໑. ເຫຕຸປຈ຺ຈຍນິທ຺ເທສວຓ຺ຓນາ

໑. ອິທານິ ສພ຺ເພປິ ເຕ ປຈ຺ຈເຍ ອຸທ຺ທິຏ຺ຐປຏິປາຏິຍາ ນິທ຺ທິສິຕ຺ວາ ທສ຺ເສຕຸໍ ເຫຕຸປຈ຺ຈໂຍຕິ ເຫຕູ ເຫຕຸສມ຺ປຍຸຕ຺ຕການໍ ຘມ຺ມານໍ ຕໍສມຸຏ຺ຐານານຎ຺ຈ ຣູປານໍ ເຫຕຸປຈ຺ຈເຍນ ປຈ຺ຈໂຍຕິອາທິມາຫ. ຕຕ຺ຖ ເຫຕຸປຈ຺ຈໂຍຕິ ຈຕຸວີສຕິຍາ ປຈ຺ຈເຍສຸ ນິກ຺ຂິຕ຺ຕປຏິປາຏິຍາ ສພ຺ພປຐມໍ ຠາເຊຕພ຺ພສ຺ສ ປທຸທ຺ຘາໂຣ. ເສສປຈ຺ຈເຍສຸປິ ອິມິນາວ ນເຍນ ປຐມໍ ຠາເຊຕພ຺ພປທໍ ອຸທ຺ຘຣິຕ຺ວາ ວິສ຺ສຊ຺ຊນໍ ກຕນ຺ຕິ ເວທິຕພ຺ພໍ. ອຍໍ ປເນຕ຺ຖ ສມ຺ພນ຺ໂຘ – ໂຍ ປຈ຺ຈຍຸທ຺ເທເສ ເຫຕຸປຈ຺ຈໂຍຕິ ອຸທ຺ທິຏ຺ໂຐ, ໂສ ນິທ຺ເທສໂຕ ‘‘ເຫຕູ ເຫຕຸສມ຺ປຍຸຕ຺ຕການໍ ຘມ຺ມານໍ ຕໍສມຸຏ຺ຐານານຎ຺ຈ ຣູປານໍ ເຫຕຸປຈ຺ຈເຍນ ປຈ຺ຈໂຍ’’ຕິ ເອວໍ ເວທິຕພ຺ໂພ. ອິມິນາ ອຸປາເຍນ ສພ຺ພປຈ຺ຈເຍສຸ ຠາເຊຕພ຺ພສ຺ສ ປທສ຺ສ ວິສ຺ສຊ຺ຊເນນ ສທ຺ຘິໍ ສມ຺ພນ຺ໂຘ ເວທິຕພ຺ໂພ.

ອິທານິ ເຫຕູ ເຫຕຸສມ຺ປຍຸຕ຺ຕການນ຺ຕິ ເອຕ຺ຖ ‘‘ເຫຕຸສມ຺ປຍຸຕ຺ຕການ’’ນ຺ຕິ ອວຕ຺ວາ ‘‘ເຫຕູ ເຫຕຸສມ຺ປຍຸຕ຺ຕການ’’ນ຺ຕິ ກສ຺ມາ ວຸຕ຺ຕນ຺ຕິ? ປຈ຺ຈຍສ຺ສ ເຈວ ປຈ຺ຈຍຸປ຺ປນ຺ນານຎ຺ຈ ວວຕ຺ຖາປນໂຕ. ເຫຕຸສມ຺ປຍຸຕ຺ຕການນ຺ຕິ ຫິ ວຸຕ຺ເຕ ເຫຕຸນາ ສມ຺ປຍຸຕ຺ຕການໍ ເຫຕຸປຈ຺ຈເຍນ ປຈ຺ຈໂຍຕິ ອຕ຺ໂຖ ຠເວຍ຺ຍ. ເອວໍ ສນ຺ເຕ ອສຸໂກ ນາມ ຘມ຺ໂມ ເຫຕຸປຈ຺ຈເຍນ ປຈ຺ຈໂຍຕິ ປຈ຺ຈຍວວຕ຺ຖານໍ ນ ປຎ຺ຎາເຍຍ຺ຍ. ອຖາປິ ເຫຕຸນາ ສມ຺ປຍຸຕ຺ຕການໍ ເຫຕຸສມ຺ປຍຸຕ຺ຕການນ຺ຕິ ອຕ຺ຖໍ ອຄ຺ຄເຫຕ຺ວາວ ເຍສໍ ເກສຎ຺ຈິ ສມ຺ປຍຸຕ຺ຕການໍ ເຫຕູ ເຫຕຸປຈ຺ຈເຍນ ປຈ຺ຈໂຍຕິ ອຕ຺ໂຖ ຠເວຍ຺ຍ, ເອວໍ ສນ຺ເຕ ເຫຕຸນາ ວິປ຺ປຍຸຕ຺ຕາ ຈກ຺ຂຸວິຎ຺ຎາຓາທໂຍປິ ສມ຺ປຍຸຕ຺ຕກາເຍວ, ເຫຕຸນາ ສມ຺ປຍຸຕ຺ຕາ ກຸສລາທໂຍປິ. ຕຕ຺ຖ ອຍໍ ເຫຕຸ ອສຸກສ຺ສ ນາມ ສມ຺ປຍຸຕ຺ຕກຘມ຺ມສ຺ສ ປຈ຺ຈໂຍຕິ ປຈ຺ຈຍຸປ຺ປນ຺ນວວຕ຺ຖານໍ ນ ປຎ຺ຎາເຍຍ຺ຍ. ຕສ຺ມາ ປຈ຺ຈຍຎ຺ເຈວ ປຈ຺ຈຍຸປ຺ປນ຺ນຎ຺ຈ ວວຕ຺ຖາເປນ຺ໂຕ ‘‘ເຫຕູ ເຫຕຸສມ຺ປຍຸຕ຺ຕການ’’ນ຺ຕິ ອາຫ. ຕສ຺ສຕ຺ໂຖ – ເຫຕຸສມ຺ປຍຸຕ຺ຕການໍ ກຸສລາທິຘມ຺ມານໍ ໂຍ ເຫຕຸ ສມ຺ປຍຸຕ຺ຕໂກ, ໂສ ເຫຕຸປຈ຺ຈເຍນ ປຈ຺ຈໂຍຕິ. ຕຕ຺ຣາປິ ‘‘ປຈ຺ຈໂຍ’’ຕິ ອວຕ຺ວາ ‘‘ເຫຕຸປຈ຺ຈເຍນາ’’ຕິ ວຈນໍ ເຫຕຸໂນ ອຎ຺ຎຖາ ປຈ຺ຈຍຠາວປຏິເສຘນຕ຺ຖໍ. ອຍຎ຺ຫິ ເຫຕຸ ເຫຕຸປຈ຺ຈເຍນາປິ ປຈ຺ຈໂຍ ໂຫຕິ, ສຫຊາຕາທິປຈ຺ຈເຍນາປິ. ຕຕ຺ຣາສ຺ສ ຍ຺ວາຍໍ ສຫຊາຕາທິປຈ຺ຈຍວເສນ ອຎ຺ຎຖາປິ ປຈ຺ຈຍຠາໂວ, ຕສ຺ສ ປຏິເສຘນຕ຺ຖໍ ເຫຕຸປຈ຺ຈເຍນາຕິ ວຸຕ຺ຕໍ. ເອວໍ ສນ຺ເຕປິ ‘‘ຕໍສມ຺ປຍຸຕ຺ຕການ’’ນ຺ຕິ ອວຕ຺ວາ ກສ຺ມາ ‘‘ເຫຕຸສມ຺ປຍຸຕ຺ຕການ’’ນ຺ຕິ ວຸຕ຺ຕນ຺ຕິ? ນິທ຺ທິສິຕພ຺ພສ຺ສ ອປາກຏຕ຺ຕາ. ຕໍສມ຺ປຍຸຕ຺ຕການນ຺ຕິ ຫິ ວຸຕ຺ເຕ ເຍນ ເຕ ຕໍສມ຺ປຍຸຕ຺ຕກາ ນາມ ໂຫນ຺ຕິ, ອຍໍ ນາມ ໂສຕິ ນິທ຺ທິສິຕພ຺ໂພ ອປາກໂຏ. ຕສ຺ສ ອປາກຏຕ຺ຕາ ເຍນ ສມ຺ປຍຸຕ຺ຕາ ເຕ ຕໍສມ຺ປຍຸຕ຺ຕກາຕິ ວຸຈ຺ຈນ຺ຕິ, ຕໍ ສຣູປໂຕວ ທສ຺ເສຕຸໍ ‘‘ເຫຕຸສມ຺ປຍຸຕ຺ຕການ’’ນ຺ຕິ ວຸຕ຺ຕໍ.

ຕໍສມຸຏ຺ຐານານນ຺ຕິ ເອຕ຺ຖ ປນ ນິທ຺ທິສິຕພ຺ພສ຺ສ ປາກຏຕ຺ຕາ ຕໍ-ຄຫຓໍ ກຕໍ. ອຍຎ຺ເຫຕ຺ຖ ອຕ຺ໂຖ – ເຕ ເຫຕູ ເຈວ ເຫຕຸສມ຺ປຍຸຕ຺ຕກາ ຈ ຘມ຺ມາ ສມຸຏ຺ຐານໍ ເອເຕສນ຺ຕິ ຕໍສມຸຏ຺ຐານານິ. ເຕສໍ ຕໍສມຸຏ຺ຐານານໍ, ເຫຕຸໂຕ ເຈວ ເຫຕຸສມ຺ປຍຸຕ຺ຕຘມ຺ເມຫິ ຈ ນິພ຺ພຕ຺ຕານນ຺ຕິ ອຕ຺ໂຖ. ອິມິນາ ຈິຕ຺ຕສມຸຏ຺ຐານຣູປໍ ຄຓ຺ຫາຕິ. ກິໍ ປນ ຕໍ ຈິຕ຺ຕໂຕ ອຎ຺ເຎນປິ ສມຸຏ຺ຐາຕີຕິ? ອາມ, ສມຸຏ຺ຐາຕິ. ສພ຺ເພປິ ຫິ ຈິຕ຺ຕເຈຕສິກາ ເອກໂຕ ຫຸຕ຺ວາ ຣູປໍ ສມຸຏ຺ຐາເປນ຺ຕິ. ໂລກິຍຘມ຺ມເທສນາຍໍ ປນ ຈິຕ຺ຕສ຺ສ ອຘິກຠາວໂຕ ຕຖາວິຘໍ ຣູປໍ ຈິຕ຺ຕສມຸຏ຺ຐານນ຺ຕິ ວຸຈ຺ຈຕິ. ເຕເນວາຫ ຈິຕ຺ຕເຈຕສິກາ ຘມ຺ມາ ຈິຕ຺ຕສມຸຏ຺ຐານານໍ ຣູປານໍ ສຫຊາຕປຈ຺ຈເຍນ ປຈ຺ຈໂຍຕິ.

ຍທິ ເອວໍ ອິຘາປິ ‘‘ຕໍສມຸຏ຺ຐານານ’’ນ຺ຕິ ອວຕ຺ວາ ຈິຕ຺ຕສມຸຏ຺ຐານານນ຺ຕິ ກສ຺ມາ ນ ວຸຕ຺ຕນ຺ຕິ? ອຈິຕ຺ຕສມຸຏ຺ຐານານມ຺ປິ ສງ຺ຄຓ຺ຫນໂຕ. ປຎ຺ຫາວາຣສ຺ມິຎ຺ຫິ ‘‘ປຏິສນ຺ຘິກ຺ຂເຓ ວິປາກາພ຺ຍາກຕາ ເຫຕູ ສມ຺ປຍຸຕ຺ຕການໍ ຂນ຺ຘານໍ ກຏຕ຺ຕາ ຈ ຣູປານໍ ເຫຕຸປຈ຺ຈເຍນ ປຈ຺ຈໂຍຕິ ອາຄຕໍ’’. ຕສ຺ສ ສງ຺ຄຓ຺ຫນຕ຺ຖໍ ອິຘ ຈິຕ຺ຕສມຸຏ຺ຐານານນ຺ຕິ ອວຕ຺ວາ ຕໍສມຸຏ຺ຐານານນ຺ຕິ ວຸຕ຺ຕໍ. ຕສ຺ສຕ຺ໂຖ – ຈິຕ຺ຕຊຣູປໍ ອຊນຍມານາປິ ເຕ ເຫຕູ ເຫຕຸສມ຺ປຍຸຕ຺ຕກາ ຘມ຺ມາ ສຫຊາຕາທິປຈ຺ຈຍວເສນ ສມຸຏ຺ຐານໍ ເອເຕສນ຺ຕິ ຕໍສມຸຏ຺ຐານານິ. ເຕສໍ ຕໍສມຸຏ຺ຐານານໍ ປວຕ຺ເຕ ຈິຕ຺ຕຊານໍ ປຏິສນ຺ຘິຍຎ຺ຈ ກຏຕ຺ຕາຣູປານມ຺ປິ ເຫຕູ ເຫຕຸປຈ຺ຈເຍນ ປຈ຺ຈໂຍຕິ. ອິມິນາ ອຸປາເຍນ ອຎ຺ເຎສຸປິ ຕໍສມຸຏ຺ຐານານນ຺ຕິ ອາຄຕຏ຺ຐາເນສຸ ອຕ຺ໂຖ ເວທິຕພ຺ໂພ.

ກສ຺ມາ ປນາຍໍ ເຫຕຸ ປຏິສນ຺ຘິຍເມວ ກຏຕ຺ຕາຣູປານໍ ເຫຕຸປຈ຺ຈໂຍ ໂຫຕິ, ນ ປວຕ຺ເຕຕິ? ປຏິສນ຺ຘິຍໍ ກມ຺ມຊຣູປານໍ ຈິຕ຺ຕປຏິພທ຺ຘວຸຕ຺ຕິຕາຍ. ປຏິສນ຺ຘິຍຎ຺ຫິ ກມ຺ມຊຣູປານໍ ຈິຕ຺ຕປຏິພທ຺ຘາ ປວຕ຺ຕິ, ຈິຕ຺ຕວເສນ ອຸປ຺ປຊ຺ຊນ຺ຕິ ເຈວ ຕິຏ຺ຐນ຺ຕິ ຈ. ຕສ຺ມິຎ຺ຫິ ຂເຓ ຈິຕ຺ຕໍ ຈິຕ຺ຕຊຣູປໍ ຊເນຕຸໍ ນ ສກ຺ໂກຕິ, ຕານິປິ ວິນາ ຈິຕ຺ເຕນ ອຸປ຺ປຊ຺ຊິຕຸໍ ວາ ຐາຕຸໍ ວາ ນ ສກ຺ໂກນ຺ຕິ. ເຕເນວາຫ – ‘‘ວິຎ຺ຎາຓປຈ຺ຈຍາ ນາມຣູປໍ, ຕສ຺ມິໍ ປຕິຏ຺ຐິເຕ ວິຎ຺ຎາເຓ ນາມຣູປສ຺ສ ອວກ຺ກນ຺ຕິ ໂຫຕີ’’ຕິ (ສໍ. ນິ. ໒.໓໙). ປວຕ຺ຕິຍໍ ປນ ເຕສໍ ຈິຕ຺ເຕ ວິຊ຺ຊມາເນປິ ກມ຺ມປຏິພທ຺ຘາວ ປວຕ຺ຕິ, ນ ຈິຕ຺ຕປຏິພທ຺ຘາ. ອວິຊ຺ຊມາເນ ຈາປິ ຈິຕ຺ເຕ ນິໂຣຘສມາປນ຺ນານໍ ອຸປ຺ປຊ຺ຊນ຺ຕິເຍວ.

ກສ຺ມາ ປນ ປຏິສນ຺ຘິກ຺ຂເຓ ຈິຕ຺ຕໍ ຈິຕ຺ຕຊຣູປໍ ຊເນຕຸໍ ນ ສກ຺ໂກຕີຕິ? ກມ຺ມເວຄກ຺ຂິຕ຺ຕຕາຍ ເຈວ ອປ຺ປຕິຏ຺ຐິຕວຕ຺ຖຸຕາຍ ຈ ທຸພ຺ພລຕ຺ຕາ. ຕຎ຺ຫິ ຕທາ ກມ຺ມເວຄກ຺ຂິຕ຺ຕໍ ອປຸເຣຊາຕວຕ຺ຖຸກຕ຺ຕາ ຈ ອປ຺ປຕິຏ຺ຐິຕວຕ຺ຖຸກນ຺ຕິ ທຸພ຺ພລໍ ໂຫຕິ. ຕສ຺ມາ ປປາເຕ ປຕິຕມຕ຺ໂຕ ປຸຣິໂສ ກິຎ຺ຈິ ສິປ຺ປໍ ກາຕຸໍ ວິຍ ຣູປໍ ຊເນຕຸໍ ນ ສກ຺ໂກຕິ; ກມ຺ມຊຣູປເມວ ປນສ຺ສ ຈິຕ຺ຕສມຸຏ຺ຐານຣູປຏ຺ຐາເນ ຕິຏ຺ຐຕິ. ຕຎ຺ຈ ກມ຺ມຊຣູປສ຺ເສວ ພີຊຏ຺ຐາເນ ຕິຏ຺ຐຕິ. ກມ຺ມໍ ປນສ຺ສ ເຂຕ຺ຕສທິສໍ, ກິເລສາ ອາປສທິສາ. ຕສ຺ມາ ສນ຺ເຕປິ ເຂຕ຺ເຕ ອາເປ ຈ ປຐມຸປ຺ປຕ຺ຕິຍໍ ພີຊານຸຠາເວນ ຣຸກ຺ຂຸປ຺ປຕ຺ຕິ ວິຍ ປຏິສນ຺ຘິກ຺ຂເຓ ຈິຕ຺ຕານຸຠາເວນ ຣູປກາຍສ຺ສ ອຸປ຺ປຕ຺ຕິ. ພີເຊ ປນ ວິຄເຕປິ ປຖວີອາປານຸຠາເວນ ຣຸກ຺ຂສ຺ສ ອຸປຣູປຣິ ປວຕ຺ຕິ ວິຍ; ວິນາ ຈິຕ຺ເຕນ ກມ຺ມໂຕວ ກຏຕ຺ຕາຣູປານໍ ປວຕ຺ຕິ ໂຫຕີຕິ ເວທິຕພ຺ພາ. ວຸຕ຺ຕມ຺ປິ ເຈຕໍ – ‘‘ກມ຺ມໍ ເຂຕ຺ຕໍ ວິຎ຺ຎາຓໍ ພີຊໍ ຕຓ຺ຫາ ສ຺ເນໂຫ’’ຕິ (ອ. ນິ. ໓.໗໗).

ອຍຎ຺ຈ ປນຕ຺ໂຖ ໂອກາສວເສເນວ ຄເຫຕພ຺ໂພ. ຕໂຍ ຫິ ໂອກາສາ – ນາໂມກາໂສ, ຣູໂປກາໂສ, ນາມຣູໂປກາໂສຕິ. ຕຕ຺ຖ ອຣູປຠໂວ ນາໂມກາໂສ ນາມ. ຕຕ຺ຣ ຫິ ຫທຍວຕ຺ຖຸມຕ຺ຕມ຺ປິ ຣູປປຈ຺ຈຍໍ ວິນາ ອຣູປຘມ຺ມາວ ອຸປ຺ປຊ຺ຊນ຺ຕິ. ອສຎ຺ຎຠໂວ ຣູໂປກາໂສ ນາມ. ຕຕ຺ຣ ຫິ ປຏິສນ຺ຘິຈິຕ຺ຕມຕ຺ຕມ຺ປິ ອຣູປປຈ຺ຈຍໍ ວິນາ ຣູປຘມ຺ມາວ ອຸປ຺ປຊ຺ຊນ຺ຕິ. ປຎ຺ຈໂວກາຣຠໂວ ນາມຣູໂປກາໂສ ນາມ. ຕຕ຺ຣ ຫິ ວຕ຺ຖຸຣູປມຕ຺ຕມ຺ປິ ວິນາ ປຏິສນ຺ຘິຍໍ ອຣູປຘມ຺ມາ, ປຏິສນ຺ຘິຈິຕ຺ຕຎ຺ຈ ວິນາ ກມ຺ມຊາປິ ຣູປຘມ຺ມາ ນຸປ຺ປຊ຺ຊນ຺ຕິ. ຍຸຄນທ຺ຘາວ ຣູປາຣູປານໍ ອຸປ຺ປຕ຺ຕິ. ຍຖາ ຫິ ສສ຺ສາມິເກ ສຣາຊເກ ເຄເຫ ສທ຺ວາຣປາລເກ ຣາຊາຓຕ຺ຕິໍ ວິນາ ປຐມປ຺ປເວໂສ ນາມ ນຕ຺ຖິ, ອປຣຠາເຄ ປນ ວິນາປິ ອາຓຕ຺ຕິໍ ປຸຣິມາຓຕ຺ຕິອານຸຠາເວເນວ ໂຫຕິ, ເອວເມວ ປຎ຺ຈໂວກາເຣ ປຏິສນ຺ຘິວິຎ຺ຎາຓຣາຊສ຺ສ ສຫຊາຕາທິປຈ຺ຈຍຕໍ ວິນາ ຣູປສ຺ສ ປຏິສນ຺ຘິວເສນ ປຐມຸປ຺ປຕ຺ຕິ ນາມ ນຕ຺ຖິ. ອປຣຠາເຄ ປນ ວິນາປິ ປຏິສນ຺ຘິວິຎ຺ຎາຓສ຺ສ ສຫຊາຕາທິປຈ຺ຈຍານຸຠາວໍ ປຸຣິມານຸຠາວວເສນ ລທ຺ຘປ຺ປເວສສ຺ສ ກມ຺ມໂຕ ປວຕ຺ຕິ ໂຫຕິ. ອສຎ຺ຎຠໂວ ປນ ຍສ຺ມາ ອຣູໂປກາໂສ ນ ໂຫຕິ, ຕສ຺ມາ ຕຕ຺ຖ ວິນາວ ອຣູປປຈ຺ຈຍາ ອສຎ຺ໂຎກາສຕ຺ຕາ ຣູປໍ ປວຕ຺ຕຕິ, ອສ຺ສາມິເກ ສຸຎ຺ຎເຄເຫ ອຕ຺ຕໂນ ເຄເຫ ຈ ປຸຣິສສ຺ສ ປເວໂສ ວິຍ. ອຣູປຠໂວປິ ຍສ຺ມາ ຣູໂປກາໂສ ນ ໂຫຕິ, ຕສ຺ມາ ຕຕ຺ຖ ວິນາວ ຣູປປຈ຺ຈຍາ ອຎ຺ໂຎກາສຕ຺ຕາ ອຣູປຘມ຺ມາ ປວຕ຺ຕນ຺ຕິ. ປຎ຺ຈໂວກາຣຠໂວ ປນ ຣູປາຣູໂປກາໂສຕິ ນຕ຺ເຖຕ຺ຖ ອຣູປປຈ຺ຈຍໍ ວິນາ ປຏິສນ຺ຘິກ຺ຂເຓ ຣູປານໍ ອຸປ຺ປຕ຺ຕີຕິ. ອິຕິ ອຍໍ ເຫຕຸ ປຏິສນ຺ຘິຍເມວ ກຏຕ຺ຕາຣູປານໍ ປຈ຺ຈໂຍ ໂຫຕິ, ນ ປວຕ຺ເຕຕິ.

ນນຸ ‘‘ເຫຕູ ສຫຊາຕານໍ ເຫຕຸປຈ຺ຈເຍນ ປຈ຺ຈໂຍຕິ ວຸຕ຺ເຕ ສພ຺ໂພປິ ອຍມຕ຺ໂຖ ຄຫິໂຕ ໂຫຕິ, ອຖ ກສ຺ມາ ‘‘ເຫຕຸສມ຺ປຍຸຕ຺ຕການໍ ຘມ຺ມານໍ ຕໍສມຸຏ຺ຐານານຎ຺ຈ ຣູປານ’’ນ຺ຕິ ອິທໍ ຄຫິຕນ຺ຕິ? ປວຕ຺ຕິຍໍ ກຏຕ຺ຕາຣູປາທີນໍ ປຈ຺ຈຍຠາວປຏິພາຫນໂຕ. ເອວຎ຺ຫິ ສຕິ ຍານິ ປວຕ຺ຕິຍໍ ເຫຕຸນາ ສຫ ເອກກ຺ຂເຓ ກຏຕ຺ຕາຣູປານິ ເຈວ ອຸຕຸອາຫາຣສມຸຏ຺ຐານານິ ຈ ຊາຍນ຺ຕິ, ເຕສມ຺ປິ ເຫຕູ ເຫຕຸປຈ຺ຈໂຍຕິ ອາປຊ຺ເຊຍ຺ຍ, ນ ຈ ໂສ ເຕສໍ ປຈ຺ຈໂຍ. ຕສ຺ມາ ເຕສໍ ປຈ຺ຈຍຠາວສ຺ສ ປຏິພາຫນຕ຺ຖເມຕໍ ຄຫິຕນ຺ຕິ ເວທິຕພ຺ພໍ.

ອິທານິ ‘‘ນານປ຺ປກາຣເຠທໂຕ ປຈ຺ຈຍຸປ຺ປນ຺ນໂຕ’’ຕິ ອິເມສໍ ປທານໍ ວເສເນຕ຺ຖ ວິຎ຺ຎາຕພ຺ໂພ ວິນິຈ຺ຉໂຍ. ເຕສຸ ນານປ຺ປກາຣເຠທໂຕຕິ ອຍຎ຺ຫິ ເຫຕຸ ນາມ ຊາຕິໂຕ ກຸສລາກຸສລວິປາກກິຣິຍເຠທໂຕ ຈຕຸພ຺ພິໂຘ. ຕຕ຺ຖ ກຸສລເຫຕຸ ຠູມນ຺ຕຣໂຕ ກາມາວຈຣາທິເຠເທນ ຈຕຸພ຺ພິໂຘ, ອກຸສລເຫຕຸ ກາມາວຈໂຣວ ວິປາກເຫຕຸ ກາມາວຈຣາທິເຠເທນ ຈຕຸພ຺ພິໂຘ, ກິຣິຍເຫຕຸ ກາມາວຈໂຣ ຣູປາວຈໂຣ ອຣູປາວຈໂຣຕິ ຕິວິໂຘ. ຕຕ຺ຖ ກາມາວຈຣກຸສລເຫຕຸ ນາມໂຕ ອໂລຠາທິວເສນ ຕິວິໂຘ. ຣູປາວຈຣາທິກຸສລເຫຕູສຸປິ ເອເສວ ນໂຍ. ອກຸສລເຫຕຸ ໂລຠາທິວເສນ ຕິວິໂຘ. ວິປາກກິຣິຍເຫຕູ ປນ ອໂລຠາທິວເສນ ຕໂຍ ຕໂຍ ໂຫນ຺ຕິ. ຕໍຕໍຈິຕ຺ຕສມ຺ປໂຍຄວເສນ ປນ ເຕສໍ ເຕສໍ ເຫຕູນໍ ນານປ຺ປກາຣເຠໂທເຍວາຕິ ເອວໍ ຕາເວຕ຺ຖ ນານປ຺ປກາຣເຠທໂຕ ວິຎ຺ຎາຕພ຺ໂພ ວິນິຈ຺ຉໂຍ.

ປຈ຺ຈຍຸປ຺ປນ຺ນໂຕຕິ ອິມິນາ ປຈ຺ຈເຍນ ອິເມ ຘມ຺ມາ ອຸປ຺ປຊ຺ຊນ຺ຕິ, ອິເມສໍ ນາມ ຘມ຺ມານໍ ອຍໍ ປຈ຺ຈໂຍຕິ ເອວມ຺ປິ ວິຎ຺ຎາຕພ຺ໂພ ວິນິຈ຺ຉໂຍຕິ ອຕ຺ໂຖ. ຕຕ຺ຖ ອິມສ຺ມິໍ ຕາວ ເຫຕຸປຈ຺ຈເຍ ກາມາວຈຣກຸສລເຫຕຸ ກາມຠວຣູປຠເວສຸ ອຕ຺ຕນາ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ເຫຕຸປຈ຺ຈໂຍ ໂຫຕິ, ອຣູປຠເວ ສມ຺ປຍຸຕ຺ຕຘມ຺ມານໍເຍວ. ຣູປາວຈຣກຸສລເຫຕຸ ກາມຠວຣູປຠເວສຸເຍວ ສມ຺ປຍຸຕ຺ຕຘມ຺ມານຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ເຫຕຸປຈ຺ຈໂຍ. ອຣູປາວຈຣກຸສລເຫຕຸ ກາມາວຈຣກຸສລເຫຕຸສທິໂສວ. ຕຖາ ອປຣິຍາປນ຺ນກຸສລເຫຕຸ, ຕຖາ ອກຸສລເຫຕຸ. ກາມາວຈຣວິປາກເຫຕຸ ປນ ກາມຠວສ຺ມິໍເຍວ ອຕ຺ຕນາ ສມ຺ປຍຸຕ຺ຕຘມ຺ມານໍ, ປຏິສນ຺ຘິຍໍ ກຏຕ຺ຕາຣູປານໍ, ປວຕ຺ເຕ ຈິຕ຺ຕສມຸຏ຺ຐານຣູປານຎ຺ຈ ເຫຕຸປຈ຺ຈໂຍ. ຣູປາວຈຣວິປາກເຫຕຸ ຣູປຠເວ ວຸຕ຺ຕປ຺ປກາຣານຎ຺ເຎວ ເຫຕຸປຈ຺ຈໂຍ. ອຣູປາວຈຣວິປາກເຫຕຸ ອຣູປຠເວ ສມ຺ປຍຸຕ຺ຕການຎ຺ເຎວ ເຫຕຸປຈ຺ຈໂຍ. ອປຣິຍາປນ຺ນວິປາກເຫຕຸ ກາມຠວຣູປຠເວສຸ ສມ຺ປຍຸຕ຺ຕການຎ຺ເຈວ ຈິຕ຺ຕສມຸຏ຺ຐານຣູປານຎ຺ຈ ອຣູປຠເວ ອຣູປຘມ຺ມານຎ຺ເຎວ ເຫຕຸປຈ຺ຈໂຍ. ກິຣິຍເຫຕູສຸ ປນ ເຕຠູມເກສຸປິ ກຸສລເຫຕຸສທິໂສວ ປຈ຺ຈໂຍຕິ. ເອວເມຕ຺ຖ ປຈ຺ຈຍຸປ຺ປນ຺ນໂຕປິ ວິຎ຺ຎາຕພ຺ໂພ ວິນິຈ຺ຉໂຍຕິ.

ເຫຕຸປຈ຺ຈຍນິທ຺ເທສວຓ຺ຓນາ.