໓. ປຎ຺ຫາປຸຈ຺ຉກວຓ຺ຓນາ

໒໑໕. ປຎ຺ຫາປຸຈ຺ຉເກ ຈຕຸນ຺ນມ຺ປິ ສຈ຺ຈານໍ ຂນ຺ຘວິຠງ຺ເຄ ວຸຕ຺ຕນຍານຸສາເຣເນວ ກຸສລາທິຠາໂວ ເວທິຕພ຺ໂພ. ອາຣມ຺ມຓຕ຺ຕິເກສຸ ປນ ສມຸທຍສຈ຺ຈໍ ກາມາວຈຣຘມ຺ເມ ອສ຺ສາເທນ຺ຕສ຺ສ ປຣິຕ຺ຕາຣມ຺ມຓໍ ໂຫຕິ, ມຫຄ຺ຄຕຘມ຺ເມ ອສ຺ສາເທນ຺ຕສ຺ສ ມຫຄ຺ຄຕາຣມ຺ມຓໍ, ປຎ຺ຎຕ຺ຕິໍ ອສ຺ສາເທນ຺ຕສ຺ສ ນວຕ຺ຕພ຺ພາຣມ຺ມຓໍ. ທຸກ຺ຂສຈ຺ຈໍ ກາມາວຈຣຘມ຺ເມ ອາຣພ຺ຠ ອຸປ຺ປນ຺ນໍ ປຣິຕ຺ຕາຣມ຺ມຓໍ, ຣູປາຣູປາວຈຣຘມ຺ເມ ອາຣພ຺ຠ ອຸປ຺ປຕ຺ຕິກາເລ ມຫຄ຺ຄຕາຣມ຺ມຓໍ, ນວ ໂລກຸຕ຺ຕຣຘມ຺ເມ ປຈ຺ຈເວກ຺ຂຓກາເລ ອປ຺ປມາຓາຣມ຺ມຓໍ, ປຓ຺ຓຕ຺ຕິໍ ປຈ຺ຈເວກ຺ຂຓກາເລ ນວຕ຺ຕພ຺ພາຣມ຺ມຓໍ. ມຄ຺ຄສຈ຺ຈໍ ສຫຊາຕເຫຕຸວເສນ ສພ຺ພທາປິ ມຄ຺ຄເຫຕຸກໍ ວີຣິຍໍ ວາ ວີມໍສໍ ວາ ເຊຏ຺ຐກໍ ກຕ຺ວາ ມຄ຺ຄຠາວນາກາເລ ມຄ຺ຄາຘິປຕິ, ຉນ຺ທຈິຕ຺ເຕສຸ ອຎ຺ຎຕຣາຘິປຕິກາເລ ນວຕ຺ຕພ຺ພໍ ນາມ ໂຫຕິ. ທຸກ຺ຂສຈ຺ຈໍ ອຣິຍານໍ ມຄ຺ຄປຈ຺ຈເວກ຺ຂຓກາເລ ມຄ຺ຄາຣມ຺ມຓໍ, ເຕສໍເຍວ ມຄ຺ຄໍ ຄຣຸໍ ກຕ຺ວາ ປຈ຺ຈເວກ຺ຂຓກາເລ ມຄ຺ຄາຘິປຕິ, ເສສຘມ຺ມປຈ຺ຈເວກ຺ຂຓກາເລ ນວຕ຺ຕພ຺ພໍ ໂຫຕິ.

ທ຺ເວ ສຈ຺ຈານີຕິ ທຸກ຺ຂສມຸທຍສຈ຺ຈານິ. ເອຕານິ ຫິ ອຕີຕາທິເຠເທ ຘມ຺ເມ ອາຣພ຺ຠ ອຸປ຺ປຕ຺ຕິກາເລ ອຕີຕາທິອາຣມ຺ມຓານິ ໂຫນ຺ຕິ. ສມຸທຍສຈ຺ຈໍ ອຊ຺ຌຕ຺ຕາທິເຠເທ ຘມ຺ເມ ອສ຺ສາເທນ຺ຕສ຺ສ ອຊ຺ຌຕ຺ຕາທິອາຣມ຺ມຓໍ ໂຫຕິ, ທຸກ຺ຂສຈ຺ຈໍ ອາກິຎ຺ຈຎ຺ຎາຍຕນກາເລ ນວຕ຺ຕພ຺ພາຣມ຺ມຓມ຺ປີຕິ ເວທິຕພ຺ພໍ. ອິຕິ ອິມສ຺ມິໍ ປຎ຺ຫາປຸຈ຺ຉເກ ທ຺ເວ ສຈ຺ຈານິ ໂລກິຍານິ ໂຫນ຺ຕິ, ທ຺ເວ ໂລກຸຕ຺ຕຣານິ. ຍຖາ ຈ ອິມສ຺ມິໍ, ເອວໍ ປຸຣິເມສຸປິ ທ຺ວີສຸ. ສມ຺ມາສມ຺ພຸທ຺ເຘນ ຫິ ຕີສຸປິ ສຸຕ຺ຕນ຺ຕຠາຊນີຍາທີສຸ ໂລກິຍໂລກຸຕ຺ຕຣາເນວ ສຈ຺ຈານິ ກຖິຕານິ. ເອວມຍໍ ສຈ຺ຈວິຠງ຺ໂຄປິ ເຕປຣິວຏ຺ຏໍ ນີຫຣິຕ຺ວາວ ຠາເຊຕ຺ວາ ທສ຺ສິໂຕຕິ.

ສມ຺ໂມຫວິໂນທນີຍາ ວິຠງ຺ຄຏ຺ຐກຖາຍ

ສຈ຺ຈວິຠງ຺ຄວຓ຺ຓນາ ນິຏ຺ຐິຕາ.