໑. ສໍວໂຣ ກມ຺ມນ຺ຕິກຖາວຓ຺ຓນາ

໖໓໐-໖໓໒. ອິທານິ ສໍວໂຣ ກມ຺ມນ຺ຕິກຖາ ນາມ ໂຫຕິ. ຕຕ຺ຖ ‘‘ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ, ນ ນິມິຕ຺ຕຄ຺ຄາຫີ ໂຫຕີ’’ຕິ ສຸຕ຺ຕໍ ນິສ຺ສາຍ ‘‘ສໍວໂຣປິ ອສໍວໂຣປິ ກມ຺ມ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ.

ອຖ ນໍ ຍາ ສກສມເຍ ເຈຕນາ ‘‘ກມ຺ມ’’ນ຺ຕິ ວຸຕ຺ຕາ ຍຖາ ສາ ກາຍວຈີມໂນທ຺ວາເຣສຸ ປວຕ຺ຕມານາ ກາຍກມ຺ມາທິນາມໍ ລຠຕິ, ຕຖາ ‘‘ຍທິ ເຕ ສໍວໂຣ ກມ຺ມໍ, ໂສປິ ຈກ຺ຂຸນ຺ທ຺ຣິຍາທີສຸ ປວຕ຺ຕມາໂນ ຈກ຺ຂຸກມ຺ມາທິນາມໍ ລເຠຍ຺ຍາ’’ຕິ ໂຈເທຕຸໍ ຈກ຺ຂຸນ຺ທ຺ຣິຍສໍວໂຣ ຈກ຺ຂຸກມ຺ມນ຺ຕິອາທິມາຫ. ອິຕໂຣ ຕາທິສໍ ສຸຕ຺ຕປທໍ ອປສ຺ສນ຺ໂຕ ຈຕູສຸ ທ຺ວາເຣສຸ ປຏິກ຺ຂິປິຕ຺ວາ ປຎ຺ຈເມ ກາຍທ຺ວາເຣ ປສາທກາຍໍ ສນ຺ຘາຍ ປຏິກ຺ຂິປຕິ, ວິຎ຺ຎຕ຺ຕິກາຍໍ ສນ຺ຘາຍ ປຏິຊານາຕິ. ໂສ ຫິ ປສາທກາຍມ຺ປິ ວິຎ຺ຎຕ຺ຕິກາຍມ຺ປິ ກາຍິນ຺ທ຺ຣິຍນ຺ຕ຺ເວວ ອິຈ຺ຉຕິ. ມໂນທ຺ວາເຣປິ ວິປາກທ຺ວາຣໍ ສນ຺ຘາຍ ປຏິກ຺ຂິປຕິ, ກມ຺ມທ຺ວາຣໍ ສນ຺ຘາຍ ປຏິຊານາຕິ. ອສໍວເຣປິ ເອເສວ ນໂຍ. ‘‘ຈກ຺ຂຸນາ ຣູປໍ ທິສ຺ວາ’’ຕິ ສຸຕ຺ຕໍ ເຕສຸ ທ຺ວາເຣສຸ ສໍວຣາສໍວຣເມວ ທີເປຕິ, ນ ຕສ຺ສ ກມ຺ມຠາວໍ, ຕສ຺ມາ ອສາຘກນ຺ຕິ.

ສໍວໂຣ ກມ຺ມນ຺ຕິກຖາວຓ຺ຓນາ.