໑. ວິມຸຕ຺ຕິກຖາວຓ຺ຓນາ

໔໑໘. ອິທານິ ວິມຸຕ຺ຕິກຖາ ນາມ ໂຫຕິ. ຕຕ຺ຖ ວິປສ຺ສນາ, ມຄ຺ໂຄ, ຜລໍ, ປຈ຺ຈເວກ຺ຂຓນ຺ຕິ ຈຕຸນ຺ນໍ ຎາຓານໍ ວິມຸຕ຺ຕິຎາຓນ຺ຕິ ນາມໍ. ເຕສຸ ວິປສ຺ສນາຎາຓໍ ນິຈ຺ຈນິມິຕ຺ຕາທີຫິ ວິມຸຕ຺ຕຕ຺ຕາ, ຕທງ຺ຄວິມຸຕ຺ຕິຠາເວນ ວາ ວິມຸຕ຺ຕຕ຺ຕາ ວິມຸຕ຺ຕິຎາຓໍ. ມຄ຺ໂຄ ສມຸຈ຺ເຉທວິມຸຕ຺ຕິ, ຜລໍ ປຏິປ຺ປສ຺ສທ຺ຘິວິມຸຕ຺ຕິ, ປຈ຺ຈເວກ຺ຂຓຎາຓໍ ປນ ວິມຸຕ຺ຕິໍ ຊານາຕີຕິ ວິມຸຕ຺ຕິຎາຓໍ. ເອວໍ ຈຕຸພ຺ພິເຘ ວິມຸຕ຺ຕິຎາເຓ ນິປ຺ປຣິຍາເຍນ ຜລຎາຓເມວ ວິມຸຕ຺ຕິ. ເສສານິ ‘‘ວິມຸຕ຺ຕານີ’’ຕິ ວາ ‘‘ອວິມຸຕ຺ຕານີ’’ຕິ ວາ ນ ວຕ຺ຕພ຺ພານິ. ຕສ຺ມາ ‘‘ອິທໍ ນາມ ວິມຸຕ຺ຕິຎາຓໍ ວິມຸຕ຺ຕ’’ນ຺ຕິ ອວຕ຺ວາ ອວິເສເສເນວ ‘‘ວິມຸຕ຺ຕິຎາຓໍ ວິມຸຕ຺ຕ’’ນ຺ຕິ ເຍສໍ ລທ຺ຘິ, ເສຍ຺ຍຖາປິ ອນ຺ຘການໍ; ເຕ ສນ຺ຘາຍ ປຸຈ຺ຉາ ສກວາທິສ຺ສ, ປຏິຎ຺ຎາ ປຣວາທິສ຺ສ. ປຸນ ຍໍກິຎ຺ຈີຕິ ປຸຏ຺ໂຐ ປຈ຺ຈເວກ຺ຂຓາທີນິ ສນ຺ຘາຍ ປຏິກ຺ຂິປຕິ. ປຏິປນ຺ນສ຺ສາຕິ ປຸຏ຺ໂຐ ມຄ຺ຄຎາຓສ຺ສ ອນາສວຕໍ ສນ຺ຘາຍ ປຏິຊານາຕິ. ຍສ຺ມາ ປນ ຕໍ ໂສຕາປນ຺ນສ຺ສ ຜເລ ຐິຕສ຺ສ ຎາຓໍ ນ ໂຫຕິ, ຕສ຺ມາ ວິມຸຕ຺ຕໍ ນາມ ນ ໂຫຕີຕິ ໂຈທນຕ຺ຖໍ ປຸນ ສກວາທີ ໂສຕາປນ຺ນສ຺ສາຕິອາທິມາຫ. ອິມິນາ ອຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ.

ວິມຸຕ຺ຕິກຖາວຓ຺ຓນາ.