໓. ປຊຫນວາຣວຓ຺ຓນາ

໑໓໒-໑໙໗. ປຊຫນວາເຣ ປຊຫຕີຕິ ເຕນ ເຕນ ມຄ຺ເຄນ ປຫານປຣິຎ຺ຎາວເສນ ປຊຫຕິ, ອາຍຕິໍ ອນຸປ຺ປຕ຺ຕິຘມ຺ມຕໍ ອາປາເທຕິ. ອາມນ຺ຕາຕິ ອນາຄາມີມຄ຺ຄຏ຺ຐໍ ສນ຺ຘາຍ ປຏິວຈນໍ. ຕເທກຏ຺ຐໍ ປຊຫຕີຕິ ປຫາເນກຏ຺ຐຕໍ ສນ຺ຘາຍ ວຸຕ຺ຕໍ. ໂນຕິ ອຣຫຕ຺ຕມຄ຺ຄຏ຺ຐໍ ສນ຺ຘາຍ ປຏິເສໂຘ.

ຍໂຕ ກາມຣາຄານຸສຍໍ ປຊຫຕີຕິ ຍໂຕ ອຸປ຺ປຊ຺ຊນກໍ ກາມຣາຄານຸສຍໍ ປຊຫຕີຕິ ອຕ຺ໂຖ. ອຏ຺ຐມໂກຕິ ອຣຫຕ຺ຕຜລຏ຺ຐໂຕ ປຏ຺ຐາຍ ປຈ຺ໂຈໂຣຫນຄຓນາຍ ຄຓິຍມາໂນ ໂສຕາປຕ຺ຕິມຄ຺ຄຏ຺ໂຐ ອຏ຺ຐມໂກ ນາມ. ທກ຺ຂິເຓຍ຺ຍຄຓນາຍ ຫິ ອຣຫາ ອຄ຺ຄທກ຺ຂິເຓຍ຺ຍຕ຺ຕາ ປຐໂມ, ອຣຫຕ຺ຕມຄ຺ຄຏ຺ໂຐ ທຸຕິໂຍ, ອນາຄາມີ ຕຕິໂຍ…ເປ… ໂສຕາປຕ຺ຕິມຄ຺ຄຏ຺ໂຐ ອຏ຺ຐໂມ. ໂສ ອິຘ ‘‘ອຏ຺ຐມໂກ’’ຕິ ວຸຕ຺ໂຕ. ນາມສຎ຺ຎາເຍວ ວາ ເອສາ ຕສ຺ສາຕິ. ອນາຄາມິມຄ຺ຄສມງ຺ຄິຎ຺ຈ ອຏ຺ຐມກຎ຺ຈ ຐເປຕ຺ວາ ອວເສສາຕິ ສທ຺ຘິໍ ປຸຖຸຊ຺ຊເນນ ເສກ຺ຂາເສກ຺ຂາ. ເຕສຸ ຫິ ປຸຖຸຊ຺ຊໂນ ປຫານປຣິຎ຺ຎາຍ ອຠາເວນ ນປ຺ປຊຫຕິ. ເສສາ ເຕສໍ ອນຸສຍານໍ ປຫີນຕ຺ຕາ. ທ຺ວິນ຺ນໍ ມຄ຺ຄສມງ຺ຄີນນ຺ຕິ ທ຺ເວ ມຄ຺ຄສມງ຺ຄິໂນ ຐເປຕ຺ວາຕິ ອຕ຺ໂຖ. ອິມິນາ ນເຍນ ສພ຺ພຕ຺ຖ ວິນິຈ຺ຉໂຍ ເວທິຕພ຺ໂພຕິ.

ປຊຫນວາຣວຓ຺ຓນາ.