໑. ມນຸສ຺ສໂລກກຖາວຓ຺ຓນາ

໘໐໒-໘໐໓. ອິທານິ ມນຸສ຺ສໂລກກຖາ ນາມ ໂຫຕິ. ຕຕ຺ຖ ‘‘ຕຖາຄໂຕ ໂລເກ, ຊາໂຕ ໂລເກ ສໍວຑ຺ໂຒ, ໂລກໍ ອຠິຠຸຍ຺ຍ ວິຫຣຕິ ອນຸປລິຕ຺ໂຕ ໂລເກນາ’’ຕິ (ສໍ. ນິ. ໓.໙໔) ສຸຕ຺ຕໍ ອໂຍນິໂສ ຄເຫຕ຺ວາ ‘‘ຠຄວາ ຕຸສິຕຠວເນ ນິພ຺ພຕ຺ໂຕ ຕຕ຺ເຖວ ວສຕິ, ນ ມນຸສ຺ສໂລກໍ ອາຄຈ຺ຉຕິ, ນິມ຺ມິຕຣູປມຕ຺ຕກໍ ປເນຕ຺ຖ ທສ຺ເສຕີ’’ຕິ ເຍສໍ ລທ຺ຘິ, ເສຍ຺ຍຖາປິ ເອຕຣຫິ ເວຕຸລ຺ລການໍເຍວ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ປຸຏ຺ໂຐກາເສນ ເຈວ ສຸຕ຺ຕສາຘເນນ ຈ ສຎ຺ຎາເປຕຸໍ ນນຸ ອຕ຺ຖີຕິອາທິມາຫ. ໂລເກ ຊາໂຕຕິ ປຣວາທີ ຕຸສິຕປຸຣໍ ສນ຺ຘາຍ ວທຕິ. ສຕ຺ຖາຣາ ປເນຕໍ ມນຸສ຺ສໂລກຎ຺ເຎວ ສນ຺ຘາຍ ໂລກໍ ວຸຕ຺ຕໍ. ໂລກໍ ອຠິຠຸຍ຺ຍາຕິ ປຣວາທີ ມນຸສ຺ສໂລກໍ ອຠິຠວິຕ຺ວາຕິ ທິຏ຺ຐິຍາ ວທຕິ, ສຕ຺ຖາ ປນ ອາຣມ຺ມຓໂລກໍ ອຠິຠວິຕ຺ວາ ວິຫາສິ. ອນຸປລິຕ຺ໂຕ ໂລເກນາຕິ ປຣວາທີ ມນຸສ຺ສໂລເກນ ອນຸປລິຕ຺ຕຕໍວ ສນ຺ຘາຍ ວທຕິ, ສຕ຺ຖາ ປນ ໂລກຘມ຺ເມສຸ ກິເລເສຫິ ອນຸປລິຕ຺ໂຕ ວິຫາສິ. ຕສ຺ມາ ອສາຘກເມຕນ຺ຕິ.

ມນຸສ຺ສໂລກກຖາວຓ຺ຓນາ.