໒. ປຎ຺ຫາປຸຈ຺ຉກວຓ຺ຓນາ

໒໒໑. ປຎ຺ຫາປຸຈ຺ຉເກ ສພ຺ເພສມ຺ປິ ອິນ຺ທ຺ຣິຍານໍ ກຸສລາທິວິຠາໂຄ ປາຬິນຍານຸສາເຣເນວ ເວທິຕພ຺ໂພ.

໒໒໓. ອາຣມ຺ມຓຕ຺ຕິເກສຸ ປນ ສຕ຺ຕິນ຺ທ຺ຣິຍາ ອນາຣມ຺ມຓາຕິ ຈກ຺ຂຸໂສຕຆານຊິວ຺ຫາກາຍອິຕ຺ຖິປຸຣິສິນ຺ທ຺ຣິຍານິ ສນ຺ຘາຍ ວຸຕ຺ຕໍ. ຊີວິຕິນ຺ທ຺ຣິຍໍ ປນ ອຣູປມິສ຺ສກຕ຺ຕາ ອິຘ ອນາຠຏ຺ຐໍ. ທ຺ວິນ຺ທ຺ຣິຍາຕິ ທ຺ເວ ອິນ຺ທ຺ຣິຍາ; ສຸຂທຸກ຺ຂທ຺ວຍໍ ສນ຺ຘາເຍຕໍ ວຸຕ຺ຕໍ. ຕຎ຺ຫິ ເອກນ຺ຕປຣິຕ຺ຕາຣມ຺ມຓໍ. ໂທມນສ຺ສິນ຺ທ຺ຣິຍໍ ສິຍາ ປຣິຕ຺ຕາຣມ຺ມຓໍ, ສິຍາ ມຫຄ຺ຄຕາຣມ຺ມຓນ຺ຕິ ກາມາວຈຣຘມ຺ເມ ອາຣພ຺ຠ ປວຕ຺ຕິກາເລ ປຣິຕ຺ຕາຣມ຺ມຓໍ ໂຫຕິ, ຣູປາວຈຣາຣູປາວຈເຣ ປນ ອາຣພ຺ຠ ປວຕ຺ຕິກາເລ ມຫຄ຺ຄຕາຣມ຺ມຓໍ, ປຓ຺ຓຕ຺ຕິໍ ອາຣພ຺ຠ ປວຕ຺ຕິກາເລ ນວຕ຺ຕພ຺ພາຣມ຺ມຓໍ. ນວິນ຺ທ຺ຣິຍາ ສິຍາ ປຣິຕ຺ຕາຣມ຺ມຓາຕິ ມນິນ຺ທ຺ຣິຍຊີວິຕິນ຺ທ຺ຣິຍໂສມນສ຺ສິນ຺ທ຺ຣິຍອຸເປກ຺ຂິນ຺ທ຺ຣິຍານິ ເຈວ ສທ຺ຘາທິປຎ຺ຈກຎ຺ຈ ສນ຺ຘາຍ ອິທໍ ວຸຕ຺ຕໍ. ຊີວິຕິນ຺ທ຺ຣິຍຎ຺ຫິ ຣູປມິສ຺ສກຕ຺ຕາ ອນາຣມ຺ມເຓສຸ ຣູປຘມ຺ເມສຸ ສງ຺ຄຫິຕມ຺ປິ ອຣູປໂກຏ຺ຐາເສນ ສິຍາປກ຺ເຂ ສງ຺ຄຫິຕໍ.

ຈຕ຺ຕາຣິ ອິນ຺ທ຺ຣິຍານີຕິ ສຸຂທຸກ຺ຂໂທມນສ຺ສອຎ຺ຎາຕາວິນ຺ທ຺ຣິຍານິ. ຕານິ ຫິ ມຄ຺ຄາຣມ຺ມຓຕ຺ຕິເກ ນ ຠຊນ຺ຕິ. ມຄ຺ຄເຫຕຸກນ຺ຕິ ສຫຊາຕເຫຕຸໍ ສນ຺ຘາຍ ວຸຕ຺ຕໍ. ວີຣິຍວີມໍສາເຊຏ຺ຐກກາເລ ສິຍາ ມຄ຺ຄາຘິປຕິ, ຉນ຺ທຈິຕ຺ຕເຊຏ຺ຐກກາເລ ສິຍາ ນວຕ຺ຕພ຺ພາ.

ທສິນ຺ທ຺ຣິຍາ ສິຍາ ອຸປ຺ປນ຺ນາ, ສິຍາ ອຸປ຺ປາທິໂນຕິ ສຕ຺ຕ ຣູປິນ຺ທ຺ຣິຍານິ ຕີຓິ ຈ ວິປາກິນ຺ທ຺ຣິຍານິ ສນ຺ຘາເຍຕໍ ວຸຕ຺ຕໍ. ທສິນ຺ທ຺ຣິຍານິ ໂທມນສ຺ເສນ ສທ຺ຘິໍ ເຫຏ຺ຐາ ວຸຕ຺ຕາເນວ. ຕຕ຺ຖ ໂທມນສ຺ສິນ຺ທ຺ຣິຍໍ ປຓ຺ຓຕ຺ຕິໍ ອາຣພ຺ຠ ປວຕ຺ຕິກາເລ ນວຕ຺ຕພ຺ພາຣມ຺ມຓໍ, ເສສານິ ນິພ຺ພານປຈ຺ຈເວກ຺ຂຓກາເລປິ. ຕີຓິນ຺ທ຺ຣິຍານິ ພຫິທ຺ຘາຣມ຺ມຓານີຕິ ຕີຓິ ໂລກຸຕ຺ຕຣິນ຺ທ຺ຣິຍານິ. ຈຕ຺ຕາຣີຕິ ສຸຂທຸກ຺ຂໂສມນສ຺ສໂທມນສ຺ສານິ. ຕານິ ຫິ ອຊ຺ຌຕ຺ຕຘມ຺ເມປິ ພຫິທ຺ຘາຘມ຺ເມປິ ອາຣພ຺ຠ ປວຕ຺ຕນ຺ຕິ. ອຏ຺ຐິນ຺ທ຺ຣິຍາຕິ ມນິນ຺ທ຺ຣິຍຊີວິຕິນ຺ທ຺ຣິຍອຸເປກ຺ຂິນ຺ທ຺ຣິຍານິ ເຈວ ສທ຺ຘາທິປຎ຺ຈກຎ຺ຈ. ຕຕ຺ຖ ອາກິຎ຺ຈຎ຺ຎາຍຕນກາເລ ນວຕ຺ຕພ຺ພາຣມ຺ມຓຕາ ເວທິຕພ຺ພາ.

ອິຕິ ອິມສ຺ມິມ຺ປິ ປຎ຺ຫາປຸຈ຺ຉເກ ທສິນ຺ທ຺ຣິຍານິ ກາມາວຈຣານິ, ຕີຓິ ໂລກຸຕ຺ຕຣານິ, ນວ ໂລກິຍໂລກຸຕ຺ຕຣມິສ຺ສກາເນວ ກຖິຕານີຕິ. ອຍມ຺ປິ ອຠິຘມ຺ມຠາຊນີເຍນ ສທ຺ຘິໍ ເອກປຣິຈ຺ເຉໂທວ ໂຫຕິ. ອຍໍ ປນ ອິນ຺ທ຺ຣິຍວິຠງ຺ໂຄ ທ຺ເວປຣິວຏ຺ຏໍ ນີຫຣິຕ຺ວາ ຠາເຊຕ຺ວາ ທສ຺ສິໂຕຕິ.

ສມ຺ໂມຫວິໂນທນິຍາ ວິຠງ຺ຄຏ຺ຐກຖາຍ

ອິນ຺ທ຺ຣິຍວິຠງ຺ຄວຓ຺ຓນາ ນິຏ຺ຐິຕາ.