໓. ສທ຺ໂທ ວິປາໂກຕິກຖາວຓ຺ຓນາ

໖໓໖-໖໓໗. ອິທານິ ສທ຺ໂທ ວິປາໂກຕິກຖາ ນາມ ໂຫຕິ. ຕຕ຺ຖ ‘‘ໂສ ຕສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ ອຸສ຺ສນ຺ນຕ຺ຕາ ວິປຸລຕ຺ຕາ ພ຺ຣຫ຺ມສ຺ສໂຣ ໂຫຕີ’’ຕິອາທີນິ (ທີ. ນິ. ໓.໒໓໖) ອໂຍນິໂສ ຄເຫຕ຺ວາ ‘‘ສທ຺ໂທ ວິປາໂກ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ; ເຕສໍ ‘‘ກມ຺ມສມຸຏ຺ຐານາ ອຣູປຘມ຺ມາວ ວິປາກາຕິ ນາມໍ ລຠນ຺ຕິ. ຣູປຘມ຺ເມສຸ ປນາຍໍ ໂວຫາໂຣ ນຕ຺ຖີ’’ຕິ ທສ຺ເສຕຸໍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ສຸຂເວທນີໂຍຕິອາທິ ‘‘ວິປາໂກ ນາມ ເອວຣູໂປ ໂຫຕີ’’ຕິ ທສ຺ສນຕ຺ຖໍ ວຸຕ຺ຕໍ. ‘‘ໂສ ຕສ຺ສ ກມ຺ມສ຺ສາ’’ຕິ ສຸຕ຺ຕໍ ລກ຺ຂຓປຏິລາຠທສ຺ສນຕ຺ຖໍ ວຸຕ຺ຕໍ. ມຫາປຸຣິໂສ ຫິ ກມ຺ມສ຺ສ ກຕຕ຺ຕາ ສຸຈິປຣິວາໂຣປິ ໂຫຕິ, ນ ຈ ປຣິວາໂຣ ວິປາໂກ, ຕສ຺ມາ ອສາຘກເມຕນ຺ຕິ.

ສທ຺ໂທ ວິປາໂກຕິກຖາວຓ຺ຓນາ.