໑໕. ປນ຺ນຣສມວຄ຺ໂຄ

໑. ປຈ຺ຈຍຕາກຖາວຓ຺ຓນາ

໗໑໑-໗໑໗. ອິທານິ ປຈ຺ຈຍຕາກຖາ ນາມ ໂຫຕິ. ຕຕ຺ຖ ໂຍ ຘມ຺ໂມ ເຫຕຸປຈ຺ຈເຍນ ປຈ຺ຈໂຍ, ໂສ ເຍສໍ ເຫຕຸປຈ຺ຈເຍນ ປຈ຺ຈໂຍ, ເຕສຎ຺ເຎວ ຍສ຺ມາ ອາຣມ຺ມຓານນ຺ຕຣສມນນ຺ຕຣປຈ຺ຈເຍນ ປຈ຺ຈໂຍ ນ ໂຫຕິ, ໂຍ ວາ ອາຣມ຺ມຓປຈ຺ຈເຍນ ປຈ຺ຈໂຍ, ໂສ ຍສ຺ມາ ເຕສໍເຍວ ອນນ຺ຕຣສມນນ຺ຕຣປຈ຺ຈເຍນ ປຈ຺ຈໂຍ ນ ໂຫຕິ, ຕສ຺ມາ ປຈ຺ຈຍຕາ ວວຕ຺ຖິຕາຕິ ເຍສໍ ລທ຺ຘິ, ເສຍ຺ຍຖາປິ ມຫາສງ຺ຆິການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສເມຕ຺ຖ ຍຖາປາຬິເມວ ນິຍ຺ຍາຕີຕິ.

ປຈ຺ຈຍຕາກຖາວຓ຺ຓນາ.

໒. ອຎ຺ຎມຎ຺ຎປຈ຺ຈຍກຖາວຓ຺ຓນາ

໗໑໘-໗໑໙. ອິທານິ ອຎ຺ຎມຎ຺ຎປຈ຺ຈຍກຖາ ນາມ ໂຫຕິ. ຕຕ຺ຖ ເຍສໍ ສມເຍ ‘‘ອວິຊ຺ຊາປຈ຺ຈຍາ ສງ຺ຂາຣາ’’ຕິ ອຍເມວ ຕນ຺ຕິ, ‘‘ສງ຺ຂາຣປຈ຺ຈຍາປິ ອວິຊ຺ຊາ’’ຕິ ອຍໍ ນຕ຺ຖິ, ຕສ຺ມາ ອວິຊ຺ຊາວ ສງ຺ຂາຣານໍ ປຈ຺ຈໂຍ, ນ ປນ ສງ຺ຂາຣາ ອວິຊ຺ຊາຍາຕິ ລທ຺ຘິ, ເສຍ຺ຍຖາປິ ມຫາສງ຺ຆິການໍ; ເຕ ສນ຺ຘາຍ ອວິຊ຺ຊາສງ຺ຂາຣາທີນໍ ອຎ຺ຎມຎ຺ຎປຈ຺ຈຍຕາປິ ອຕ຺ຖີຕິ ທສ຺ເສຕຸໍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອວິຊ຺ຊາ ສງ຺ຂາເຣນາຕິ ເອຕ຺ຖ ອປຸຎ຺ຎາຠິສງ຺ຂາໂຣວ ຄຫິໂຕ. ຕສ຺ມາ ສງ຺ຂາຣປຈ຺ຈຍາປິ ອວິຊ຺ຊາຕິ ເອຕ຺ຖ ສຫຊາຕອຎ຺ຎມຎ຺ຎອຕ຺ຖິອວິຄຕສມ຺ປຍຸຕ຺ຕວເສນ ປຈ຺ຈຍຕາ ເວທິຕພ຺ພາ. ອຸປາທານປຈ຺ຈຍາປິ ຕຓ຺ຫາຕິ ເອຕ຺ຖ ຐເປຕ຺ວາ ກາມຸປາທານໍ ເສສານິ ຕີຓິ ອຸປາທານານິ ອວິຊ຺ຊາຍ ສງ຺ຂາຣາ ວິຍ ຕຓ຺ຫາຍ ປຈ຺ຈຍາ ໂຫນ຺ຕີຕິ ເວທິຕພ຺ພານິ. ເສສໍ ຍຖາປາຬິເມວ ນິຍ຺ຍາຕິ. ຊຣາມຣຓປຈ຺ຈຍາຕິ ປຸຈ຺ຉາ ປຣວາທິສ຺ສ, ນາມຣູປໍ ວິຎ຺ຎາຓປຈ຺ຈຍາຕິ ສກວາທິສ຺ສາຕິ.

ອຎ຺ຎມຎ຺ຎປຈ຺ຈຍກຖາວຓ຺ຓນາ.

໓. ອທ຺ຘາກຖາວຓ຺ຓນາ

໗໒໐-໗໒໑. ອິທານິ ອທ຺ຘາກຖາ ນາມ ໂຫຕິ. ຕຕ຺ຖ ‘‘ຕີຓິມານິ, ຠິກ຺ຂເວ, ກຖາວຕ຺ຖູນີ’’ຕິ (ອ. ນິ. ໓.໖໘) ສຸຕ຺ຕໍ ນິສ຺ສາຍ ກາລສງ຺ຂາໂຕ ອທ຺ຘາ ນາມ ປຣິນິປ຺ຜນ຺ໂນ ອຕ຺ຖີຕິ ເຍສໍ ລທ຺ຘິ; ເຕສໍ ‘‘ອທ຺ຘາ ນາມ ໂກຈິ ປຣິນິປ຺ຜນ຺ໂນ ນຕ຺ຖິ ອຎ຺ຎຕ຺ຣ ກາລປຎ຺ຎຕ຺ຕິມຕ຺ຕາ. ຣູປາທໂຍ ປນ ຂນ຺ຘາວ ປຣິນິປ຺ຜນ຺ນາ’’ຕິ ວິຠາຄໍ ທສ຺ເສຕຸໍ ອທ຺ຘາ ປຣິນິປ຺ຜນ຺ໂນຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ສເຈ ໂສ ປຣິນິປ຺ຜນ຺ໂນ, ຣູປາທີສຸ ອເນນ ອຎ຺ຎຕເຣນ ຠວິຕພ຺ພ’’ນ຺ຕິ ໂຈເທຕຸໍ ຣູປນ຺ຕິອາທິມາຫ. ອິຕໂຣ ປຏິກ຺ຂິປຕິ. ເສສໍ ຍຖາປາຬິເມວ ນິຍ຺ຍາຕີຕິ.

ອທ຺ຘາກຖາວຓ຺ຓນາ.

໔. ຂຓລຍມຸຫຸຕ຺ຕກຖາວຓ຺ຓນາ

໗໒໒-໗໒໓. ຂຓລຍມຸຫຸຕ຺ຕກຖາສຸປິ ເອເສວ ນໂຍ. ສພ຺ເພປິ ເຫເຕ ຂຓາທໂຍ ອທ຺ຘາປຣິຍາຍາ ເອວາຕິ.

ຂຓລຍມຸຫຸຕ຺ຕກຖາວຓ຺ຓນາ.

໕. ອາສວກຖາວຓ຺ຓນາ

໗໒໔-໗໒໕. ອິທານິ ອາສວກຖາ ນາມ ໂຫຕິ. ຕຕ຺ຖ ຍສ຺ມາ ຈຕູຫິ ອາສເວຫິ ອຸຕ຺ຕຣິ ອຎ຺ໂຎ ອາສໂວ ນາມ ນຕ຺ຖິ, ເຍນ ຈຕ຺ຕາໂຣ ອາສວາ ສາສວາ ສິຍຸໍ, ຕສ຺ມາ ຈຕ຺ຕາໂຣ ອາສວາ ອນາສວາຕິ ເຍສໍ ລທ຺ຘິ, ເສຍ຺ຍຖາປິ ເຫຕຸວາທານໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ເຕ ອາສວາ ອນາສວາ, ເອວໍ ສນ຺ເຕ ເຕຫິ ມຄ຺ຄາທິລກ຺ຂຓປ຺ປຕ຺ເຕຫິ ຠວິຕພ຺ພ’’ນ຺ຕິ ໂຈເທຕຸໍ ມຄ຺ໂຄຕິອາທິມາຫ. ເສສເມຕ຺ຖ ອຸຕ຺ຕານຕ຺ຖເມວາຕິ.

ອາສວກຖາວຓ຺ຓນາ.

໖. ຊຣາມຣຓກຖາວຓ຺ຓນາ

໗໒໖-໗໒໗. ອິທານິ ຊຣາມຣຓກຖາ ນາມ ໂຫຕິ. ຕຕ຺ຖ ຊຣາມຣຓໍ ນາມ ອປຣິນິປ຺ຜນ຺ນຕ຺ຕາ ໂລກິຍນ຺ຕິ ວາ ໂລກຸຕ຺ຕຣນ຺ຕິ ວາ ນ ວຕ຺ຕພ຺ພໍ. ‘‘ໂລກິຍາ ຘມ຺ມາ ໂລກຸຕ຺ຕຣາ ຘມ຺ມາ’’ຕິ ຫິ ທຸເກ ຊຣາມຣຓໍ ເນວ ໂລກິຍປເທ, ນ ໂລກຸຕ຺ຕຣປເທ ນິທ຺ທິຏ຺ຐໍ. ຕຕ຺ຖ ເຍສໍ ອິມໍ ລກ຺ຂຓໍ ອນາທິຍິຕ຺ວາ ໂລກຸຕ຺ຕຣານໍ ຘມ຺ມານໍ ຊຣາມຣຓໍ ໂລກຸຕ຺ຕຣນ຺ຕິ ລທ຺ຘິ, ເສຍ຺ຍຖາປິ ມຫາສງ຺ຆິການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສເມຕ຺ຖ ຍຖາປາຬິເມວ ນິຍ຺ຍາຕີຕິ.

ຊຣາມຣຓກຖາວຓ຺ຓນາ.

໗. ສຎ຺ຎາເວທຍິຕກຖາວຓ຺ຓນາ

໗໒໘-໗໒໙. ອິທານິ ສຎ຺ຎາເວທຍິຕກຖາ ນາມ ໂຫຕິ. ຕຕ຺ຖ ສຎ຺ຎາເວທຍິຕນິໂຣຘສມາປຕ຺ຕິ ນາມ ນ ໂກຈິ ຘມ຺ໂມ, ຈຕຸນ຺ນໍ ປນ ຂນ຺ຘານໍ ນິໂຣໂຘ. ອິຕິ ສາ ເນວ ໂລກິຍາ ນ ໂລກຸຕ຺ຕຣາ. ຍສ຺ມາ ປນ ໂລກິຍາ ນ ໂຫຕິ, ຕສ຺ມາ ໂລກຸຕ຺ຕຣາຕິ ເຍສໍ ລທ຺ຘິ, ເສຍ຺ຍຖາປິ ເຫຕຸວາທານໍເຍວ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສໍ ປຸຣິມກຖາສທິສເມວາຕິ.

ສຎ຺ຎາເວທຍິຕກຖາວຓ຺ຓນາ.

໘. ທຸຕິຍສຎ຺ຎາເວທຍິຕກຖາວຓ຺ຓນາ

໗໓໐-໗໓໑. ອິທານິ ຍສ຺ມາ ສາ ໂລກຸຕ຺ຕຣາ ນ ໂຫຕິ, ຕສ຺ມາ ໂລກິຍາຕິ ເຍສໍ ລທ຺ຘິ, ເສຍ຺ຍຖາປິ ເຫຕຸວາທານໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສໍ ປຸຣິມສທິສເມວາຕິ.

ທຸຕິຍສຎ຺ຎາເວທຍິຕກຖາວຓ຺ຓນາ.

໙. ຕຕິຍສຎ຺ຎາເວທຍິຕກຖາວຓ຺ຓນາ

໗໓໒. ອິທານິ ຍສ຺ມາ ‘‘ອສຸໂກ ມຣຓຘມ຺ໂມ, ອສຸໂກ ນ ມຣຓຘມ຺ໂມ’’ຕິ ສຕ຺ຕານໍ ມຣຓຘມ຺ມຕາຍ ນິຍາໂມ ນຕ຺ຖີຕິ ສຎ຺ຎາເວທຍິຕນິໂຣຘໍ ສມາປນ຺ໂນປິ ກາລໍ ກເຣຍ຺ຍາຕິ ເຍສໍ ລທ຺ຘິ, ເສຍ຺ຍຖາປິ ຣາຊຄິຣິການໍ; ເຕສໍ ສມາປນ຺ນາຍປິ ມຣຓຘມ຺ມຕາຍ ມຣຓສມຍຎ຺ຈ ອມຣຓສມຍຎ຺ຈ ທສ຺ເສຕຸໍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ຍສ຺ມາ ກາລໍ ກໂຣນ຺ຕສ຺ສ ນາມ ມຣຓນ຺ຕິເກຫິ ຜສ຺ສາທີຫິ ຠວິຕພ຺ພໍ, ຕສ຺ມາ ເຕນາກາເຣນ ໂຈເທຕຸໍ ອຕ຺ຖີຕິອາທິມາຫ.

ອຜສ຺ສກສ຺ສ ກາລກິຣິຍາຕິອາທີນິ ປຸຏ຺ໂຐ ເສສສຕ຺ເຕ ສນ຺ຘາຍ ປຏິກ຺ຂິປຕິ ວິສໍ ກເມຍ຺ຍາຕິອາທີນິ ປຸຏ຺ໂຐ ສມາປຕ຺ຕິອານຸຠາວໍ ສນ຺ຘາຍ ປຏິກ຺ຂິປຕິ. ທຸຕິຍວາເຣ ສຣີຣປກຕິໍ ສນ຺ຘາຍ ປຏິຊານາຕິ. ເອວໍ ສນ຺ເຕ ປນ ສມາປຕ຺ຕິອານຸຠາໂວ ນາມ ນ ໂຫຕິ, ເຕເນວ ນ ນິໂຣຘສມາປນ຺ໂນຕິ ອນຸຍຸຎ຺ຊຕິ.

໗໓໓-໗໓໔. ນ ກາລໍ ກເຣຍ຺ຍາຕິ ປຸຈ຺ຉາ ປຣວາທິສ຺ສ. ອຕ຺ຖິ ໂສ ນິຍາໂມຕິ ປຣວາທິສ຺ສ ປຎ຺ເຫ ປນ ຍສ຺ມາ ເອວຣູໂປ ນິຍາໂມ ນາມ ນຕ຺ຖິ, ຕສ຺ມາ ປຏິກ຺ຂິປຕິ. ຈກ຺ຂຸວິຎ຺ຎາຓສມງ຺ຄີຕິອາທິ ສກວາທິນາ ‘‘ນິຍາເມ ອສນ຺ເຕປິ ມຣຓສມເຍເນວ ມຣຕິ, ນາສມເຍນາ’’ຕິ ທສ຺ເສຕຸໍ ວຸຕ຺ຕໍ. ຕຕ຺ຣາຍມຘິປ຺ປາໂຍ – ຍທິ ນິຍາມາຠາເວນ ກາລກິຣິຍາ ຠເວຍ຺ຍ, ຈກ຺ຂຸວິຎ຺ຎາຓສມງ຺ຄິໂນປິ ຠເວຍ຺ຍ. ຕໂຕ ‘‘ປຎ຺ຈຫິ ວິຎ຺ຎາເຓຫິ ນ ຈວຕິ, ນ ອຸປປຊ຺ຊຕີ’’ຕິ ສຸຕ຺ຕວິໂຣໂຘ ສິຍາ. ຍຖາ ປນ ຈກ຺ຂຸວິຎ຺ຎາຓສມງ຺ຄິສ຺ສ ກາລກິຣິຍາ ນ ໂຫຕິ, ຕຖາ ນິໂຣຘສມາປນ຺ນສ຺ສາປີຕິ.

ຕຕິຍສຎ຺ຎາເວທຍິຕກຖາວຓ຺ຓນາ.

໑໐. ອສຎ຺ຎສຕ຺ຕຸປິກາກຖາວຓ຺ຓນາ

໗໓໕. ອິທານິ ອສຎ຺ຎສຕ຺ຕຸປິກາກຖາ ນາມ ໂຫຕິ. ຕຕ຺ຖ ສຎ຺ຎາວິຣາຄວເສນ ປວຕ຺ຕຠາວນາ ອສຎ຺ຎສມາປຕ຺ຕິປິ ນິໂຣຘສມາປຕ຺ຕິປິ ສຎ຺ຎາເວທຍິຕນິໂຣຘສມາປຕ຺ຕິ ນາມ. ອິຕິ ທ຺ເວ ສຎ຺ຎາເວທຍິຕນິໂຣຘສມາປຕ຺ຕິໂຍ ໂລກິຍາ ຈ ໂລກຸຕ຺ຕຣາ ຈ. ຕຕ຺ຖ ໂລກິຍາ ປຸຖຸຊ຺ຊນສ຺ສ ອສຎ຺ຎສຕ຺ຕຸປິກາ ໂຫຕິ, ໂລກຸຕ຺ຕຣາ ອຣິຍານໍ, ສາ ຈ ນາສຎ຺ຎສຕ຺ຕຸປິກາ. ອິມໍ ປນ ວິຠາຄໍ ອກຕ຺ວາ ອວິເສເສນ ສຎ຺ຎາເວທຍິຕນິໂຣຘສມາປຕ຺ຕິ ອສຎ຺ຎສຕ຺ຕຸປິກາຕິ ເຍສໍ ລທ຺ຘິ, ເສຍ຺ຍຖາປິ ເຫຕຸວາທານໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ຍສ຺ມາ ອສຎ຺ຎສມາປຕ຺ຕິໍ ສມາປນ຺ນສ຺ສ ອໂລຠາທໂຍ ອຕ຺ຖິ, ນ ນິໂຣຘສມາປຕ຺ຕິໍ, ຕສ຺ມາ ເຕສໍ ວເສນ ໂຈເທຕຸໍ ອຕ຺ຖີຕິອາທິມາຫ.

໗໓໖. ອິຘາປິ ອສຎ຺ຎີຕິ ປຎ຺ເຫ ອິຘ ສຎ຺ຎາວິຣາຄວເສນ ສມາປນ຺ນຕ຺ຕາ ອສຎ຺ຎິຕາ ອນຸຎ຺ຎາຕາ, ຕຕ຺ຣາປິ ອສຎ຺ຎສຕ຺ເຕເນວ. ຕສ຺ມາ ອິມໍ ປຏິຎ຺ຎໍ ຄເຫຕ຺ວາ ລທ຺ຘິໍ ປຕິຏ຺ຐເປນ຺ເຕນ ຉເລນ ປຕິຏ຺ຐາປິຕາ ໂຫຕິ. ອິຘ ວາ ນິໂຣຘສມາປຕ຺ຕິໍ ສນ຺ຘາຍ ອສຎ຺ຎິຕາ ອນຸຎ຺ຎາຕາ. ຕຕ຺ຣາປິ ອິໂຕ ຈຸຕສ຺ສ ອນາຄາມິໂນ ນິໂຣຘສມາປຕ຺ຕິເມວ ຕສ຺ມາປິ ອິມາຍ ປຏິຎ຺ຎາຍ ປຕິຏ຺ຐາປິຕາ ລທ຺ຘິ ອປ຺ປຕິຏ຺ຐິຕາເຍວາຕິ.

ອສຎ຺ຎສຕ຺ຕຸປິກາກຖາວຓ຺ຓນາ.

໑໑. ກມ຺ມູປຈຍກຖາວຓ຺ຓນາ

໗໓໗. ອິທານິ ກມ຺ມູປຈຍກຖາ ນາມ ໂຫຕິ. ຕຕ຺ຖ ເຍສໍ ກມ຺ມູປຈໂຍ ນາມ ກມ຺ມໂຕ ອຎ຺ໂຎ ຈິຕ຺ຕວິປ຺ປຍຸຕ຺ໂຕ ອພ຺ຍາກໂຕ ອນາຣມ຺ມໂຓຕິ ລທ຺ຘິ, ເສຍ຺ຍຖາປິ ອນ຺ຘການຎ຺ເຈວ ສມ຺ມິຕິຍານຎ຺ຈ; ເຕ ສນ຺ຘາຍ ອຎ຺ຎໍ ກມ຺ມນ຺ຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ກມ຺ມໂຕ ອຎ຺ໂຎ ກມ຺ມູປຈໂຍ, ຜສ຺ສາທິໂຕປິ ອຎ຺ເຎນ ຜສ຺ສູປຈຍາທິນາ ຠວິຕພ຺ພ’’ນ຺ຕິ ໂຈເທຕຸໍ ອຎ຺ໂຎ ຜສ຺ໂສຕິອາທິມາຫ. ອິຕໂຣ ລທ຺ຘິຍາ ອຠາເວນ ປຏິກ຺ຂິປຕິ.

໗໓໘-໗໓໙. ກມ຺ເມນ ສຫຊາໂຕຕິ ປຎ຺ເຫສຸ ຈິຕ຺ຕວິປ຺ປຍຸຕ຺ຕໍ ສນ຺ຘາຍ ປຏິກ຺ຂິປຕິ, ຈິຕ຺ຕສມ຺ປຍຸຕ຺ຕໍ ສນ຺ຘາຍ ປຏິຊານາຕິ. ກຸສໂລຕິ ປຎ຺ເຫສຸປິ ຈິຕ຺ຕວິປ຺ປຍຸຕ຺ຕໍ ສນ຺ຘາຍ ປຏິຊານາຕິ. ປຣໂຕ ອກຸສໂລຕິປຎ຺ເຫສຸປິ ເອເສວ ນໂຍ.

໗໔໐. ສາຣມ຺ມໂຓຕິ ປຸຏ຺ໂຐ ປນ ເອກນ຺ຕໍ ອນາຣມ຺ມຓເມວ ອິຈ຺ຉຕິ, ຕສ຺ມາ ປຏິກ຺ຂິປຕິ. ຈິຕ຺ຕໍ ຠິຊ຺ຊມານນ຺ຕິ ຍທາ ຈິຕ຺ຕໍ ຠິຊ຺ຊມານໍ ໂຫຕິ, ຕທາ ກມ຺ມໍ ຠິຊ຺ຊຕີຕິ ອຕ຺ໂຖ. ຠຸມ຺ມຕ຺ເຖ ວາ ປຈ຺ຈຕ຺ຕໍ, ຈິຕ຺ເຕ ຠິຊ຺ຊມາເນຕິ ອຕ຺ໂຖ. ອຍເມວ ວາ ປາໂຐ. ຕຕ຺ຖ ຍສ຺ມາ ສມ຺ປຍຸຕ຺ໂຕ ຠິຊ຺ຊຕິ, ວິປ຺ປຍຸຕ຺ໂຕ ນ ຠິຊ຺ຊຕິ, ຕສ຺ມາ ປຏິຊານາຕິ ເຈວ ປຏິກ຺ຂິປຕິ ຈ.

໗໔໑. ກມ຺ມມ຺ຫິ ກມ຺ມູປຈໂຍຕິ ກມ຺ເມ ສຕິ ກມ຺ມູປຈໂຍ, ກມ຺ເມ ວາ ປຕິຏ຺ຐິເຕ ກມ຺ມູປຈໂຍ, ກມ຺ມູປຈຍໂຕວ ວິປາໂກ ນິພ຺ພຕ຺ຕຕິ. ຕສ຺ມິໍ ປນ ກມ຺ເມ ນິຣຸທ຺ເຘ ຍາວ ອໍກຸຣຸປ຺ປາທາ ພີຊໍ ວິຍ ຍາວ ວິປາກຸປ຺ປາທາ ກມ຺ມູປຈໂຍ ຕິຏ຺ຐຕີຕິສ຺ສ ລທ຺ຘິ, ຕສ຺ມາ ປຏິຊານາຕິ. ຕຎ຺ເຎວ ກມ຺ມໍ, ໂສ ກມ຺ມູປຈໂຍ, ໂສ ກມ຺ມວິປາໂກຕິ ຍສ຺ມາ ກມ຺ມມ຺ຫິ ກມ຺ມູປຈໂຍ, ໂສ ຈ ຍາວ ວິປາກຸປ຺ປາທາ ຕິຏ຺ຐຕີຕິສ຺ສ ລທ຺ຘິ, ຕສ຺ມາ ນໍ ເຕສໍ ຕິຓ຺ຓມ຺ປິ ເອກຕ຺ຕໍ ປຸຈ຺ຉຕິ ວິປາໂກ ສາຣມ຺ມໂຓຕິ ອິທໍ ວິປາໂກ ວິຍ ວິປາກຘມ຺ມຘມ຺ໂມປິ ອາຣມ຺ມຓປຏິພທ຺ໂຘເຍວາຕິ ໂຈທນຕ຺ຖໍ ປຸຈ຺ຉຕິ. ອິຕໂຣ ປນ ລທ຺ຘິວເສເນກໍ ປຏິຊານາຕິ, ເອກໍ ປຏິກ຺ຂິປຕິ. ປຏິໂລເມປິ ເອເສວ ນໂຍ. ເສສເມຕ຺ຖ ຍຖາປາຬິເມວ ນິຍ຺ຍາຕີຕິ.

ກມ຺ມູປຈຍກຖາວຓ຺ຓນາ.

ປນ຺ນຣສໂມ ວຄ຺ໂຄ.

ຕຕິຍປຓ຺ຓາສໂກ ສມຕ຺ໂຕ.