໓. ປຎ຺ຫາປຸຈ຺ຉກວຓ຺ຓນາ

໑໕໐. ອິທານິ ປຎ຺ຫາປຸຈ຺ຉກໍ ໂຫຕິ. ຕຕ຺ຖ ປຎ຺ຫາປຸຈ຺ຉເນ ປຎ຺ຈນ຺ນໍ ຂນ຺ຘານໍ ‘‘ກຕິກຸສລາ? ກຕິອກຸສລາ? ກຕິອພ຺ຍາກຕາ’’ຕິອາທິນາ ນເຍນ ຍໍ ລພ຺ຠຕິ, ຍຎ຺ຈ ນ ລພ຺ຠຕິ, ຕໍ ສພ຺ພໍ ປຸຈ຺ຉິຕ຺ວາ ວິສ຺ສຊ຺ຊເນ ‘‘ຣູປກ຺ຂນ຺ໂຘ ອພ຺ຍາກໂຕ’’ຕິອາທິນາ ນເຍນ ຍໍ ລພ຺ຠຕິ ຕເທວ ອຸທ຺ຘຏນ຺ຕິ ເວທິຕພ຺ພໍ. ຍຕ຺ຖ ຍຕ຺ຖ ຈ ‘ເອໂກ ຂນ຺ໂຘ’ຕິ ວາ ‘ທ຺ເວ ຂນ຺ຘາ’ຕິ ວາ ປຣິຈ຺ເຉທໍ ອກຕ຺ວາ ‘‘ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ’’ຕິອາທິນາ ນເຍນ ຕນ຺ຕິ ຐປິຕາ, ຕຕ຺ຖ ຕຕ຺ຖ ປຎ຺ຈນ຺ນມ຺ປິ ຂນ຺ຘານໍ ຄຫຓໍ ເວທິຕພ຺ພໍ. ເສໂສ ເຕສໍ ເຕສໍ ຂນ຺ຘານໍ ກຸສລາທິວິຠາໂຄ ເຫຏ຺ຐາ ຘມ຺ມສງ຺ຄຫຏ຺ຐກຖາຍໍ (ຘ. ສ. ອຏ຺ຐ. ໙໘໕) ວຸຕ຺ໂຕເຍວ.

ອາຣມ຺ມຓຕ຺ຕິເກສຸ ປນ ຈຕ຺ຕາໂຣ ຂນ຺ຘາ ປຎ຺ຈປຓ຺ຓາສ ກາມາວຈຣຘມ຺ເມ ອາຣພ຺ຠ ຣຊ຺ຊນ຺ຕສ຺ສ ທຸສ຺ສນ຺ຕສ຺ສ ມຸຍ຺ຫນ຺ຕສ຺ສ ສໍວຣນ຺ຕສ຺ສ ສມ຺ມສນ຺ຕສ຺ສ ປຈ຺ຈເວກ຺ຂນ຺ຕສ຺ສ ຈ ປຣິຕ຺ຕາຣມ຺ມຓາ ໂຫນ຺ຕິ, ສຕ຺ຕວີສຕິ ຣູປາຣູປາວຈຣຘມ຺ເມ ອາຣພ຺ຠ ຣຊ຺ຊນ຺ຕສ຺ສ ທຸສ຺ສນ຺ຕສ຺ສ ມຸຍ຺ຫນ຺ຕສ຺ສ ສໍວຣນ຺ຕສ຺ສ ປຣິຄ຺ຄຫໍ ປຏ຺ຐເປນ຺ຕສ຺ສ ມຫຄ຺ຄຕາຣມ຺ມຓາ, ມຄ຺ຄຜລນິພ຺ພານານິ ປຈ຺ຈເວກ຺ຂນ຺ຕສ຺ສ ອປ຺ປມາຓາຣມ຺ມຓາ, ປຎ຺ຎຕ຺ຕິໍ ປຈ຺ຈເວກ຺ຂຓກາເລ ນວຕ຺ຕພ຺ພາຣມ຺ມຓາຕິ.

ເຕເຍວ ເສກ຺ຂາເສກ຺ຂານໍ ມຄ຺ຄປຈ຺ຈເວກ຺ຂຓກາເລ ມຄ຺ຄາຣມ຺ມຓາ ໂຫນ຺ຕິ, ມຄ຺ຄກາເລ ສຫຊາຕເຫຕຸນາ ມຄ຺ຄເຫຕຸກາ, ມຄ຺ຄໍ ຄຣຸໍ ກຕ຺ວາ ປຈ຺ຈເວກ຺ຂຓກາເລ ອາຣມ຺ມຓາຘິປຕິນາ ມຄ຺ຄາຘິປຕິໂນ, ວີຣິຍເຊຏ຺ຐກໍ ວາ ວີມໍສເຊຏ຺ຐກໍ ວາ ມຄ຺ຄໍ ຠາເວນ຺ຕສ຺ສ ສຫຊາຕາຘິປຕິນາ ມຄ຺ຄາຘິປຕິໂນ, ຉນ຺ທເຊຏ຺ຐກໍ ປນ ຈິຕ຺ຕເຊຏ຺ຐກໍ ວາ ຠາເວນ຺ຕສ຺ສ ນວຕ຺ຕພ຺ພາຣມ຺ມຓາ ນາມ ໂຫນ຺ຕິ.

ອຕີຕານິ ປນ ຂນ຺ຘຘາຕຸອາຍຕນານິ ອາຣພ຺ຠ ຣຊ຺ຊນ຺ຕສ຺ສ ທຸສ຺ສນ຺ຕສ຺ສ ມຸຍ຺ຫນ຺ຕສ຺ສ ສໍວຣນ຺ຕສ຺ສ ປຣິຄ຺ຄຫໍ ປຏ຺ຐເປນ຺ຕສ຺ສ ອຕີຕາຣມ຺ມຓາ ໂຫນ຺ຕິ, ອນາຄຕານິ ອາຣພ຺ຠ ອນາຄຕາຣມ຺ມຓາ ໂຫນ຺ຕິ, ປຈ຺ຈຸປ຺ປນ຺ນານິ ອາຣພ຺ຠ ປຈ຺ຈຸປ຺ປນ຺ນາຣມ຺ມຓາ ໂຫນ຺ຕິ, ປຎ຺ຎຕ຺ຕິໍ ວາ ນິພ຺ພານໍ ວາ ປຈ຺ຈເວກ຺ຂນ຺ຕສ຺ສ ນວຕ຺ຕພ຺ພາຣມ຺ມຓາ ໂຫນ຺ຕິ.

ຕຖາ ອຕ຺ຕໂນ ຂນ຺ຘຘາຕຸອາຍຕນານິ ອາຣພ຺ຠ ຣຊ຺ຊນ຺ຕສ຺ສ ທຸສ຺ສນ຺ຕສ຺ສ ມຸຍ຺ຫນ຺ຕສ຺ສ ສໍວຣນ຺ຕສ຺ສ ປຣິຄ຺ຄຫໍ ປຏ຺ຐເປນ຺ຕສ຺ສ ອຊ຺ຌຕ຺ຕາຣມ຺ມຓາ ໂຫນ຺ຕິ, ປເຣສໍ ຂນ຺ຘຘາຕຸອາຍຕນານິ ອາຣພ຺ຠ ເອວໍ ປວຕ຺ເຕນ຺ຕສ຺ສ ພຫິທ຺ຘາຣມ຺ມຓາ, ປຓ຺ຓຕ຺ຕິນິພ຺ພານປຈ຺ຈເວກ຺ຂຓກາເລປິ ພຫິທ຺ຘາຣມ຺ມຓາເຍວ, ກາເລນ ອຊ຺ຌຕ຺ຕໍ ກາເລນ ພຫິທ຺ຘາ ຘມ຺ເມສຸ ເອວໍ ປວຕ຺ເຕນ຺ຕສ຺ສ ອຊ຺ຌຕ຺ຕພຫິທ຺ຘາຣມ຺ມຓາ, ອາກິຎ຺ຈຎ຺ຎາຍຕນກາເລ ນວຕ຺ຕພ຺ພາຣມ຺ມຓາຕິ ເວທິຕພ຺ພາ.

ອິຕິ ຠຄວາ ອິມໍ ຂນ຺ຘວິຠງ຺ຄໍ ສຸຕ຺ຕນ຺ຕຠາຊນີຍາທິວເສນ ຕໂຍ ປຣິວຏ຺ເຏ ນີຫຣິຕ຺ວາ ຠາເຊນ຺ໂຕ ທສ຺ເສສິ. ຕີສຸປິ ຫິ ປຣິວຏ຺ເຏສຸ ເອໂກວ ປຣິຈ຺ເຉໂທ. ຣູປກ຺ຂນ຺ໂຘ ຫິ ສພ຺ພຕ຺ຖ ກາມາວຈໂຣເຍວ. ຈຕ຺ຕາໂຣ ຂນ຺ຘາ ຈຕຸຠູມກາ ໂລກິຍໂລກຸຕ຺ຕຣມິສ຺ສກາ ກຖິຕາຕິ.

ສມ຺ໂມຫວິໂນທນິຍາ ວິຠງ຺ຄຏ຺ຐກຖາຍ

ຂນ຺ຘວິຠງ຺ຄວຓ຺ຓນາ ນິຏ຺ຐິຕາ.