໑. ວາທຍຸຕ຺ຕິວຓ຺ຓນາ

໒໘໒. ອິທານິ ສພ຺ພມຕ຺ຖີຕິວາທກຖາ ນາມ ໂຫຕິ. ຕຕ຺ຖ ເຍສໍ ‘‘ຍໍ ກິຎ຺ຈິ ຣູປໍ ອຕີຕານາຄຕປຈ຺ຈຸປ຺ປນ຺ນໍ…ເປ… ອຍໍ ວຸຈ຺ຈຕິ ຣູປກ຺ຂນ຺ໂຘ’’ຕິອາທິວຈນໂຕ (ວິຠ. ໒) ‘‘ສພ຺ເພປິ ອຕີຕາທິເຠທາ ຘມ຺ມາ ຂນ຺ຘສຠາວໍ ນ ວິຊຫນ຺ຕິ, ຕສ຺ມາ ສພ຺ພໍ ອຕ຺ຖິເຍວ ນາມາ’’ຕິ ລທ຺ຘິ, ເສຍ຺ຍຖາປິ ເອຕຣຫິ ສພ຺ພມຕ຺ຖິວາທານໍ, ເຕສໍ ລທ຺ຘິວິໂສຘນຕ຺ຖໍ ສພ຺ພມຕ຺ຖີຕິ ປຸຈ຺ຉາ ສກວາທິສ຺ສ, ວຸຕ຺ຕປ຺ປກາຣາຍ ລທ຺ຘິຍາ ຐຕ຺ວາ ປຏິຎ຺ຎາ ອິຕຣສ຺ສ. ສພ຺ພຖາຕິ ສພ຺ພສ຺ມິໍ ສຣີເຣ ສພ຺ພມຕ຺ຖີຕິ ປຸຈ຺ຉຕິ. ສພ຺ພທາຕິ ສພ຺ພສ຺ມິໍ ກາເລ ສພ຺ພມຕ຺ຖີຕິ ປຸຈ຺ຉຕິ. ສພ຺ເພນ ສພ຺ພນ຺ຕິ ສພ຺ເພນາກາເຣນ ສພ຺ພມຕ຺ຖີຕິ ປຸຈ຺ຉຕິ. ສພ຺ເພສູຕິ ສພ຺ເພສຸ ຘມ຺ເມສຸ ສພ຺ພມຕ຺ຖີຕິ ປຸຈ຺ຉຕິ. ອໂຍຄນ຺ຕິ ອຍຸຕ຺ຕໍ. ນານາສຠາວານຎ຺ຫິ ໂຍໂຄ ໂຫຕິ, ນ ເອກສຠາວສ຺ສ. ອິຕິ ອິມສ຺ມິໍ ປຎ຺ເຫ ຣູປໍ ເວທນາຍ, ເວທນໍ ວາ ຣູເປນ ອນານໍ ເອກລກ຺ຂຓເມວ ກຕ຺ວາ ສພ຺ພມຕ຺ຖີຕິ ປຸຈ຺ຉຕິ. ຍມ຺ປິ ນຕ຺ຖິ ຕມ຺ປຕ຺ຖີຕິ ຍມ຺ປິ ຉຏ຺ຐຂນ຺ຘາທິກໍ ສສວິສາຓາທິກໍ ວາ ກິຎ຺ຈິ ນຕ຺ຖີຕິ ສິທ຺ຘໍ, ຕມ຺ປິ ເຕ ອຕ຺ຖີຕິ ປຸຈ຺ຉຕິ. ສພ຺ພມຕ຺ຖີຕິ ຍາ ທິຏ຺ຐິ ສາ ທິຏ຺ຐິ ມິຈ຺ຉາທິຏ຺ຐີຕິ, ຍາ ທິຏ຺ຐິ ສາ ທິຏ຺ຐິ ສມ຺ມາທິຏ຺ຐີຕິ ເຫວມຕ຺ຖີຕິ ອິມິນາ ອິທໍ ປຸຈ຺ຉຕິ – ຍາ ເຕ ເອສາ ສພ຺ພມຕ຺ຖີຕິ ທິຏ຺ຐິ, ສາ ທິຏ຺ຐິ ອຍາຖາວກຕ຺ຕາ ມິຈ຺ຉາທິຏ຺ຐີຕິ ເອວໍ ຍາ ອມ຺ຫາກໍ ທິຏ຺ຐິ, ສາ ທິຏ຺ຐິ ຍາຖາວກຕ຺ຕາ ສມ຺ມາທິຏ຺ຐີຕິ ເອວໍ ຕວ ສມເຍ ອຕ຺ຖີຕິ ປຸຈ຺ຉຕິ. ອິຕໂຣ ສພ຺ເພສຸປິ ເອເຕສຸ ນເຍສຸ ວຸຕ຺ຕປ຺ປກາຣາຍ ອຕ຺ຖິຕາຍ ອຠາວໂຕ ປຏິກ຺ຂິປຕິ. ອິເມສຸ ປນ ສພ຺ເພສຸປິ ນເຍສຸ ‘‘ອາຊານາຫິ ນິຄ຺ຄຫ’’ນ຺ຕິ ອາທິໍ ກຕ຺ວາ ສພ຺ໂພ ກຖາມຄ຺ຄເຠໂທ ວິຕ຺ຖາຣໂຕ ເວທິຕພ຺ໂພຕິ ອຍໍ ຕາເວຕ຺ຖ ວາທຍຸຕ຺ຕິ.