໑໐. ທສມວຄ຺ໂຄ

໑. ນິໂຣຘກຖາວຓ຺ຓນາ

໕໗໑-໕໗໒. ອິທານິ ນິໂຣຘກຖາ ນາມ ໂຫຕິ. ຕຕ຺ຖ ເຍສໍ ‘‘ອຸປປຕ຺ເຕສິຍນ຺ຕິ ສງ຺ຂໍ ຄຕສ຺ສ ຠວງ຺ຄຈິຕ຺ຕສ຺ສ ຠງ຺ຄກ຺ຂເຓນ ສເຫວ ກິຣິຍາຕິ ສງ຺ຂໍ ຄຕາ ກຸສລາ ວາ ອກຸສລາ ວາ ຈຕ຺ຕາໂຣ ຂນ຺ຘາ ຈິຕ຺ຕສມຸຏ຺ຐານຣູປຎ຺ຈາຕິ ປຎ຺ຈກ຺ຂນ຺ຘາ ອຸປ຺ປຊ຺ຊນ຺ຕິ. ເຕສຸ ຫິ ອນຸປ຺ປນ຺ເນສຸ ຠວງ຺ເຄ ນິຣຸທ຺ເຘ ສນ຺ຕຕິວິຈ຺ເຉໂທ ຠເວຍ຺ຍາ’’ຕິ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ອຸປປຕ຺ເຕສິເຍຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ຕຕ຺ຖ ອຸປປຕ຺ເຕສິເຍຕິ ຈຕູສຸປິ ປເທສຸ ພຫຸວຈນຠຸມ຺ມຕ຺ເຖ ເອກວຈນຠຸມ຺ມໍ. ອຸປປຕ຺ເຕສິເຍສຸ ປຎ຺ຈສຸ ຂນ຺ເຘສຸ ອນິຣຸທ຺ເຘສູຕິ ອຍຎ຺ເຫຕ຺ຖ ອຕ຺ໂຖ. ທສນ຺ນນ຺ຕິ ອຸປປຕ຺ເຕສິຍຂນ຺ຘານຎ຺ຈ ກິຣິຍຂນ຺ຘານຎ຺ຈ ວເສນ ວຸຕ຺ຕໍ. ຕຕ຺ຖ ປຐມປຎ຺ເຫ ຂນ຺ຘລກ຺ຂຓວເສນ ກິຣິຍວເສນ ຈ ປຎ຺ເຈວ ນາມ ເຕ ຂນ຺ຘາຕິ ປຏິກ຺ຂິປຕິ. ທຸຕິຍປຎ຺ເຫ ປຸຣິມປຈ຺ຉິມວເສນ ອຸປປຕ຺ເຕສິຍກິຣິຍວເສນ ຈ ນານຕ຺ຕໍ ສນ຺ຘາຍ ປຏິຊານາຕິ. ທ຺ວິນ຺ນໍ ປນ ຜສ຺ສານໍ ຈິຕ຺ຕານຎ຺ຈ ສໂມຘານໍ ປຸຏ຺ໂຐ ສຸຕ຺ຕເລສາຠາເວນ ປຏິກ຺ຂິປຕິ.

ກິຣິຍາ ຈຕ຺ຕາໂຣຕິ ຣູເປນ ວິນາ ກຸສລາ ອກຸສລາ ວາ ຈຕ຺ຕາໂຣ ຄຫິຕາ. ກິຣິຍາຎາຓນ຺ຕິ ປຣວາທິນາ ຈກ຺ຂຸວິຎ຺ຎາຓສມງ຺ຄິກ຺ຂເຓ ອຣຫໂຕ ອນຸຎ຺ຎາຕໍ ອນາຣມ຺ມຓຎາຓໍ. ນິຣຸທ຺ເຘ ມຄ຺ໂຄ ອຸປ຺ປຊ຺ຊຕີຕິ ປຸຈ຺ຉາ ປຣວາທິສ຺ສ, ອນິຣຸທ຺ເຘ ອນຸປ຺ປຊ຺ຊນໂຕ ປຏິຎ຺ຎາ ສກວາທິສ຺ສ. ມໂຕ ມຄ຺ຄໍ ຠາເວຕີຕິ ຉເລນ ປຸຈ຺ຉາ ປຣວາທິສ຺ສ. ຍສ຺ມາ ປນ ປຏິສນ຺ຘິໂຕ ຍາວ ຈຸຕິຈິຕ຺ຕາ ສຕ຺ໂຕ ຊີວຕິເຍວ ນາມ, ຕສ຺ມາ ສກວາທີ ນ ເຫວນ຺ຕິ ປຏິກ຺ຂິປຕິ.

ນິໂຣຘກຖາວຓ຺ຓນາ.

໒. ຣູປໍມຄ຺ໂຄຕິກຖາວຓ຺ຓນາ

໕໗໓-໕໗໕. ອິທານິ ຣູປໍ ມຄ຺ໂຄຕິກຖາ ນາມ ໂຫຕິ. ຕຕ຺ຖ ເຍສໍ ‘‘ສມ຺ມາວາຈາກມ຺ມນ຺ຕາຊີວາ ຣູປ’’ນ຺ຕິ ລທ຺ຘິ, ເສຍ຺ຍຖາປິ ມຫິສາສກສມ຺ມິຕິຍມຫາສໍຆິການໍ; ເຕ ສນ຺ຘາຍ ມຄ຺ຄສມງ຺ຄິສ຺ສາຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ເຕ ສມ຺ມາວາຈາທໂຍ ຣູປໍ, ນ ວິຣຕິໂຍ, ຍຖາ ສມ຺ມາທິຏ຺ຐາທິມຄ຺ໂຄ ສາຣມ຺ມຓາທິສຠາໂວ, ເອວໍ ຕມ຺ປິ ຣູປໍ ສິຍາ’’ຕິ ໂຈເທຕຸໍ ສາຣມ຺ມໂຓຕິອາທິມາຫ. ຕຕ຺ຖ ປຏິກ຺ເຂໂປ ຈ ປຏິຎ຺ຎາ ຈ ປຣວາທິໂນ ລທ຺ຘິອນຸຣູເປນ ເວທິຕພ຺ພາ. ເສສເມຕ຺ຖ ອຸຕ຺ຕານຕ຺ຖເມວາຕິ.

ຣູປໍ ມຄ຺ໂຄຕິກຖາວຓ຺ຓນາ.

໓. ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄກຖາວຓ຺ຓນາ

໕໗໖. ອິທານິ ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄກຖາ ນາມ ໂຫຕິ. ຕຕ຺ຖ ເຍສໍ ‘‘ຈກ຺ຂຸນາ ຣູປໍ ທິສ຺ວາ ນ ນິມິຕ຺ຕຄ຺ຄາຫີ ໂຫຕີ’’ຕິ ສຸຕ຺ຕໍ ນິສ຺ສາຍ ‘‘ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ’’ຕິ ລທ຺ຘິ, ເສຍ຺ຍຖາປິ ມຫາສໍຆິການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ສເຈ ຕສ຺ສ ມຄ຺ຄຠາວນາ ອຕ຺ຖິ, ປຎ຺ຈວິຎ຺ຎາຓຄຕິເກນ ວາ ມຄ຺ເຄນ, ມຄ຺ຄຄຕິເກຫິ ວາ ປຎ຺ຈວິຎ຺ຎາເຓຫິ ຠວິຕພ຺ພໍ, ນ ຈ ຕານິ ມຄ຺ຄຄຕິການິ ອນິພ຺ພານາຣມ຺ມຓຕ຺ຕາ ອໂລກຸຕ຺ຕຣຕ຺ຕາ ຈ, ນ ມຄ຺ໂຄ ປຎ຺ຈວິຎ຺ຎາຓຄຕິໂກ ເຕສໍ ລກ຺ຂເຓນ ອສງ຺ຄຫິຕຕ຺ຕາ’’ຕິ ໂຈເທຕຸໍ ນນຸ ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາຕິອາທິມາຫ. ຕຕ຺ຣາຍໍ ອຘິປ຺ປາໂຍ – ຍທິ ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄຠາວນາ ສິຍາ, ເຍນ ມໂນວິຎ຺ຎາເຓນ ມຄ຺ໂຄ ສມ຺ປຍຸຕ຺ໂຕ, ຕມ຺ປິ ປຎ຺ຈວິຎ຺ຎາຓສມງ຺ຄິສ຺ສ ສິຍາ. ເອວໍ ສນ຺ເຕ ຍທິທໍ ‘‘ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ’’ຕິອາທິ ລກ຺ຂຓໍ ວຸຕ຺ຕໍ, ຕໍ ເອວໍ ອວຕ຺ວາ ‘‘ຉ ວິຎ຺ຎາຓາ’’ຕິ ວຕ຺ຕພ຺ພໍ ສິຍາ. ຕຖາ ປນ ອວຕ຺ວາ ‘‘ປຎ຺ຈວິຎ຺ຎາຓາ’’ຕ຺ເວວ ວຸຕ຺ຕໍ, ຕສ຺ມາ ນ ວຕພ຺ພໍ ‘‘ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ’’ຕິ. ຍສ຺ມາ ເຈຕ຺ຖ ອຍເມວ ອຘິປ຺ປາໂຍ, ຕສ຺ມາ ສກວາທີ ຕໍ ລກ຺ຂຓໍ ປຣວາທິໍ ສມ຺ປຏິຈ຺ຉາເປຕ຺ວາ ໂນ ຈ ວຕ ເຣ ວຕ຺ຕພ຺ເພ ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ ອາຫ.

ອປໂຣ ນໂຍ – ປຎ຺ຈວິຎ຺ຎາຓາ ອຸປ຺ປນ຺ນວຕ຺ຖຸກາ, ມຄ຺ໂຄ ອວຕ຺ຖຸໂກປິ ໂຫຕິ. ເຕ ຈ ອຸປ຺ປນ຺ນາຣມ຺ມຓາ, ມຄ຺ໂຄ ນວຕ຺ຕພ຺ພາຣມ຺ມໂຓ. ເຕ ປຸເຣຊາຕວຕ຺ຖຸກາວ ມຄ຺ໂຄ ອວຕ຺ຖຸໂກປິ. ເຕ ປຸເຣຊາຕາຣມ຺ມຓາ, ມຄ຺ໂຄ ອປຸເຣຊາຕາຣມ຺ມໂຓ. ເຕ ອຊ຺ຌຕ຺ຕິກວຕ຺ຖຸກາວ ມຄ຺ໂຄ ອວຕ຺ຖຸໂກປິ ໂຫຕິ. ເຕ ຈ ຣູປາທິວເສນ ພາຫິຣາຣມ຺ມຓາ, ມຄ຺ໂຄ ນິພ຺ພານາຣມ຺ມໂຓ. ເຕ ອນິຣຸທ຺ຘໍ ວຕ຺ຖຸໍ ນິສ຺ສຍໍ ກຕ຺ວາ ປວຕ຺ຕນໂຕ ອສມ຺ຠິນ຺ນວຕ຺ຖຸກາ, ມຄ຺ໂຄ ອວຕ຺ຖຸໂກປິ. ເຕ ອນິຣຸທ຺ຘາເນວ ຣູປາທີນິ ອາຣພ຺ຠ ປວຕ຺ຕນໂຕ ອສມ຺ຠິນ຺ນາຣມ຺ມຓາ, ມຄ຺ໂຄ ນິພ຺ພານາຣມ຺ມໂຓ. ເຕ ນານາວຕ຺ຖຸກາ, ມຄ຺ໂຄ ອວຕ຺ຖຸໂກ ວາ ເອກວຕ຺ຖຸໂກ ວາ. ເຕ ນານາຣມ຺ມຓາ ມຄ຺ໂຄ ເອກາຣມ຺ມໂຓ. ເຕ ອຕ຺ຕໂນ ອຕ຺ຕໂນວ ຣູປາທິໂຄຈເຣ ປວຕ຺ຕນໂຕ ນ ອຎ຺ຎມຎ຺ຎສ຺ສ ໂຄຈຣວິສຍໍ ປຈ຺ຈນຸໂຠນ຺ຕິ, ມຄ຺ໂຄ ຣູປາທີສຸ ເອກມ຺ປິ ໂຄຈຣໍ ນ ກໂຣຕິ. ເຕ ກິຣິຍມໂນຘາຕຸໍ ປຸເຣຈາຣິກໍ ກຕ຺ວາ ອຸປ຺ປຊ຺ຊນໂຕ ນ ອສມນ຺ນາຫາຣາ ນ ອມນສິກາຣາ ອຸປ຺ປຊ຺ຊນ຺ຕິ, ມຄ຺ໂຄ ນິຣາວຊ຺ຊໂນວ. ເຕ ສມ຺ປຏິຈ຺ຉນາທີຫິ ໂວກິຓ຺ຓາ ອຸປ຺ປຊ຺ຊນ຺ຕິ, ມຄ຺ຄສ຺ສ ໂວກາໂຣເຍວ ນຕ຺ຖິ. ເຕ ອຎ຺ຎມຎ຺ຎໍ ປຸພ຺ພຈຣິມຠາເວນ ອຸປ຺ປຊ຺ຊນ຺ຕິ, ມຄ຺ຄສ຺ສ ເຕຫິ ສທ຺ຘິໍ ປຸຣິມປຈ຺ຉິມຕາວ ນຕ຺ຖິ, ເຕສໍ ອນຸປ຺ປຕ຺ຕິກາເລ ຕິກ຺ຂວິປສ຺ສນາສມເຍ, ເຕສໍ ອນຸປ຺ປຕ຺ຕິເທເສ ອາຣຸປ຺ເປປິ ຈ ອຸປ຺ປຊ຺ຊນໂຕ. ເຕ ສມ຺ປຏິຈ຺ຉນາທີຫິ ອນ຺ຕຣິຕຕ຺ຕາ ນ ອຎ຺ຎມຎ຺ຎສ຺ສ ສມນນ຺ຕຣາ ອຸປ຺ປຊ຺ຊນ຺ຕິ, ມຄ຺ຄສ຺ສ ສມ຺ປຏິຈ຺ຉນາທີຫິ ອນ຺ຕຣິຕຠາໂວວ ນຕ຺ຖິ. ເຕສໍ ອຎ຺ຎຕ຺ຣ ອຠິນິປາຕາ ອາໂຠຄມຕ຺ຕມ຺ປິ ກິຈ຺ຈໍ ນຕ຺ຖິ, ມຄ຺ຄສ຺ສ ກິເລສສມຸຄ຺ຆາຕນໍ ກິຈ຺ຈນ຺ຕິ. ຍສ຺ມາ ເຈຕ຺ຖ ອຍມ຺ປິ ອຘິປ຺ປາໂຍ, ຕສ຺ມາ ສກວາທີ ອິເມຫາກາເຣຫິ ປຣວາທິໍ ມຄ຺ຄສ຺ສ ອປຎ຺ຈວິຎ຺ຎາຓຄຕິກຠາວໍ ສມ຺ປຏິຈ຺ຉາເປຕ຺ວາ ໂນ ຈ ວຕ ເຣ ວຕ຺ຕພ຺ເພ ປຎ຺ຈວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາຕິ ອາຫ.

໕໗໗. ສຸຎ຺ຎຕໍ ອາຣພ຺ຠາຕິ ‘‘ຍຖາ ໂລກຸຕ຺ຕຣມຄ຺ໂຄ ສຸຎ຺ຎຕໍ ນິພ຺ພານໍ ອາຣພ຺ຠ, ໂລກິໂຍ ສຸທ຺ຘສງ຺ຂາຣປຸຎ຺ຊໍ ອາຣພ຺ຠ ອຸປ຺ປຊ຺ຊຕິ, ກິໍ ເຕ ເອວໍ ຈກ຺ຂຸວິຎ຺ຎາຓ’’ນ຺ຕິ ປຸຈ຺ຉຕິ. ອິຕໂຣ ‘‘ຈກ຺ຂຸຎ຺ຈ ປຏິຈ຺ຈ ຣູເປ ຈາ’’ຕິ ວຈນໂຕ ປຏິກ຺ຂິປຕິ. ທຸຕິຍໍ ປຸຏ຺ໂຐ ‘‘ນ ນິມິຕ຺ຕຄ຺ຄາຫີ’’ຕິ ວຈນໂຕ ຍໍ ຕຕ຺ຖ ອນິມິຕ຺ຕໍ, ຕເທວ ສຸຎ຺ຎຕນ຺ຕິ ສນ຺ຘາຍ ປຏິຊານາຕິ. ຈກ຺ຂຸຎ຺ຈ ປຏິຈ຺ຈາຕິ ປຎ຺ຫທ຺ວເຍປິ ເອເສວ ນໂຍ.

໕໗໘-໕໗໙. ຈກ຺ຂຸວິຎ຺ຎາຓໍ ອຕີຕານາຄຕໍ ອາຣພ຺ຠາຕິ ເອຕ຺ຖ ອຍມຘິປ຺ປາໂຍ – ມໂນວິຎ຺ຎາຓສມງ຺ຄິສ຺ສ ອຕ຺ຖິ ມຄ຺ຄຠາວນາ, ມໂນວິຎ຺ຎາຓຎ຺ຈ ອຕີຕານາຄຕມ຺ປິ ອາຣພ຺ຠ ອຸປ຺ປຊ຺ຊຕິ, ກິໍ ເຕ ເອວໍ ຈກ຺ຂຸວິຎ຺ຎາຓມ຺ປີຕິ. ຜສ຺ສໍ ອາຣພ຺ຠາຕິອາທີສຸປິ ເອເສວ ນໂຍ. ຈກ຺ຂຸນາ ຣູປໍ ທິສ຺ວາ ນ ນິມິຕ຺ຕຄ຺ຄາຫີຕິ ເອຕ຺ຖ ຊວນກ຺ຂເຓ ນ ນິມິຕ຺ຕຄ຺ຄາຫິຕາ ວຸຕ຺ຕາ, ນ ຈກ຺ຂຸວິຎ຺ຎາຓກ຺ຂເຓ. ຕສ຺ມາ ໂລກິຍມຄ຺ຄມ຺ປິ ສນ຺ຘາເຍຕໍ ອສາຘກນ຺ຕິ.

ປຎ຺ຈວິຎ຺ຎາຓສມງ຺ຄິສ຺ສ ມຄ຺ຄກຖາວຓ຺ຓນາ.

໔. ປຎ຺ຈວິຎ຺ຎາຓາ ກຸສລາປີຕິກຖາວຓ຺ຓນາ

໕໘໐-໕໘໓. ອິທານິ ປຎ຺ຈວິຎ຺ຎາຓາ ກຸສລາປີຕິກຖາ ນາມ ໂຫຕິ. ສາ ເຫຏ຺ຐາ ວຸຕ຺ຕນເຍເນວ ອຕ຺ຖໂຕ ເວທິຕພ຺ພາຕິ.

ປຎ຺ຈວິຎ຺ຎາຓາ ກຸສລາປີຕິກຖາວຓ຺ຓນາ.

໕. ປຎ຺ຈວິຎ຺ຎາຓາ ສາໂຠຄາຕິກຖາວຓ຺ຓນາ

໕໘໔-໕໘໖. ອິທານິ ປຎ຺ຈວິຎ຺ຎາຓາ ສາໂຠຄາຕິກຖາ ນາມ ໂຫຕິ. ຕຕ຺ຖ ອາໂຠໂຄ ນາມ ກຸສລາກຸສລວເສນ ໂຫຕິ ສຕ຺ຖາຣາ ຈ ‘‘ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕິ, ນ ນິມິຕ຺ຕຄ຺ຄາຫີ ໂຫຕີ’’ຕິອາທິ ວຸຕ຺ຕໍ, ຕໍ ອໂຍນິໂສ ຄເຫຕ຺ວາ ‘‘ປຎ຺ຈວິຎ຺ຎາຓາ ສາໂຠຄາ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສເມຕ຺ຖ ປຸຣິມກຖາສທິສເມວາຕິ.

ປຎ຺ຈວິຎ຺ຎາຓາ ສາໂຠຄາຕິກຖາວຓ຺ຓນາ.

໖. ທ຺ວີຫິ ສີເລຫີຕິກຖາວຓ຺ຓນາ

໕໘໗-໕໘໙. ອິທານິ ທ຺ວີຫິ ສີເລຫີຕິກຖາ ນາມ ໂຫຕິ. ຕຕ຺ຖ ‘‘ສີເລ ປຕິຏ຺ຐາຍ ນໂຣ ສປຎ຺ໂຎ’’ຕິອາທິວຈນໂຕ (ສໍ. ນິ. ໑.໒໓) ຍສ຺ມາ ໂລກິເຍນ ສີເລນ ສີລວາ ໂລກຸຕ຺ຕຣໍ ມຄ຺ຄໍ ຠາເວຕິ, ຕສ຺ມາ ‘‘ປຸຣິເມນ ຈ ໂລກິເຍນ ມຄ຺ຄກ຺ຂເຓ ໂລກຸຕ຺ຕເຣນ ຈາຕິ ທ຺ວີຫິ ສີເລຫິ ສມນ຺ນາຄໂຕ ນາມ ໂຫຕີ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍເຍວ, ເຕ ສນ຺ຘາຍ ມຄ຺ຄສມງ຺ຄີຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ຍທິ ໂສ ເອກກ຺ຂເຓ ໂລກິຍໂລກຸຕ຺ຕເຣຫິ ທ຺ວີຫິ ສີເລຫິ ສມນ຺ນາຄໂຕ, ທ຺ວີຫິ ຜສ຺ສາທີຫິປິ ເຕນ ສມນ຺ນາຄເຕນ ຠວິຕພ຺ພ’’ນ຺ຕິ ໂຈເທຕຸໍ ທ຺ວີຫິ ຜສ຺ເສຫີຕິອາທິມາຫ. ອິຕໂຣ ຕຖາຣູປໍ ນຍໍ ອປສ຺ສນ຺ໂຕ ປຏິກ຺ຂິປຕິ. ໂລກິເຍນ ຈ ໂລກຸຕ຺ຕເຣນ ຈາຕິ ປຎ຺ເຫ ປຸພ຺ເພ ສມາທິນ຺ນຎ຺ຈ ມຄ຺ຄກ຺ຂເຓ ອຸປ຺ປນ຺ນສມ຺ມາວາຈາທີນິ ຈ ສນ຺ຘາຍ ປຏິຊານາຕິ.

ໂລກິເຍ ສີເລ ນິຣຸທ຺ເຘຕິ ປຸຈ຺ຉາ ປຣວາທິສ຺ສ, ຂຓຠງ຺ຄນິໂຣຘໍ ສນ຺ຘາຍ ປຏິຎ຺ຎາ ສກວາທິສ຺ສ. ອິຕໂຣ ປນ ຕໍ ວີຕິກ຺ກມໍ ວິຍ ສລ຺ລກ຺ເຂນ຺ໂຕ ທຸສ຺ສີໂລຕິອາທິມາຫ. ລທ຺ຘິປຕິຏ຺ຐາປນໍ ປນສ຺ສ ປຸພ຺ເພ ອຠິນ຺ນສີລຕໍເຍວ ທີເປຕິ, ນ ທ຺ວີຫິ ສມນ຺ນາຄຕຕໍ. ຕສ຺ມາ ອປ຺ປຕິຏ຺ຐິຕາວ ລທ຺ຘີຕິ.

ທ຺ວີຫິ ສີເລຫີຕິກຖາວຓ຺ຓນາ.

໗. ສີລໍ ອເຈຕສິກນ຺ຕິກຖາວຓ຺ຓນາ

໕໙໐-໕໙໔. ອິທານິ ສີລໍ ອເຈຕສິກນ຺ຕິກຖາ ນາມ ໂຫຕິ. ຕຕ຺ຖ ຍສ຺ມາ ສີເລ ອຸປ຺ປຊ຺ຊິຕ຺ວາ ນິຣຸທ຺ເຘປິ ສມາທານເຫຕຸໂກ ສີໂລປຈໂຍ ນາມ ອຕ຺ຖິ, ເຍນ ໂສ ສີລວາເຍວ ນາມ ໂຫຕິ, ຕສ຺ມາ ‘‘ສີລໍ ອເຈຕສິກ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສເມຕ຺ຖ ‘‘ທານໍ ອເຈຕສິກ’’ນ຺ຕິກຖາຍໍ ວຸຕ຺ຕນເຍເນວ ເວທິຕພ຺ພໍ. ລທ຺ຘິປຕິຏ຺ຐາປນມ຺ປິ ອໂຍນິໂສ ຄຫິຕຕ຺ຕາ ອປ຺ປຕິຏ຺ຐາປນເມວາຕິ.

ສີລໍ ອເຈຕສິກນ຺ຕິກຖາວຓ຺ຓນາ.

໘. ສີລໍ ນ ຈິຕ຺ຕານຸປຣິວຕ຺ຕີຕິກຖາວຓ຺ຓນາ

໕໙໕-໕໙໗. ອິທານິ ສີລໍ ນ ຈິຕ຺ຕານຸປຣິວຕ຺ຕີຕິກຖາ ນາມ ໂຫຕິ. ຕຕ຺ຖ ນ ຈິຕ຺ຕານຸປຣິວຕ຺ຕີຕິ ຠາສນ຺ຕຣເມວ ນານໍ, ເສສໍ ປຸຣິມກຖາສທິສເມວາຕິ.

ສີລໍ ນ ຈິຕ຺ຕານຸປຣິວຕ຺ຕີຕິກຖາວຓ຺ຓນາ.

໙. ສມາທານເຫຕຸກຖາວຓ຺ຓນາ

໕໙໘-໖໐໐. ອິທານິ ສມາທານເຫຕຸກຖາ ນາມ ໂຫຕິ. ຕຕ຺ຖ ‘‘ອາຣາມໂຣປາ’’ຕິ ຄາຖາຍ ອຕ຺ຖໍ ອໂຍນິໂສ ຄເຫຕ຺ວາ ‘‘ສທາ ປຸຎ຺ຎໍ ປວຑ຺ຒຕີ’’ຕິ ວຈນໂຕ ‘‘ສມາທານເຫຕຸກໍ ສີລໍ ວຑ຺ຒຕີ’’ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການຎ຺ເຎວ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ຈິຕ຺ຕວິປ຺ປຍຸຕ຺ຕໍ ສີໂລປຈຍໍ ສນ຺ຘາຍ ປຏິຎ຺ຎາ ປຣວາທິສ຺ສ. ເສສໍ ປຸຣິມກຖາສທິສເມວາຕິ.

ສມາທານເຫຕຸກຖາວຓ຺ຓນາ.

໑໐. ວິຎ຺ຎຕ຺ຕິ ສີລນ຺ຕິກຖາວຓ຺ຓນາ

໖໐໑-໖໐໒. ອິທານິ ວິຎ຺ຎຕ຺ຕິ ສີລນ຺ຕິກຖາ ນາມ ໂຫຕິ. ຕຕ຺ຖ ກາຍວິຎ຺ຎຕ຺ຕິ ກາຍກມ຺ມໍ, ວຈີວິຎ຺ຎຕ຺ຕິ ວຈີກມ຺ມນ຺ຕິ ຄຫິຕຕ຺ຕາ ‘‘ວິຎ຺ຎຕ຺ຕິ ສີລ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການຎ຺ເຈວ ສມ຺ມິຕິຍານຎ຺ຈ; ເຕ ສນ຺ຘາຍ ວິຎ຺ຎຕ຺ຕີຕິ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ຍສ຺ມາ ສີລໍ ນາມ ວິຣຕິ, ນ ຣູປຘມ຺ໂມ, ຕສ຺ມາ ເຕນຕ຺ເຖນ ໂຈເທຕຸໍ ປາຓາຕິປາຕາ ເວຣມຓີຕິອາທິມາຫ. ອຠິວາທນໍ ສີລນ຺ຕິອາທິ ຍຖາຣູປໍ ວິຎ຺ຎຕ຺ຕິໍ ໂສ ‘‘ສີລ’’ນ຺ຕິ ມຎ຺ຎຕິ ຕໍ ອຸທ຺ຘຣິຕ຺ວາ ທສ຺ເສຕຸໍ ວຸຕ຺ຕໍ. ຍສ຺ມາ ປນ ສາ ວິຣຕິ ນ ໂຫຕິ, ຕສ຺ມາ ປຸນ ປາຓາຕິປາຕາຕິອາທິມາຫ. ລທ຺ຘິ ປນສ຺ສ ຉເລນ ປຕິຏ຺ຐິຕຕ຺ຕາ ອປ຺ປຕິຏ຺ຐິຕາເຍວາຕິ.

ວິຎ຺ຎຕ຺ຕິ ສີລນ຺ຕິກຖາວຓ຺ຓນາ.

໑໑. ອວິຎ຺ຎຕ຺ຕິ ທຸສ຺ສີລ຺ຍນ຺ຕິກຖາວຓ຺ຓນາ

໖໐໓-໖໐໔. ອິທານິ ອວິຎ຺ຎຕ຺ຕິ ທຸສ຺ສີລ຺ຍນ຺ຕິກຖາ ນາມ ໂຫຕິ. ຕຕ຺ຖ ຈິຕ຺ຕວິປ຺ປຍຸຕ຺ຕໍ ອປຸຎ຺ຎູປຈຍຎ຺ເຈວ ອາຓຕ຺ຕິຍາ ຈ ປາຓາຕິປາຕາທີສຸ ອງ຺ຄປາຣິປູຣິໍ ສນ຺ຘາຍ ‘‘ອວິຎ຺ຎຕ຺ຕິ ທຸສ຺ສີລ຺ຍ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ມຫາສໍຆິການໍ, ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ອຖ ນໍ ‘‘ສເຈ ສາ ທຸສ຺ສີລ຺ຍໍ, ປາຓາຕິປາຕາທີສຸ ອຎ຺ຎຕຣາ ສິຍາ’’ຕິ ໂຈເທຕຸໍ ປາຓາຕິປາໂຕຕິອາທິມາຫ. ປາປກມ຺ມໍ ສມາທິຍິຕ຺ວາຕິ ‘‘ອສຸກໍ ນາມ ຆາເຕສ຺ສາມິ, ອສຸກໍ ຠຓ຺ຑໍ ອວຫຣິສ຺ສາມີ’’ຕິ ເອວໍ ປາປສມາທານໍ ກຕ຺ວາ. ອຸໂຠ ວຑ຺ຒນ຺ຕີຕິ ປຸຏ຺ໂຐ ທານກ຺ຂເຓ ປາປສ຺ສ ອນຸປ຺ປຕ຺ຕິໍ ສນ຺ຘາຍ ປຏິກ຺ຂິປຕິ. ທຸຕິຍໍ ປຸຏ຺ໂຐ ຈິຕ຺ຕວິປ຺ປຍຸຕ຺ຕໍ ປາປູປຈຍໍ ສນ຺ຘາຍ ປຏິຊານາຕິ. ເສສເມຕ຺ຖ ປຣິໂຠຄມຍກຖາຍໍ ວຸຕ຺ຕນເຍເນວ ເວທິຕພ຺ພໍ. ລທ຺ຘິປຕິຏ຺ຐາປນມ຺ປິສ຺ສ ປາປສມາທິນ຺ນປຸພ຺ພຠາຄເມວ ສາເຘຕິ; ນ ອວິຎ຺ຎຕ຺ຕິຍາ ທຸສ຺ສີລຠາວນ຺ຕິ.

ອວິຎ຺ຎຕ຺ຕິ ທຸສ຺ສີລ຺ຍນ຺ຕິກຖາວຓ຺ຓນາ.

ທສໂມ ວຄ຺ໂຄ.

ທຸຕິຍປຓ຺ຓາສໂກ ສມຕ຺ໂຕ.