໔. ນິສ຺ສຍວາຣວຓ຺ຓນາ

໓໒໙-໓໓໗. ນິສ຺ສຍວາເຣ ກຸສລໍ ຘມ຺ມໍ ນິສ຺ສາຍາຕິ ກຸສລໍ ຘມ຺ມໍ ປຕິຏ຺ຐຏ຺ເຐນ ນິສ຺ສຍໍ ກຕ຺ວາຕິ ອຕ຺ໂຖ. ເສສເມຕ຺ຖ ປຈ຺ຈຍວາເຣ ວຸຕ຺ຕນເຍເນວ ເວທິຕພ຺ພໍ. ອວສາເນ ປນສ຺ສ ‘‘ປຈ຺ຈຍຕ຺ຕໍ ນາມ ນິສ຺ສຍຕ຺ຕໍ, ນິສ຺ສຍຕ຺ຕໍ ນາມ ປຈ຺ຈຍຕ຺ຕ’’ນ຺ຕິ ອິທໍ ອຸຠິນ຺ນມ຺ປິ ເອເຕສໍ ວາຣານໍ ອຕ຺ຖໂຕ ນິນ຺ນານາກຣຓຠາວທສ຺ສນຕ຺ຖໍ ວຸຕ຺ຕໍ. ອຕ຺ຖໂຕ ຫິ ເອເຕປິ ປຏິຈ຺ຈສຫຊາຕາ ວິຍ ນິນ຺ນານາກຣຓາ. ເອວໍ ສນ຺ເຕປິ ອຎ຺ຎມຎ຺ຎສ຺ສ ອຕ຺ຖນິຍມນຕ຺ຖໍ ວຸຕ຺ຕາ. ອວິຊ຺ຊາປຈ຺ຈຍາ ສງ຺ຂາຣາຕິອາທີສຸ ຫິ ອນິສ຺ສາຍ ວຕ຺ຕມານໍ ນານາກ຺ຂຓິກມ຺ປິ ‘‘ປຈ຺ຈຍາ ອຸປ຺ປຊ຺ຊຕີ’’ຕິ ວຸຕ຺ຕໍ. ອຎ຺ຎມຎ຺ຎໍ ອລ຺ລີຍິຕ຺ວາ ຐິຕກຏ຺ຐາທີສຸ ຈ ເອກໍ ເອກສ຺ສ ນິສ຺ສຍປຈ຺ຈໂຍ ນ ໂຫຕິ, ຕຖາ ອຸປາທາຣູປໍ ມຫາຠູຕສ຺ສ ນິສ຺ສຍປຈ຺ຈໂຍ ນ ໂຫຕິເຍວ. ອິຕິ ປຈ຺ຈຍວາເຣນ ນິສ຺ສຍປຈ຺ຈຍຠາວໍ ນິສ຺ສຍວາເຣນ ຈ ປຈ຺ຈຍາຕິ ວຸຕ຺ຕສ຺ສ ສຫຊາຕປຸເຣຊາຕຠາວໍ ນິຍເມຕຸໍ ອຸໂຠເປເຕ ວຸຕ຺ຕາ. ອປິຈ ຕຖາ ພຸຊ຺ຌນການໍ ອຊ຺ຌາສຍວເສນ ເທສນາວິລາເສນ ນິຣຸຕ຺ຕິປຏິສມ຺ຠິທາປເຠທຊານນວເສນ ຈາປິ ເອເຕ ອຸໂຠປິ ວຸຕ຺ຕາຕິ.

ນິສ຺ສຍວາຣວຓ຺ຓນາ.