໓. ສຎ຺ຎາກ຺ຂນ຺ຘນິທ຺ເທໂສ

໑໔. ສຎ຺ຎາກ຺ຂນ຺ຘນິທ຺ເທເສ ຍາ ກາຈິ ສຎ຺ຎາຕິ ຈຕຸຠູມິກສຎ຺ຎໍ ປຣິຍາທິຍຕິ. ຈກ຺ຂຸສມ຺ຜສ຺ສຊາ ສຎ຺ຎາຕິອາທີນິ ອຕີຕາທິວເສນ ນິທ຺ທິຏ຺ຐສຎ຺ຎໍ ສຠາວໂຕ ທສ຺ເສຕຸໍ ວຸຕ຺ຕານິ. ຕຕ຺ຖ ຈກ຺ຂຸສມ຺ຜສ຺ສໂຕ ຈກ຺ຂຸສມ຺ຜສ຺ສສ຺ມິໍ ວາ ຊາຕາ ຈກ຺ຂຸສມ຺ຜສ຺ສຊາ ນາມ. ເສສາສຸປິ ເອເສວ ນໂຍ. ເອຕ຺ຖ ຈ ປຸຣິມາ ປຎ຺ຈ ຈກ຺ຂຸປສາທາທິວຕ຺ຖຸກາວ. ມໂນສມ຺ຜສ຺ສຊາ ຫທຍວຕ຺ຖຸກາປິ ອວຕ຺ຖຸກາປິ. ສພ຺ພາ ຈຕຸຠູມິກສຎ຺ຎາ.

໑໗. ໂອຬາຣິກທຸກນິທ຺ເທເສ ປຏິຆສມ຺ຜສ຺ສຊາຕິ ສປ຺ປຏິເຆ ຈກ຺ຂຸປສາທາທໂຍ ວຕ຺ຖຸໍ ກຕ຺ວາ ສປ຺ປຏິເຆ ຣູປາທໂຍ ອາຣພ຺ຠ ອຸປ຺ປນ຺ໂນ ຜສ຺ໂສ ປຏິຆສມ຺ຜສ຺ໂສ ນາມ. ຕໂຕ ຕສ຺ມິໍ ວາ ຊາຕາ ປຏິຆສມ຺ຜສ຺ສຊາ ນາມ. ຈກ຺ຂຸສມ຺ຜສ຺ສຊາ ສຎ຺ຎາ…ເປ… ກາຍສມ຺ຜສ຺ສຊາ ສຎ຺ຎາຕິປິ ຕສ຺ສາເຍວ ວຕ຺ຖຸໂຕ ນາມໍ. ຣູປສຎ຺ຎາ…ເປ… ໂຜຏ຺ຐພ຺ພສຎ຺ຎາຕິປິ ຕສ຺ສາເຍວ ອາຣມ຺ມຓໂຕ ນາມໍ. ອິທໍ ປນ ວຕ຺ຖາຣມ຺ມຓໂຕ ນາມໍ. ສປ຺ປຏິຆານິ ຫິ ວຕ຺ຖູນິ ນິສ຺ສາຍ, ສປ຺ປຏິຆານິ ຈ ອາຣມ຺ມຓານິ ອາຣພ຺ຠ ອຸປ຺ປຕ຺ຕິໂຕ ເອສາ ປຏິຆສມ຺ຜສ຺ສຊາ ສຎ຺ຎາຕິ ວຸຕ຺ຕາ. ມໂນສມ຺ຜສ຺ສຊາຕິປິ ປຣິຍາເຍນ ເອຕິສ຺ສາ ນາມໍ ໂຫຕິເຍວ. ຈກ຺ຂຸວິຎ຺ຎາຓຎ຺ຫິ ມໂນ ນາມ. ເຕນ ສຫຊາໂຕ ຜສ຺ໂສ ມໂນສມ຺ຜສ຺ໂສ ນາມ. ຕສ຺ມິໍ ມໂນສມ຺ຜສ຺ເສ, ຕສ຺ມາ ວາ ມໂນສມ຺ຜສ຺ສາ ຊາຕາຕິ ມໂນສມ຺ຜສ຺ສຊາ. ຕຖາ ໂສຕຆານຊິວ຺ຫາກາຍວິຎ຺ຎາຓໍ ມໂນ ນາມ. ເຕນ ສຫຊາໂຕ ຜສ຺ໂສ ມໂນສມ຺ຜສ຺ໂສ ນາມ. ຕສ຺ມິໍ ມໂນສມ຺ຜສ຺ເສ, ຕສ຺ມາ ວາ ມໂນສມ຺ຜສ຺ສາ ຊາຕາຕິ ມໂນສມ຺ຜສ຺ສຊາ.

ອຘິວຈນສມ຺ຜສ຺ສຊາ ສຎ຺ຎາຕິປິ ປຣິຍາເຍນ ເອຕິສ຺ສາ ນາມໍ ໂຫຕິເຍວ. ຕໂຍ ຫິ ອຣູປິໂນ ຂນ຺ຘາ ສຍໍ ປິຏ຺ຐິວຏ຺ຏກາ ຫຸຕ຺ວາ ອຕ຺ຕນາ ສຫຊາຕາຍ ສຎ຺ຎາຍ ອຘິວຈນສມ຺ຜສ຺ສຊາ ສຎ຺ຎາຕິປິ ນາມໍ ກໂຣນ຺ຕິ. ນິປ຺ປຣິຍາເຍນ ປນ ປຏິຆສມ຺ຜສ຺ສຊາ ສຎ຺ຎາ ນາມ ປຎ຺ຈທ຺ວາຣິກສຎ຺ຎາ, ອຘິວຈນສມ຺ຜສ຺ສຊາ ສຎ຺ຎາ ນາມ ມໂນທ຺ວາຣິກສຎ຺ຎາ. ຕຕ຺ຖ ປຎ຺ຈທ຺ວາຣິກສຎ຺ຎາ ໂອໂລເກຕ຺ວາປິ ຊານິຕຸໍ ສກ຺ກາຕິ ໂອຬາຣິກາ. ຣຊ຺ຊິຕ຺ວາ ອຸປນິຊ຺ຌາຍນ຺ຕຎ຺ຫິ ‘ຣຊ຺ຊິຕ຺ວາ ອຸປນິຊ຺ຌາຍຕີ’ຕິ, ກຸຊ຺ຌິຕ຺ວາ ອຸປນິຊ຺ຌາຍນ຺ຕໍ ‘ກຸຊ຺ຌິຕ຺ວາ ອຸປນິຊ຺ຌາຍຕີ’ຕິ ໂອໂລເກຕ຺ວາວ ຊານນ຺ຕິ.

ຕຕ຺ຣິທໍ ວຕ຺ຖຸ – ທ຺ເວ ກິຣ ອິຕ຺ຖິໂຍ ນິສີທິຕ຺ວາ ສຸຕ຺ຕໍ ກນ຺ຕນ຺ຕິ. ທ຺ວີສຸ ທຫເຣສຸ ຄາເມ ຈຣນ຺ເຕສຸ ເອໂກ ປຸຣໂຕ ຄຈ຺ຉນ຺ໂຕ ເອກໍ ອິຕ຺ຖິໍ ໂອໂລເກສິ. ອິຕຣາ ຕໍ ປຸຈ຺ຉິ ‘ກສ຺ມາ ນຸ ໂຂ ຕໍ ເອໂສ ໂອໂລເກສີ’ຕິ? ‘ນ ເອໂສ ຠິກ຺ຂຸ ມໍ ວິສຠາຄຈິຕ຺ເຕນ ໂອໂລເກສິ, ກນິຏ຺ຐຠຄິນີສຎ຺ຎາຍ ປນ ໂອໂລເກສີ’ຕິ. ເຕສຸປິ ຄາເມ ຈຣິຕ຺ວາ ອາສນສາລາຍ ນິສິນ຺ເນສຸ ອິຕໂຣ ຠິກ຺ຂຸ ຕໍ ຠິກ຺ຂຸໍ ປຸຈ຺ຉິ – ‘ຕຍາ ສາ ອິຕ຺ຖີ ໂອໂລກິຕາ’ຕິ? ‘ອາມ ໂອໂລກິຕາ’. ‘ກິມຕ຺ຖາຍາ’ຕິ? ‘ມຍ຺ຫໍ ຠຄິນີສຣິກ຺ຂຕ຺ຕາ ຕໍ ໂອໂລເກສິ’ນ຺ຕິ ອາຫ. ເອວໍ ປຎ຺ຈທ຺ວາຣິກສຎ຺ຎາ ໂອໂລເກຕ຺ວາປິ ຊານິຕຸໍ ສກ຺ກາຕິ ເວທິຕພ຺ພາ. ສາ ປເນສາ ປສາທວຕ຺ຖຸກາ ເອວ. ເກຈິ ປນ ຊວນປ຺ປວຕ຺ຕາຕິ ທີເປນ຺ຕິ. ມໂນທ຺ວາຣິກສຎ຺ຎາ ປນ ເອກມຎ຺ເຈ ວາ ເອກປີເຐ ວາ ນິສີທິຕ຺ວາປິ ອຎ຺ຎໍ ຈິນ຺ເຕນ຺ຕໍ ວິຕກ຺ເກນ຺ຕຎ຺ຈ ‘ກິໍ ຈິນ຺ເຕສິ, ກິໍ ວິຕກ຺ເກສີ’ຕິ ປຸຈ຺ຉິຕ຺ວາ ຕສ຺ສ ວຈນວເສເນວ ຊານິຕພ຺ພໂຕ ສຸຂຸມາ. ເສສໍ ເວທນາກ຺ຂນ຺ຘສທິສເມວາຕິ.

ອຍໍ ສຎ຺ຎາກ຺ຂນ຺ຘນິທ຺ເທໂສ.