໗. ຊາລິຍສຸຕ຺ຕວຓ຺ຓນາ

ທ຺ເວ ປພ຺ພຊິຕວຕ຺ຖຸວຓ຺ຓນາ

໓໗໘. ເອວໍ ເມ ສຸຕໍ…ເປ… ໂກສມ຺ພິຍນ຺ຕິ ຊາລິຍສຸຕ຺ຕໍ. ຕຕ຺ຣາຍໍ ອປຸພ຺ພປທວຓ຺ຓນາ. ໂຆສິຕາຣາເມຕິ ໂຆສິເຕນ ເສຏ຺ຐິນາ ກເຕ ອາຣາເມ. ປຸພ຺ເພ ກິຣ ອລ຺ລກປ຺ປຣຏ຺ຐໍ ນາມ ອໂຫສິ. ຕໂຕ ໂກຕູຫລິໂກ ນາມ ທລິທ຺ໂທ ຉາຕກຠເຍນ ສປຸຕ຺ຕທາໂຣ ອວນ຺ຕິຣຏ຺ຐໍ ຄຈ຺ຉນ຺ໂຕ ປຸຕ຺ຕໍ ວຫິຕຸໍ ອສກ຺ໂກນ຺ໂຕ ຉຑ຺ເຑຕ຺ວາ ອຄມາສິ, ມາຕາ ນິວຕ຺ຕິຕ຺ວາ ຕໍ ຄເຫຕ຺ວາ ຄຕາ, ເຕ ເອກໍ ໂຄປາລກຄາມໍ ປວິສິໍສຸ. ໂຄປາລເກນ ຈ ຕທາ ພຫຸປາຍາໂສ ປຏິຍຕ຺ໂຕ ໂຫຕິ, ເຕ ຕໂຕ ປາຍາສໍ ລຠິຕ຺ວາ ຠຸຎ຺ຊິໍສຸ. ອຖ ໂສ ປຸຣິໂສ ພລວປາຍາສໍ ຠຸຕ຺ໂຕ ຊີຣາເປຕຸໍ ອສກ຺ໂກນ຺ໂຕ ຣຕ຺ຕິຠາເຄ ກາລໍ ກຕ຺ວາ ຕຕ຺ເຖວ ສຸນຂິຍາ ກຸຈ຺ຉິສ຺ມິໍ ປຏິສນ຺ຘິໍ ຄເຫຕ຺ວາ ກຸກ຺ກຸໂຣ ຊາໂຕ, ໂສ ໂຄປາລກສ຺ສ ປິໂຍ ອໂຫສິ. ໂຄປາລໂກ ຈ ປຈ຺ເຈກພຸທ຺ຘໍ ອຸປຏ຺ຐຫຕິ. ປຈ຺ເຈກພຸທ຺ໂຘປິ ຠຕ຺ຕກິຈ຺ຈປຣິໂຍສາເນ ກຸກ຺ກຸຣສ຺ສ ເອເກກໍ ປິຓ຺ຑໍ ເທຕິ, ໂສ ປຈ຺ເຈກພຸທ຺ເຘ ສິເນຫໍ ອຸປ຺ປາເທຕ຺ວາ ໂຄປາລເກນ ສທ຺ຘິໍ ປຓ຺ຓສາລມ຺ປິ ຄຈ຺ຉຕິ. ໂຄປາລເກ ອສນ຺ນິຫິເຕ ຠຕ຺ຕເວລາຍໍ ສຍເມວ ຄນ຺ຕ຺ວາ ກາລາໂຣຈນຕ຺ຖໍ ປຓ຺ຓສາລທ຺ວາເຣ ຠຸສ຺ສຕິ, ອນ຺ຕຣາມຄ຺ເຄປິ ຈຓ຺ຑມິເຄ ທິສ຺ວາ ຠຸສ຺ສິຕ຺ວາ ປລາເປຕິ. ໂສ ປຈ຺ເຈກພຸທ຺ເຘ ມຸທຸເກນ ຈິຕ຺ເຕນ ກາລໍກຕ຺ວາ ເທວໂລເກ ນິພ຺ພຕ຺ຕິ. ຕຕ຺ຣສ຺ສ ໂຆສກເທວປຸຕ຺ໂຕ ຕ຺ເວວ ນາມໍ ອໂຫສິ. ໂສ ເທວໂລກໂຕ ຈວິຕ຺ວາ ໂກສມ຺ພິຍໍ ເອກສ຺ສ ກຸລສ຺ສ ຆເຣ ນິພ຺ພຕ຺ຕິ. ຕໍ ອປຸຕ຺ຕໂກ ເສຏ຺ຐິ ຕສ຺ສ ມາຕາປິຕູນໍ ຘນໍ ທຕ຺ວາ ປຸຕ຺ຕໍ ກຕ຺ວາ ອຄ຺ຄເຫສິ. ອຖ ອຕ຺ຕໂນ ປຸຕ຺ເຕ ຊາເຕ ສຕ຺ຕກ຺ຂຕ຺ຕຸໍ ຆາຕາເປຕຸໍ ອຸປກ຺ກມິ. ໂສ ປຸຎ຺ຎວນ຺ຕຕາຍ ສຕ຺ຕສຸປິ ຐາເນສຸ ມຣຓໍ ອປ຺ປຕ຺ວາ ອວສາເນ ເອກາຍ ເສຏ຺ຐິຘີຕາຍ ເວຍ຺ຍຕ຺ຕິເຍນ ລທ຺ຘຊີວິໂຕ ອປຣຠາເຄ ປິຕຸອຈ຺ຈເຍນ ເສຏ຺ຐິຏ຺ຐານໍ ປຕ຺ວາ ໂຆສກເສຏ຺ຐິ ນາມ ຊາໂຕ. ອຎ຺ເຎປິ ໂກສມ຺ພິຍໍ ກຸກ຺ກຸຏເສຏ຺ຐິ, ປາວາຣິຍເສຏ຺ຐີຕິ ທ຺ເວ ເສຏ຺ຐິໂນ ອຕ຺ຖິ, ອິມິນາ ສທ຺ຘິໍ ຕໂຍ ອເຫສຸໍ.

ເຕນ ຈ ສມເຍນ ຫິມວນ຺ຕໂຕ ປຎ຺ຈສຕຕາປສາ ສຣີຣສນ຺ຕປ຺ປນຕ຺ຖໍ ອນ຺ຕຣນ຺ຕຣາໂກສມ຺ພິໍ ອາຄຈ຺ຉນ຺ຕິ, ເຕສໍ ເອເຕ ຕໂຍ ເສຏ຺ຐີ ອຕ຺ຕໂນ ອຕ຺ຕໂນ ອຸຍ຺ຍາເນສຸ ປຓ຺ຓກຸຏິໂຍ ກຕ຺ວາ ອຸປຏ຺ຐານໍ ກໂຣນ຺ຕິ. ອເຖກທິວສໍ ເຕ ຕາປສາ ຫິມວນ຺ຕໂຕ ອາຄຈ຺ຉນ຺ຕາ ມຫາກນ຺ຕາເຣ ຕສິຕາ ກິລນ຺ຕາ ເອກໍ ມຫນ຺ຕໍ ວຏຣຸກ຺ຂໍ ປຕ຺ວາ ຕຕ຺ຖ ອຘິວຕ຺ຖາຍ ເທວຕາຍ ສນ຺ຕິກາ ສງ຺ຄຫໍ ປຈ຺ຈາສິສນ຺ຕາ ນິສີທິໍສຸ. ເທວຕາ ສພ຺ພາລງ຺ກາຣວິຠູສິຕໍ ຫຕ຺ຖໍ ປສາເຣຕ຺ວາ ເຕສໍ ປານີຍປານກາທີນິ ທຕ຺ວາ ກິລມຖໍ ປຏິວິໂນເທສິ, ເອເຕ ເທວຕາຍານຸຠາເວນ ວິມ຺ຫິຕາ ປຸຈ຺ຉິໍສຸ – ‘‘ກິໍ ນຸ ໂຂ, ເທວເຕ, ກມ຺ມໍ ກຕ຺ວາ ຕຍາ ອຍໍ ສມ຺ປຕ຺ຕິ ລທ຺ຘາ’’ຕິ? ເທວຕາ ອາຫ – ‘‘ໂລເກ ພຸທ຺ໂຘ ນາມ ຠຄວາ ອຸປ຺ປນ຺ໂນ, ໂສ ເອຕຣຫິ ສາວຕ຺ຖິຍໍ ວິຫຣຕິ, ອນາຖປິຓ຺ຑິໂກ ຄຫປຕິ ຕໍ ອຸປຏ຺ຐຫຕິ. ໂສ ອຸໂປສຖທິວເສສຸ ອຕ຺ຕໂນ ຠຕການໍ ປກຕິຠຕ຺ຕເວຕນເມວ ທຕ຺ວາ ອຸໂປສຖໍ ກາຣາເປສິ. ອຖາຫໍ ເອກທິວສໍ ມຊ຺ຌນ຺ຫິເກ ປາຕຣາສຕ຺ຖາຍ ອາຄໂຕ ກຎ຺ຈິ ຠຕກກມ຺ມໍ ອກໂຣນ຺ຕໍ ທິສ຺ວາ – ‘ອຊ຺ຊ ມນຸສ຺ສາ ກສ຺ມາ ກມ຺ມໍ ນ ກໂຣນ຺ຕີ’ຕິ ປຸຈ຺ຉິໍ. ຕສ຺ສ ເມ ຕມຕ຺ຖໍ ອາໂຣເຈສຸໍ. ອຖາຫໍ ເອຕທໂວຈໍ – ‘ອິທານິ ອຸປຑ຺ຒທິວໂສ ຄໂຕ, ສກ຺ກາ ນຸ ໂຂ ອຸປຑ຺ຒຸໂປສຖໍ ກາຕຸ’ນ຺ຕິ. ຕໂຕ ເສຏ຺ຐິສ຺ສ ປຏິເວເທຕ຺ວາ ‘‘ສກ຺ກາ ກາຕຸ’’ນ຺ຕິ ອາຫ. ສ຺ວາຫໍ ອຸປຑ຺ຒທິວສໍ ອຸປຑ຺ຒຸໂປສຖໍ ສມາທິຍິຕ຺ວາ ຕທເຫວ ກາລໍ ກຕ຺ວາ ອິມໍ ສມ຺ປຕ຺ຕິໍ ປຏິລຠິ’’ນ຺ຕິ.

ອຖ ເຕ ຕາປສາ ‘‘ພຸທ຺ໂຘ ກິຣ ອຸປ຺ປນ຺ໂນ’’ຕິ ສຎ຺ຊາຕປີຕິປາໂມຊ຺ຊາ ຕໂຕວ ສາວຕ຺ຖິໍ ຄນ຺ຕຸກາມາ ຫຸຕ຺ວາປິ – ‘‘ພຫຸກາຣາ ໂນ ອຸປຏ຺ຐາກເສຏ຺ຐິໂນ ເຕສມ຺ປິ ອິມມຕ຺ຖມາໂຣເຈສ຺ສາມາ’’ຕິ ໂກສມ຺ພິໍ ຄນ຺ຕ຺ວາ ເສຏ຺ຐີຫິ ກຕສກ຺ກາຣພຫຸມານາ ‘‘ຕທເຫວ ມຍໍ ຄຈ຺ຉາມາ’’ຕິ ອາຫໍສຸ. ‘‘ກິໍ, ຠນ຺ເຕ, ຕຸຣິຕາຕ຺ຖ, ນນຸ ຕຸມ຺ເຫ ປຸພ຺ເພ ຈຕ຺ຕາໂຣ ປຎ຺ຈ ມາເສ ວສິຕ຺ວາ ຄຈ຺ຉຖາ’’ຕິ ຈ ວຸຕ຺ເຕ ຕໍ ປວຕ຺ຕິໍ ອາໂຣເຈສຸໍ. ‘‘ເຕນ ຫິ, ຠນ຺ເຕ, ສເຫວ ຄຈ຺ຉາມາ’’ຕິ ຈ ວຸຕ຺ເຕ ‘‘ຄຈ຺ຉາມ ມຍໍ, ຕຸມ຺ເຫ ສຓິກໍ ອາຄຈ຺ຉຖາ’’ຕິ ສາວຕ຺ຖິໍ ຄນ຺ຕ຺ວາ ຠຄວໂຕ ສນ຺ຕິເກ ປພ຺ພຊິຕ຺ວາ ອຣຫຕ຺ຕໍ ປາປຸຓິໍສຸ. ເຕປິ ເສຏ຺ຐິໂນ ປຎ຺ຈສຕປຎ຺ຈສຕສກຏປຣິວາຣາ ສາວຕ຺ຖິໍ ຄນ຺ຕ຺ວາ ທານາທີນິ ທຕ຺ວາ ໂກສມ຺ພິໍ ອາຄມນຕ຺ຖາຍ ຠຄວນ຺ຕໍ ຍາຈິຕ຺ວາ ປຈ຺ຈາຄມ຺ມ ຕໂຍ ວິຫາເຣ ກາເຣສຸໍ. ເຕສຸ ກຸກ຺ກຸຏເສຏ຺ຐິນາ ກໂຕ ກຸກ຺ກຸຏາຣາໂມ ນາມ, ປາວາຣິຍເສຏ຺ຐິນາ ກໂຕ ປາວາຣິກມ຺ພວນໍ ນາມ, ໂຆສິຕເສຏ຺ຐິນາ ກໂຕ ໂຆສິຕາຣາໂມ ນາມ ອໂຫສິ. ຕໍ ສນ຺ຘາຍ ວຸຕ຺ຕໍ – ‘‘ໂກສມ຺ພິຍໍ ວິຫຣຕິ ໂຆສິຕາຣາເມ’’ຕິ.

ມຸຓ຺ຑິໂຍຕິ ອິທໍ ຕສ຺ສ ນາມໍ. ຊາລິໂຍຕິ ອິທມ຺ປິ ອິຕຣສ຺ສ ນາມເມວ. ຍສ຺ມາ ປນສ຺ສ ອຸປຊ຺ຌາໂຍ ທາຣຸມເຍນ ປຕ຺ເຕນ ປິຓ຺ຑາຍ ຈຣຕິ, ຕສ຺ມາ ທາຣຸປຕ຺ຕິກນ຺ເຕວາສີຕິ ວຸຈ຺ຈຕິ. ເອຕທໂວຈຸນ຺ຕິ ອຸປາຣມ຺ຠາຘິປ຺ປາເຍນ ວາທໍ ອາໂຣເປຕຸກາມາ ຫຸຕ຺ວາ ເອຕທໂວຈຸໍ. ອິຕິ ກິຣ ເນສໍ ອໂຫສິ, ສເຈ ສມໂຓ ໂຄຕໂມ ‘‘ຕໍ ຊີວໍ ຕໍ ສຣີຣ’’ນ຺ຕິ ວກ຺ຂຕິ, ອຖສ຺ສ ມຍໍ ເອຕໍ ວາທໍ ອາໂຣເປສ຺ສາມ – ‘‘ໂຠ ໂຄຕມ, ຕຸມ຺ຫາກໍ ລທ຺ຘິຍາ ອິເຘວ ສຕ຺ໂຕ ຠິຊ຺ຊຕິ, ເຕນ ໂວ ວາໂທ ອຸຈ຺ເຉທວາໂທ ໂຫຕີ’’ຕິ. ສເຈ ປນ ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ ວກ຺ຂຕິ, ອຖສ຺ເສຕໍ ວາທໍ ອາໂຣເປສ຺ສາມ ‘‘ຕຸມ຺ຫາກໍ ວາເທ ຣູປໍ ຠິຊ຺ຊຕິ, ນ ສຕ຺ໂຕ ຠິຊ຺ຊຕິ. ເຕນ ໂວ ວາເທ ສຕ຺ໂຕ ສສ຺ສໂຕ ອາປຊ຺ຊຕີ’’ຕິ. ອຖ ຠຄວາ ‘‘ອິເມ ວາທາໂຣປນຕ຺ຖາຍ ປຎ຺ຫໍ ປຸຈ຺ຉນ຺ຕິ, ມມ ສາສເນ ອິເມ ທ຺ເວ ອນ຺ເຕ ອນຸປຄມ຺ມ ມຊ຺ຌິມາ ປຏິປທາ ອຕ຺ຖີຕິ ນ ຊານນ຺ຕິ, ຫນ຺ທ ເນສໍ ປຎ຺ຫໍ ອວິສ຺ສຊ຺ເຊຕ຺ວາ ຕສ຺ສາເຍວ ປຏິປທາຍ ອາວິຠາວຕ຺ຖໍ ຘມ຺ມໍ ເທເສມີ’’ຕິ ຈິນ຺ເຕຕ຺ວາ ‘‘ເຕນ ຫາວຸໂສ’’ຕິອາທິມາຫ.

໓໗໙-໓໘໐. ຕຕ຺ຖ ກລ຺ລໍ ນຸ ໂຂ ຕສ຺ເສຕໍ ວຈນາຍາຕິ ຕສ຺ເສຕໍ ສທ຺ຘາປພ຺ພຊິຕສ຺ສ ຕິວິຘໍ ສີລໍ ປຣິປູເຣຕ຺ວາ ປຐມຊ຺ຌານໍ ປຕ຺ຕສ຺ສ ຍຸຕ຺ຕໍ ນຸ ໂຂ ເອຕໍ ວຕ຺ຕຸນ຺ຕິ ອຕ຺ໂຖ. ຕໍ ສຸຕ຺ວາ ປຣິພ຺ພາຊກາ ປຸຖຸຊ຺ຊໂນ ນາມ ຍສ຺ມາ ນິພ຺ພິຈິກິຈ຺ໂຉ ນ ໂຫຕິ, ຕສ຺ມາ ກທາຈິ ເອວໍ ວເທຍ຺ຍາຕິ ມຎ຺ຎມານາ – ‘‘ກລ຺ລໍ ຕສ຺ເສຕໍ ວຈນາຍາ’’ຕິ ອາຫໍສຸ. ອຖ ຈ ປນາຫໍ ນ ວທາມີຕິ ອຫໍ ເອຕເມວໍ ຊານາມິ, ໂນ ຈ ເອວໍ ວທາມິ, ອຖ ໂຂ ກສິຓປຣິກມ຺ມໍ ກຕ຺ວາ ຠາເວນ຺ຕສ຺ສ ປຎ຺ຎາພເລນ ອຸປ຺ປນ຺ນໍ ມຫຄ຺ຄຕຈິຕ຺ຕເມຕນ຺ຕິ ສຎ຺ຎໍ ຐເປສິໍ. ນ ກລ຺ລໍ ຕສ຺ເສຕນ຺ຕິ ອິທໍ ເຕ ປຣິພ຺ພາຊກາ – ‘‘ຍສ຺ມາ ຂີຓາສໂວ ວິຄຕສມ຺ໂມໂຫ ຕິຓ຺ຓວິຈິກິຈ຺ໂຉ, ຕສ຺ມາ ນ ຍຸຕ຺ຕໍ ຕສ຺ເສຕໍ ວຕ຺ຕຸ’’ນ຺ຕິ ມຎ຺ຎມານາ ວທນ຺ຕິ. ເສສເມຕ຺ຖ ອຸຕ຺ຕານຕ຺ຖເມວາຕິ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍໍ

ຊາລິຍສຸຕ຺ຕວຓ຺ຓນາ ນິຏ຺ຐິຕາ.