໑໒. ໂລຫິຈ຺ຈສຸຕ຺ຕວຓ຺ຓນາ

ໂລຫິຈ຺ຈພ຺ຣາຫ຺ມຓວຕ຺ຖຸວຓ຺ຓນາ

໕໐໑. ເອວໍ ເມ ສຸຕໍ…ເປ… ໂກສເລສູຕິ ໂລຫິຈ຺ຈສຸຕ຺ຕໍ. ຕຕ຺ຣາຍໍ ອນຸຕ຺ຕານປທວຓ຺ຓນາ. ສາລວຕິກາຕິ ຕສ຺ສ ຄາມສ຺ສ ນາມໍ, ໂສ ກິຣ ວຕິຍາ ວິຍ ສມນ຺ຕໂຕ ສາລປນ຺ຕິຍາ ປຣິກ຺ຂິຕ຺ໂຕ. ຕສ຺ມາ ສາລວຕິກາຕິ ວຸຈ຺ຈຕິ. ໂລຫິຈ຺ໂຈຕິ ຕສ຺ສ ພ຺ຣາຫ຺ມຓສ຺ສ ນາມໍ.

໕໐໒-໕໐໓. ປາປກນ຺ຕິ ປຣານຸກມ຺ປາ ວິຣຫິຕຕ຺ຕາ ລາມກໍ, ນ ປນ ອຸຈ຺ເຉທສສ຺ສຕານໍ ອຎ຺ຎຕຣໍ. ອຸປ຺ປນ຺ນໍ ໂຫຕີຕິ ຊາຕໍ ໂຫຕິ, ນ ເກວລຎ຺ຈ ຈິຕ຺ເຕ ຊາຕມຕ຺ຕເມວ. ໂສ ກິຣ ຕສ຺ສ ວເສນ ປຣິສມຊ຺ເຌປິ ເອວໍ ຠາສຕິເຍວ. ກິຎ຺ຫິ ປໂຣ ປຣສ຺ສາຕິ ປໂຣ ໂຍ ອນຸສາສີຍຕິ, ໂສ ຕສ຺ສ ອນຸສາສກສ຺ສ ກິໍ ກຣິສ຺ສຕິ. ອຕ຺ຕນາ ປຏິລທ຺ຘໍ ກຸສລໍ ຘມ຺ມໍ ອຕ຺ຕນາວ ສກ຺ກຕ຺ວາ ຄຣຸໍ ກຕ຺ວາ ວິຫາຕພ຺ພນ຺ຕິ ວທຕິ.

໕໐໔-໔໐໗. ໂຣສິກໍ ນ຺ຫາປິຕໍ ອາມນ຺ເຕສີຕິ ໂຣສິກາຕິ ເອວໍ ອິຕ຺ຖິລິງ຺ຄວເສນ ລທ຺ຘນາມໍ ນ຺ຫາປິຕໍ ອາມນ຺ເຕສິ. ໂສ ກິຣ ຠຄວໂຕ ອາຄມນໍ ສຸຕ຺ວາ ຈິນ຺ເຕສິ – ‘‘ວິຫາຣໍ ຄນ຺ຕ຺ວາ ທິຏ຺ຐໍ ນາມໍ ຠາໂຣ, ເຄຫໍ ປນ ອາຓາເປຕ຺ວາ ປສ຺ສິສ຺ສາມິ ເຈວ ຍຖາສຕ຺ຕິ ຈ ອາຄນ຺ຕຸກຠິກ຺ຂໍ ທສ຺ສາມີ’’ຕິ, ຕສ຺ມາ ເອວໍ ນ຺ຫາປິຕໍ ອາມນ຺ເຕສິ.

໕໐໘. ປິຏ຺ຐິໂຕ ປິຏ຺ຐິໂຕຕິ ກຖາຜາສຸກຕ຺ຖໍ ປຈ຺ຉໂຕ ປຈ຺ຉໂຕ ອນຸພນ຺ໂຘ ໂຫຕິ. ວິເວເຈຕູຕິ ວິໂມເຈຕຸ, ຕໍ ທິຏ຺ຐິຄຕໍ ວິໂນເທຕູຕິ ວທຕິ. ອຍໍ ກິຣ ອຸປາສໂກ ໂລຫິຈ຺ຈສ຺ສ ພ຺ຣາຫ຺ມຓສ຺ສ ປິຍສຫາຍໂກ. ຕສ຺ມາ ຕສ຺ສ ອຕ຺ຖກາມຕາຍ ເອວມາຫ. ອປ຺ເປວ ນາມ ສິຍາຕິ ເອຕ຺ຖ ປຐມວຈເນນ ຠຄວາ ຄຊ຺ຊຕິ, ທຸຕິຍວຈເນນ ອນຸຄຊ຺ຊຕິ. ອຍໍ ກິເຣຕ຺ຖ ອຘິປ຺ປາໂຍ – ໂຣສິເກ ເອຕທຕ຺ຖເມວ ມຍາ ຈຕ຺ຕາຣິ ອສງ຺ຂ຺ເຍຍ຺ຍານິ. ກປ຺ປສຕສຫສ຺ສຎ຺ຈ ວິວິຘານິ ທຸກ຺ກຣານິ ກໂຣນ຺ເຕນ ປາຣມິໂຍ ປູຣິຕາ, ເອຕທຕ຺ຖເມວ ສພ຺ພຎ຺ຎຸຕຎ຺ຎາຓໍ ປຏິວິທ຺ຘໍ, ນ ເມ ໂລຫິຈ຺ຈສ຺ສ ທິຏ຺ຐິຄຕໍ ຠິນ຺ທິຕຸໍ ຠາໂຣຕິ, ອິມມຕ຺ຖໍ ທສ຺ເສນ຺ໂຕ ປຐມວຈເນນ ຠຄວາ ຄຊ຺ຊຕິ. ເກວລໍ ໂຣສິເກ ໂລຫິຈ຺ຈສ຺ສ ມມ ສນ຺ຕິເກ ອາຄມນໍ ວາ ນິສຊ຺ຊາ ວາ ອລ຺ລາປສລ຺ລາໂປ ວາ ໂຫຕຸ, ສເຈປິ ໂລຫິຈ຺ຈສທິສານໍ ສຕສຫສ຺ສສ຺ສ ກງ຺ຂາ ໂຫຕິ, ປຏິພໂລ ອຫໍ ວິໂນເທຕຸໍ ໂລຫິຈ຺ຈສ຺ສ ປນ ເອກສ຺ສ ທິຏ຺ຐິວິໂນທເນ ມຍ຺ຫໍ ໂກ ຠາໂຣຕິ ອິມມຕ຺ຖໍ ທສ຺ເສນ຺ໂຕ ທຸຕິຍວຈເນນ ຠຄວາ ອນຸຄຊ຺ຊຕີຕິ ເວທິຕພ຺ໂພ.

ໂລຫິຈ຺ຈພ຺ຣາຫ຺ມຓານຸໂຍຄວຓ຺ຓນາ

໕໐໙. ສມຸທຍສຎ຺ຊາຕີຕິ ສມຸທຍສ຺ສ ສຎ຺ຊາຕິ ໂຠຄຸປ຺ປາໂທ, ຕໂຕ ອຸຏ຺ຐິຕໍ ຘນຘຎ຺ຎນ຺ຕິ ອຕ຺ໂຖ. ເຍ ຕໍ ອຸປຊີວນ຺ຕີຕິ ເຍ ຎາຕິປຣິຊນທາສກມ຺ມກຣາທໂຍ ຊນາ ຕໍ ນິສ຺ສາຍ ຊີວນ຺ຕິ. ອນ຺ຕຣາຍກໂຣຕິ ລາຠນ຺ຕຣາຍກໂຣ. ຫິຕານຸກມ຺ປີຕິ ເອຕ຺ຖ ຫິຕນ຺ຕິ ວຸຑ຺ຒິ. ອນຸກມ຺ປຕີຕິ ອນຸກມ຺ປີ, ອິຈ຺ຉຕີຕິ ອຕ຺ໂຖ, ວຸຑ຺ຒິໍ ອິຈ຺ຉຕິ ວາ ໂນ ວາຕິ ວຸຕ຺ຕໍ ໂຫຕິ. ນິຣຍໍ ວາ ຕິຣຈ຺ຉານໂຍນິໍ ວາຕິ ສເຈ ສາ ມິຈ຺ຉາທິຏ຺ຐິ ສມ຺ປຊ຺ຊຕິ, ນິຍຕາ ໂຫຕິ, ເອກໍເສນ ນິຣເຍ ນິພ຺ພຕ຺ຕຕິ, ໂນ ເຈ, ຕິຣຈ຺ຉານໂຍນິຍໍ ນິພ຺ພຕ຺ຕຕີຕິ ອຕ຺ໂຖ.

໕໑໐-໕໑໒. ອິທານິ ຍສ຺ມາ ຍຖາ ອຕ຺ຕໂນ ລາຠນ຺ຕຣາເຍນ ສຕ຺ຕາ ສໍວິຊ຺ຊນ຺ຕິ ນ ຕຖາ ປເຣສໍ, ຕສ຺ມາ ສຸຏ຺ຐຸຕຣໍ ພ຺ຣາຫ຺ມຓໍ ປເວເຈຕຸກາໂມ ‘‘ຕໍ ກິໍ ມຎ຺ຎສີ’’ຕິ ທຸຕິຍໍ ອຸປປຕ຺ຕິມາຫ. ເຍ ຈິເມຕິ ເຍ ຈ ອິເມ ຕຖາຄຕສ຺ສ ຘມ຺ມເທສນໍ ສຸຕ຺ວາ ອຣິຍຠູມິໍ ໂອກ຺ກມິຕຸໍ ອສກ຺ໂກນ຺ຕາ ກຸລປຸຕ຺ຕາ ທິພ຺ພາ ຄພ຺ຠາຕິ ອຸປໂຍຄຕ຺ເຖ ປຈ຺ຈຕ຺ຕວຈນໍ, ທິພ຺ເພ ຄພ຺ເຠຕິ ອຕ຺ໂຖ. ທິພ຺ພາ, ຄພ຺ຠາຕິ ຈ ຉນ຺ນໍ ເທວໂລການເມຕໍ ອຘິວຈນໍ. ປຣິປາເຈນ຺ຕີຕິ ເທວໂລກຄາມິນິໍ ປຏິປທໍ ປູຣຍມານາ ທານໍ, ທທມານາ, ສີລໍ ຣກ຺ຂມານາ, ຄນ຺ຘມາລາທີຫິ, ປູຊໍ ກຸຣຸມານາ ຠາວນໍ ຠາວຍມານາ ປາເຈນ຺ຕິ ວິປາເຈນ຺ຕິ ປຣິປາເຈນ຺ຕິ ປຣິຓາມໍ ຄເມນ຺ຕິ. ທິພ຺ພານໍ ຠວານໍ ອຠິນິພ຺ພຕ຺ຕິຍາຕິ ທິພ຺ພຠວາ ນາມ ເທວານໍ ວິມານານິ, ເຕສໍ ນິພ຺ພຕ຺ຕນຕ຺ຖາຍາຕິ ອຕ຺ໂຖ. ອຖ ວາ ທິພ຺ພາ ຄພ຺ຠາຕິ ທານາທໂຍ ປຸຎ຺ຎວິເສສາ. ທິພ຺ພາ ຠວາຕິ ເທວໂລເກ ວິປາກກ຺ຂນ຺ຘາ, ເຕສໍ ນິພ຺ພຕ຺ຕນຕ຺ຖາຍ ຕານິ ປຸຎ຺ຎານິ ກໂຣນ຺ຕີຕິ ອຕ຺ໂຖ. ເຕສໍ ອນ຺ຕຣາຍກໂຣຕິ ເຕສໍ ມຄ຺ຄສມ຺ປຕ຺ຕິຜລສມ຺ປຕ຺ຕິທິພ຺ພຠວວິເສສານໍ ອນ຺ຕຣາຍກໂຣ. ອິຕິ ຠຄວາ ເອຕ຺ຕາວຕາ ອນິຍມິເຕເນວ ໂອປມ຺ມວິຘິນາ ຍາວ ຠວຄ຺ຄາ ອຸຄ຺ຄຕໍ ພ຺ຣາຫ຺ມຓສ຺ສ ມານໍ ຠິນ຺ທິຕ຺ວາ ອິທານິ ໂຈທນາຣເຫ ຕໂຍ ສຕ຺ຖາເຣ ທສ຺ເສຕຸໍ ‘‘ຕໂຍ ໂຂ ເມ, ໂລຫິຈ຺ຈາ’’ຕິອາທິມາຫ.

ຕໂຍ ໂຈທນາຣຫວຓ຺ຓນາ

໕໑໓. ຕຕ຺ຖ ສາ ໂຈທນາຕິ ຕໂຍ ສຕ຺ຖາເຣ ໂຈເທນ຺ຕສ຺ສ ໂຈທນາ. ນ ອຎ຺ຎາ ຈິຕ຺ຕໍ ອຸປຏ຺ຐເປນ຺ຕີຕິ ອຎ຺ຎາຍ ອາຊານນຕ຺ຖາຍ ຈິຕ຺ຕໍ ນ ອຸປຏ຺ຐເປນ຺ຕິ. ໂວກ຺ກມ຺ມາຕິ ນິຣນ຺ຕຣໍ ຕສ຺ສ ສາສນໍ ອກຕ຺ວາ ຕໂຕ ອຸກ຺ກມິຕ຺ວາ ວຕ຺ຕນ຺ຕີຕິ ອຕ຺ໂຖ. ໂອສກ຺ກນ຺ຕິຍາ ວາ ອຸສ຺ສກ຺ເກຍ຺ຍາຕິ ປຏິກ຺ກມນ຺ຕິຍາ ອຸປຄຈ຺ເຉຍ຺ຍ, ອນິຈ຺ຉນ຺ຕິຍາ ອິຈ຺ເຉຍ຺ຍ, ເອກາຍ ສມ຺ປໂຍຄໍ ອນິຈ຺ຉນ຺ຕິຍາ ເອໂກ ອິຈ຺ເຉຍ຺ຍາຕິ ວຸຕ຺ຕໍ ໂຫຕິ. ປຣມ຺ມຸຂິໍ ວາ ອາລິງ຺ເຄຍ຺ຍາຕິ ທຏ຺ຐຸມ຺ປິ ອນິຈ຺ຉມານໍ ປຣມ຺ມຸຂິໍ ຐິຕໍ ປຈ຺ຉໂຕ ຄນ຺ຕ຺ວາ ອາລິງ຺ເຄຍ຺ຍ. ເອວໍສມ຺ປທມິທນ຺ຕິ ອິມສ຺ສາປິ ສຕ຺ຖຸໂນ ‘‘ມມ ອິເມ ສາວກາ’’ຕິ ສາສນາ ໂວກ຺ກມ຺ມ ວຕ຺ຕມາເນປິ ເຕ ໂລເຠນ ອນຸສາສໂຕ ອິມໍ ໂລຠຘມ຺ມໍ ເອວໍສມ຺ປທເມວ ອີທິສເມວ ວທາມິ. ອິຕິ ໂສ ເອວຣູໂປ ຕວ ໂລຠຘມ຺ໂມ ເຍນ ຕ຺ວໍ ໂອສກ຺ກນ຺ຕິຍາ ອຸສ຺ສກ຺ກນ຺ໂຕ ວິຍ ປຣມ຺ມຸຂິໍ ອາລິງ຺ຄນ຺ໂຕ ວິຍ ອໂຫສີຕິປິ ຕໍ ໂຈທນໍ ອຣຫຕິ. ກິຎ຺ຫິ ປໂຣ ປຣສ຺ສ ກຣິສ຺ສຕີຕິ ເຍນ ຘມ຺ເມນ ປເຣ ອນຸສາສິ, ອຕ຺ຕານເມວ ຕາວ ຕຕ຺ຖ ສມ຺ປາເທຫິ, ອຸຊຸໍ ກໂຣຫິ. ກິຎ຺ຫິ ປໂຣ ປຣສ຺ສ ກຣິສ຺ສຕີຕິ ໂຈທນໍ ອຣຫຕິ.

໕໑໔. ນິທ຺ທາຍິຕພ຺ພນ຺ຕິ ສສ຺ສຣູປການິ ຕິຓານິ ອຸປ຺ປາເຏຕ຺ວາ ປຣິສຸທ຺ຘໍ ກາຕພ຺ພໍ.

໕໑໕. ຕຕິຍໂຈທນາຍ ກິຎ຺ຫິ ປໂຣ ປຣສ຺ສາຕິ ອນຸສາສນໍ ອສມ຺ປຏິຈ຺ຉນກາລໂຕ ປຏ຺ຐາຍ ປໂຣ ອນຸສາສິຕພ຺ໂພ, ປຣສ຺ສ ອນຸສາສກສ຺ສ ກິໍ ກຣິສ຺ສຕີຕິ ນນຸ ຕຕ຺ຖ ອປ຺ໂປສ຺ສຸກ຺ກຕໍ ອາປຊ຺ຊິຕ຺ວາ ອຕ຺ຕນາ ປຏິວິທ຺ຘຘມ຺ມໍ ອຕ຺ຕນາວ ມາເນຕ຺ວາ ປູເຊຕ຺ວາ ວິຫາຕພ຺ພນ຺ຕິ ເອວໍ ໂຈທນໍ ອຣຫຕີຕິ ອຕ຺ໂຖ.

ນ ໂຈທນາຣຫສຕ຺ຖຸວຓ຺ຓນາ

໕໑໖. ນ ໂຈທນາຣໂຫຕິ ອຍຎ຺ຫິ ຍສ຺ມາ ປຐມເມວ ອຕ຺ຕານໍ ປຕິຣູເປ ປຕິຏ຺ຐາເປຕ຺ວາ ສາວການໍ ຘມ຺ມໍ ເທເສຕິ. ສາວກາ ຈສ຺ສ ອສ຺ສວາ ຫຸຕ຺ວາ ຍຖານຸສິຏ຺ຐໍ ປຏິປຊ຺ຊນ຺ຕິ, ຕາຍ ຈ ປຏິປຕ຺ຕິຍາ ມຫນ຺ຕໍ ວິເສສມຘິຄຈ຺ຉນ຺ຕິ. ຕສ຺ມາ ນ ໂຈທນາຣໂຫຕິ.

໕໑໗. ນຣກປປາຕໍ ປປຕນ຺ໂຕຕິ ມຍາ ຄຫິຕາຍ ທິຏ຺ຐິຍາ ອຫໍ ນຣກປປາຕໍ ປປຕນ຺ໂຕ. ອຸທ຺ຘຣິຕ຺ວາ ຖເລ ປຕິຏ຺ຐາປິໂຕຕິ ຕໍ ທິຏ຺ຐິໍ ຠິນ຺ທິຕ຺ວາ ຘມ຺ມເທສນາຫຕ຺ເຖນ ອປາຍປຕນໂຕ ອຸທ຺ຘຣິຕ຺ວາ ສຄ຺ຄມຄ຺ຄຖເລ ຐປິໂຕມ຺ຫີຕິ ວທຕິ. ເສສເມຕ຺ຖ ອຸຕ຺ຕານເມວາຕິ.

ອິຕິ ສຸມງ຺ຄລວິລາສິນິຍາ ທີຆນິກາຍຏ຺ຐກຖາຍໍ

ໂລຫິຈ຺ຈສຸຕ຺ຕວຓ຺ຓນາ ນິຏ຺ຐິຕາ.