ເຕນ ເຕ ພຫ຺ວາພາຘາ ໂຫນ຺ຕິ.

ສີຫສ຺ເສວ ຫນຸ ອສ຺ສາຕິ ສີຫຫນຸ. ຕຕ຺ຖ ສີຫສ຺ສ ເຫຏ຺ຐິມຫນຸເມວ ປຣິປຸຓ຺ຓໍ ໂຫຕິ, ນ ອຸປຣິມໍ. ມຫາປຸຣິສສ຺ສ ປນ ສີຫສ຺ສ ເຫຏ຺ຐິມໍ ວິຍ ທ຺ເວປິ ປຣິປຸຓ຺ຓານິ ທ຺ວາທສິຍາ ປກ຺ຂສ຺ສ ຈນ຺ທສທິສານິ ໂຫນ຺ຕິ. ອຖ ເນມິຕ຺ຕກາ ຫນຸກປຣິຍນ຺ຕໍ ໂອໂລເກນ຺ຕາວ ອິເມສຸ ຫນຸເກສຸ ເຫຏ຺ຐິເມ ວີສຕິ ອຸປຣິເມ ວີສຕີຕິ ຈຕ຺ຕາລີສທນ຺ຕາ ສມາ ອວິຣຬາ ປຕິຏ຺ຐຫິສ຺ສນ຺ຕີຕິ ສລ຺ລກ຺ເຂຕ຺ວາ ອຍຎ຺ຫິ ເທວ, ກຸມາໂຣ ຈຕ຺ຕາລີສທນ຺ໂຕ ໂຫຕີຕິອາທິມາຫໍສຸ. ຕຕ຺ຣາຍມຕ຺ໂຖ, ອຎ຺ເຎສຎ຺ຫິ ປຣິປຸຓ຺ຓທນ຺ຕານມ຺ປິ ທ຺ວຕ຺ຕິໍສ ທນ຺ຕາ ໂຫນ຺ຕິ. ອິມສ຺ສ ປນ ຈຕ຺ຕາລີສໍ ຠວິສ຺ສນ຺ຕິ. ອຎ຺ເຎສຎ຺ຈ ເກຈິ ທນ຺ຕາ ອຸຈ຺ຈາ, ເກຈິ ນີຈາຕິ ວິສມາ ໂຫນ຺ຕິ, ອິມສ຺ສ ປນ ອຍປຏ຺ຏເກນ ຉິນ຺ນສງ຺ຂປຏລໍ ວິຍ ສມາ ຠວິສ຺ສນ຺ຕິ. ອຎ຺ເຎສໍ ກຸມ຺ຠິລານໍ ວິຍ ທນ຺ຕາ ວິຣຬາ ໂຫນ຺ຕິ, ມຈ຺ຉມໍສານິ ຂາທນ຺ຕານໍ ທນ຺ຕນ຺ຕຣໍ ປູເຣນ຺ຕິ. ອິມສ຺ສ ປນ ກນກຜລກາຍໍ ສມຸສ຺ສິຕວຊິຣປນ຺ຕິ ວິຍ ອວິຣຬາ ຕູລິກາຍ ທສ຺ສິຕປຣິຈ຺ເຉທາ ວິຍ ທນ຺ຕາ ຠວິສ຺ສນ຺ຕິ. ອຎ຺ເຎສຎ຺ຈ ປູຕິທນ຺ຕາ ອຸຏ຺ຐຫນ຺ຕິ. ເຕນ ກາຈິ ທາຐາ ກາຬາປິ ວິວຓ຺ຓາປິ ໂຫນ຺ຕິ. ອຍໍ ປນ ສຸຏ຺ຐຸ ສຸກ຺ກທາໂຐ ໂອສຘິຕາຣກມ຺ປິ ອຕິກ຺ກມ຺ມ ວິໂຣຈມານາຍ ປຠາຍ ສມນ຺ນາຄຕທາໂຐ ຠວິສ຺ສຕິ.

ປຫູຕຊິວ຺ໂຫຕິ ປຸຖຸລຊິວ຺ໂຫ. ອຎ຺ເຎສໍ ຊິວ຺ຫາ ຖູລາປິ ໂຫນ຺ຕິ ກິສາປິ ຣສ຺ສາປິ ຖທ຺ຘາປິ ວິສມາປິ, ມຫາປຸຣິສສ຺ສ ປນ ຊິວ຺ຫາ ມຸທຸ ທີຆາ ປຸຖຸລາ ວຓ຺ຓສມ຺ປນ຺ນາ ໂຫຕິ. ໂສ ຫິ ເອຕໍ ລກ຺ຂຓໍ ປຣິເຍສິຕຸໍ ອາຄຕານໍ ກງ຺ຂາວິໂນທນຕ຺ຖໍ ມຸທຸກຕ຺ຕາ ຕໍ ຊິວ຺ຫໍ ກຖິນສູຈິໍ ວິຍ ວຏ຺ເຏຕ຺ວາ ອຸໂຠ ນາສິກໂສຕານິ ປຣາມສຕິ, ທີຆຕ຺ຕາ ອຸໂຠ ກຓ຺ຓໂສຕານິ ປຣາມສຕິ, ປຸຖຸລຕ຺ຕາ ເກສນ຺ຕປຣິໂຍສານໍ ເກວລມ຺ປິ ນລາຏໍ ປຏິຈ຺ຉາເທຕິ. ເອວມສ຺ສ ມຸທຸທີຆປຸຖຸລຠາວໍ ປກາເສນ຺ໂຕ ເຕສໍ ກງ຺ຂໍ ວິໂນເທຕິ. ເອວໍ ຕິລກ຺ຂຓສມ຺ປນ຺ນໍ ຊິວ຺ຫໍ ສນ຺ຘາຍ ‘‘ປຫູຕຊິວ຺ໂຫ’’ຕິ ວຸຕ຺ຕໍ.

ພ຺ຣຫ຺ມສ຺ສໂຣຕິ ອຎ຺ເຎ ຉິນ຺ນສ຺ສຣາປິ ຠິນ຺ນສ຺ສຣາປິ ກາກສ຺ສຣາປິ ໂຫນ຺ຕິ, ອຍໍ ປນ ມຫາພ຺ຣຫ຺ມຸໂນ ສຣສທິເສນ ສເຣນ ສມນ຺ນາຄໂຕ ຠວິສ຺ສຕິ, ມຫາພ຺ຣຫ຺ມຸໂນ ຫິ ປິຕ຺ຕເສມ຺ເຫຫິ ອປລິພຸທ຺ຘຕ຺ຕາ ສໂຣ ວິສໂທ ໂຫຕິ. ມຫາປຸຣິເສນາປິ ກຕກມ຺ມໍ ຕສ຺ສ ວຕ຺ຖຸໍ ໂສເຘຕິ. ວຕ຺ຖຸໂນ ສຸທ຺ຘຕ຺ຕາ ນາຠິໂຕ ປຏ຺ຐາຍ ສມຸຏ຺ຐຫນ຺ໂຕ ສໂຣ ວິສໂທ ອຏ຺ຐງ຺ຄສມນ຺ນາຄໂຕວ ສມຸຏ຺ຐາຕິ. ກຣວີໂກ ວິຍ ຠຓຕີຕິ ກຣວີກຠາຓີ, ມຕ຺ຕກຣວີກຣຸຕມຎ຺ຊຸໂຆໂສຕິ ອຕ຺ໂຖ.

ອຠິນີລເນຕ຺ໂຕຕິ ນ ສກລນີລເນຕ຺ໂຕ, ນີລຍຸຕ຺ຕຏ຺ຐາເນ ປນສ຺ສ ອຸມາປຸປ຺ຜສທິເສນ ອຕິວິສຸທ຺ເຘນ ນີລວຓ຺ເຓນ ສມນ຺ນາຄຕານິ ເນຕ຺ຕານິ ໂຫນ຺ຕິ, ປີຕຍຸຕ຺ຕຏ຺ຐາເນ ກຓິກາຣປຸປ຺ຜສທິເສນ ປີຕວຓ຺ເຓນ, ໂລຫິຕຍຸຕ຺ຕຏ຺ຐາເນ ພນ຺ຘຸຊີວກປຸປ຺ຜສທິເສນ ໂລຫິຕວຓ຺ເຓນ, ເສຕຍຸຕ຺ຕຏ຺ຐາເນ ໂອສຘິຕາຣກສທິເສນ ເສຕວຓ຺ເຓນ, ກາຬຍຸຕ຺ຕຏ຺ຐາເນ ອທ຺ທາຣິຏ຺ຐກສທິເສນ ກາຬວຓ຺ເຓນ ສມນ຺ນາຄຕານິ. ສຸວຓ຺ຓວິມາເນ ອຸຄ຺ຆາຏິຕມຓິສີຫປຎ຺ຊຣສທິສານິ ຂາຍນ຺ຕິ.

ໂຄປຂຸໂມຕິ ເອຕ຺ຖ ປຂຸມນ຺ຕິ ສກລຈກ຺ຂຸຠຓ຺ຑໍ ອຘິປ຺ເປຕໍ, ຕໍ ກາຬວຈ຺ຉກສ຺ສ ພຫລຘາຕຸກໍ ໂຫຕິ, ຣຕ຺ຕວຈ຺ຉກສ຺ສ ວິປ຺ປສນ຺ນໍ, ຕໍມຸຫຸຕ຺ຕຊາຕຕຣຸຓຣຕ຺ຕວຈ຺ຉກສທິສຈກ຺ຂຸຠຓ຺ໂຑຕິ ອຕ຺ໂຖ. ອຎ຺ເຎສຎ຺ຫິ ຈກ຺ຂຸຠຓ຺ຑາ ອປຣິປຸຓ຺ຓາ ໂຫນ຺ຕິ, ຫຕ຺ຖິມູສິກາທີນໍ ອກ຺ຂິສທິເສຫິ ວິນິຄ຺ຄເຕຫິປິ ຄມ຺ຠີເຣຫິປິ ອກ຺ຂີຫິ ສມນ຺ນາຄຕາ ໂຫນ຺ຕິ. ມຫາປຸຣິສສ຺ສ ປນ ໂຘວິຕ຺ວາ ມຊ຺ຊິຕ຺ວາ ຐປິຕມຓິຄຸຬິກາ ວິຍ ມຸທຸສິນິທ຺ຘນີລສຸຂຸມປຂຸມາຈິຕານິ ອກ຺ຂີນິ.

ອຸຓ຺ຓາຕິ ອຸຓ຺ຓໂລມໍ. ຠມຸກນ຺ຕເຣຕິ ທ຺ວິນ຺ນໍ ຠມຸການໍ ເວມຊ຺ເຌ ນາສິກມຕ຺ຖເກເຍວ ຊາຕາ, ອຸຄ຺ຄນ຺ຕ຺ວາ ປນ ນລາຏເວມຊ຺ເຌ ຊາຕາ. ໂອທາຕາຕິ ປຣິສຸທ຺ຘາ, ໂອສຘິຕາຣກສມານວຓ຺ຓາ. ມຸທູຕິ ສປ຺ປິມຓ຺ເຑ ໂອສາເຣຕ຺ວາ ຐປິຕສຕວາຣວິຫຕກປ຺ປາສປຏລສທິສາ. ຕູລສນ຺ນິຠາຕິ ສິມ຺ພລິຕູລລຕາຕູລສມານາ, ອຍມສ຺ສ ໂອທາຕຕາຍ ອຸປມາ. ສາ ປເນສາ ໂກຏິຍໍ ຄເຫຕ຺ວາ ອາກຑ຺ຒິຍມານາ ອຸປຑ຺ຒພາຫຸປ຺ປມາຓາ ໂຫຕິ, ວິສ຺ສຏ຺ຐາ ທກ຺ຂິຓາວຏ຺ຏວເສນ ອາວຏ຺ຏິຕ຺ວາ ອຸທ຺ຘຄ຺ຄາ ຫຸຕ຺ວາ ສນ຺ຕິຏ຺ຐຕິ. ສຸວຓ຺ຓຜລກມຊ຺ເຌ ຐປິຕຣຊຕປຸພ຺ພຸຬກໍ ວິຍ, ສຸວຓ຺ຓຆຏໂຕ ນິກ຺ຂມມານາ ຂີຣຘາຣາ ວິຍ, ອຣຸຓປ຺ປຠາຣຎ຺ຊິເຕ ຄຄນປ຺ປເທເສ ໂອສຘິຕາຣກາ ວິຍ ຈ ອຕິມໂນຫຣາຍ ສິຣິຍາ ວິໂຣຈຕິ.

ອຸຓ຺ຫີສສີໂສຕິ ອິທໍ ປຣິປຸຓ຺ຓນລາຏຕຎ຺ຈ ປຣິປຸຓ຺ຓສີສຕໍ ຈາຕິ ທ຺ເວ ອຕ຺ຖວເສ ປຏິຈ຺ຈ ວຸຕ຺ຕໍ. ມຫາປຸຣິສສ຺ສ ຫິ ທກ຺ຂິຓກຓ຺ຓຈູຬິກໂຕ ປຏ຺ຐາຍ ມໍສປຏລໍ ອຸຏ຺ຐຫິຕ຺ວາ ສກລນລາຏໍ ຉາທຍມານໍ ປູຣຍມານໍ ຄນ຺ຕ຺ວາ ວາມກຓ຺ຓຈູຬິກາຍໍ ປຕິຏ຺ຐິຕໍ, ຕໍ ຣຎ຺ໂຎ ພນ຺ຘອຸຓ຺ຫີສປຏ຺ໂຏ ວິຍ ວິໂຣຈຕິ. ມຫາປຸຣິສສ຺ສ ກິຣ ອິມໍ ລກ຺ຂຓໍ ທິສ຺ວາ ຣາຊູນໍ ອຸຓ຺ຫີສປຏ຺ຏໍ ອກໍສຸ. ອຍໍ ຕາວ ເອໂກ ອຕ຺ໂຖ. ອຎ຺ເຎ ປນ ຊນາ ອປຣິປຸຓ຺ຓສີສາ ໂຫນ຺ຕິ, ເກຈິ ກປິສີສາ, ເກຈິ ຜລສີສາ, ເກຈິ ອຏ຺ຐິສີສາ, ເກຈິ ຫຕ຺ຖິສີສາ, ເກຈິ ຕຸມ຺ພສີສາ, ເກຈິ ປພ຺ຠາຣສີສາ. ມຫາປຸຣິສສ຺ສ ປນ ອາຣຄ຺ເຄນ ວຏ຺ເຏຕ຺ວາ ຐປິຕໍ ວິຍ ສຸປຣິປຸຓ຺ຓໍ ອຸທກປຸພ຺ພຸຬສທິສໍ ສີສໍ ໂຫຕິ. ຕຕ຺ຖ ປຸຣິມນເຍ ອຸຓ຺ຫີສເວຐິຕສີໂສ ວິຍາຕິ ອຸຓ຺ຫີສສີໂສ. ທຸຕິຍນເຍ ອຸຓ຺ຫີສໍ ວິຍ ສພ຺ພຕ຺ຖ ປຣິມຓ຺ຑລສີໂສຕິ ອຸຓ຺ຫີສສີໂສ.