໑໑. ອຕີຕານາຄຕສມນ຺ນາຄຕກຖາວຓ຺ຓນາ

໕໖໘-໕໗໐. ອິທານິ ອຕີຕານາຄເຕຫິ ສມນ຺ນາຄຕກຖາ ນາມ ໂຫຕິ. ຕຕ຺ຖ ສມນ຺ນາຄຕປຎ຺ຎຕ຺ຕິ ປຏິລາຠປຎ຺ຎຕ຺ຕີຕິ ທ຺ເວ ປຎ຺ຎຕ຺ຕິໂຍ ເວທິຕພ຺ພາ. ຕາສຸ ປຈ຺ຈຸປ຺ປນ຺ນຘມ຺ມສມງ຺ຄີ ສມນ຺ນາຄໂຕຕິ ວຸຈ຺ຈຕິ. ອຏ຺ຐ ສມາປຕ຺ຕິລາຠິໂນ ປນ ສມາປຕ຺ຕິໂຍ ກິຎ຺ຈາປິ ນ ເອກກ຺ຂເຓ ປວຕ຺ຕນ຺ຕິ, ອຎ຺ຎາ ອຕີຕາ ໂຫນ຺ຕິ, ອຎ຺ຎາ ອນາຄຕາ, ອຎ຺ຎາ ປຈ຺ຈຸປ຺ປນ຺ນາ, ປຏິວິຊ຺ຌິຕ຺ວາ ອປຣິຫີນຕາຍ ປນ ລາຠີຕິ ວຸຈ຺ຈຕິ. ຕຕ຺ຖ ເຍສໍ ອິມໍ ວິຠາຄໍ ອຄ຺ຄເຫຕ຺ວາ ຍສ຺ມາ ຌານລາຠີນໍ ອຕີຕານາຄຕານິ ຌານານິປິ ອຕ຺ຖິ, ຕສ຺ມາ ‘‘ເຕ ອຕີເຕນປິ ອນາຄເຕນປິ ສມນ຺ນາຄຕາ’’ຕິ ລທ຺ຘິ, ເສຍ຺ຍຖາປິ ອນ຺ຘການໍ. ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ອິຕຣສ຺ສ. ເສສເມຕ຺ຖ ອຸຕ຺ຕານຕ຺ຖເມວາຕິ. ‘‘ອຏ຺ຐວິໂມກ຺ຂຌາຍີ’’ຕິອາທິ ປນ ລາຠີຠາວສ຺ສ ສາຘກໍ, ນ ສມນ຺ນາຄຕຠາວສ຺ສາຕິ.

ອຕີຕານາຄຕສມນ຺ນາຄຕກຖາວຓ຺ຓນາ.

ນວໂມ ວຄ຺ໂຄ.