໗. ຘາຕຸວິສ຺ສຊ຺ຊນາວາຣວຓ຺ຓນາ

໓໔໑-໓໔໙. ນິທ຺ເທສວາເຣ ປນສ຺ສ ກສ຺ສຈິ ສຕ຺ຕ ອນຸສຍາ ອນຸເສນ຺ຕີຕິ ປຸຖຸຊ຺ຊນວເສນ ວຸຕ຺ຕໍ. ກສ຺ສຈິ ປຎ຺ຈາຕິ ໂສຕາປນ຺ນສກທາຄາມິວເສນ ວຸຕ຺ຕໍ. ເຕສຎ຺ຫິ ທິຏ຺ຐານຸສໂຍ ຈ ວິຈິກິຈ຺ຉານຸສໂຍ ຈ ປຫີນາຕິ ປຎ຺ເຈວ ອນຸເສນ຺ຕິ. ຕຕ຺ຖ ຍຖາ ອນຸສຍວາເຣ ‘‘ອນຸເສນ຺ຕີ’’ຕິ ປທສ຺ສ ອຸປ຺ປຊ຺ຊນ຺ຕີຕິ ອຕ຺ໂຖ ຄຫິໂຕ, ເອວມິຘ ນ ຄເຫຕພ຺ໂພ. ກສ຺ມາ? ຕສ຺ມິໍ ຂເຓ ອນຸປ຺ປຊ຺ຊນໂຕ. ກາມຘາຕຸໍ ອຸປປຊ຺ຊນ຺ຕສ຺ສ ຫິ ວິປາກຈິຕ຺ຕຎ຺ເຈວ ກມ຺ມສມຸຏ຺ຐານຣູປຎ຺ຈ ອຸປ຺ປຊ຺ຊຕິ, ອກຸສລຈິຕ຺ຕໍ ນຕ຺ຖິ. ອນຸສຍາ ຈ ອກຸສລຈິຕ຺ຕກ຺ຂເຓ ອຸປ຺ປຊ຺ຊນ຺ຕິ, ນ ວິປາກຈິຕ຺ຕກ຺ຂເຓຕິ ຕສ຺ມິໍ ຂເຓ ອນຸປ຺ປຊ຺ຊນໂຕ ຕຖາ ອຕ຺ໂຖ ນ ຄເຫຕພ຺ໂພ. ກຖໍ ປນ ຄເຫຕພ຺ໂພຕິ? ຍຖາ ລພ຺ຠຕິ ຕຖາ ຄເຫຕພ຺ໂພ. ກຖຎ຺ຈ ລພ຺ຠຕິ? ອປ຺ປຫີນຏ຺ເຐນ. ຍຖາ ຫິ ຣາຄໂທສໂມຫານໍ ອປ຺ປຫີນຕ຺ຕາ. ກຸສລາພ຺ຍາກຕຈິຕ຺ຕສມງ຺ຄີ ປຸຄ຺ຄໂລ ‘‘ສຣາໂຄ ສໂທໂສ ສໂມໂຫ’’ຕິ ວຸຈ຺ຈຕິ, ເອວໍ ມຄ຺ຄຠາວນາຍ ອປ຺ປຫີນຕ຺ຕາ ປຏິສນ຺ຘິກ຺ຂເຓປິ ຕສ຺ສ ຕສ຺ສ ປຸຄ຺ຄລສ຺ສ ເຕ ເຕ ອນຸສຍາ ອນຸເສນ຺ຕີຕິ ວຸຈ຺ຈນ຺ຕິ. ນ ເກວລຎ຺ຈ ວຸຈ຺ຈນ຺ຕິ, ອປ຺ປຫີນຕ຺ຕາ ປນ ເຕ ອນຸເສນ຺ຕິເຍວ ນາມາຕິ ເວທິຕພ຺ພາ.

ອນຸສຍາ ຠງ຺ຄາ ນຕ຺ຖີຕິ ຍສ຺ສ ຫິ ໂຍ ອນຸເສຕິ, ໂສ ອນຸເສຕິເຍວ; ໂຍ ນານຸເສຕິ, ໂສ ນານຸເສຕິເຍວ. ອຍໍ ອນຸເສຕິ ຈ ນານຸເສຕິ ຈ, ອຍໍ ສິຍາ ອນຸເສຕິ ສິຍາ ນານຸເສຕີຕິ, ເອວໍ ວິຠຊິຕພ຺ໂພ ອນຸສໂຍ ນາມ ນຕ຺ຖິ. ຣູປຘາຕຸໍ ອຸປປຊ຺ຊນ຺ຕສ຺ສ ກສ຺ສຈິ ຕໂຍຕິ ອນາຄາມິວເສນ ວຸຕ຺ຕໍ. ຕສ຺ສ ຫິ ກາມຣາຄປຏິຆທິຏ຺ຐິວິຈິກິຈ຺ຉານຸສຍາ ຈຕ຺ຕາໂຣປິ ອນວເສສໂຕ ປຫີນາ. ອິຕເຣ ຕໂຍວ ອປ຺ປຫີນາ. ເຕນ ວຸຕ຺ຕໍ – ‘‘ກສ຺ສຈິ ຕໂຍ ອນຸສຍາ ອນຸເສນ຺ຕີ’’ຕິ.

ນ ກາມຘາຕຸນ຺ຕິ ກາມຘາຕຸຍາ ປຏິສິທ຺ຘຕ຺ຕາ ເສສາ ທ຺ເວ ຘາຕຸໂຍ ອຸປປຊ຺ຊນ຺ຕສ຺ສາຕິ ອຕ຺ໂຖ. ສຕ຺ເຕ ວາຕິ ຍສ຺ມາ ອຣິຍສາວກສ຺ສ ຣູປຘາຕຸຍາ ຈຸຕສ຺ສ ກາມຘາຕຸຍໍ ອຸປປຕ຺ຕິ ນາມ ນຕ຺ຖິ, ປຸຖຸຊ຺ຊນສ຺ເສວ ໂຫຕິ, ຕສ຺ມາ ສຕ຺ເຕວາຕິ ນິຍເມຕ຺ວາ ວຸຕ຺ຕໍ. ‘‘ອຣູປຘາຕຸຍາ ຈຸຕສ຺ສ ກາມຘາຕຸໍ ອຸປປຊ຺ຊນ຺ຕສ຺ສ ສຕ຺ເຕວາ’’ຕິ ເອຕ຺ຖາປິ ເອເສວ ນໂຍ. ຣູປຘາຕຸຍາ ອຸປປຕ຺ຕິ ນຕ຺ຖີຕິ ກສ຺ມາ ນຕ຺ຖິ? ອຸປປຕ຺ຕິນິປ຺ຜາທກສ຺ສ ຣູປາວຈຣຊ຺ຌານສ຺ສ ອຠາວາ. ໂສ ຫິ ສພ຺ພໂສ ຣູປສຎ຺ຎານໍ ສມຕິກ຺ກມາ ຕໍ ຘາຕຸໍ ອຸປປນ຺ໂນຕິ ນາສ຺ສ ຕຕ຺ຖ ຣູປາວຈຣຊ຺ຌານໍ ອຕ຺ຖິ. ຕທຠາວາ ຣູປຘາຕຸຍໍ ອຸປປຕ຺ຕິ ນຕ຺ຖີຕິ ເວທິຕພ຺ພາ. ອຣູປຘາຕຸຍາ ຈຸຕສ຺ສ ນ ກາມຘາຕຸນ຺ຕິ ເອຕ຺ຖ ອຣູປຘາຕຸເຍວ ອຘິປ຺ເປຕາ. ອິມິນາ ນເຍນ ສພ຺ພວິສ຺ສຊ຺ຊເນສຸ ອຕ຺ໂຖ ເວທິຕພ຺ໂພຕິ.

ຘາຕຸວາຣວຓ຺ຓນາ.

ອນຸສຍຍມກວຓ຺ຓນາ ນິຏ຺ຐິຕາ.