໔. ສງ຺ຂາຣກ຺ຂນ຺ຘນິທ຺ເທໂສ

໒໐. ສງ຺ຂາຣກ຺ຂນ຺ຘນິທ຺ເທເສ ເຍ ເກຈິ ສງ຺ຂາຣາຕິ ຈຕຸຠູມິກສງ຺ຂາເຣ ປຣິຍາທິຍຕິ. ຈກ຺ຂຸສມ຺ຜສ຺ສຊາ ເຈຕນາຕິອາທີນິ ອຕີຕາທິວເສນ ນິທ຺ທິຏ຺ຐສງ຺ຂາເຣ ສຠາວໂຕ ທສ຺ເສຕຸໍ ວຸຕ຺ຕານິ. ຈກ຺ຂຸສມ຺ຜສ຺ສຊາຕິອາທີນິ ວຸຕ຺ຕຕ຺ຖາເນວ. ເຈຕນາຕິ ເຫຏ຺ຐິມໂກຏິຍາ ປຘານສງ຺ຂາຣວເສນ ວຸຕ຺ຕໍ. ເຫຏ຺ຐິມໂກຏິຍາ ຫິ ອນ຺ຕມໂສ ຈກ຺ຂຸວິຎ຺ຎາເຓນ ສທ຺ຘິໍ ປາຬິຍໍ ອາຄຕາ ຈຕ຺ຕາໂຣ ສງ຺ຂາຣາ ອຸປ຺ປຊ຺ຊນ຺ຕິ. ເຕສຸ ເຈຕນາ ປຘານາ ອາຍູຫນຏ຺ເຐນ ປາກຏຕ຺ຕາ. ຕສ຺ມາ ອຍເມວ ຄຫິຕາ. ຕໍສມ຺ປຍຸຕ຺ຕສງ຺ຂາຣາ ປນ ຕາຍ ຄຫິຕາຍ ຄຫິຕາວ ໂຫນ຺ຕິ. ອິຘາປິ ປຸຣິມາ ປຎ຺ຈ ຈກ຺ຂຸປສາທາທິວຕ຺ຖຸກາວ. ມໂນສມ຺ຜສ຺ສຊາ ຫທຍວຕ຺ຖຸກາປິ ອວຕ຺ຖຸກາປິ. ສພ຺ພາ ຈຕຸຠູມິກເຈຕນາ. ເສສໍ ເວທນາກ຺ຂນ຺ຘສທິສເມວາຕິ.

ອຍໍ ສງ຺ຂາຣກ຺ຂນ຺ຘນິທ຺ເທໂສ.