໕. ສຕ຺ຕກ຺ຂຕ຺ຕຸປຣມກຖາວຓ຺ຓນາ

໕໔໑-໕໔໕. ອິທານິ ສຕ຺ຕກ຺ຂຕ຺ຕຸປຣມກຖາ ນາມ ໂຫຕິ, ຕຕ຺ຖ ຍສ຺ມາ ‘‘ສຕ຺ຕກ຺ຂຕ຺ຕຸປຣໂມ’’ຕິ ວຸຕ຺ຕໍ, ຕສ຺ມາ ‘‘ສຕ຺ຕກ຺ຂຕ຺ຕຸປຣໂມ ປຸຄ຺ຄໂລ ສຕ຺ຕກ຺ຂຕ຺ຕຸປຣມຕາຍ ນິຍໂຕ’’ຕິ ເຍສໍ ລທ຺ຘິ, ເສຍ຺ຍຖາປິ ອຸຕ຺ຕຣາປຖການໍ; ເຕສໍ ຐເປຕ຺ວາ ‘‘ອຣິຍມຄ຺ຄໍ ອຎ຺ໂຎ ຕສ຺ສ ນິຍໂມ ນຕ຺ຖິ, ເຍນ ໂສ ສຕ຺ຕກ຺ຂຕ຺ຕຸປຣມຕາຍ ນິຍໂຕ ຠເວຍ຺ຍາ’’ຕິ ອິມໍ ວິຠາຄໍ ທສ຺ເສຕຸໍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ.

ມາຕາ ຊີວິຕາຕິອາທີສຸ ອຍມຘິປ຺ປາໂຍ – ທ຺ເວ ນິຍາມາ ສມ຺ມຕ຺ຕນິຍາໂມ ຈ ມິຈ຺ຉຕ຺ຕນິຍາໂມ ຈ. ສມ຺ມຕ຺ຕນິຍາໂມ ອຣິຍມຄ຺ໂຄ. ໂສ ອວິນິປາຕຘມ຺ມຕຎ຺ເຈວ ຜລຸປ຺ປຕ຺ຕິຎ຺ຈ ນິຍເມຕິ. ມິຈ຺ຉຕ຺ຕນິຍາໂມ ອານນ຺ຕຣິຍກມ຺ມໍ. ຕໍ ອນນ຺ຕຣາ ນິຣຍູປປຕ຺ຕິໍ ນິຍເມຕິ. ຕຕ຺ຖ ສຕ຺ຕກ຺ຂຕ຺ຕຸປຣໂມ ໂສຕາປຕ຺ຕິມຄ຺ເຄນ ອວິນິປາຕຘມ຺ມຕາຍ ຈ ຜລຸປ຺ປຕ຺ຕິຍາ ຈ ນິຍມິໂຕ. ເສສມຄ຺ຄນິຍາໂມ ປນສ຺ສ ນຕ຺ຖິ ອນຘິຄຕຕ຺ຕາ, ອານນ຺ຕຣິຍມ຺ປິ ກາຕຸໍ ໂສ ອຠພ຺ໂພ. ຕ຺ວໍ ປນສ຺ສ ນິຍາມໍ ອິຈ຺ຉສິ, ເຕນ ຕໍ ວທາມ – ‘‘ກິໍ ເຕ ໂສ ອິມິນາ ມິຈ຺ຉຕ຺ຕນິຍາເມນ ນິຍມິໂຕ’’ຕິ.

ອຠພ຺ໂພ ອນ຺ຕຣາຕິ ປຎ຺ເຫສຸ ອານນ຺ຕຣິຍາຠາວໍ ສນ຺ຘາຍ ປຏິກ຺ຂິປຕິ, ສຕ຺ຕກ຺ຂຕ຺ຕຸປຣມໍ ສນ຺ຘາຍ ປຏິຊານາຕິ. ອຕ຺ຖິ ໂສ ນິຍາໂມຕິ ປຎ຺ເຫ ສຕ຺ຕກ຺ຂຕ຺ຕຸປຣມຕາຍ ນິຍາມໍ ອປສ຺ສນ຺ໂຕ ປຏິກ຺ຂິປຕິ. ອຕ຺ຖິ ເຕ ສຕິປຏ຺ຐານາຕິອາທິ ນິຍາມສງ຺ຂາເຕ ມຄ຺ຄຘມ຺ເມ ທສ຺ເສຕຸໍ ວຸຕ຺ຕໍ. ຕສ຺ສ ປນ ປຸນ ປຐມມຄ຺ຄານຸປ຺ປຕ຺ຕິໂຕ ເຕປິ ນຕ຺ຖິ, ຕສ຺ມາ ປຏິກ຺ຂິປຕິ. ເສສເມຕ຺ຖ ອຸຕ຺ຕານຕ຺ຖເມວ. ນນຸ ໂສ ສຕ຺ຕກ຺ຂຕ຺ຕຸປຣໂມຕິ ເອຕ຺ຖ ຠຄວາ ‘‘ອຍໍ ປຸຄ຺ຄໂລ ເອຕ຺ຕເກ ຠເວ ສນ຺ຘາວິຕ຺ວາ ປຣິນິພ຺ພາຍິສ຺ສຕິ, ອຍໍ ເອຕ຺ຕເກ’’ຕິ ອຕ຺ຕໂນ ຎາຓພເລນ ພ຺ຍາກໂຣຕິ, ນ ຠວນິຍາມໍ ນາມ ກິຎ຺ຈິ ເຕນ ສຕ຺ຕກ຺ຂຕ຺ຕຸປຣໂມ, ໂກລໍໂກໂລ, ເອກພີຊີ ວາຕິ ວຸຕ຺ຕໍ, ຕສ຺ມາ ອສາຘກເມຕນ຺ຕິ.

ສຕ຺ຕກ຺ຂຕ຺ຕຸປຣມກຖາວຓ຺ຓນາ.

໖໔໖-໖໔໗. ໂກລໍໂກລເອກພີຊິກຖາໂຍປິ ອິມິນາວຸປາເຍນ ເວທິຕພ຺ພາ.

ໂກລໍໂກລເອກພີຊິກຖາວຓ຺ຓນາ.