ເອກຈ຺ຈສສ຺ສຕວາທວຓ຺ຓນາ

໓໘. ເອກຈ຺ຈສສ຺ສຕິກາຕິ ເອກຈ຺ຈສສ຺ສຕວາທາ. ເຕ ທຸວິຘາ ໂຫນ຺ຕິ – ສຕ຺ເຕກຈ຺ຈສສ຺ສຕິກາ, ສງ຺ຂາເຣກຈ຺ຈສສ຺ສຕິກາຕິ. ທຸວິຘາປິ ອິຘ ຄຫິຕາເຍວ.

໓໙. ຍນ຺ຕິ ນິປາຕມຕ຺ຕໍ. ກທາຈີຕິ ກິສ຺ມິຎ຺ຈິ ກາເລ. ກຣຫຈີຕິ ຕສ຺ເສວ ເວວຈນໍ. ທີຆສ຺ສ ອທ຺ຘຸໂນຕິ ທີຆສ຺ສ ກາລສ຺ສ. ອຈ຺ຈເຍນາຕິ ອຕິກ຺ກເມນ. ສໍວຏ຺ຏຕີຕິ ວິນສ຺ສຕິ. ເຍຠຸຍ຺ເຍນາຕິ ເຍ ອຸປຣິພ຺ຣຫ຺ມໂລເກສຸ ວາ ອຣູເປສຸ ວາ ນິພ຺ພຕ຺ຕນ຺ຕິ, ຕທວເສເສ ສນ຺ຘາຍ ວຸຕ຺ຕໍ. ຌານມເນນ ນິພ຺ພຕ຺ຕຕ຺ຕາ ມໂນມຍາ. ປີຕິ ເຕສໍ ຠກ຺ໂຂ ອາຫາໂຣຕິ ປີຕິຠກ຺ຂາ. ອຕ຺ຕໂນວ ເຕສໍ ປຠາຕິ ສຍໍປຠາ. ອນ຺ຕລິກ຺ເຂ ຈຣນ຺ຕີຕິ ອນ຺ຕລິກ຺ຂຈຣາ. ສຸເຠສຸ ອຸຍ຺ຍານວິມານກປ຺ປຣຸກ຺ຂາທີສຸ ຕິຏ຺ຐນ຺ຕີຕິ, ສຸຠຏ຺ຐາຍິໂນ ສຸຠາ ວາ ມໂນຣມ຺ມວຕ຺ຖາຠຣຓາ ຫຸຕ຺ວາ ຕິຏ຺ຐນ຺ຕີຕິ ສຸຠຏ຺ຐາຍິໂນ. ຈິຣໍ ທີຆມທ຺ຘານນ຺ຕິ ອຸກ຺ກໍເສນ ອຏ຺ຐ ກປ຺ເປ.

໔໐. ວິວຏ຺ຏຕີຕິ ສຓ຺ຐາຕິ. ສຸຎ຺ຎໍ ພ຺ຣຫ຺ມວິມານນ຺ຕິ ປກຕິຍາ ນິພ຺ພຕ຺ຕສຕ຺ຕານໍ ນຕ຺ຖິຕາຍ ສຸຎ຺ຎໍ, ພ຺ຣຫ຺ມກາຍິກຠູມິ ນິພ຺ພຕ຺ຕຕີຕິ ອຕ຺ໂຖ. ຕສ຺ສ ກຕ຺ຕາ ວາ ກາເຣຕາ ວາ ນຕ຺ຖິ, ວິສຸທ຺ຘິມຄ຺ເຄ ວຸຕ຺ຕນເຍນ ປນ ກມ຺ມປຈ຺ຈຍອຸຕຸສມຸຏ຺ຐານາ ຣຕນຠູມິ ນິພ຺ພຕ຺ຕຕິ. ປກຕິນິພ຺ພຕ຺ຕິຏ຺ຐາເນສຸເຍວ ເຈຕ຺ຖ ອຸຍ຺ຍານກປ຺ປຣຸກ຺ຂາທໂຍ ນິພ຺ພຕ຺ຕນ຺ຕິ. ອຖ ສຕ຺ຕານໍ ປກຕິຍາ ວສິຕຏ຺ຐາເນ ນິກນ຺ຕິ ອຸປ຺ປຊ຺ຊຕິ, ເຕ ປຐມຊ຺ຌານໍ ຠາເວຕ຺ວາ ຕໂຕ ໂອຕຣນ຺ຕິ, ຕສ຺ມາ ອຖ ໂຂ ອຎ຺ຎຕໂຣ ສຕ຺ໂຕຕິອາທິມາຫ. ອາຍຸກ຺ຂຍາ ວາ ປຸຎ຺ຎກ຺ຂຍາ ວາຕິ ເຍ ອຸຬາຣໍ ປຸຎ຺ຎກມ຺ມໍ ກຕ຺ວາ ຍຕ຺ຖ ກຕ຺ຖຈິ ອປ຺ປາຍຸເກ ເທວໂລເກ ນິພ຺ພຕ຺ຕນ຺ຕິ, ເຕ ອຕ຺ຕໂນ ປຸຎ຺ຎພເລນ ຐາຕຸໍ ນ ສກ຺ໂກນ຺ຕິ, ຕສ຺ສ ປນ ເທວໂລກສ຺ສ ອາຍຸປ຺ປມາເຓເນວ ຈວນ຺ຕີຕິ ອາຍຸກ຺ຂຍາ ຈວນ຺ຕີຕິ ວຸຈ຺ຈນ຺ຕິ. ເຍ ປນ ປຣິຕ຺ຕໍ ປຸຎ຺ຎກມ຺ມໍ ກຕ຺ວາ ທີຆາຍຸກເທວໂລເກ ນິພ຺ພຕ຺ຕນ຺ຕິ, ເຕ ຍາວຕາຍຸກໍ ຐາຕຸໍ ນ ສກ຺ໂກນ຺ຕິ, ອນ຺ຕຣາວ ຈວນ຺ຕີຕິ ປຸຎ຺ຎກ຺ຂຍາ ຈວນ຺ຕີຕິ ວຸຈ຺ຈນ຺ຕິ. ທີຆມທ຺ຘານໍ ຕິຏ຺ຐຕີຕິ ກປ຺ປໍ ວາ ອຸປຑ຺ຒກປ຺ປໍ ວາ.

໔໑. ອນຠິຣຕີຕິ ອປຣສ຺ສາປິ ສຕ຺ຕສ຺ສ ອາຄມນປຕ຺ຖນາ. ຍາ ປນ ປຏິຆສມ຺ປຍຸຕ຺ຕາ ອຸກ຺ກຓ຺ຐິຕາ, ສາ ພ຺ຣຫ຺ມໂລເກ ນຕ຺ຖິ. ປຣິຕສ຺ສນາຕິ ອຸພ຺ພິຊ຺ຊນາ ຜນ຺ທນາ, ສາ ປເນສາ ຕາສຕສ຺ສນາ, ຕຓ຺ຫາຕສ຺ສນາ, ທິຏ຺ຐິຕສ຺ສນາ, ຎາຓຕສ຺ສນາຕິ ຈຕຸພ຺ພິຘາ ໂຫຕິ. ຕຕ຺ຖ ‘‘ຊາຕິໍ ປຏິຈ຺ຈ ຠຍໍ ຠຍານກໍ ຉມ຺ຠິຕຕ຺ຕໍ ໂລມຫໍໂສ ເຈຕໂສ ອຸຕ຺ຣາໂສ. ຊຣໍ… ພ຺ຍາຘິໍ… ມຣຓໍ ປຏິຈ຺ຈ…ເປ… ອຸຕ຺ຣາໂສ’’ຕິ (ວິຠ. ໙໒໑) ອຍໍ ຕາສຕສ຺ສນາ ນາມ. ‘‘ອໂຫ ວຕ ອຎ຺ເຎປິ ສຕ຺ຕາ ອິຕ຺ຖຕ຺ຕໍ ອາຄຈ຺ເຉຍ຺ຍຸ’’ນ຺ຕິ (ທີ. ນິ. ໓.໓໘) ອຍໍ ຕຓ຺ຫາຕສ຺ສນາ ນາມ. ‘‘ປຣິຕສ຺ສິຕວິປ຺ຜນ຺ທິຕເມວາ’’ຕິ ອຍໍ ທິຏ຺ຐິຕສ຺ສນາ ນາມ. ‘‘ເຕປິ ຕຖາຄຕສ຺ສ ຘມ຺ມເທສນໍ ສຸຕ຺ວາ ເຍຠຸຍ຺ເຍນ ຠຍໍ ສໍເວຄໍ ສນ຺ຕາສໍ ອາປຊ຺ຊນ຺ຕີ’’ຕິ (ອ. ນິ. ໔.໓໓) ອຍໍ ຎາຓຕສ຺ສນາ ນາມ. ອິຘ ປນ ຕຓ຺ຫາຕສ຺ສນາປິ ທິຏ຺ຐິຕສ຺ສນາປິ ວຏ຺ຏຕິ. ພ຺ຣຫ຺ມວິມານນ຺ຕິ ອິຘ ປນ ປຐມາຠິນິພ຺ພຕ຺ຕສ຺ສ ອຕ຺ຖິຕາຍ ສຸຎ຺ຎນ຺ຕິ ນ ວຸຕ຺ຕໍ. ອຸປປຊ຺ຊນ຺ຕີຕິ ອຸປປຕ຺ຕິວເສນ ອຸປຄຈ຺ຉນ຺ຕິ. ສຫພ຺ຍຕນ຺ຕິ ສຫຠາວໍ.

໔໒. ອຠິຠູຕິ ອຠິຠວິຕ຺ວາ ຐິໂຕ ເຊຏ຺ຐໂກຫມສ຺ມີຕິ. ອນຠິຠູໂຕຕິ ອຎ຺ເຎຫິ ອນຠິຠູໂຕ. ອຎ຺ຎທຕ຺ຖູຕິ ເອກໍສວຈເນ ນິປາໂຕ. ທສ຺ສນວເສນ ທໂສ, ສພ຺ພໍ ປສ຺ສາມີຕິ ອຕ຺ໂຖ. ວສວຕ຺ຕີຕິ ສພ຺ພໍ ຊນໍ ວເສ ວຕ຺ເຕມິ. ອິສ຺ສໂຣ ກຕ຺ຕາ ນິມ຺ມາຕາຕິ ອຫໍ ໂລເກ ອິສ຺ສໂຣ, ອຫໍ ໂລກສ຺ສ ກຕ຺ຕາ ຈ ນິມ຺ມາຕາ ຈ, ປຖວີ – ຫິມວນ຺ຕ-ສິເນຣຸ-ຈກ຺ກວາຬ-ມຫາສມຸທ຺ທ-ຈນ຺ທິມ-ສູຣິຍາ ມຍາ ນິມ຺ມິຕາຕິ. ເສຏ຺ໂຐ ສຊິຕາຕິ ອຫໍ ໂລກສ຺ສ ອຸຕ຺ຕໂມ ຈ ສຊິຕາ ຈ, ‘‘ຕ຺ວໍ ຂຕ຺ຕິໂຍ ນາມ ໂຫຫິ, ຕ຺ວໍ ພ຺ຣາຫ຺ມໂຓ, ເວສ຺ໂສ, ສຸທ຺ໂທ, ຄຫຏ຺ໂຐ, ປພ຺ພຊິໂຕ ນາມ. ອນ຺ຕມໂສ ຕ຺ວໍ ໂອຏ຺ໂຐ ໂຫຫິ, ໂຄໂຓ ໂຫຫີ’’ຕິ ‘‘ເອວໍ ສຕ຺ຕານໍ ສໍວິສເຊຕາ ອຫ’’ນ຺ຕິ ມຎ຺ຎຕິ. ວສີ ປິຕາ ຠູຕຠພ຺ຍານນ຺ຕິ (ທີ. ນິ. ໑.໑໗) ອຫມສ຺ມິ ຈິຓ຺ຓວສິຕາຍ ວສີ, ອຫໍ ປິຕາ ຠູຕານຎ຺ຈ ຠພ຺ຍານຎ຺ຈາຕິ ມຎ຺ຎຕິ. ຕຕ຺ຖ ອຓ຺ຑຊຊລາພຸຊາ ສຕ຺ຕາ ອນ຺ໂຕອຓ຺ຑໂກເສ ເຈວ ອນ຺ໂຕວຕ຺ຖິມ຺ຫິ ຈ ຠພ຺ຍາ ນາມ, ພຫິ ນິກ຺ຂນ຺ຕກາລໂຕ ປຏ຺ຐາຍ ຠູຕາ ນາມ. ສໍເສທຊາ ປຐມຈິຕ຺ຕກ຺ຂເຓ ຠພ຺ຍາ, ທຸຕິຍໂຕ ປຏ຺ຐາຍ ຠູຕາ. ໂອປປາຕິກາ ປຐມອິຣິຍາປເຖ ຠພ຺ຍາ, ທຸຕິຍໂຕ ປຏ຺ຐາຍ ຠູຕາຕິ ເວທິຕພ຺ພາ. ເຕ ສພ຺ເພປິ ມຍ຺ຫໍ ປຸຕ຺ຕາຕິ ສຎ຺ຎາຍ ‘‘ອຫໍ ປິຕາ ຠູຕຠພ຺ຍານ’’ນ຺ຕິ ມຎ຺ຎຕິ.

ອິທານິ ກາຣຓໂຕ ສາເຘຕຸກາໂມ – ‘‘ມຍາ ອິເມ ສຕ຺ຕາ ນິມ຺ມິຕາ’’ຕິ ປຏິຎ຺ຎໍ ກຕ຺ວາ ‘‘ຕໍ ກິສ຺ສ ເຫຕູ’’ຕິອາທິມາຫ. ອິຕ຺ຖຕ຺ຕນ຺ຕິ ອິຕ຺ຖຠາວໍ, ພ຺ຣຫ຺ມຠາວນ຺ຕິ ອຕ຺ໂຖ. ອິມິນາ ມຍນ຺ຕິ ອຕ຺ຕໂນ ກມ຺ມວເສນ ຈຸຕາປິ ອຸປປນ຺ນາປິ ຈ ເກວລໍ ມຎ຺ຎນາມຕ຺ເຕເນວ ‘‘ອິມິນາ ມຍໍ ນິມ຺ມິຕາ’’ຕິ ມຎ຺ຎມານາ ວງ຺ກຈ຺ຉິທ຺ເທ ວງ຺ກອາຓີ ວິຍ ໂອນມິຕ຺ວາ ຕສ຺ເສວ ປາທມູລໍ ຄຈ຺ຉນ຺ຕີຕິ.

໔໓. ວຓ຺ຓວນ຺ຕຕໂຣ ຈາຕິ ວຓ຺ຓວນ຺ຕຕໂຣ, ອຠິຣູໂປ ປາສາທິໂກຕິ ອຕ຺ໂຖ. ມເຫສກ຺ຂຕໂຣຕິ ອິສ຺ສຣິຍປຣິວາຣວເສນ ມຫາຍສຕໂຣ.

໔໔. ຐານໍ ໂຂ ປເນຕນ຺ຕິ ກາຣຓໍ ໂຂ ປເນຕໍ. ໂສ ຕໂຕ ຈວິຕ຺ວາ ອຎ຺ຎຕ຺ຣ ນ ຄຈ຺ຉຕິ, ອິເຘວ ອາຄຈ຺ຉຕິ, ຕໍ ສນ຺ຘາເຍຕໍ ວຸຕ຺ຕໍ. ອຄາຣສ຺ມາຕິ ເຄຫາ. ອນຄາຣິຍນ຺ຕິ ປພ຺ພຊ຺ຊໍ. ປພ຺ພຊ຺ຊາ ຫິ ຍສ຺ມາ ອຄາຣສ຺ສ ຫິ ຕໍ ກສິໂຄຣກ຺ຂາທິກມ຺ມໍ ຕຕ຺ຖ ນຕ຺ຖິ, ຕສ຺ມາ ອນຄາຣິຍນ຺ຕິ ວຸຈ຺ຈຕິ. ປພ຺ພຊຕີຕິ ອຸປຄຈ຺ຉຕິ. ຕໂຕ ປຣໍ ນານຸສ຺ສຣຕີຕິ ຕໂຕ ປຸພ຺ເພນິວາສາ ປຣໍ ນ ສຣຕິ, ສຣິຕຸໍ ອສກ຺ໂກນ຺ໂຕ ຕຕ຺ຖ ຐຕ຺ວາ ທິຏ຺ຐິໍ ຄຓ຺ຫາຕິ.

ນິຈ຺ໂຈຕິອາທີສຸ ຕສ຺ສ ອຸປປຕ຺ຕິໍ ອປສ຺ສນ຺ໂຕ ນິຈ຺ໂຈຕິ ວທຕິ, ມຣຓໍ ອປສ຺ສນ຺ໂຕ ຘຸໂວຕິ, ສທາຠາວໂຕ ສສ຺ສໂຕຕິ, ຊຣາວເສນາປິ ວິປຣິຓາມສ຺ສ ອຠາວໂຕ ອວິປຣິຓາມຘມ຺ໂມຕິ. ເສສເມຕ຺ຖ ປຐມວາເຣ ອຸຕ຺ຕານເມວາຕິ.

໔໕-໔໖. ທຸຕິຍວາເຣ ຂິຑ຺ຑາຍ ປທຸສ຺ສນ຺ຕິ ວິນສ຺ສນ຺ຕີຕິ ຂິຑ຺ຑາປໂທສິກາ, ປທູສິກາຕິປິ ປາຬິໍ ລິຂນ຺ຕິ, ສາ ອຏ຺ຐກຖາຍໍ ນຕ຺ຖິ. ອຕິເວລນ຺ຕິ ອຕິກາລໍ, ອຕິຈິຣນ຺ຕິ ອຕ຺ໂຖ. ຫສ຺ສຂິຑ຺ຑາຣຕິຘມ຺ມສມາປນ຺ນາຕິ ຫສ຺ສຣຕິ ຘມ຺ມຎ຺ເຈວ ຂິຑ຺ຑາຣຕິຘມ຺ມຎ຺ຈ ສມາປນ຺ນາ ອນຸຍຸຕ຺ຕາ, ເກຬິຫສ຺ສສຸຂຎ຺ເຈວ ກາຍິກວາຈສິກກີຬາສຸຂຎ຺ຈ ອນຸຍຸຕ຺ຕາ, ວຸຕ຺ຕປ຺ປກາຣຣຕິຘມ຺ມສມງ຺ຄິໂນ ຫຸຕ຺ວາ ວິຫຣນ຺ຕີຕິ ອຕ຺ໂຖ.

ສຕິ ສມ຺ມຸສ຺ສຕີຕິ ຂາທນີຍໂຠຊນີເຍສຸ ສຕິ ສມ຺ມຸສ຺ສຕິ. ເຕ ກິຣ ປຸຎ຺ຎວິເສສາຘິຄເຕນ ມຫນ຺ເຕນ ອຕ຺ຕໂນ ສິຣິວິຠເວນ ນກ຺ຂຕ຺ຕໍ ກີຬນ຺ຕາ ຕາຍ ສມ຺ປຕ຺ຕິມຫນ຺ຕຕາຍ – ‘‘ອາຫາຣໍ ປຣິຠຸຎ຺ຊິມ຺ຫ, ນ ປຣິຠຸຎ຺ຊິມ຺ຫາ’’ຕິປິ ນ ຊານນ຺ຕິ. ອຖ ເອກາຫາຣາຕິກ຺ກມນໂຕ ປຏ຺ຐາຍ ນິຣນ຺ຕຣໍ ຂາທນ຺ຕາປິ ປິວນ຺ຕາປິ ຈວນ຺ຕິເຍວ, ນ ຕິຏ຺ຐນ຺ຕິ. ກສ຺ມາ? ກມ຺ມຊເຕຊສ຺ສ ພລວຕາຍ, ກຣຊກາຍສ຺ສ ມນ຺ທຕາຍ, ມນຸສ຺ສານຎ຺ຫິ ກມ຺ມຊເຕໂຊ ມນ຺ໂທ, ກຣຊກາໂຍ ພລວາ. ເຕສໍ ເຕຊສ຺ສ ມນ຺ທຕາຍ ກຣຊກາຍສ຺ສ ພລວຕາຍ ສຕ຺ຕາຫມ຺ປິ ອຕິກ຺ກມິຕ຺ວາ ອຸຓ຺ໂຫທກອຈ຺ຉຍາຄຸອາທີຫິ ສກ຺ກາ ວຕ຺ຖຸໍ ອຸປຕ຺ຖມ຺ເຠຕຸໍ. ເທວານໍ ປນ ເຕໂຊ ພລວາ ໂຫຕິ, ກຣຊໍ ມນ຺ທໍ. ເຕ ເອກໍ ອາຫາຣເວລໍ ອຕິກ຺ກມິຕ຺ວາວ ສຓ຺ຐາຕຸໍ ນ ສກ຺ໂກນ຺ຕິ. ຍຖາ ນາມ ຄິມ຺ຫານໍ ມຊ຺ຌນ຺ຫິເກ ຕຕ຺ຕປາສາເຓ ຐປິຕໍ ປທຸມໍ ວາ ອຸປ຺ປລໍ ວາ ສາຍນ຺ຫສມເຍ ຆຏສເຕນາປິ ສິຎ຺ຈິຍມານໍ ປາກຕິກໍ ນ ໂຫຕິ, ວິນສ຺ສຕິເຍວ. ເອວເມວ ປຈ຺ຉາ ນິຣນ຺ຕຣໍ ຂາທນ຺ຕາປິ ປິວນ຺ຕາປິ ຈວນ຺ຕິເຍວ, ນ ຕິຏ຺ຐນ຺ຕິ. ເຕນາຫ ‘‘ສຕິຍາ ສມ຺ໂມສາ ເຕ ເທວາ ຕມ຺ຫາ ກາຍາ ຈວນ຺ຕີ’’ຕິ. ກຕເມ ປນ ເຕ ເທວາຕິ? ອິເມ ເທວາຕິ ອຏ຺ຐກຖາຍໍ ວິຈາຣຓາ ນຕ຺ຖິ, ‘‘ເທວານໍ ກມ຺ມຊເຕໂຊ ພລວາ ໂຫຕິ, ກຣຊໍ ມນ຺ທ’’ນ຺ຕິ ອວິເສເສນ ວຸຕ຺ຕຕ຺ຕາ ປນ ເຍ ເກຈິ ກພຬີກາຣາຫາຣູປຊີວິໂນ ເທວາ ເອວໍ ກໂຣນ຺ຕິ, ເຕເຍວ ຈວນ຺ຕີຕິ ເວທິຕພ຺ພາ. ເກຈິ ປນາຫຸ – ‘‘ນິມ຺ມານຣຕິປຣນິມ຺ມິຕວສວຕ຺ຕິໂນ ເຕ ເທວາ’’ຕິ. ຂິຑ຺ຑາປທຸສ຺ສນມຕ຺ເຕເນວ ເຫເຕ ຂິຑ຺ຑາປໂທສິກາຕິ ວຸຕ຺ຕາ. ເສສເມຕ຺ຖ ປຸຣິມນເຍເນວ ເວທິຕພ຺ພໍ.

໔໗-໔໘. ຕຕິຍວາເຣ ມເນນ ປທຸສ຺ສນ຺ຕິ ວິນສ຺ສນ຺ຕີຕິ ມໂນປໂທສິກາ, ເອເຕ ຈາຕຸມຫາຣາຊິກາ. ເຕສຸ ກິຣ ເອໂກ ເທວປຸຕ຺ໂຕ – ນກ຺ຂຕ຺ຕໍ ກີຬິສ຺ສາມີຕິ ສປຣິວາໂຣ ຣເຖນ ວີຖິໍ ປຏິປຊ຺ຊຕິ, ອຖຎ຺ໂຎ ນິກ຺ຂມນ຺ໂຕ ຕໍ ປຸຣໂຕ ຄຈ຺ຉນ຺ຕໍ ທິສ຺ວາ – ‘ໂຠ ອຍໍ ກປໂຓ’, ອທິຏ຺ຐປຸພ຺ພໍ ວິຍ ເອຕໍ ທິສ຺ວາ – ‘‘ປີຕິຍາ ອຸທ຺ຘຸມາໂຕ ວິຍ ຠິຊ຺ຊມາໂນ ວິຍ ຈ ຄຈ຺ຉຕີ’’ຕິ ກຸຊ຺ຌຕິ. ປຸຣໂຕ ຄຈ຺ຉນ຺ໂຕປິ ນິວຕ຺ຕິຕ຺ວາ ຕໍ ກຸທ຺ຘໍ ທິສ຺ວາ – ກຸທ຺ຘາ ນາມ ສຸວິທິຕາ ໂຫນ຺ຕີຕິ ກຸທ຺ຘຠາວມສ຺ສ ຎຕ຺ວາ – ‘‘ຕ຺ວໍ ກຸທ຺ໂຘ, ມຍ຺ຫໍ ກິໍ ກຣິສ຺ສສິ, ອຍໍ ສມ຺ປຕ຺ຕິ ມຍາ ທານສີລາທີນໍ ວເສນ ລທ຺ຘາ, ນ ຕຸຍ຺ຫໍ ວເສນາ’’ຕິ ປຏິກຸຊ຺ຌຕິ. ເອກສ຺ມິຎ຺ຫິ ກຸທ຺ເຘ ອິຕໂຣ ອກຸທ຺ໂຘ ຣກ຺ຂຕິ, ອຸໂຠສຸ ປນ ກຸທ຺ເຘສຸ ເອກສ຺ສ ໂກໂຘ ອິຕຣສ຺ສ ປຈ຺ຈໂຍ ໂຫຕິ. ຕສ຺ສປິ ໂກໂຘ ອິຕຣສ຺ສ ປຈ຺ຈໂຍ ໂຫຕີຕິ ອຸໂຠ ກນ຺ທນ຺ຕານໍເຍວ ໂອໂຣຘານໍ ຈວນ຺ຕິ. ອຍເມຕ຺ຖ ຘມ຺ມຕາ. ເສສໍ ວຸຕ຺ຕນເຍເນວ ເວທິຕພ຺ພໍ.

໔໙-໕໒. ຕກ຺ກີວາເທ ອຍໍ ຈກ຺ຂາທີນໍ ເຠທໍ ປສ຺ສຕິ, ຈິຕ຺ຕໍ ປນ ຍສ຺ມາ ປຸຣິມໍ ປຸຣິມໍ ປຈ຺ຉິມສ຺ສ ປຈ຺ຉິມສ຺ສ ປຈ຺ຈຍໍ ທຕ຺ວາວ ນິຣຸຊ຺ຌຕິ, ຕສ຺ມາ ຈກ຺ຂາທີນໍ ເຠທໂຕ ພລວຕຣມ຺ປິ ຈິຕ຺ຕສ຺ສ ເຠທໍ ນ ປສ຺ສຕິ. ໂສ ຕໍ ອປສ຺ສນ຺ໂຕ ຍຖາ ນາມ ສກຸໂຓ ເອກໍ ຣຸກ຺ຂໍ ຊຫິຕ຺ວາ ອຎ຺ຎສ຺ມິໍ ນິລີຍຕິ, ເອວເມວ ອິມສ຺ມິໍ ອຕ຺ຕຠາເວ ຠິນ຺ເນ ຈິຕ຺ຕໍ ອຎ຺ຎຕ຺ຣ ຄຈ຺ຉຕີຕິ ຄເຫຕ຺ວາ ເອວມາຫ. ເສສເມຕ຺ຖ ວຸຕ຺ຕນເຍເນວ ເວທິຕພ຺ພໍ.