ສຎ຺ຎີວາທວຓ຺ຓນາ

໗໕. ອຸທ຺ຘມາຆາຕນິກາຕິ ອາຆາຕນໍ ວຸຈ຺ຈຕິ ມຣຓໍ, ອຸທ຺ຘມາຆາຕນາ ອຕ຺ຕານໍ ວທນ຺ຕີຕິ ອຸທ຺ຘມາຆາຕນິກາ. ສຎ຺ຎີຕິ ປວຕ຺ໂຕ ວາໂທ, ສຎ຺ຎີວາໂທ, ໂສ ເອເຕສໍ ອຕ຺ຖີຕິ ສຎ຺ຎີວາທາ.

໗໖-໗໗. ຣູປີ ອຕ຺ຕາຕິອາທີສຸ ກສິຓຣູປໍ ‘‘ອຕ຺ຕາ’’ຕິ ຕຕ຺ຖ ປວຕ຺ຕສຎ຺ຎຎ຺ຈສ຺ສ ‘‘ສຎ຺ຎາ’’ຕິ ຄເຫຕ຺ວາ ວາ ອາຊີວກາທໂຍ ວິຍ ຕກ຺ກມຕ຺ເຕເນວ ວາ ‘‘ຣູປີ ອຕ຺ຕາ ໂຫຕິ, ອໂຣໂຄ ປຣໍ ມຣຓາ ສຎ຺ຎີ’’ຕິ ນໍ ປຎ຺ຎເປນ຺ຕິ. ຕຕ຺ຖ ອໂຣໂຄຕິ ນິຈ຺ໂຈ. ອຣູປສມາປຕ຺ຕິນິມິຕ຺ຕໍ ປນ ‘‘ອຕ຺ຕາ’’ຕິ ສມາປຕ຺ຕິສຎ຺ຎຎ຺ຈສ຺ສ ‘‘ສຎ຺ຎາ’’ຕິ ຄເຫຕ຺ວາ ວາ ນິຄຓ຺ຐາທໂຍ ວິຍ ຕກ຺ກມຕ຺ເຕເນວ ວາ ‘‘ອຣູປີ ອຕ຺ຕາ ໂຫຕິ, ອໂຣໂຄ ປຣໍ ມຣຓາ ສຎ຺ຎີ’’ຕິ ນໍ ປຎ຺ຎເປນ຺ຕິ. ຕຕິຍາ ປນ ມິສ຺ສກຄາຫວເສນ ປວຕ຺ຕາ ທິຏ຺ຐິ. ຈຕຸຕ຺ຖາ ຕກ຺ກຄາເຫເນວ. ທຸຕິຍຈຕຸກ຺ກໍ ອນ຺ຕານນ຺ຕິກວາເທ ວຸຕ຺ຕນເຍເນວ ເວທິຕພ຺ພໍ. ຕຕິຍຈຕຸກ຺ເກ ສມາປນ຺ນກວເສນ ເອກຕ຺ຕສຎ຺ຎີ, ອສມາປນ຺ນກວເສນ ນານຕ຺ຕສຎ຺ຎີ, ປຣິຕ຺ຕກສິຓວເສນ ປຣິຕ຺ຕສຎ຺ຎີ, ວິປຸລກສິຓວເສນ ອປ຺ປມາຓສຎ຺ຎີຕິ ເວທິຕພ຺ພາ. ຈຕຸຕ຺ຖຈຕຸກ຺ເກ ປນ ທິພ຺ເພນ ຈກ຺ຂຸນາ ຕິກຈຕຸກ຺ກຊ຺ຌານຠູມິຍໍ ນິພ຺ພຕ຺ຕມານໍ ທິສ຺ວາ ‘‘ເອກນ຺ຕສຸຂີ’’ຕິ ຄຓ຺ຫາຕິ. ນິຣເຍ ນິພ຺ພຕ຺ຕມານໍ ທິສ຺ວາ ‘‘ເອກນ຺ຕທຸກ຺ຂີ’’ຕິ. ມນຸສ຺ເສສຸ ນິພ຺ພຕ຺ຕມານໍ ທິສ຺ວາ ‘‘ສຸຂທຸກ຺ຂີ’’ຕິ. ເວຫປ຺ຜລເທເວສຸ ນິພ຺ພຕ຺ຕມານໍ ທິສ຺ວາ ‘‘ອທຸກ຺ຂມສຸຂີ’’ຕິ ຄຓ຺ຫາຕິ. ວິເສສໂຕ ຫິ ປຸພ຺ເພນິວາສານຸສ຺ສຕິຎາຓລາຠິໂນ ປຸພ຺ພນ຺ຕກປ຺ປິກາ ໂຫນ຺ຕິ, ທິພ຺ພຈກ຺ຂຸກາ ອປຣນ຺ຕກປ຺ປິກາຕິ.