໑໑. ເອກາທສມວຄ຺ໂຄ

໑-໓. ຕິສ຺ໂສປິ ອນຸສຍກຖາວຓ຺ຓນາ

໖໐໕-໖໑໓. ອິທານິ ອນຸສຍາ ອພ຺ຍາກຕາ, ອເຫຕຸກາ, ຈິຕ຺ຕວິປ຺ປຍຸຕ຺ຕາຕິ ຕິສ຺ໂສປິ ອນຸສຍກຖາ ນາມ ໂຫນ຺ຕິ. ຕຕ຺ຖ ຍສ຺ມາ ປຸຖຸຊ຺ຊໂນ ກຸສລາພ຺ຍາກເຕ ຈິຕ຺ເຕ ວຕ຺ຕມາເນ ‘‘ສານຸສໂຍ’’ຕິ ວຕ຺ຕພ຺ໂພ, ໂຍ ຈສ຺ສ ຕສ຺ມິໍ ຂເຓ ເຫຕຸ, ນ ເຕນ ເຫຕຸນາ ອນຸສຍາ ສເຫຕຸກາ, ນ ເຕນ ຈິຕ຺ເຕນ ສມ຺ປຍຸຕ຺ຕາ, ຕສ຺ມາ ‘‘ເຕ ອພ຺ຍາກຕາ, ອເຫຕຸກາ, ຈິຕ຺ຕວິປ຺ປຍຸຕ຺ຕາ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການຎ຺ເຈວ ສມ຺ມິຕິຍານຎ຺ຈ; ເຕ ສນ຺ຘາຍ ຕີສຸປິ ກຖາສຸ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສໍ ເຫຏ຺ຐາ ວຸຕ຺ຕນຍຕ຺ຕາ ສກ຺ກາ ປາຬິມຄ຺ເຄເນວ ຊານິຕຸນ຺ຕິ, ຕສ຺ມາ ນ ວິຕ຺ຖາຣິຕນ຺ຕິ.

ຕິສ຺ໂສປິ ອນຸສຍກຖາວຓ຺ຓນາ.

໔. ຎາຓກຖາວຓ຺ຓນາ

໖໑໔-໖໑໕. ອິທານິ ຎາຓກຖາ ນາມ ໂຫຕິ. ຕຕ຺ຖ ມຄ຺ຄຎາເຓນ ອຎ຺ຎາເຓ ວິຄເຕປິ ປຸນ ຈກ຺ຂຸວິຎ຺ຎາຓາທິວເສນ ຎາຓວິປ຺ປຍຸຕ຺ຕຈິຕ຺ເຕ ວຕ຺ຕມາເນ ຍສ຺ມາ ຕໍ ມຄ຺ຄຈິຕ຺ຕໍ ນ ປວຕ຺ຕຕິ, ຕສ຺ມາ ‘‘ນ ວຕ຺ຕພ຺ພໍ ຎາຓີ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ອຎ຺ຎາເຓ ວິຄເຕ ‘ຎາຓີ’ຕິ ປຎ຺ຎຕ຺ຕິ ນ ສິຍາ, ຣາຄາທີສຸ ວິຄເຕສຸ ວີຕຣາຄາທິປຎ຺ຎຕ຺ຕິປິ ນ ສິຍາຕິ ປຸຄ຺ຄລປຎ຺ຎຕ຺ຕິຍໍ ອໂກວິໂທສີ’’ຕິ ໂຈເທຕຸໍ ຣາເຄ ວິຄເຕຕິອາທິມາຫ. ອິຕໂຣ ເຕສຸ ວິຄເຕສຸ ສຣາຄາທິຠາເວ ຍຸຕ຺ຕິໍ ອປສ຺ສນ຺ໂຕ ປຏິກ຺ຂິປຕິ. ປຣິໂຍສາເນ ຍສ຺ມາ ຎາຓປຏິລາເຠນ ໂສ ຎາຓີຕິ ວຕ຺ຕພ຺ພຕໍ ອຣຫຕິ, ຕສ຺ມາ ນ ເຫວນ຺ຕິ ປຏິກ຺ເຂໂປ ສກວາທິສ຺ສາຕິ.

ຎາຓກຖາວຓ຺ຓນາ.

໕. ຎາຓໍ ຈິຕ຺ຕວິປ຺ປຍຸຕ຺ຕນ຺ຕິກຖາວຓ຺ຓນາ

໖໑໖-໖໑໗. ອິທານິ ຎາຓໍ ຈິຕ຺ຕວິປ຺ປຍຸຕ຺ຕນ຺ຕິກຖາ ນາມ ໂຫຕິ. ຕຕ຺ຖ ຍສ຺ມາ ອຣຫາ ຈກ຺ຂຸວິຎ຺ຎາຓາທິສມງ຺ຄີ ປຏິລທ຺ຘໍ ມຄ຺ຄຎາຓໍ ສນ຺ຘາຍ ‘‘ຎາຓີ’’ຕິ ວຸຈ຺ຈຕິ, ນ ຈສ຺ສ ຕໍ ເຕນ ຈິຕ຺ເຕນ ສມ຺ປຍຸຕ຺ຕໍ, ຕສ຺ມາ ‘‘ຎາຓໍ ຈິຕ຺ຕວິປ຺ປຍຸຕ຺ຕ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ປຸພ຺ພເສລິຍານໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ເຕ ຎາຓໍ ຈິຕ຺ຕວິປ຺ປຍຸຕ຺ຕໍ ຈິຕ຺ຕວິປ຺ປຍຸຕ຺ເຕສຸ ຣູປາທີສຸ ອຎ຺ຎຕຣໍ ສິຍາ’’ຕິ ໂຈເທຕຸໍ ຣູປນ຺ຕິອາທິມາຫ. ອິຕໂຣ ປຏິກ຺ຂິປຕິ. ເສສໍ ເຫຏ຺ຐາ ວຸຕ຺ຕນຍເມວ. ປຣິໂຍສາເນ ປນ ປຎ຺ຎວາຕິ ປຸຏ຺ໂຐ ປຏິລາຠວເສນ ຕໍ ປວຕ຺ຕິໍ ອິຈ຺ຉຕິ, ຕສ຺ມາ ປຏິຊານາຕີຕິ.

ຎາຓໍ ຈິຕ຺ຕວິປ຺ປຍຸຕ຺ຕນ຺ຕິກຖາວຓ຺ຓນາ.

໖. ອິທໍ ທຸກ຺ຂນ຺ຕິກຖາວຓ຺ຓນາ

໖໑໘-໘໒໐. ອິທານິ ອິທໍ ທຸກ຺ຂນ຺ຕິກຖາ ນາມ ໂຫຕິ. ຕຕ຺ຖ ເຍສໍ ‘‘ໂລກຸຕ຺ຕຣມຄ຺ຄກ຺ຂເຓ ໂຍຄາວຈໂຣ ອິທໍ ທຸກ຺ຂນ຺ຕິ ວາຈໍ ຠາສຕິ, ເອວມສ຺ສ ອິທໍ ທຸກ຺ຂນ຺ຕິ ວາຈໍ ຠາສໂຕ ຈ ອິທໍ ທຸກ຺ຂນ຺ຕິ ຎາຓໍ ປວຕ຺ຕຕີ’’ຕິ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ມຄ຺ຄກ຺ຂເຓ ຕຖາ ວາຈາຠາສນໍ ຎາຓປ຺ປວຕ຺ຕິຎ຺ຈ ສນ຺ຘາຍ ປຏິຎ຺ຎາ ອິຕຣສ຺ສ. ຍສ຺ມາ ປນ ໂສ ເສສສຈ຺ຈປຏິສໍຍຸຕ຺ຕໍ ວາຈໍ ປຸຖຸຊ຺ຊໂນວ ຠາສຕິ, ນ ຈ ຕສ຺ສ ຕຖາ ຎາຓປ຺ປວຕ຺ຕີຕິ ອິຈ຺ຉຕິ, ຕສ຺ມາ ສມຸທຍາທິປຎ຺ເຫສຸ ປຏິກ຺ຂິປຕິ. ຣູປໍ ອນິຈ຺ຈນ຺ຕິອາທິ ທຸກ຺ຂປຣິຍາຍທສ຺ສນວເສນ ວຸຕ຺ຕໍ. ອິຕໂຣ ປນ ສກສມເຍ ຕາທິສໍ ໂວຫາຣໍ ອປສ຺ສນ຺ໂຕ ປຏິກ຺ຂິປຕິ. ອິຕິ ຈ ທນ຺ຕິ ຈາຕິອາທິ ຍທິ ຕສ຺ສ ທຸກ຺ເຂ ຎາຓໍ ປວຕ຺ຕຕິ, ອິ-ກາຣ ທໍ-ກາຣ ທຸ-ກາຣ ຂ-ກາເຣສຸ ປຏິປາຏິຍາ ຈຕູຫິ ຎາເຓຫິ ປວຕ຺ຕິຕພ຺ພນ຺ຕິ ທສ຺ເສຕຸໍ ວຸຕ຺ຕໍ. ອິຕໂຣ ປນ ຕຖາ ນ ອິຈ຺ຉຕິ, ຕສ຺ມາ ປຏິກ຺ຂິປຕິ.

ອິທໍ ທຸກ຺ຂນ຺ຕິກຖາວຓ຺ຓນາ.

໗. ອິທ຺ຘິພລກຖາວຓ຺ຓນາ

໖໒໑-໖໒໔. ອິທານິ ອິທ຺ຘິພລກຖາ ນາມ ໂຫຕິ. ຕຕ຺ຖ ອິທ຺ຘິປາທຠາວນານິສໍສສ຺ສ ອຕ຺ຖໍ ອໂຍນິໂສ ຄເຫຕ຺ວາ ‘‘ອິທ຺ຘິພເລນ ສມນ຺ນາຄໂຕ ກປ຺ປໍ ຕິຏ຺ເຐຍ຺ຍາ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ; ເຕ ສນ຺ຘາຍ ອິທ຺ຘິພເລນ ສມນ຺ນາຄໂຕ ກປ຺ປໍ ຕິຏ຺ເຐຍ຺ຍາຕິ ປຸຈ຺ຉາ ສກວາທິສ຺ສ. ຕຕ຺ຖ ກປ຺ໂປ ນາມ ມຫາກປ຺ໂປ, ກປ຺ເປກເທໂສ, ອາຍຸກປ຺ໂປຕິ ຕິວິໂຘ. ‘‘ຈຕ຺ຕາຣິມານິ, ຠິກ຺ຂເວ, ກປ຺ປສ຺ສ ອສງ຺ຂ຺ເຍຍ຺ຍານີ’’ຕິ (ອ. ນິ. ໔.໑໕໖) ເອຕ຺ຖ ຫິ ມຫາກປ຺ໂປວ ກປ຺ໂປຕິ ວຸຕ຺ໂຕ. ‘‘ພ຺ຣຫ຺ມກາຍິການໍ ເທວານໍ ກປ຺ໂປ ອາຍຸປ຺ປມາຓ’’ນ຺ຕິ (ອ. ນິ. ໔.໑໒໓) ເອຕ຺ຖ ກປ຺ເປກເທສາ. ‘‘ກປ຺ປໍ ນິຣຍມ຺ຫິ ປຈ຺ຈຕິ, ກປ຺ປໍ ສຄ຺ຄມ຺ຫິ ໂມທຕີ’’ຕິ (ຈູຬວ. ໓໕໔) ເອຕ຺ຖ ອາຍຸກປ຺ໂປ. ອາຍຸກປ຺ປນໍ ອາຍຸວິຘານໍ ກມ຺ມສ຺ສ ວິປາກວເສນ ວາ ວສ຺ສຄຓນາຍ ວາ ອາຍຸປຣິຈ຺ເຉໂທຕິ ອຕ຺ໂຖ. ເຕສຸ ມຫາກປ຺ປໍ ສນ຺ຘາຍ ປຸຈ຺ຉຕິ, ອິຕໂຣ ປຏິຊານາຕິ.

ອຖ ນໍ ສກວາທີ ‘‘ສເຈ ເຕ ອິທ຺ຘິພເລນ ສມນ຺ນາຄໂຕ, ‘ໂຍ ຈິຣໍ ຊີວຕິ, ໂສ ວສ຺ສສຕໍ ອປ຺ປໍ ວາ ຠິຍ຺ໂຍ’ຕິ (ສໍ. ນິ. ໒.໑໔໓) ເອວໍ ປຣິຈ຺ຉິນ຺ນາ ອາຍຸກປ຺ປາ ອຸທ຺ຘໍ ມຫາກປ຺ປໍ ວາ ມຫາກປ຺ເປກເທສໍ ວາ ຊີເວຍ຺ຍ ອິທ຺ຘິມຍິເກນສ຺ສ ອາຍຸນາ ຠວິຕພ຺ພ’’ນ຺ຕິ ໂຈເທຕຸໍ ອິທ຺ຘິມຍິໂກ ໂສ ອາຍູຕິອາທິມາຫ. ອິຕໂຣ ‘‘ຊີວິຕິນ຺ທ຺ຣິຍໍ ນາມ ອິທ຺ຘິມຍິກໍ ນຕ຺ຖິ, ກມ຺ມສມຸຏ຺ຐານເມວາ’’ຕິ ວຸຕ຺ຕຕ຺ຕາ ປຏິກ຺ຂິປຕິ. ໂກ ປເນຕ຺ຖ ອິທ຺ຘິມໂຕ ວິເສໂສ, ນນຸ ອນິທ຺ຘິມາປິ ອາຍຸກປ຺ປໍ ຕິຏ຺ເຐຍ຺ຍາຕິ? ອຍໍ ວິເສໂສ – ອິທ຺ຘິມາ ຫິ ຍາວຕາຍຸກໍ ຊີວິຕປ຺ປວຕ຺ຕິຍາ ອນ຺ຕຣາຍກເຣ ຘມ຺ເມ ອິທ຺ຘິພເລນ ປຏິພາຫິຕ຺ວາ ອນ຺ຕຣາ ອກາລມຣຓໍ ນິວາເຣຕຸໍ ສກ຺ໂກຕິ, ອນິທ຺ຘິມໂຕ ເອຕໍ ພລໍ ນຕ຺ຖິ. ອຍເມເຕສໍ ວິເສໂສ.

ອຕີຕໍ ອນາຄຕນ຺ຕິ ອິທໍ ອວິເສເສນ ກປ຺ປໍ ຕິຏ຺ເຐຍ຺ຍາຕິ ປຏິຎ຺ຎາຕຕ຺ຕາ ໂຈເທຕິ. ທ຺ເວ ກປ຺ເປຕິອາທິ ‘‘ຍທິ ອິທ຺ຘິມາ ຊີວິຕປຣິຈ຺ເຉທໍ ອຕິກ຺ກມິຕຸໍ ສກ຺ໂກຕິ, ນ ເກວລໍ ເອກໍ ອເນເກປິ ກປ຺ເປ ຕິຏ຺ເຐຍ຺ຍາ’’ຕິ ໂຈທນຕ຺ຖໍ ວຸຕ຺ຕໍ. ອຸປ຺ປນ຺ໂນ ຜສ຺ໂສຕິອາທິ ນ ສພ຺ພໍ ອິທ຺ຘິຍາ ລພ຺ຠຕິ, ອິທ຺ຘິຍາ ອວິສໂຍປິ ອຕ຺ຖີຕິ ທສ຺ເສຕຸໍ ວຸຕ຺ຕໍ. ເສສເມຕ຺ຖ ອຸຕ຺ຕານຕ຺ຖເມວາຕິ.

ອິທ຺ຘິພລກຖາວຓ຺ຓນາ.

໘. ສມາຘິກຖາວຓ຺ຓນາ

໖໒໕-໖໒໖. ອິທານິ ສມາຘິກຖາ ນາມ ໂຫຕິ. ຕຕ຺ຖ ເຍສໍ ເອກຈິຕ຺ຕກ຺ຂເຓ ອຸປ຺ປນ຺ນາປິ ເອກຄ຺ຄຕາ ສມາຘານຏ຺ເຐນ ສມາຘີຕິ ອຄ຺ຄເຫຕ຺ວາ ‘‘ສຕ຺ຕ ຣຕ຺ຕິນ຺ທິວານິ ເອກນ຺ຕສຸຂປຏິສໍເວທີ ວິຫຣິຕຸ’’ນ຺ຕິອາທິວຈນໍ (ມ. ນິ. ໑.໑໘໐) ນິສ຺ສາຍ ‘‘ຈິຕ຺ຕສນ຺ຕຕິ ສມາຘີ’’ຕິ ລທ຺ຘິ, ເສຍ຺ຍຖາປິ ສພ຺ພຕ຺ຖິວາທານຎ຺ເຈວ ອຸຕ຺ຕຣາປຖການຎ຺ຈ; ເຕ ສນ຺ຘາຍ ຈິຕ຺ຕສນ຺ຕຕີຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ຈິຕ຺ຕສນ຺ຕຕິ ສມາຘິ, ຈິຕ຺ຕສນ຺ຕຕິ ນາມ ອຕີຕາປິ ອຕ຺ຖິ, ອນາຄຕາປິ ອຕ຺ຖິ. ນ ຫິ ເອກໍ ປຈ຺ຈຸປ຺ປນ຺ນຈິຕ຺ຕເມວ ຈິຕ຺ຕສນ຺ຕຕິ ນາມ ໂຫຕິ, ກິໍ ເຕ ສພ຺ພາປິ ສາ ສມາຘີ’’ຕິ ໂຈເທຕຸໍ ອຕີຕາຕິອາທິມາຫ, ອິຕໂຣ ຕຖາ ອນິຈ຺ຉນ຺ໂຕ ປຏິກ຺ຂິປຕິ.

ນນຸ ອຕີຕໍ ນິຣຸທ຺ຘນ຺ຕິອາທິ ‘‘ຈິຕ຺ຕສນ຺ຕຕິຍໍ ປຈ຺ຈຸປ຺ປນ຺ນເມວ ຈິຕ຺ຕໍ ກິຈ຺ຈກຣໍ, ອຕີຕານາຄຕໍ ນິຣຸທ຺ຘຕ຺ຕາ ອນຸປ຺ປນ຺ນຕ຺ຕາ ຈ ນຕ຺ຖິ, ກຖໍ ຕໍ ສມາຘິ ນາມ ໂຫຕີ’’ຕິ ທສ຺ເສຕຸໍ ວຸຕ຺ຕໍ. ເອກຈິຕ຺ຕກ຺ຂຓິໂກຕິ ປຸຈ຺ຉາ ປຣວາທິສ຺ສ. ຕໂຕ ຍາ ສກສມເຍ ‘‘ສມາຘິໍ, ຠິກ຺ຂເວ, ຠາເວຖາ’’ຕິອາທີສຸ ປຈ຺ຈຸປ຺ປນ຺ນກຸສລຈິຕ຺ຕສມ຺ປຍຸຕ຺ຕາ ເອກຄ຺ຄຕາ ສມາຘີຕິ ວຸຕ຺ຕາ, ຕໍ ສນ຺ຘາຍ ປຏິຎ຺ຎາ ສກວາທິສ຺ສ. ຈກ຺ຂຸວິຎ຺ຎາຓສມງ຺ຄີຕິອາທິ ‘‘ເອກຈິຕ຺ຕກ຺ຂຓິໂກ’’ຕິ ວຈນມຕ຺ຕໍ ຄເຫຕ຺ວາ ຉເລນ ວຸຕ຺ຕໍ, ເຕເນວ ສກວາທິນາ ປຏິກ຺ຂິຕ຺ຕໍ. ນນຸ ວຸຕ຺ຕໍ ຠຄວຕາຕິ ສຸຕ຺ຕໍ ປຸຣິມປຈ຺ຉິມວເສນ ປວຕ຺ຕມານສ຺ສ ສມາຘິສ຺ສ ອພ຺ໂພກິຓ຺ຓຕໍ ສາເຘຕິ, ນ ສນ຺ຕຕິຍາ ສມາຘິຠາວໍ, ຕສ຺ມາ ອສາຘກນ຺ຕິ.

ສມາຘິກຖາວຓ຺ຓນາ.

໙. ຘມ຺ມຏ຺ຐິຕຕາກຖາວຓ຺ຓນາ

໖໒໗. ອິທານິ ຘມ຺ມຏ຺ຐິຕຕາກຖາ ນາມ ໂຫຕິ. ຕຕ຺ຖ ‘‘ຐິຕາວ ສາ ຘາຕູ’’ຕິ ວຈນໍ ນິສ຺ສາຍ ‘‘ປຏິຈ຺ຈສມຸປ຺ປາທສງ຺ຂາຕາ ຘມ຺ມຏ຺ຐິຕຕາ ນາມ ເອກາ ອຕ຺ຖິ, ສາ ຈ ປຣິນິປ຺ຜນ຺ນາ’’ຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ປຣິນິປ຺ຜນ຺ນານໍ ອວິຊ຺ຊາທີນໍ ອຎ຺ຎາ ຘມ຺ມຏ຺ຐິຕຕາ ນາມ ປຣິນິປ຺ຜນ຺ນາ ອຕ຺ຖິ, ຕາຍປິ ຈ ເຕ ຘມ຺ມຏ຺ຐິຕຕາຍ ອຎ຺ຎາ ຐິຕຕາ ປຣິນິປ຺ຜນ຺ນາ ອາປຊ຺ຊຕີ’’ຕິ ໂຈເທຕຸໍ ຕາຍ ຐິຕຕາຕິອາທິມາຫ. ປຣວາທີ ເອວຣູປາຍ ລທ຺ຘິຍາ ອຠາເວນ ປຏິກ຺ຂິປຕິ. ທຸຕິຍໍ ປຸຏ຺ໂຐ ອນນ຺ຕຣປຈ຺ຈຍຕຎ຺ເຈວ ອຎ຺ຎມຎ຺ຎປຈ຺ຈຍຕຎ຺ຈ ສນ຺ຘາຍ ປຏິຊານາຕິ. ເສສໍ ເຫຏ຺ຐາ ວຸຕ຺ຕນຍຕ຺ຕາ ອຸຕ຺ຕານຕ຺ຖເມວາຕິ.

ຘມ຺ມຏ຺ຐິຕຕາກຖາວຓ຺ຓນາ.

໑໐. ອນິຈ຺ຈຕາກຖາວຓ຺ຓນາ

໖໒໘. ອິທານິ ອນິຈ຺ຈຕາກຖາ ນາມ ໂຫຕິ. ຕຕ຺ຖ ‘‘ອນິຈ຺ຈານໍ ຣູປາທີນໍ ອນິຈ຺ຈຕາປິ ຣູປາທໂຍ ວິຍ ປຣິນິປ຺ຜນ຺ນາ’’ຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ເຕ ຣູປາທໂຍ ວິຍ ອນິຈ຺ຈຕາ ປຣິນິປ຺ຜນ຺ນາ, ຕສ຺ສາປິ ອຎ຺ຎາຍ ປຣິນິປ຺ຜນ຺ນາຍ ອນິຈ຺ຈຕາຍ ຠວິຕພ຺ພ’’ນ຺ຕິ ໂຈເທຕຸໍ ຕາຍ ອນິຈ຺ຈຕາຍາຕິອາທິມາຫ. ອິຕໂຣ ທ຺ວິນ຺ນໍ ອນິຈ຺ຈຕາຍ ເອກໂຕ ອຠາເວນ ປຏິກ຺ຂິປິຕ຺ວາ ປຸນ ຍສ຺ມາ ສາ ອນິຈ຺ຈຕາ ນິຈ຺ຈາ ນ ໂຫຕິ, ເຕເນວ ອນິຈ຺ເຈນ ສທ຺ຘິໍ ອນ຺ຕຣຘາຍຕິ, ຕສ຺ມາ ປຏິຊານາຕິ. ອຖສ຺ສ ສກວາທີ ເລໂສກາສໍ ອທຕ຺ວາ ຍາ ເຕນ ທຸຕິຍາ ອນິຈ຺ຈຕາ ປຏິຎ຺ຎາຕາ, ຕາຍປິ ຕໂຕ ປຣາຍປີຕິ ປຣມ຺ປຣວເສນ ອນຸປຈ຺ເຉທໂທສໍ ອາໂຣເປນ຺ໂຕ ຕາຍ ຕາເຍວາຕິອາທິມາຫ. ຊຣາ ປຣິນິປ຺ຜນ຺ນາຕິອາທິ ຍສ຺ມາ ອຸປ຺ປນ຺ນສ຺ສ ຊຣາມຣຓໂຕ ອຎ຺ຎາ ອນິຈ຺ຈຕາ ນາມ ນຕ຺ຖິ, ຕສ຺ມາ ອນິຈ຺ຈຕາວິຠາຄານຸຍຸຎ຺ຊນວເສນ ວຸຕ຺ຕໍ. ຕຕ຺ຣາປິ ປຣວາທິໂນ ປຸຣິມນເຍເນວ ປຏິຎ຺ຎາ ຈ ປຏິກ຺ເຂໂປ ຈ ເວທິຕພ຺ໂພ.

໖໒໙. ຣູປໍ ປຣິນິປ຺ຜນ຺ນນ຺ຕິອາທິ ເຍສໍ ສາ ອນິຈ຺ຈຕາ, ເຕຫິ ສທ຺ຘິໍ ສໍສນ຺ທນຕ຺ຖໍ ວຸຕ຺ຕໍ. ຕຕ຺ຖ ‘‘ຍຖາ ປຣິນິປ຺ຜນ຺ນານໍ ຣູປາທີນໍ ອນິຈ຺ຈຕາຊຣາມຣຓານິ ອຕ຺ຖິ, ເອວໍ ປຣິນິປ຺ຜນ຺ນານໍ ອນິຈ຺ຈຕາທີນໍ ຕານິ ນຕ຺ຖີ’’ຕິ ມຎ຺ຎມາໂນ ເອກນ຺ເຕນ ປຏິກ຺ຂິປຕິເຍວາຕິ.

ອນິຈ຺ຈຕາກຖາວຓ຺ຓນາ.

ເອກາທສໂມ ວຄ຺ໂຄ.