໗. ອຎ຺ຎມຎ຺ຎປຈ຺ຈຍນິທ຺ເທສວຓ຺ຓນາ

໗. ອຎ຺ຎມຎ຺ຎປຈ຺ຈຍນິທ຺ເທເສ ສຫຊາຕປຈ຺ຈຍນິທ຺ເທສສ຺ສ ປຸຣິມານໍ ຕິຓ຺ຓໍ ໂກຏ຺ຐາສານໍ ວເສນ ປາຬິ ອາຄຕາ. ຕສ຺ສາ ຕຕ຺ຖ ວຸຕ຺ຕສທິສາວ ວຓ຺ຓນາຕິ ປຸນ ນ ຄຫິຕາ. ອຍມ຺ປິ ຈ ອຎ຺ຎມຎ຺ຎປຈ຺ຈໂຍ ຊາຕິວເສນ ກຸສໂລ ອກຸສໂລ ວິປາໂກ ກິຣິຍໍ ຣູປນ຺ຕິ ປຎ຺ຈຘາ ຠິນ຺ໂນ. ຕຕ຺ຖ ກຸສໂລ ຠູມິໂຕ ຈຕຸພ຺ພິໂຘ. ສພ຺ພໍ ປຸຣິມສທິສເມວາຕິ ເອວເມຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ເອວໍ ຠິນ຺ເນ ປເນຕ຺ຖ ສພ຺ພມ຺ປິ ຈຕຸຠູມກໍ ກຸສລໍ ອຕ຺ຕນາ ສມ຺ປຍຸຕ຺ຕຘມ຺ມານໍ ອຎ຺ຎມຎ຺ຎປຈ຺ຈເຍນ ປຈ຺ຈໂຍ. ຕຖາ ອກຸສລໍ. ວິປາເກ ປນ ກາມາວຈຣຣູປາວຈຣວິປາກໍ ປຏິສນ຺ຘິຍໍ ວຕ຺ຖຸຣູປສ຺ສ, ປວຕ຺ເຕ ສມ຺ປຍຸຕ຺ຕຘມ຺ມານຎ຺ເຎວ. ອຣູປາວຈຣໂລກຸຕ຺ຕຣວິປາກໍ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຎວ ອຎ຺ຎມຎ຺ຎປຈ຺ຈເຍນ ປຈ຺ຈໂຍ. ສພ຺ພມ຺ປິ ກິຣິຍໍ ສມ຺ປຍຸຕ຺ຕຘມ຺ມານຎ຺ເຎວ ອຎ຺ຎມຎ຺ຎປຈ຺ຈເຍນ ປຈ຺ຈໂຍ. ຈຕຸສມຸຏ຺ຐານິກຣູປສ຺ສ ກມ຺ມສມຸຏ຺ຐາເນ ເອກໍ ມຫາຠູຕໍ ຕິຓ຺ຓໍ, ຕີຓິ ເອກສ຺ສ, ທ຺ເວ ທ຺ວິນ຺ນໍ ມຫາຠູຕານໍ ອຎ຺ຎມຎ຺ຎປຈ຺ຈເຍນ ປຈ຺ຈໂຍ. ກາມາວຈຣຣູປາວຈຣປຏິສນ຺ຘິຍໍ ວຕ຺ຖຸຣູປໍ ວິປາກກ຺ຂນ຺ຘານໍ ອຎ຺ຎມຎ຺ຎປຈ຺ຈເຍນ ປຈ຺ຈໂຍ. ອຸຕຸຈິຕ຺ຕາຫາຣສມຸຏ຺ຐາເນສຸ ມຫາຠູຕາເນວ ມຫາຠູຕານໍ ອຎ຺ຎມຎ຺ຎປຈ຺ຈເຍນ ປຈ຺ຈໂຍຕິ ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ອຎ຺ຎມຎ຺ຎປຈ຺ຈຍນິທ຺ເທສວຓ຺ຓນາ.