໒. ສຫຊາຕວາຣວຓ຺ຓນາ

໒໓໔-໒໔໒. ສຫຊາຕວາເຣ ກຸສລໍ ຘມ຺ມໍ ສຫຊາໂຕຕິ ກຸສລໍ ຘມ຺ມໍ ປຏິຈ຺ຈ ເຕນ ສຫຊາໂຕ ຫຸຕ຺ວາຕິ ອຕ຺ໂຖ. ເສສເມຕ຺ຖ ປຏິຈ຺ຈວາເຣ ວຸຕ຺ຕນເຍເນວ ເວທິຕພ຺ພໍ. ອວສາເນ ປນສ຺ສ ‘‘ປຏິຈ຺ຈຕ຺ຕໍ ນາມ ສຫຊາຕຕ຺ຕໍ, ສຫຊາຕຕ຺ຕໍ ນາມ ປຏິຈ຺ຈຕ຺ຕ’’ນ຺ຕິ ອິທໍ ອຸຠິນ຺ນມ຺ປິ ເອເຕສໍ ວາຣານໍ ອຕ຺ຖໂຕ ນິນ຺ນານາກຣຓຠາວທສ຺ສນຕ຺ຖໍ ວຸຕ຺ຕໍ. ອຕ຺ຖໂຕ ຫິ ເອເຕ ທ຺ເວປິ ນິນ຺ນານາກຣຓາ. ເອວໍ ສນ຺ເຕປິ ອຎ຺ຎມຎ຺ຎສ຺ສ ອຕ຺ຖນິຍມນຕ຺ຖໍ ວຸຕ຺ຕາ. ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈາ’’ຕິອາທີສຸ ຫິ ອສຫຊາຕມ຺ປິ ປຏິຈ຺ຈ ອຸປ຺ປຊ຺ຊຕີຕິ ວຸຈ຺ຈຕິ. ສຫຊາຕມ຺ປິ ຈ ອຸປາທາຣູປໍ ຠູຕຣູປສ຺ສ ປຈ຺ຈໂຍ ນ ໂຫຕິ. ອິຕິ ປຏິຈ຺ຈວາເຣນ ສຫຊາຕປຈ຺ຈຍຠາວໍ, ສຫຊາຕວາເຣນ ຈ ປຏິຈ຺ຈາຕິ ວຸຕ຺ຕສ຺ສ ສຫຊາຕຠາວໍ ນິຍເມຕຸໍ ອຸໂຠເປເຕ ວຸຕ຺ຕາ. ອປິຈ ຕຖາ ພຸຊ຺ຌນການໍ ອຊ຺ຌາສຍວເສນ ເທສນາວິລາເສນ ນິຣຸຕ຺ຕິປຏິສມ຺ຠິທາປ຺ປເຠທຊານນວເສນ ຈາປິ ເອເຕ ອຸໂຠປິ ວຸຕ຺ຕາຕິ.

ສຫຊາຕວາຣວຓ຺ຓນາ ນິຏ຺ຐິຕາ.