໕. ວຈີເຠທກຖາວຓ຺ຓນາ

໓໒໖. ອິທານິ ວຈີເຠທກຖາ ນາມ ໂຫຕິ. ຕຕ຺ຖ ເຍສໍ ‘‘ໂສຕາປຕ຺ຕິມຄ຺ຄກ຺ຂເຓ ປຐມໍ ຌານໍ ສມາປນ຺ນສ຺ສ ທຸກ຺ຂນ຺ຕິ ວາຈາ ຠິຊ຺ຊຕີ’’ຕິ ລທ຺ຘິ, ເສຍ຺ຍຖາປິ ເອຕຣຫິ ປຸພ຺ພເສລິຍາທີນໍ; ເຕ ສນ຺ຘາຍ ສມາປນ຺ນສ຺ສ ອຕ຺ຖິ ວຈີເຠໂທຕິ ປຸຈ຺ຉາ ສກວາທິສ຺ສ, ລທ຺ຘິຍໍ ຐຕ຺ວາ ປຏິຎ຺ຎາ ປຣວາທິສ຺ສ. ປຸນ ສພ຺ພຕ຺ຖາຕິ ຕໂຍ ຠເວ ສນ຺ຘາຍ ປຸຏ຺ໂຐ ອຣູປໍ ສນ຺ຘາຍ ປຏິກ຺ຂິປຕິ. ສພ຺ພທາຕິ ກາລວເສນ ປຸຏ຺ໂຐ ປຐມມຄ຺ຄກ຺ຂເຓ ປຐມຊ຺ຌານິກສມາປຕ຺ຕິໂຕ ອຎ຺ຎໍ ສພ຺ພໍ ສມາປຕ຺ຕິກາລໍ ສນ຺ຘາຍ ປຏິກ຺ຂິປຕິ. ສພ຺ເພສໍ ສມາປນ຺ນານນ຺ຕິ ປຸຏ຺ໂຐ ໂລກິຍສມາປຕ຺ຕິໂຍ ສມາປນ຺ເນ ສນ຺ຘາຍ ປຏິກ຺ຂິປຕິ. ສພ຺ພສມາປຕ຺ຕີສູຕິ ປຸຏ຺ໂຐ ທຸຕິຍຊ຺ຌານາທິກໍ ໂລກຸຕ຺ຕຣໍ ສພ຺ພຎ຺ຈ ໂລກິຍສມາປຕ຺ຕິໍ ສນ຺ຘາຍ ປຏິກ຺ຂິປຕິ.

ກາຍເຠໂທຕິ ອຠິກ຺ກມາທິວເສນ ປວຕ຺ຕກາຍວິຎ຺ຎຕ຺ຕິ. ອິທໍ ‘‘ຍານິ ຈິຕ຺ຕານິ ວຈີວິຎ຺ຎຕ຺ຕິໍ ສມຸຏ຺ຐາເປນ຺ຕິ, ຕາເນວ ກາຍວິຎ຺ຎຕ຺ຕິໍ. ເອວໍ ສນ຺ເຕ ກສ຺ມາ ກາຍເຠໂທປິ ນ ໂຫຕີ’’ຕິ ໂຈທນຕ຺ຖໍ ປຸຈ຺ຉຕິ. ອິຕໂຣ ລທ຺ຘິວເສນ ປຏິກ຺ຂິປຕິ ເຈວ ປຏິຊານາຕິ ຈ. ອິທານິ ຍທິ ໂສ ມຄ຺ຄກ຺ຂເຓ ‘‘ທຸກ຺ຂ’’ນ຺ຕິ ວາຈໍ ຠາສຕິ, ‘‘ສມຸທໂຍ’’ຕິອາທິກມ຺ປິ ຠາເສຍ຺ຍ. ຍທິ ວາ ຕໍ ນ ຠາສຕິ, ອິຕຣມ຺ປິ ນ ຠາເສຍ຺ຍາຕິ ໂຈທນຕ຺ຖໍ ທຸກ຺ຂນ຺ຕິ ຊານນ຺ໂຕຕິອາທໂຍ ປຎ຺ຫາ ວຸຕ຺ຕາ. ອິຕໂຣ ປນ ອຕ຺ຕໂນ ລທ຺ຘິວເສເນວ ປຏິຊານາຕິ ເຈວ ປຏິກ຺ຂິປຕິ ຈ. ໂລກຸຕ຺ຕຣໍ ປຐມຊ຺ຌານໍ ສມາປນ຺ໂນ ທຸກ຺ຂທຸກ຺ຂນ຺ຕິ ວິປສ຺ສຕີຕິ ຫິສ຺ສ ລທ຺ຘິ.

໓໒໘. ຎາຓນ຺ຕິ ໂລກຸຕ຺ຕຣໍ ຈຕຸສຈ຺ຈຎາຓໍ. ໂສຕນ຺ຕິ ໂສຕວິຎ຺ຎາຓໍ ອຘິປ຺ເປຕໍ, ເຍນ ຕໍ ສທ຺ທໍ ສຸຓາຕິ. ທ຺ວິນ຺ນໍ ຜສ຺ສານນ຺ຕິ ໂສຕສມ຺ຜສ຺ສມໂນສມ຺ຜສ຺ສານໍ.

໓໒໙. ໂນ ວຕ ເຣ ວຕ຺ຕພ຺ເພຕິ ຍທິ ອວິເສເສນ ຍໍກິຎ຺ຈິ ສມາປນ຺ນສ຺ສ ນຕ຺ຖິ ວຈີເຠໂທ, ນ ອວິເສເສນ ວຕ຺ຕພ຺ພໍ ‘‘ສມາປນ຺ນສ຺ສ ອຕ຺ຖິ ວຈີເຠໂທ’’ຕິ. ເສສເມຕ຺ຖ ອຸຕ຺ຕານຕ຺ຖເມວ ສທ຺ຘິໍ ສຸຕ຺ຕສາຘນາຍ. ຍໍ ປເນເຕນ ‘‘ສິຂິສ຺ສ ອານນ຺ທ, ຠຄວໂຕ’’ຕິ ປຣິໂຍສາເນ ສຸຕ຺ຕໍ ອາຠຕໍ, ຕຕ຺ຖ ເຍນ ສມາປຕ຺ຕິຈິຕ຺ເຕນ ໂສ ວຈີເຠໂທ ສມຸຏ຺ຐິໂຕ, ກາຍເຠໂທປິ ເຕນ ສມຸຏ຺ຐາຕິເຍວ, ນ ຈ ຕໍ ໂລກຸຕ຺ຕຣໍ ປຐມຊ຺ຌານຈິຕ຺ຕໍ, ຕສ຺ມາ ອສາຘກນ຺ຕິ.

ວຈີເຠທກຖາວຓ຺ຓນາ.