ຘມ຺ມຸທ຺ເທສວາຣກຖາ

ປຐມຈິຕ຺ຕໍ

໓໖໕. ອິທານິ ອກຸສລຘມ຺ມປທໍ ຠາເຊຕ຺ວາ ທສ຺ເສຕຸໍ ກຕເມ ຘມ຺ມາ ອກຸສລາຕິອາທິ ອາຣທ຺ຘໍ. ຕຕ຺ຖ ຘມ຺ມວວຕ຺ຖານາທິວາຣປ຺ປເຠໂທ ຈ ເຫຏ຺ຐາ ອາຄຕານໍ ປທານໍ ອຕ຺ຖວິນິຈ຺ຉໂຍ ຈ ເຫຏ຺ຐາ ວຸຕ຺ຕນເຍເນວ ເວທິຕພ຺ໂພ. ຕຕ຺ຖ ຕຕ຺ຖ ປນ ວິເສສມຕ຺ຕເມວ ວຓ຺ຓຍິສ຺ສາມ. ຕຕ຺ຖ ສມຍວວຕ຺ຖາເນ ຕາວ ຍສ຺ມາ, ກຸສລສ຺ສ ວິຍ, ອກຸສລສ຺ສ ຠູມິເຠໂທ ນຕ຺ຖິ, ຕສ຺ມາ ເອກນ຺ຕໍ ກາມາວຈຣມ຺ປິ ສມານໍ ເອຕໍ ‘ກາມາວຈຣ’ນ຺ຕິ ນ ວຸຕ຺ຕໍ. ທິຏ຺ຐິຄຕສມ຺ປຍຸຕ຺ຕນ຺ຕິ ເອຕ຺ຖ ທິຏ຺ຐິ ເອວ ທິຏ຺ຐິຄຕໍ ‘ຄູຖຄຕໍ ມຸຕ຺ຕຄຕ’ນ຺ຕິອາທີນິ (ອ. ນິ. ໙.໑໑) ວິຍ. ຄນ຺ຕພ຺ພາຠາວໂຕ ວາ ທິຏ຺ຐິຍາ ຄຕມຕ຺ຕເມເວຕນ຺ຕິປິ ທິຏ຺ຐິຄຕໍ. ເຕນ ສມ຺ປຍຸຕ຺ຕໍ ທິຏ຺ຐິຄຕສມ຺ປຍຸຕ຺ຕໍ.

ຕຕ຺ຖ ອສທ຺ຘມ຺ມສວນໍ, ອກລ຺ຍາຓມິຕ຺ຕຕາ, ອຣິຍານໍ ອທສ຺ສນກາມຕາທີນິ ອໂຍນິໂສ ມນສິກາໂຣຕິ ເອວມາທີຫິ ກາຣເຓຫິ ອິມສ຺ສ ທິຏ຺ຐິຄຕສງ຺ຂາຕສ຺ສ ມິຈ຺ຉາທສ຺ສນສ຺ສ ອຸປ຺ປຕ຺ຕິ ເວທິຕພ຺ພາ. ເຍ ຫິ ເອເຕ ທິຏ຺ຐິວາທປຏິສໍຍຸຕ຺ຕາ ອສທ຺ຘມ຺ມາ ເຕສໍ ພຫຸມານປຸພ຺ພງ຺ຄເມນ ອຕິກ຺ກນ຺ຕມຊ຺ຌຕ຺ເຕນ ອຸປປຣິກ຺ຂາຣຫິເຕນ ສວເນນ, ເຍ ຈ ທິຏ຺ຐິວິປນ຺ນາ ອກລ຺ຍາຓມິຕ຺ຕາ ຕໍສມ຺ປວງ຺ກຕາສງ຺ຂາຕາຍ ອກລ຺ຍາຓມິຕ຺ຕຕາຍ, ພຸທ຺ຘາທີນໍ ອຣິຍານຎ຺ເຈວ ສປ຺ປຸຣິສານຎ຺ຈ ອທສ຺ສນກາມຕາຍ ຈຕຸສຕິປຏ຺ຐານາທິເຠເທ ອຣິຍຘມ຺ເມ ອໂກວິທຕ຺ເຕນ ປາຕິໂມກ຺ຂສໍວຣອິນ຺ທ຺ຣິຍສໍວຣສຕິສໍວຣຎາຓສໍວຣປຫານສໍວຣປ຺ປເຠເທ ອຣິຍຘມ຺ເມ ເຈວ ສປ຺ປຸຣິສຘມ຺ເມ ຈ ສໍວຣເຠທສງ຺ຂາເຕນ ອວິນເຍນ ເຕເຫວ ກາຣເຓຫິ ປຣິຠາວິເຕນ ອໂຍນິໂສ ມນສິກາເຣນ ໂກຕູຫລມງ຺ຄລາທິປສຸຕຕາຍ ຈ ເອຕໍ ອຸປ຺ປຊ຺ຊຕີຕິ ເວທິຕພ຺ພໍ. ອສງ຺ຂາຣຠາໂວ ປນສ຺ສ ຈິຕ຺ຕສ຺ສ ເຫຏ຺ຐາ ວຸຕ຺ຕນເຍເນວ ເວທິຕພ຺ໂພ.

ຘມ຺ມຸທ຺ເທສວາເຣ ຜສ຺ໂສຕິ ອກຸສລຈິຕ຺ຕສຫຊາໂຕ ຜສ຺ໂສ. ເວທນາທີສຸປິ ເອເສວ ນໂຍ. ອິຕິ ອກຸສລມຕ຺ຕເມວ ເອເຕສໍ ປຸຣິເມຫິ ວິເສໂສ.

ຈິຕ຺ຕສ຺ເສກຄ຺ຄຕາ ໂຫຕີຕິ ປາຓາຕິປາຕາທີສຸປິ ອວິກ຺ຂິຕ຺ຕຠາເວນ ຈິຕ຺ຕສ຺ສ ເອກຄ຺ຄຕາ ໂຫຕິ. ມນຸສ຺ສາ ຫິ ຈິຕ຺ຕໍ ສມາທຫິຕ຺ວາ ອວິກ຺ຂິຕ຺ຕາ ຫຸຕ຺ວາ ອວິຣຊ຺ຌມານານິ ສຕ຺ຖານິ ປາຓສຣີເຣສຸ ນິປາເຕນ຺ຕິ, ສຸສມາຫິຕາ ປເຣສໍ ສນ຺ຕກໍ ຫຣນ຺ຕິ, ເອກຣເສນ ຈິຕ຺ເຕນ ມິຈ຺ຉາຈາຣໍ ອາປຊ຺ຊນ຺ຕິ. ເອວໍ ອກຸສລປ຺ປວຕ຺ຕິຍມ຺ປິ ຈິຕ຺ຕສ຺ສ ເອກຄ຺ຄຕາ ໂຫຕິ.

ມິຈ຺ຉາທິຏ຺ຐີຕິ ອຍາຖາວທິຏ຺ຐິ, ວິຣຊ຺ຌິຕ຺ວາ ຄຫຓໂຕ ວາ ວິຕຖາ ທິຏ຺ຐິ ມິຈ຺ຉາທິຏ຺ຐິ. ອນຕ຺ຖາວຫຕ຺ຕາ ປຓ຺ຑິເຕຫິ ຊິຄຸຈ຺ຉິຕາ ທິຏ຺ຐີຕິປິ ມິຈ຺ຉາທິຏ຺ຐິ. ມິຈ຺ຉາສງ຺ກປ຺ປາທີສຸປິ ເອເສວ ນໂຍ. ອປິຈ ມິຈ຺ຉາ ປສ຺ສນ຺ຕິ ຕາຍ, ສຍໍ ວາ ມິຈ຺ຉາ ປສ຺ສຕິ, ມິຈ຺ຉາທສ຺ສນມຕ຺ຕເມວ ວາ ເອສາຕິ ມິຈ຺ຉາທິຏ຺ຐິ. ສາ ອໂຍນິໂສ ອຠິນິເວສລກ຺ຂຓາ, ປຣາມາສຣສາ, ມິຈ຺ຉາຠິນິເວສປຈ຺ຈຸປຏ຺ຐານາ, ອຣິຍານໍ ອທສ຺ສນກາມຕາທິປທຏ຺ຐານາ; ປຣມໍ ວຊ຺ຊນ຺ຕິ ທຏ຺ຐພ຺ພາ. ມິຈ຺ຉາສງ຺ກປ຺ປາທີສຸ ‘ມິຈ຺ຉາ’ຕິ ປທມຕ຺ຕເມວ ວິເສໂສ. ເສສໍ ກຸສລາຘິກາເຣ ວຸຕ຺ຕນເຍເນວ ເວທິຕພ຺ພໍ.

ອຫິຣິກພລໍ ອໂນຕ຺ຕປ຺ປພລນ຺ຕິ ເອຕ຺ຖ ພລຕ຺ໂຖ ນິທ຺ເທສວາເຣ ອາວິ ຠວິສ຺ສຕິ. ອິຕເຣສຸ ປນ – ນ ຫິຣິຍຕີຕິ ອຫິຣິໂກ. ອຫິຣິກສ຺ສ ຠາໂວ ອຫິຣິກໍ. ນ ໂອຕ຺ຕປ຺ປໍ ອໂນຕ຺ຕປ຺ປໍ. ເຕສຸ ອຫິຣິກໍ ກາຍທຸຈ຺ຈຣິຕາທີຫິ ອຊິຄຸຈ຺ຉນລກ຺ຂຓໍ, ອລຊ຺ຊາລກ຺ຂຓໍ ວາ. ອໂນຕ຺ຕປ຺ປໍ ເຕເຫວ ອສາຣຊ຺ຊນລກ຺ຂຓໍ ອນຸຕ຺ຕາສນລກ຺ຂຓໍ ວາ. ອຫິຣິກເມວ ພລໍ ອຫິຣິກພລໍ. ອໂນຕ຺ຕປ຺ປເມວ ພລໍ ອໂນຕ຺ຕປ຺ປພລໍ. ອຍເມຕ຺ຖ ສງ຺ເຂປຕ຺ໂຖ. ວິຕ຺ຖາໂຣ ປນ ເຫຏ຺ຐາ ວຸຕ຺ຕປຏິປກ຺ຂວເສນ ເວທິຕພ຺ໂພ.

ລຸພ຺ຠນ຺ຕິ ເຕນ, ສຍໍ ວາ ລຸພ຺ຠຕິ, ລຸພ຺ຠນມຕ຺ຕເມວ ວາ ຕນ຺ຕິ ໂລໂຠ. ມຸຍ຺ຫນ຺ຕິ ເຕນ, ສຍໍ ວາ ມຸຍ຺ຫຕິ, ມຸຍ຺ຫນມຕ຺ຕເມວ ວາ ຕນ຺ຕິ ໂມໂຫ. ເຕສຸ ໂລໂຠ ອາຣມ຺ມຓຄ຺ຄຫຓລກ຺ຂໂຓ ມກ຺ກຏາເລໂປ ວິຍ, ອຠິສງ຺ຄຣໂສ ຕຕ຺ຕກປາເລ ຂິຕ຺ຕມໍສເປສິ ວິຍ, ອປຣິຈ຺ຈາຄປຈ຺ຈຸປຏ຺ຐາໂນ ເຕລຎ຺ຊນຣາໂຄ ວິຍ, ສໍໂຍຊນິຍຘມ຺ເມສຸ ອສ຺ສາທທສ຺ສນປທຏ຺ຐາໂນ. ໂສ ຕຓ຺ຫານທີຠາເວນ ວຑ຺ຒມາໂນ, ສີຆໂສຕາ ນທີ ວິຍ ມຫາສມຸທ຺ທໍ, ອປາຍເມວ ຄເຫຕ຺ວາ ຄຈ຺ຉຕີຕິ ທຏ຺ຐພ຺ໂພ.

ໂມໂຫ ຈິຕ຺ຕສ຺ສ ອນ຺ຘຠາວລກ຺ຂໂຓ ອຎ຺ຎາຓລກ຺ຂໂຓ ວາ, ອສມ຺ປຏິເວຘຣໂສ ອາຣມ຺ມຓສຠາວຈ຺ຉາທນຣໂສ ວາ, ອສມ຺ມາປຏິປຕ຺ຕິປຈ຺ຈຸປຏ຺ຐາໂນ ອນ຺ຘກາຣປຈ຺ຈຸປຏ຺ຐາໂນ ວາ, ອໂຍນິໂສມນສິກາຣປທຏ຺ຐາໂນ. ສພ຺ພາກຸສລານໍ ມູລນ຺ຕິ ທຏ຺ຐພ຺ໂພ.

ອຠິຊ຺ຌາຍນ຺ຕິ ຕາຍ, ສຍໍ ວາ ອຠິຊ຺ຌາຍຕິ, ອຠິຊ຺ຌາຍນມຕ຺ຕເມວ ວາ ເອສາຕິ ອຠິຊ຺ຌາ. ສາ ປຣສມ຺ປຕ຺ຕີນໍ ສກກຣຓອິຈ຺ຉາລກ຺ຂຓາ, ເຕນາກາເຣນ ເອສນຠາວຣສາ, ປຣສມ຺ປຕ຺ຕິ-ອຠິມຸຂຠາວປຈ຺ຈຸປຏ຺ຐານາ, ປຣສມ຺ປຕ຺ຕີສຸ ອຠິຣຕິປທຏ຺ຐານາ. ປຣສມ຺ປຕ຺ຕິອຠິມຸຂາ ເອວ ຫິ ສາ ອຸປຏ຺ຐຫຕິ. ຕາສຸ ຈ ອຠິຣຕິຍາ ສຕິ ປວຕ຺ຕຕິ, ປຣສມ຺ປຕ຺ຕີສຸ ເຈຕໂສ ຫຕ຺ຖປ຺ປສາໂຣວິຍາຕິ ທຏ຺ຐພ຺ພາ.

ສມໂຖ ໂຫຕີຕິອາທີສຸ ອຎ຺ເຎສຸ ກິຈ຺ເຈສຸ ວິກ຺ເຂປສມນໂຕ ສມໂຖ. ອກຸສລປ຺ປວຕ຺ຕິຍໍ ຈິຕ຺ຕໍ ປຄ຺ຄຓ຺ຫາຕີຕິ ປຄ຺ຄາໂຫ. ນ ວິກ຺ຂິປຕີຕິ ອວິກ຺ເຂໂປ.

ອິມສ຺ມິໍ ຈິຕ຺ເຕ ສທ຺ຘາ, ສຕິ, ປຎ຺ຎາ, ຉ ຍຸຄຬການີຕິ ອິເມ ຘມ຺ມາ ນ ຄຫິຕາ. ກສ຺ມາ? ອສ຺ສທ຺ຘິຍຈິຕ຺ເຕ ປສາໂທ ນາມ ນຕ຺ຖິ. ຕສ຺ມາ ຕາວ ສທ຺ຘາ ນ ຄຫິຕາ. ກິໍ ປນ ທິຏ຺ຐິຄຕິກາ ອຕ຺ຕໂນ ອຕ຺ຕໂນ ສຕ຺ຖາຣານໍ ນ ສທ຺ທຫນ຺ຕີຕິ? ສທ຺ທຫນ຺ຕິ. ສາ ປນ ສທ຺ຘາ ນາມ ນ ໂຫຕິ, ວຈນສມ຺ປຏິຈ຺ຉນມຕ຺ຕເມເວຕໍ. ອຕ຺ຖໂຕ ອນຸປປຣິກ຺ຂາ ວາ ໂຫຕິ, ທິຏ຺ຐິ ວາ. ອສຕິຍຈິຕ຺ເຕ ປນ ສຕິ ນຕ຺ຖີຕິ ນ ຄຫິຕາ. ກິໍ ທິຏ຺ຐິຄຕິກາ ອຕ຺ຕນາ ກຕກມ຺ມໍ ນ ສຣນ຺ຕີຕິ? ສຣນ຺ຕິ. ສາ ປນ ສຕິ ນາມ ນ ໂຫຕິ. ເກວລໍ ເຕນາກາເຣນ ອກຸສລຈິຕ຺ຕປ຺ປວຕ຺ຕິ. ຕສ຺ມາ ສຕິ ນ ຄຫິຕາ. ອຖ ກສ຺ມາ ‘‘ມິຈ຺ຉາສຕີ’’ຕິ (ທີ. ນິ. ໓.໓໓໓; ສໍ. ນິ. ໕.໑) ສຸຕ຺ຕນ຺ເຕ ວຸຕ຺ຕາ? ສາ ປນ ອກຸສລກ຺ຂນ຺ຘານໍ ສຕິວິຣຫິຕຕ຺ຕາ ສຕິປຏິປກ຺ຂຕ຺ຕາ ຈ ມິຈ຺ຉາມຄ຺ຄມິຈ຺ຉຕ຺ຕານໍ ປູຣຓຕ຺ຖໍ ຕຕ຺ຖ ປຣິຍາເຍນ ເທສນາ ກຕາ. ນິປ຺ປຣິຍາເຍນ ປເນສາ ນຕ຺ຖິ. ຕສ຺ມາ ນ ຄຫິຕາ. ອນ຺ຘພາລຈິຕ຺ເຕ ປນ ປຎ຺ຎາ ນຕ຺ຖີຕິ ນ ຄຫິຕາ. ກິໍ ທິຏ຺ຐິຄຕິການໍ ວຎ຺ຈນາປຎ຺ຎາ ນຕ຺ຖີຕິ? ອຕ຺ຖິ. ນ ປເນສາ ປຎ຺ຎາ, ມາຍາ ນາເມສາ ໂຫຕິ. ສາ ອຕ຺ຖໂຕ ຕຓ຺ຫາວ. ອິທໍ ປນ ຈິຕ຺ຕໍ ສທຣຖໍ ຄຣຸກໍ ຠາຣິຍໍ ກກ຺ຂຬໍ ຖທ຺ຘໍ ອກມ຺ມຎ຺ຎໍ ຄິລານໍ ວງ຺ກໍ ກຸຏິລໍ. ຕສ຺ມາ ປສ຺ສທ຺ຘາທີນິ ຉ ຍຸຄຬການິ ນ ຄຫິຕານິ.

ເອຕ຺ຕາວຕາ ປທປຏິປາຏິຍາ ຈິຕ຺ຕງ຺ຄວເສນ ປາຬິອາຣຸຬ຺ຫານິ ທ຺ວຕ຺ຕິໍສ ປທານິ ທສ຺ເສຕ຺ວາ ອິທານິ ເຍວາປນກຘມ຺ເມ ທສ຺ເສຕຸໍ ເຍ ວາ ປນ ຕສ຺ມິໍ ສມເຍຕິອາທິມາຫ. ຕຕ຺ຖ ສພ຺ເພສຸປິ ອກຸສລຈິຕ຺ເຕສຸ ຉນ຺ໂທ ອຘິໂມກ຺ໂຂ ມນສິກາໂຣ ມາໂນ ອິສ຺ສາ ມຈ຺ຉຣິຍໍ ຖິນໍ ມິທ຺ຘໍ ອຸທ຺ຘຈ຺ຈໍ ກຸກ຺ກຸຈ຺ຈນ຺ຕິ ອິເມ ທເສວ ເຍວາປນກາ ໂຫນ຺ຕິ ຘມ຺ມາ, ສຸຕ຺ຕາຄຕາ, ສຸຕ຺ຕປເທສຸ ທິສ຺ສເຣຕິ ວຸຕ຺ຕາ. ອິມສ຺ມິໍ ປນ ຈິຕ຺ເຕ ຉນ຺ໂທ ອຘິໂມກ຺ໂຂ ມນສິກາໂຣ ອຸທ຺ຘຈ຺ຈນ຺ຕິ ອິເມ ອປຓ຺ຓກງ຺ຄສງ຺ຂາຕາ ຈຕ຺ຕາໂຣວ ເຍວາປນກາ ໂຫນ຺ຕິ.

ຕຕ຺ຖ ຉນ຺ທາທໂຍ ເຫຏ຺ຐາ ວຸຕ຺ຕນເຍເນວ ເວທິຕພ຺ພາ. ເກວລຎ຺ຫິ ເຕ ກຸສລາ, ອິເມ ອກຸສລາ. ອິຕຣໍ ປນ ອຸທ຺ຘຕສ຺ສ ຠາໂວ ‘ອຸທ຺ຘຈ຺ຈໍ’. ຕໍ ເຈຕໂສ ອວູປສມລກ຺ຂຓໍ ວາຕາຠິຆາຕຈລຊລໍ ວິຍ, ອນວຏ຺ຐານຣສໍ ວາຕາຠິຆາຕຈລຘຊປຏາກາ ວິຍ, ຠນ຺ຕຕ຺ຕປຈ຺ຈຸປຏ຺ຐານໍ ປາສາຓາຠິຆາຕສມຸທ຺ຘຕຠສ຺ມາ ວິຍ, ເຈຕໂສ ອວູປສເມ ອໂຍນິໂສມນສິກາຣປທຏ຺ຐານໍ. ຈິຕ຺ຕວິກ຺ເຂໂປຕິ ທຏ຺ຐພ຺ພໍ.

ອິຕິ ຜສ຺ສາທີນິ ທ຺ວຕ຺ຕິໍສ, ເຍວາປນກວເສນ ວຸຕ຺ຕານິ ຈຕ຺ຕາຣີຕິ ສພ຺ພານິປິ ອິມສ຺ມິໍ ຘມ຺ມຸທ຺ເທສວາເຣ ຉຕ຺ຕິໍສ ຘມ຺ມປທານິ ຠວນ຺ຕິ. ຈຕ຺ຕາຣິ ອປຓ຺ຓກງ຺ຄານິ ຫາເປຕ຺ວາ ປາຬິຍໍ ອາຄຕານິ ທ຺ວຕ຺ຕິໍສເມວ. ອຄ຺ຄຫິຕຄ຺ຄຫເຓນ ປເນຕ຺ຖ ຜສ຺ສປຎ຺ຈກໍ, ວິຕກ຺ໂກ ວິຈາໂຣ ປີຕິ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ຊີວິຕິນ຺ທ຺ຣິຍໍ ມິຈ຺ຉາທິຏ຺ຐິ ອຫິຣິກໍ ອໂນຕ຺ຕປ຺ປໍ ໂລໂຠ ໂມໂຫຕິ ໂສຬສ ຘມ຺ມາ ໂຫນ຺ຕິ.

ເຕສຸ ໂສຬສສຸ ສຕ຺ຕ ຘມ຺ມາ ອວິຠຕ຺ຕິກາ ນວ ສວິຠຕ຺ຕິກາ ໂຫນ຺ຕິ. ກຕເມ ສຕ຺ຕ? ຜສ຺ໂສ ສຎ຺ຎາ ເຈຕນາ ວິຈາໂຣ ປີຕິ ຊີວິຕິນ຺ທ຺ຣິຍໍ ໂມໂຫຕິ ອິເມ ສຕ຺ຕ ອວິຠຕ຺ຕິກາ. ເວທນາ ຈິຕ຺ຕໍ ວິຕກ຺ໂກ ຈິຕ຺ຕສ຺ເສກຄ຺ຄຕາ ວີຣິຍິນ຺ທ຺ຣິຍໍ ມິຈ຺ຉາທິຏ຺ຐິ ອຫິຣິກໍ ອໂນຕ຺ຕປ຺ປໍ ໂລໂຠຕິ ອິເມ ນວ ສວິຠຕ຺ຕິກາ.

ເຕສຸ ຉ ຘມ຺ມາ ທ຺ວີສຸ ຐາເນສຸ ວິຠຕ຺ຕາ, ເອໂກ ຕີສຸ, ເອໂກ ຈຕູສຸ, ເອໂກ ຉສຸ. ກຖໍ? ຈິຕ຺ຕໍ ວິຕກ຺ໂກ ມິຈ຺ຉາທິຏ຺ຐິ ອຫິຣິກໍ ອໂນຕ຺ຕປ຺ປໍ ໂລໂຠຕິ ອິເມ ຉ ທ຺ວີສຸ ຐາເນສຸ ວິຠຕ຺ຕາ. ເຕສຸ ຫິ ຈິຕ຺ຕໍ ຕາວ ຜສ຺ສປຎ຺ຈກໍ ປຕ຺ວາ ຈິຕ຺ຕໍ ໂຫຕີຕິ ວຸຕ຺ຕໍ, ອິນ຺ທ຺ຣິຍານິ ປຕ຺ວາ ມນິນ຺ທ຺ຣິຍນ຺ຕິ. ວິຕກ຺ໂກ ຌານງ຺ຄານິ ປຕ຺ວາ ວິຕກ຺ໂກ ໂຫຕີຕິ ວຸຕ຺ໂຕ, ມຄ຺ຄງ຺ຄານິ ປຕ຺ວາ ມິຈ຺ຉາສງ຺ກປ຺ໂປຕິ. ມິຈ຺ຉາທິຏ຺ຐິ ມຄ຺ຄງ຺ເຄສຸປິ ກມ຺ມປເຖສຸປິ ມິຈ຺ຉາທິຏ຺ຐິເຍວ. ອຫິຣິກໍ ພລານິ ປຕ຺ວາ ອຫິຣິກພລໍ ໂຫຕີຕິ ວຸຕ຺ຕໍ, ໂລກນາສກທຸກໍ ປຕ຺ວາ ອຫິຣິກນ຺ຕິ. ອໂນຕ຺ຕປ຺ເປປິ ເອເສວ ນໂຍ. ໂລໂຠ ມູລໍ ປຕ຺ວາ ໂລໂຠ ໂຫຕີຕິ ວຸຕ຺ໂຕ. ກມ຺ມປຖໍ ປຕ຺ວາ ອຠິຊ຺ຌາຕິ. ອິເມ ຉ ທ຺ວີສຸ ຐາເນສຸ ວິຠຕ຺ຕາ.

ເວທນາ ປນ ຜສ຺ສປຎ຺ຈກໍ ປຕ຺ວາ ເວທນາ ໂຫຕີຕິ ວຸຕ຺ຕາ, ຌານງ຺ຄານິ ປຕ຺ວາ ສຸຂນ຺ຕິ, ອິນ຺ທ຺ຣິຍານິ ປຕ຺ວາ ໂສມນສ຺ສິນ຺ທ຺ຣິຍນ຺ຕິ. ເອວໍ ເອໂກວ ຘມ຺ໂມ ຕີສຸ ຐາເນສຸ ວິຠຕ຺ໂຕ.

ວີຣິຍໍ ປນ ອິນ຺ທ຺ຣິຍານິ ປຕ຺ວາ ວີຣິຍິນ຺ທ຺ຣິຍໍ ໂຫຕີຕິ ວຸຕ຺ຕໍ, ມຄ຺ຄງ຺ຄານິ ປຕ຺ວາ ມິຈ຺ຉາວາຍາໂມ ໂຫຕີຕິ, ພລານິ ປຕ຺ວາ ວີຣິຍພລນ຺ຕິ, ປິຏ຺ຐິທຸກໍ ປຕ຺ວາ ປຄ຺ຄາໂຫ ໂຫຕີຕິ. ເອວໍ ອຍໍ ເອໂກ ຘມ຺ໂມ ຈຕູສຸ ຐາເນສຸ ວິຠຕ຺ໂຕ.

ສມາຘິ ປນ ຌານງ຺ຄານິ ປຕ຺ວາ ຈິຕ຺ຕສ຺ເສກຄ຺ຄຕາ ໂຫຕີຕິ ວຸຕ຺ໂຕ, ອິນ຺ທ຺ຣິຍານິ ປຕ຺ວາ ສມາຘິນ຺ທ຺ຣິຍນ຺ຕິ, ມຄ຺ຄງ຺ຄານິ ປຕ຺ວາ ມິຈ຺ຉາສມາຘີຕິ, ພລານິ ປຕ຺ວາ ສມາຘິພລນ຺ຕິ, ປິຏ຺ຐິທຸກໍ ປຕ຺ວາ ທຸຕິຍທຸເກ ເອກກວເສເນວ ສມໂຖຕິ, ຕຕິເຍ ອວິກ຺ເຂໂປຕິ. ເອວມຍໍ ເອໂກ ຘມ຺ໂມ ຉສຸ ຐາເນສຸ ວິຠຕ຺ໂຕ.

ສພ຺ເພປິ ປເນເຕ ຘມ຺ມາ ຜສ຺ສປຎ຺ຈກວເສນ ຌານງ຺ຄວເສນ ອິນ຺ທ຺ຣິຍວເສນ ມຄ຺ຄງ຺ຄວເສນ ພລວເສນ ມູລວເສນ ກມ຺ມປຖວເສນ ໂລກນາສກວເສນ ປິຏ຺ຐິທຸກວເສນາຕິ ນວ ຣາສໂຍ ໂຫນ຺ຕິ. ຕຕ຺ຖ ຍໍ ວຕ຺ຕພ຺ພໍ ຕໍ ປຐມກຸສລຈິຕ຺ຕນິທ຺ເທເສ ວຸຕ຺ຕເມວາຕິ.

ຘມ຺ມຸທ຺ເທສວາຣກຖາ ນິຏ຺ຐິຕາ.