ກິຣິຍາພ຺ຍາກຕວຓ຺ຓນາ

ມໂນຘາຕຸຈິຕ຺ຕໍ

໕໖໖. ອິທານິ ກິຣິຍາພ຺ຍາກຕໍ ຠາເຊຕ຺ວາ ທສ຺ເສຕຸໍ ປຸນ ກຕເມ ຘມ຺ມາ ອພ຺ຍາກຕາຕິອາທິ ອາຣທ຺ຘໍ. ຕຕ຺ຖ ກິຣິຍາຕິ ກຣຓມຕ຺ຕໍ. ສພ຺ເພສຸເຍວ ຫິ ກິຣິຍຈິຕ຺ເຕສຸ ຍໍ ຊວນຠາວໍ ອປ຺ປຕ຺ຕໍ ຕໍ ວາຕປຸປ຺ຜໍ ວິຍ. ຍໍ ຊວນຠາວປ຺ປຕ຺ຕໍ ຕໍ ຉິນ຺ນມູລກຣຸກ຺ຂປຸປ຺ຜໍ ວິຍ ອຜລໍ ໂຫຕິ, ຕໍຕໍ ກິຈ຺ຈສາຘນວເສນ ປວຕ຺ຕຕ຺ຕາ ປນ ກຣຓມຕ຺ຕເມວ ໂຫຕິ. ຕສ຺ມາ ກິຣິຍາຕິ ວຸຕ຺ຕໍ. ເນວກຸສລານາກຸສລາຕິອາທີສຸ ກຸສລມູລສງ຺ຂາຕສ຺ສ ກຸສລເຫຕຸໂນ ອຠາວາ ‘ເນວກຸສລາ’; ອກຸສລມູລສງ຺ຂາຕສ຺ສ ອກຸສລເຫຕຸໂນ ອຠາວາ ‘ເນວອກຸສລາ’; ໂຍນິໂສມນສິກາຣອໂຍນິໂສມນສິກາຣສງ຺ຂາຕານມ຺ປິ ກຸສລາກຸສລປຈ຺ຈຍານໍ ອຠາວາ ‘ເນວກຸສລານາກຸສລາ’. ກຸສລາກຸສລສງ຺ຂາຕສ຺ສ ຊນກເຫຕຸໂນ ອຠາວາ ເນວກມ຺ມວິປາກາ.

ອິຘາປິ ຈິຕ຺ຕສ຺ເສກຄ຺ຄຕານິທ຺ເທເສ ປວຕ຺ຕິຏ຺ຐິຕິມຕ຺ຕເມວ ລພ຺ຠຕິ. ທ຺ເວ ປຎ຺ຈວິຎ຺ຎາຓານິ, ຕິສ຺ໂສ ມໂນຘາຕຸໂຍ, ຕິສ຺ໂສ ມໂນວິຎ຺ຎາຓຘາຕຸໂຍ, ວິຈິກິຈ຺ຉາສຫຄຕນ຺ຕິ ອິເມສຸ ສຕ຺ຕຣສສຸ ຈິຕ຺ເຕສຸ ທຸພ຺ພລຕ຺ຕາ ສຓ຺ຐິຕິ ອວຏ຺ຐິຕິອາທີນິ ນ ລພ຺ຠນ຺ຕິ. ເສສໍ ສພ຺ພໍ ວິປາກມໂນຘາຕຸນິທ຺ເທເສ ວຸຕ຺ຕນເຍເນວ ເວທິຕພ຺ພໍ, ອຎ຺ຎຕ຺ຣ ອຸປ຺ປຕ຺ຕິຏ຺ຐານາ. ຕຎ຺ຫິ ຈິຕ຺ຕໍ ປຎ຺ຈວິຎ຺ຎາຓານນ຺ຕຣໍ ອຸປ຺ປຊ຺ຊຕິ. ອິທໍ ປນ ປຎ຺ຈທ຺ວາເຣ ວຬຎ຺ຊນກປ຺ປວຕ຺ຕິກາເລ ສພ຺ເພສໍ ປຸເຣ ອຸປ຺ປຊ຺ຊຕິ. ກຖໍ? ຈກ຺ຂຸທ຺ວາເຣ ຕາວ ອິຏ຺ຐອິຏ຺ຐມຊ຺ຌຕ຺ຕອນິຏ຺ຐອນິຏ຺ຐມຊ຺ຌຕ຺ເຕສຸ ຣູປາຣມ຺ມເຓສຸ ເຍນ ເກນຈິ ປສາເທ ຆຏ຺ຏິເຕ ຕໍ ອາຣມ຺ມຓໍ ຄເຫຕ຺ວາ ອາວຊ຺ຊນວເສນ ປຸເຣຈາຣິກໍ ຫຸຕ຺ວາ ຠວງ຺ຄໍ ອາວຏ຺ຏຍມານໍ ອຸປ຺ປຊ຺ຊຕິ. ໂສຕທ຺ວາຣາທີສຸປິ ເອເສວ ນໂຍຕິ.

ກິຣິຍມໂນຘາຕຸຈິຕ຺ຕໍ ນິຏ຺ຐິຕໍ.

ກິຣິຍມໂນວິຎ຺ຎາຓຘາຕຸຈິຕ຺ຕານິ

໕໖໘. ມໂນວິຎ຺ຎາຓຘາຕຸ ອຸປ຺ປນ຺ນາ ໂຫຕິ…ເປ… ໂສມນສ຺ສສຫຄຕາຕິ, ອິທໍ ຈິຕ຺ຕໍ ອຎ຺ເຎສໍ ອສາຘາຣຓໍ. ຂີຓາສວສ຺ເສວ ປາຏິປຸຄ຺ຄລິກໍ. ຉສຸ ທ຺ວາເຣສຸ ລພ຺ຠຕິ. ຈກ຺ຂຸທ຺ວາເຣ ຫິ ປຘານສາຣຸປ຺ປໍ ຐານໍ ທິສ຺ວາ ຂີຓາສໂວ ອິມິນາ ຈິຕ຺ເຕນ ໂສມນສ຺ສິໂຕ ໂຫຕິ. ໂສຕທ຺ວາເຣ ຠຓ຺ຑຠາຊນີຍຏ຺ຐານໍ ປຕ຺ວາ ມຫາສທ຺ທໍ ກຕ຺ວາ ລຸທ຺ຘລຸທ຺ເຘສຸ ຄຓ຺ຫນ຺ເຕສຸ ‘ເອວຣູປາ ນາມ ເມ ໂລລຸປ຺ປຕຓ຺ຫາ ປຫີນາ’ຕິ ອິມິນາ ຈິຕ຺ເຕນ ໂສມນສ຺ສິໂຕ ໂຫຕິ. ຆານທ຺ວາເຣ ຄນ຺ເຘຫິ ວາ ປຸປ຺ເຜຫິ ວາ ເຈຕິຍໍ ປູເຊນ຺ໂຕ ອິມິນາ ຈິຕ຺ເຕນ ໂສມນສ຺ສິໂຕ ໂຫຕິ. ຊິວ຺ຫາທ຺ວາເຣ ຣສສມ຺ປນ຺ນໍ ປິຓ຺ຑປາຕໍ ລທ຺ຘາ ຠາເຊຕ຺ວາ ປຣິຠຸຎ຺ຊນ຺ໂຕ ‘ສາຣຓີຍຘມ຺ໂມ ວຕ ເມ ປູຣິໂຕ’ຕິ ອິມິນາ ຈິຕ຺ເຕນ ໂສມນສ຺ສິໂຕ ໂຫຕິ. ກາຍທ຺ວາເຣ ອຠິສມາຈາຣິກວຕ຺ຕໍ ກໂຣນ຺ໂຕ ‘ກາຍທ຺ວາເຣ ເມ ວຕ຺ຕໍ ປູຣິຕ’ນ຺ຕິ ອິມິນາ ຈິຕ຺ເຕນ ໂສມນສ຺ສິໂຕ ໂຫຕິ. ເອວໍ ຕາວ ປຎ຺ຈທ຺ວາເຣ ລພ຺ຠຕິ.

ມໂນທ຺ວາເຣ ປນ ອຕີຕານາຄຕມາຣພ຺ຠ ອຸປ຺ປຊ຺ຊຕິ. ໂຊຕິປາລມາຓວ(ມ. ນິ. ໒.໒໘໒ ອາທໂຍ) ມຄ຺ຆເທວຣາຊ(ມ. ນິ. ໒.໓໐໘ ອາທໂຍ) ກຓ຺ຫຕາປສາທິກາລສ຺ມິຎ຺ຫິ (ຊາ. ໑.໑໐.໑໑ ອາທໂຍ) ກຕໍ ກາຣຓໍ ອາວຊ຺ເຊຕ຺ວາ ຕຖາຄໂຕ ສິຕໍ ປາຕ຺ວາກາສິ. ຕໍ ປນ ປຸພ຺ເພນິວາສຎາຓສພ຺ພຎ຺ຎຸຕຎ຺ຎາຓານໍ ກິຈ຺ຈໍ. ເຕສໍ ປນ ທ຺ວິນ຺ນໍ ຎາຓານໍ ຈິຓ຺ຓປຣິຍນ຺ເຕ ອິທໍ ຈິຕ຺ຕໍ ຫາສຍມານໍ ອຸປ຺ປຊ຺ຊຕິ. ອນາຄເຕ ‘ຕນ຺ຕິສ຺ສໂຣ ມຸທິງ຺ຄສ຺ສໂຣ ປຈ຺ເຈກພຸທ຺ໂຘ ຠວິສ຺ສຕີ’ຕິ ສິຕໍ ປາຕ຺ວາກາສິ. ຕມ຺ປິ ອນາຄຕໍສຎາຓສພ຺ພຎ຺ຎຸຕຎ຺ຎາຓານໍ ກິຈ຺ຈໍ. ເຕສໍ ປນ ທ຺ວິນ຺ນ ຎາຓານໍ ຈິຓ຺ຓປຣິຍນ຺ເຕ ອິທໍ ຈິຕ຺ຕໍ ຫາສຍມານໍ ອຸປ຺ປຊ຺ຊຕິ.

ນິທ຺ເທສວາເຣ ປນສ຺ສ ເສສອເຫຕຸກຈິຕ຺ເຕຫິ ພລວຕຣຕາຍ ຈິຕ຺ເຕກຄ຺ຄຕາ ສມາຘິພລໍ ປາເປຕ຺ວາ ຐປິຕາ. ວີຣິຍມ຺ປິ ວີຣິຍພລໍ ປາເປຕ຺ວາ. ອຸທ຺ເທສວາເຣ ປນ ‘ສມາຘິພລໍ ໂຫຕິ ວີຣິຍພລໍ ໂຫຕີ’ຕິ ອນາຄຕຕ຺ຕາ ປຣິປຸຓ຺ເຓນ ພລຏ຺ເຐເນຕໍ ທ຺ວຍໍ ພລໍ ນາມ ນ ໂຫຕິ. ຍສ຺ມາ ປນ ‘ເນວ ກຸສລໍ ນາກຸສລໍ’ ຕສ຺ມາ ພລນ຺ຕິ ວຕ຺ວານ ຐປິຕໍ. ຍສ຺ມາ ຈ ນ ນິປ຺ປຣິຍາເຍນ ພລໍ, ຕສ຺ມາ ສງ຺ຄຫວາເຣປິ ‘ທ຺ເວ ພລານິ ໂຫນ຺ຕີ’ຕິ ນ ວຸຕ຺ຕໍ. ເສສໍ ສພ຺ພໍ ໂສມນສ຺ສສຫຄຕາເຫຕຸກມໂນວິຎ຺ຎາຓຘາຕຸນິທ຺ເທເສ ວຸຕ຺ຕນເຍເນວ ເວທິຕພ຺ພໍ.

໕໗໔. ອຸເປກ຺ຂາສຫຄຕາຕິ ອິທໍ ຈິຕ຺ຕໍ ຕີສຸ ຠເວສຸ ສພ຺ເພສໍ ສຈິຕ຺ຕກສຕ຺ຕານໍ ສາຘາຣຓໍ, ນ ກສ຺ສຈິ ສຈິຕ຺ຕກສ຺ສ ນຸປ຺ປຊ຺ຊຕິ ນາມ. ອຸປ຺ປຊ຺ຊມານໍ ປນ ປຎ຺ຈທ຺ວາເຣ ໂວຏ຺ຐພ຺ພນໍ ໂຫຕິ, ມໂນທ຺ວາເຣ ອາວຊ຺ຊນໍ. ຉ ອສາຘາຣຓຎາຓານິປິ ອິມິນາ ຄຫິຕາຣມ຺ມຓເມວ ຄຓ຺ຫນ຺ຕິ. ມຫາຄຊໍ ນາເມຕໍ ຈິຕ຺ຕໍ; ອິມສ຺ສ ອນາຣມ຺ມຓໍ ນາມ ນຕ຺ຖິ. ‘ອສພ຺ພຎ຺ຎຸຕຎ຺ຎາຓໍ ສພ຺ພຎ຺ຎຸຕຎ຺ຎາຓຄຕິກໍ ນາມ ກຕມ’ນ຺ຕິ ວຸຕ຺ເຕ ‘ອິທ’ນ຺ຕິ ວຕ຺ຕພ຺ພໍ. ເສສເມຕ຺ຖ ປຸຣິມຈິຕ຺ເຕ ວຸຕ຺ຕນເຍເນວ ເວທິຕພ຺ພໍ. ເກວລຎ຺ຫິ ຕຕ຺ຖ ສປ຺ປີຕິກຕ຺ຕາ ນວງ຺ຄິໂກ ສງ຺ຂາຣກ຺ຂນ຺ໂຘ ວິຠຕ຺ໂຕ. ອິຘ ນິປ຺ປີຕິກຕ຺ຕາ ອຏ຺ຐງ຺ຄິໂກ.

ອິທານິ ຍານິ ກຸສລໂຕ ອຏ຺ຐ ມຫາຈິຕ຺ຕາເນວ ຂີຓາສວສ຺ສ ອຸປ຺ປຊ຺ຊນຕາຍ ກິຣິຍານິ ຊາຕານິ, ຕສ຺ມາ ຕານິ ກຸສລນິທ຺ເທເສ ວຸຕ຺ຕນເຍເນວ ເວທິຕພ຺ພານິ.

ອິຘ ຐຕ຺ວາ ຫສນກຈິຕ຺ຕານິ ສໂມຘາເນຕພ຺ພານິ. ກຕິ ປເນຕານິ ໂຫນ຺ຕີຕິ? ວຸຈ຺ຈເຕ ເຕຣສ. ປຸຖຸຊ຺ຊນາ ຫິ ກຸສລໂຕ ຈຕູຫິ ໂສມນສ຺ສສຫຄເຕຫິ, ອກຸສລໂຕ ຈຕູຫີຕິ, ອຏ຺ຐຫິ ຈິຕ຺ເຕຫິ ຫສນ຺ຕິ. ເສກ຺ຂາ ກຸສລໂຕ ຈຕູຫິ ໂສມນສ຺ສສຫຄເຕຫິ, ອກຸສລໂຕ ທ຺ວີຫິ ທິຏ຺ຐິຄຕວິປ຺ປຍຸຕ຺ເຕຫິ ໂສມນສ຺ສສຫຄເຕຫີຕິ, ຉຫິ ຈິຕ຺ເຕຫິ ຫສນ຺ຕິ. ຂີຓາສວາ ກິຣິຍໂຕ ປຎ຺ຈຫິ ໂສມນສ຺ສສຫຄເຕຫິ ຫສນ຺ຕີຕິ.

ຣູປາວຈຣາຣູປາວຈຣກິຣິຍໍ

໕໗໗. ຣູປາວຈຣາຣູປາວຈຣກິຣິຍນິທ຺ເທເສສຸ ທິຏ຺ຐຘມ຺ມສຸຂວິຫາຣນ຺ຕິ ທິຏ຺ຐຘມ຺ເມ, ອິມສ຺ມິໍເຍວ ອຕ຺ຕຠາເວ, ສຸຂວິຫາຣມຕ຺ຕໍ. ຕຕ຺ຖ ຂີຓາສວສ຺ສ ປຸຖຸຊ຺ຊນກາເລ ນິພ຺ພຕ຺ຕິຕາ ສມາປຕ຺ຕິ ຍາວ ນ ນໍ ສມາປຊ຺ຊຕິ ຕາວ ກຸສລາວ ສມາປນ຺ນກາເລ ກິຣິຍາ ໂຫຕິ. ຂີຓາສວກາເລ ປນສ຺ສ ນິພ຺ພຕ຺ຕິຕາ ສມາປຕ຺ຕິ ກິຣິຍາວ ໂຫຕິ. ເສສໍ ສພ຺ພໍ ຕໍສທິສຕ຺ຕາ ກຸສລນິທ຺ເທເສ ວຸຕ຺ຕນເຍເນວ ເວທິຕພ຺ພນ຺ຕິ.

ອຏ຺ຐສາລິນິຍາ ຘມ຺ມສງ຺ຄຫອຏ຺ຐກຖາຍ

ຈິຕ຺ຕຸປ຺ປາທກຓ຺ຑກຖາ ນິຏ຺ຐິຕາ.

ອພ຺ຍາກຕປທໍ ປນ ເນວ ຕາວ ນິຏ຺ຐິຕນ຺ຕິ.

ຈິຕ຺ຕຸປ຺ປາທກຓ຺ຑວຓ຺ຓນາ ນິຏ຺ຐິຕາ.