໒. ອຠິຘມ຺ມຠາຊນີຍວຓ຺ຓນາ

໔໗໒. ອຠິຘມ຺ມຠາຊນີເຍ ສຕ຺ຕປິ ໂພຊ຺ຌງ຺ເຄ ເອກໂຕ ປຸຈ຺ຉິຕ຺ວາ ວິສ຺ສຊ຺ຊນສ຺ສ ຈ ປາຏິເຍກ຺ກໍ ປຸຈ຺ຉິຕ຺ວາ ວິສ຺ສຊ຺ຊນສ຺ສ ຈ ວເສນ ທ຺ເວ ນຍາ. ເຕສໍ ອຕ຺ຖວຓ຺ຓນາ ເຫຏ຺ຐາ ວຸຕ຺ຕນເຍເນວ ເວທິຕພ຺ພາ.

ອຸເປກ຺ຂາສມ຺ໂພຊ຺ຌງ຺ຄນິທ຺ເທເສ ປນ ອຸເປກ຺ຂນວເສນ ອຸເປກ຺ຂາ. ອຸເປກ຺ຂນາກາໂຣ ອຸເປກ຺ຂນາ. ອຸເປກ຺ຂິຕພ຺ພຍຸຕ຺ເຕ ສມປ຺ປວຕ຺ເຕ ຘມ຺ເມ ອິກ຺ຂຕິ, ນ ໂຈເທຕີຕິ ອຸເປກ຺ຂາ. ປຸຄ຺ຄລໍ ອຸເປກ຺ຂາເປຕີຕິ ອຸເປກ຺ຂນາ. ໂພຊ຺ຌງ຺ຄຠາວປ຺ປຕ຺ຕິຍາ ໂລກິຍອຸເປກ຺ຂນາຍ ອຘິກາ ອຸເປກ຺ຂນາ ອຊ຺ຌຸເປກ຺ຂນາ. ອພ຺ຍາປາຣາປຊ຺ຊເນນ ມຊ຺ຌຕ຺ຕຠາໂວ ມຊ຺ຌຕ຺ຕຕາ. ສາ ປນ ຈິຕ຺ຕສ຺ສ, ນ ສຕ຺ຕສ຺ສາຕິ ທີເປຕຸໍ ມຊ຺ຌຕ຺ຕຕາ ຈິຕ຺ຕສ຺ສາຕິ ວຸຕ຺ຕນ຺ຕິ. ອຍເມຕ຺ຖ ອນຸປຸພ຺ພປທວຓ຺ຓນາ.

ນຍາ ປເນຕ຺ຖ ຄເຓຕພ຺ພາ – ສຕ຺ຕນ຺ນມ຺ປິ ຫິ ໂພຊ຺ຌງ຺ຄານໍ ເອກໂຕ ປຸຈ຺ຉິຕ຺ວາ ວິສ຺ສຊ຺ຊເນ ເອເກກມຄ຺ເຄ ນຍສຫສ຺ສໍ ນຍສຫສ຺ສນ຺ຕິ ຈຕ຺ຕາຣິ ນຍສຫສ຺ສານິ ວິຠຕ຺ຕານິ. ປາຏິເຍກ຺ກໍ ປຸຈ຺ຉິຕ຺ວາ ວິສ຺ສຊ຺ຊເນ ເອເກກໂພຊ຺ຌງ຺ຄວເສນ ຈຕ຺ຕາຣິ ຈຕ຺ຕາຣີຕິ ສຕ຺ຕ ຈຕຸກ຺ກາ ອຏ຺ຐວີສຕິ. ຕານິ ປຸຣິເມຫິ ຈຕູຫິ ສທ຺ຘິໍ ທ຺ວຕ຺ຕິໍສາຕິ ສພ຺ພານິປິ ອຠິຘມ຺ມຠາຊນີເຍ ທ຺ວຕ຺ຕິໍສ ນຍສຫສ຺ສານິ ວິຠຕ຺ຕານິ ກຸສລາເນວ. ຍສ຺ມາ ປນ ຜລກ຺ຂເຓປິ ໂພຊ຺ຌງ຺ຄາ ລພ຺ຠນ຺ຕິ, ກຸສລເຫຕຸການິ ຈ ສາມຎ຺ຎຜລານິ, ຕສ຺ມາ ເຕສຸປິ ໂພຊ຺ຌງ຺ຄທສ຺ສນຕ຺ຖໍ ກຸສລນິທ຺ເທສປຸພ຺ພງ຺ຄມາຍ ເອວ ຕນ຺ຕິຍາ ວິປາກນໂຍ ອາຣທ຺ໂຘ. ໂສປິ ເອກໂຕ ປຸຈ຺ຉິຕ຺ວາ ວິສ຺ສຊ຺ຊນສ຺ສ ຈ, ປາຏິເຍກ຺ກໍ ປຸຈ຺ຉິຕ຺ວາ ວິສ຺ສຊ຺ຊນສ຺ສ ຈ ວເສນ ທຸວິໂຘ ໂຫຕິ. ເສສເມຕ຺ຖ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ. ວິປາເກ ປນ ກຸສລໂຕ ຕິຄຸຓາ ນຍາ ກາຕພ຺ພາຕິ.

ອຠິຘມ຺ມຠາຊນີຍວຓ຺ຓນາ.