ທຸກມາຕິກາປທວຓ຺ຓນາ

໑-໖. ທຸກມາຕິກາຍໍ ປນ ຕິເກສຸ ອນາຄຕປທວຓ຺ຓນໍເຍວ ກຣິສ຺ສາມ. ເຫຕຸໂຄຈ຺ຉເກ ຕາວ ເຫຕຸຘມ຺ມາຕິ ມູລຏ຺ເຐນ ເຫຕຸສງ຺ຂາຕາ ຘມ຺ມາ. ເຫຕູ ຘມ຺ມາຕິປິ ປາໂຐ. ນ ເຫຕູຕິ ເຕສໍເຍວ ປຏິກ຺ເຂປວຈນໍ. ສມ຺ປໂຍຄໂຕ ປວຕ຺ເຕນ ສຫ ເຫຕຸນາຕິ ສເຫຕຸກາ. ຕເຖວ ປວຕ຺ໂຕ ນຕ຺ຖິ ເອເຕສໍ ເຫຕູຕິ ອເຫຕຸກາ. ເອກຸປ຺ປາທາທິຕາຍ ເຫຕຸນາ ສມ຺ປຍຸຕ຺ຕາຕິ ເຫຕຸສມ຺ປຍຸຕ຺ຕາ. ເຫຕຸນາ ວິປ຺ປຍຸຕ຺ຕາຕິ ເຫຕຸວິປ຺ປຍຸຕ຺ຕາ. ອິເມສໍ ທ຺ວິນ຺ນມ຺ປິ ທຸການໍ ກິຎ຺ຈາປິ ອຕ຺ຖໂຕ ນານຕ຺ຕໍ ນຕ຺ຖິ, ເທສນາວິລາເສນ ປນ ຕຖາ ພຸຊ຺ຌນ຺ຕານໍ ວາ ປຸຄ຺ຄລານໍ ອຊ຺ຌາສຍວເສນ ວຸຕ຺ຕາ. ຕໂຕ ປຣໍ ປຐມທຸກໍ ທຸຕິຍຕຕິເຍຫິ ສທ຺ຘິໍ ໂຍເຊຕ຺ວາ ເຕສໍ ‘ເຫຕູ ນ ເຫຕູ’ຕິອາທີນໍ ປທານໍ ວເສນ ຍຖາສມ຺ຠວໂຕ ອປເຣປິ ຕໂຍ ທຸກາ ວຸຕ຺ຕາ. ຕຕ຺ຖ ຍເຖວ ‘ເຫຕູ ເຈວ ຘມ຺ມາ ສເຫຕຸກາ ຈາ’ຕິ ເອຕໍ ສມ຺ຠວຕິ, ຕຖາ ‘ເຫຕູ ເຈວ ຘມ຺ມາ ອເຫຕຸກາ ຈາ’ຕິ ອິທມ຺ປິ. ຍຖາ ຈ ‘ສເຫຕຸກາ ເຈວ ຘມ຺ມາ ນ ຈ ເຫຕູ’ຕິ ເອຕໍ ສມ຺ຠວຕິ, ຕຖາ ‘ອເຫຕຸກາ ເຈວ ຘມ຺ມາ ນ ຈ ເຫຕູ’ຕິ ອິທມ຺ປິ. ເຫຕຸສມ຺ປຍຸຕ຺ຕທຸເກນ ສທ຺ຘິໍ ໂຍຊນາຍປິ ເອເສວ ນໂຍ.

ຕຕ຺ຣ ຍເທຕໍ ‘ນ ເຫຕູ ຘມ຺ມາ ສເຫຕຸກາປິ ອເຫຕຸກາປີ’ຕິ ສິທ຺ເຘ, ‘ນ ເຫຕູ ໂຂ ປນ ຘມ຺ມາ’ຕິ ອຕິຣິຕ຺ຕໍ ‘ໂຂ ປນາ’ຕິ ປທໍ ວຸຕ຺ຕໍ, ຕສ຺ສ ວເສນ ອຍໍ ອຕິເຣກຕ຺ໂຖ ສງ຺ຄຫິໂຕຕິ ເວທິຕພ຺ໂພ. ກຖໍ? ນ ເກວລໍ ‘ນ ເຫຕຸ ຘມ຺ມາ ອຖ ໂຂ ອຎ຺ເຎປິ ນ ຈ ສເຫຕຸກາປິ ອເຫຕຸກາປິ ອິຈ຺ເຈວ, ອຖ ໂຂ ອຎ຺ຎຖາປີຕິ. ອິທໍ ວຸຕ຺ຕໍ ໂຫຕິ – ຍເຖວ ຫິ ‘ນ ເຫຕູ ຘມ຺ມາ ສເຫຕຸກາປິ ອເຫຕຸກາປິ’, ເອວໍ ‘ເຫຕູ ຘມ຺ມາ ສເຫຕຸກາປິ ອເຫຕຸກາປິ’. ຍຖາ ຈ ‘ນ ເຫຕູ ຘມ຺ມາ ສເຫຕຸກາປິ ອເຫຕຸກາປິ’, ເອວໍ ‘ນ ເຫຕູ ຘມ຺ມາ ເຫຕຸສມ຺ປຍຸຕ຺ຕາປິ ເຫຕຸວິປ຺ປຍຸຕ຺ຕາປີ’ຕິ.

໗-໑໓. ຈູຬນ຺ຕຣທຸເກສຸ ອຕ຺ຕໂນ ນິປ຺ຜາທເກນ ສຫ ປຈ຺ຈເຍນາຕິ ສປ຺ປຈ຺ຈຍາ. ນຕ຺ຖິ ເອເຕສໍ ອຸປ຺ປາເທ ວາ ຐິຕິຍໍ ວາ ປຈ຺ຈໂຍຕິ ອປ຺ປຈ຺ຈຍາ. ປຈ຺ຈເຍຫິ ສມາຄນ຺ຕ຺ວາ ກຕາຕິ ສງ຺ຂຕາ. ນ ສງ຺ຂຕາຕິ ອສງ຺ຂຕາ. ອວິນິພ຺ໂຠຄວເສນ ຣູປໍ ເອເຕສໍ ອຕ຺ຖີຕິ ຣູປິໂນ. ຕຖາວິຘໍ ນຕ຺ຖິ ເອເຕສໍ ຣູປນ຺ຕິ ອຣູປິໂນ. ຣຸປ຺ປນລກ຺ຂຓໍ ວາ ຣູປໍ; ຕໍ ເອເຕສໍ ອຕ຺ຖີຕິ ຣູປິໂນ. ນ ຣູປິໂນ ອຣູປິໂນ. ໂລກິຍາ ຘມ຺ມາຕິ ໂລໂກ ວຸຈ຺ຈຕິ ລຸຊ຺ຊນປລຸຊ຺ຊນຏ຺ເຐນ ວຏ຺ຏໍ; ຕສ຺ມິໍ ປຣິຍາປນ຺ນຠາເວນ ໂລເກ ນິຍຸຕ຺ຕາຕິ ໂລກິຍາ. ຕໂຕ ອຸຕ຺ຕິຓ຺ຓາຕິ ອຸຕ຺ຕຣາ; ໂລເກ ອປຣິຍາປນ຺ນຠາເວນ ໂລກໂຕ ອຸຕ຺ຕຣາຕິ ໂລກຸຕ຺ຕຣາ. ເກນຈິ ວິຎ຺ເຎຍ຺ຍາຕິ ຈກ຺ຂຸວິຎ຺ຎາຓາທີສຸ ເກນຈິ ເອເກນ ຈກ຺ຂຸວິຎ຺ຎາເຓນ ວາ ໂສຕວິຎ຺ຎາເຓນ ວາ ວິຊານິຕພ຺ພາ. ເກນຈິ ນ ວິຎ຺ເຎຍ຺ຍາຕິ ເຕເນວ ຈກ຺ຂຸວິຎ຺ຎາເຓນ ວາ ໂສຕວິຎ຺ຎາເຓນ ວາ ນ ວິຊານິຕພ຺ພາ. ເອວໍ ສນ຺ເຕ ທ຺ວິນ຺ນມ຺ປິ ປທານໍ ອຕ຺ຖນານຕ຺ຕໂຕ ທຸໂກ ໂຫຕິ.

໑໔-໑໙. ອາສວໂຄຈ຺ຉເກ ອາສວນ຺ຕີຕິ ອາສວາ. ຈກ຺ຂຸໂຕປິ…ເປ… ມນໂຕປິ ສນ຺ທນ຺ຕິ ປວຕ຺ຕນ຺ຕີຕິ ວຸຕ຺ຕໍ ໂຫຕິ. ຘມ຺ມໂຕ ຍາວ ໂຄຕ຺ຣຠຸໍ, ໂອກາສໂຕ ຍາວ ຠວຄ຺ຄໍ ສວນ຺ຕີຕິ ວາ ອາສວາ. ເອເຕ ຘມ຺ເມ ເອຕຎ຺ຈ ໂອກາສໍ ອນ຺ໂຕກຣິຕ຺ວາ ປວຕ຺ຕນ຺ຕີຕິ ອຕ຺ໂຖ. ອນ຺ໂຕກຣຓຕ຺ໂຖ ຫິ ອຍໍ ‘ອາ’ກາໂຣ. ຈິຣປາຣິວາສິຍຏ຺ເຐນ ມທິຣາທໂຍ ອາສວາ. ອາສວາ ວິຍາຕິປິ ອາສວາ. ໂລກສ຺ມິຎ຺ຫິ ຈິຣປາຣິວາສິກາ ມທິຣາທໂຍ ອາສວາຕິ ວຸຈ຺ຈນ຺ຕິ. ຍທິ ຈ ຈິຣປາຣິວາສິຍຏ຺ເຐນ ອາສວາ, ເອເຕເຍວ ຠວິຕຸມຣຫນ຺ຕິ. ວຸຕ຺ຕຎ຺ເຫຕໍ – ‘‘ປຸຣິມາ, ຠິກ຺ຂເວ, ໂກຏິ ນ ປຎ຺ຎາຍຕິ ອວິຊ຺ຊາຍ, ອິໂຕ ປຸພ຺ເພ ອວິຊ຺ຊາ ນາໂຫສີ’’ຕິອາທິ (ອ. ນິ. ໑໐.໖໑). ອາຍຕໍ ວາ ສໍສາຣທຸກ຺ຂໍ ສວນ຺ຕິ ປສວນ຺ຕີຕິປິ ອາສວາ. ຕໂຕ ອຎ຺ເຎ ໂນ ອາສວາ ນາມ. ອຕ຺ຕານໍ ອາຣມ຺ມຓໍ ກຕ຺ວາ ປວຕ຺ເຕຫິ ສຫ ອາສເວຫີຕິ ສາສວາ. ເອວໍ ປວຕ຺ຕມານາ ນຕ຺ຖິ ເອເຕສໍ ອາສວາຕິ ອນາສວາ. ເສສໍ ເຫຕຸໂຄຈ຺ຉເກ ວຸຕ຺ຕນເຍນ ເວທິຕພ຺ພໍ. ອຍໍ ປນ ວິເສໂສ – ຍຖາ ຕຕ຺ຖ ‘ນ ເຫຕູ ໂຂ ປນ ຘມ຺ມາ ສເຫຕຸກາປິ ອເຫຕຸກາປີຕິ ອຍໍ ໂອສານທຸໂກ ປຐມທຸກສ຺ສ ທຸຕິຍປທໍ ອາທິມ຺ຫິ ຐເປຕ຺ວາ ວຸຕ຺ໂຕ, ເອວໍ ອິຘ ‘ໂນ ອາສວາ ໂຂ ປນ ຘມ຺ມາ ສາສວາປິ ອນາສວາປີ’ຕິ ນ ວຸຕ຺ໂຕ. ກິຎ຺ຈາປິ ນ ວຸຕ຺ໂຕ, ອຖ ໂຂ ອຍຎ຺ຈ ອຎ຺ໂຎ ຈ ເຠໂທ ຕຕ຺ຖ ວຸຕ຺ຕນເຍເນວ ເວທິຕພ຺ໂພ.

໒໐-໒໕. ສໍໂຍຊນໂຄຈ຺ຉເກ ຍສ຺ສ ສໍວິຊ຺ຊນ຺ຕິ, ຕໍ ປຸຄ຺ຄລໍ ວຏ຺ຏສ຺ມິໍ ສໍໂຍເຊນ຺ຕິ ພນ຺ຘນ຺ຕີຕິ ສໍໂຍຊນາ. ຕໂຕ ອຎ຺ເຎ ໂນ ສໍໂຍຊນາ ນາມ. ອາຣມ຺ມຓຠາວໍ ອຸປຄນ຺ຕ຺ວາ ສໍໂຍຊນສມ຺ພນ຺ຘເນ ສໍໂຍຊນານໍ ຫິຕາຕິ ສໍໂຍຊນິຍາ. ສໍໂຍຊນສ຺ສ ອາຣມ຺ມຓປຈ຺ຈຍຠູຕານໍ ເອຕໍ ອຘິວຈນໍ. ນ ສໍໂຍຊນິຍາ ອສໍໂຍຊນິຍາ. ເສສໍ ເຫຕຸໂຄຈ຺ຉເກ ວຸຕ຺ຕນເຍເນວ ໂຍເຊຕພ຺ພໍ.

໒໖-໓໑. ຄນ຺ຖໂຄຈ຺ຉເກ ຍສ຺ສ ສໍວິຊ຺ຊນ຺ຕິ ຕໍ ຈຸຕິປຏິສນ຺ຘິວເສນ ວຏ຺ຏສ຺ມິໍ ຄນ຺ເຖນ຺ຕິ ຆເຏນ຺ຕີຕິ ຄນ຺ຖາ. ຕໂຕ ອຎ຺ເຎ ໂນ ຄນ຺ຖາ. ອາຣມ຺ມຓກຣຓວເສນ ຄນ຺ເຖຫິ ຄນ຺ຖິຕພ຺ພາຕິ ຄນ຺ຖນິຍາ. ເສສໍ ເຫຕຸໂຄຈ຺ຉເກ ວຸຕ຺ຕນເຍເນວ ໂຍເຊຕພ຺ພໍ. ຍຖາ ຈ ອິຘ, ເອວໍ ອິໂຕ ປເຣສຸປິ ວຸຕ຺ຕາວເສສໍ ຕຕ຺ຖ ຕຕ຺ຖ ວຸຕ຺ຕນເຍເນວ ເວທິຕພ຺ພໍ.

໓໒-໓໗. ໂອຆໂຄຈ຺ຉເກ ຍສ຺ສ ສໍວິຊ຺ຊນ຺ຕິ ຕໍ ວຏ຺ຏສ຺ມິໍເຍວ ໂອຫນນ຺ຕິ ໂອສີທາເປນ຺ຕີຕິ ໂອຆາ. ອາຣມ຺ມຓໍ ກຕ຺ວາ ອຕິກ຺ກມນີຍໂຕ ໂອເຆຫິ ອຕິກ຺ກມິຕພ຺ພາຕິ ໂອຆນິຍາ. ໂອຆານໍ ອາຣມ຺ມຓຘມ຺ມາ ເອວ ເວທິຕພ຺ພາ.

໓໘-໔໓. ໂຍຄໂຄຈ຺ຉເກ ວຏ຺ຏສ຺ມິໍ ໂຍເຊນ຺ຕີຕິ ໂຍຄາ. ໂຍຄນິຍາ ໂອຆນິຍາ ວິຍ ເວທິຕພ຺ພາ.

໔໔-໔໙. ນີວຣຓໂຄຈ຺ຉເກ ຈິຕ຺ຕໍ ນີວຣນ຺ຕິ ປຣິໂຍນນ຺ຘນ຺ຕີຕິ ນີວຣຓາ. ນີວຣຓິຍາ ສໍໂຍຊນິຍາ ວິຍ ເວທິຕພ຺ພາ.

໕໐-໕໔. ປຣາມາສໂຄຈ຺ຉເກ ຘມ຺ມານໍ ຍຖາຠູຕໍ ອນິຈ຺ຈາທິອາກາຣໍ ອຕິກ຺ກມິຕ຺ວາ ‘ນິຈ຺ຈ’ນ຺ຕິ ອາທິວເສນ ປວຕ຺ຕມານາ ປຣໂຕ ອາມສນ຺ຕີຕິ ປຣາມາສາ. ປຣາມາເສຫິ ອາຣມ຺ມຓກຣຓວເສນ ປຣາມຏ຺ຐຕ຺ຕາ ປຣາມຏ຺ຐາ.

໕໕-໖໘. ມຫນ຺ຕຣທຸເກສຸ ອາຣມ຺ມຓໍ ອຄ຺ຄເຫຕ຺ວາ ອປ຺ປວຕ຺ຕິໂຕ ສຫ ອາຣມ຺ມເຓນາຕິ ສາຣມ຺ມຓາ. ນຕ຺ຖິ ເອເຕສໍ ອາຣມ຺ມຓນ຺ຕິ ອນາຣມ຺ມຓາ. ຈິນ຺ຕນຏ຺ເຐນ ຈິຕ຺ຕາ, ວິຈິຕ຺ຕຏ຺ເຐນ ວາ ຈິຕ຺ຕາ. ອວິປ຺ປໂຍຄວເສນ ເຈຕສິ ນິຍຸຕ຺ຕາຕິ ເຈຕສິກາ. ນິຣນ຺ຕຣຠາວູປຄມນຕາຍ, ອຸປ຺ປາທໂຕ ຍາວ ຠງ຺ຄາ, ຈິຕ຺ເຕນ ສໍສຏ຺ຐາຕິ ຈິຕ຺ຕສໍສຏ຺ຐາ. ເອກໂຕ ວຕ຺ຕມານາປິ ນິຣນ຺ຕຣຠາວໍ ອນຸປຄມນຕາຍ ຈິຕ຺ເຕນ ວິສໍສຏ຺ຐາຕິ ຈິຕ຺ຕວິສໍສຏ຺ຐາ. ສມຸຏ຺ຐຫນ຺ຕິ ເອເຕນາຕິ ສມຸຏ຺ຐານໍ. ຈິຕ຺ຕໍ ສມຸຏ຺ຐານໍ ເອເຕສນ຺ຕິ ຈິຕ຺ຕສມຸຏ຺ຐານາ. ສຫ ຠວນ຺ຕີຕິ ສຫຠຸໂນ. ຈິຕ຺ເຕນ ສຫຠຸໂນ ຈິຕ຺ຕສຫຠຸໂນ. ອນຸປຣິວຕ຺ຕນ຺ຕີຕິ ອນຸປຣິວຕ຺ຕິໂນ. ກິໍ ອນຸປຣິວຕ຺ຕນ຺ຕິ? ຈິຕ຺ຕໍ. ຈິຕ຺ຕສ຺ສ ອນຸປຣິວຕ຺ຕິໂນ ຈິຕ຺ຕານຸປຣິວຕ຺ຕິໂນ. ຈິຕ຺ຕສໍສຏ຺ຐາ ຈ ເຕ ຈິຕ຺ຕສມຸຏ຺ຐານາ ຈາຕິ ຈິຕ຺ຕສໍສຏ຺ຐສມຸຏ຺ຐານາ. ຈິຕ຺ຕສໍສຏ຺ຐາ ຈ ເຕ ຈິຕ຺ຕສມຸຏ຺ຐານາ ຈ ຈິຕ຺ຕສຫຠຸໂນ ເອວ ຈາຕິ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ຈິຕ຺ຕສໍສຏ຺ຐາ ຈ ເຕ ຈິຕ຺ຕສມຸຏ຺ຐານາ ຈ ຈິຕ຺ຕານຸປຣິວຕ຺ຕິໂນ ເອວ ຈາຕິ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ເສສານິ ສພ຺ພປທານິ ວຸຕ຺ຕປທານໍ ປຏິກ຺ເຂປວເສນ ເວທິຕພ຺ພານິ. ອຊ຺ຌຕ຺ຕຊ຺ຌຕ຺ຕໍ ສນ຺ຘາຍ ອຊ຺ຌຕ຺ຕຕ຺ຕິເກ ວຸຕ຺ຕວເສນ ອຊ຺ຌຕ຺ຕາວ ອຊ຺ຌຕ຺ຕິກາ. ຕໂຕ ພຫິຠູຕາຕິ ພາຫິຣາ. ອຸປາທິຍນ຺ເຕວ ຠູຕານິ, ນ ຠູຕານິ ວິຍ ອຸປາທິຍນ຺ຕີຕິ ອຸປາທາ. ນ ອຸປາທິຍນ຺ເຕວາຕິ ໂນອຸປາທາ.

໖໙-໗໔. ອຸປາທານໂຄຈ຺ຉເກ ຠຸສໍ ອາທິຍນ຺ຕີຕິ ອຸປາທານາ; ທຬ຺ຫຄ຺ຄາຫໍ ຄຓ຺ຫນ຺ຕີຕິ ອຕ຺ໂຖ. ຕໂຕ ອຎ຺ເຎ ໂນອຸປາທານາ.

໗໕-໘໒. ກິເລສໂຄຈ຺ຉເກ ສໍກິລິຏ຺ຐຕ຺ຕິເກ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ.

໘໓-໑໐໐. ປິຏ຺ຐິທຸເກສຸ ກາເມ ອວຈຣນ຺ຕີຕິ ກາມາວຈຣາ ຣູເປ ອວຈຣນ຺ຕີຕິ ຣູປາວຈຣາ. ອຣູເປ ອວຈຣນ຺ຕີຕິ ອຣູປາວຈຣາ. ອຍເມຕ຺ຖ ສງ຺ເຂໂປ. ວິຕ຺ຖາໂຣ ປນ ປຣໂຕ ອາວິ ຠວິສ຺ສຕິ. ເຕຠູມກວຏ຺ເຏ ປຣິຍາປນ຺ນາ ອນ຺ໂຕຄຘາຕິ ປຣິຍາປນ຺ນາ. ຕສ຺ມິໍ ນ ປຣິຍາປນ຺ນາຕິ ອປຣິຍາປນ຺ນາ. ວຏ຺ຏມູລໍ ຉິນ຺ທນ຺ຕາ ນິພ຺ພານໍ ອາຣມ຺ມຓໍ ກຕ຺ວາ ວຏ຺ຏໂຕ ນິຍ຺ຍນ຺ຕີຕິ ນິຍ຺ຍານິກາ. ອິມິນາ ລກ຺ຂເຓນ ນ ນິຍ຺ຍນ຺ຕີຕິ ອນິຍ຺ຍານິກາ. ຈຸຕິຍາ ວາ ອຕ຺ຕໂນ ວາ ປວຕ຺ຕິຍາ ອນນ຺ຕຣໍ ຜລທາເນ ນິຍຕຕ຺ຕາ ນິຍຕາ. ຕຖາ ອນິຍຕຕ຺ຕາ ອນິຍຕາ. ອຎ຺ເຎ ຘມ຺ເມ ອຸຕ຺ຕຣນ຺ຕິ ປຊຫນ຺ຕີຕິ ອຸຕ຺ຕຣາ. ອຕ຺ຕານໍ ອຸຕ຺ຕຣິຕຸໍ ສມຕ຺ເຖຫິ ສຫ ອຸຕ຺ຕເຣຫີຕິ ສອຸຕ຺ຕຣາ. ນຕ຺ຖິ ເອເຕສໍ ອຸຕ຺ຕຣາຕິ ອນຸຕ຺ຕຣາ. ຣຓນ຺ຕິ ເອເຕຫີຕິ ຣຓາ; ເຍຫິ ອຠິຠູຕາ ສຕ຺ຕາ ນານປ຺ປກາເຣນ ກນ຺ທນ຺ຕິ ປຣິເທວນ຺ຕິ, ເຕສໍ ຣາຄາທີນໍ ເອຕໍ ອຘິວຈນໍ. ສມ຺ປໂຍຄວເສນ ປຫາເນກຏ຺ຐຕາວເສນ ຈ ສຫ ຣເຓຫີຕິ ສຣຓາ. ເຕນາກາເຣນ ນຕ຺ຖິ ເອເຕສໍ ຣຓາຕິ ອຣຓາ.

ສຸຕ຺ຕນ຺ຕິກທຸກມາຕິກາປທວຓ຺ຓນາ

໑໐໑-໑໐໘. ສຸຕ຺ຕນ຺ຕິກທຸເກສຸ ສມ຺ປໂຍຄວເສນ ວິຊ຺ຊໍ ຠຊນ຺ຕີຕິ ວິຊ຺ຊາຠາຄິໂນ; ວິຊ຺ຊາຠາເຄ ວິຊ຺ຊາໂກຏ຺ຐາເສ ວຕ຺ຕນ຺ຕີຕິປິ ວິຊ຺ຊາຠາຄິໂນ. ຕຕ຺ຖ ວິປສ຺ສນາຎາຓໍ, ມໂນມຍິທ຺ຘິ, ຉ ອຠິຎ຺ຎາຕິ ອຏ຺ຐ ວິຊ຺ຊາ. ປຸຣິເມນ ອຕ຺ເຖນ ຕາຫິ ສມ຺ປຍຸຕ຺ຕຘມ຺ມາປິ ວິຊ຺ຊາຠາຄິໂນ. ປຈ຺ຉິເມນ ອຕ຺ເຖນ ຕາສຸ ຍາ ກາຈິ ເອກາ ວິຊ຺ຊາ ວິຊ຺ຊາ. ເສສາ ວິຊ຺ຊາຠາຄິໂນຕິ. ເອວໍ ວິຊ຺ຊາປິ ວິຊ຺ຊາຍ ສມ຺ປຍຸຕ຺ຕຘມ຺ມາປິ ວິຊ຺ຊາຠາຄິໂນຕ຺ເວວ ເວທິຕພ຺ພາ. ອິຘ ປນ ສມ຺ປຍຸຕ຺ຕຘມ຺ມາວ ອຘິປ຺ເປຕາ. ສມ຺ປໂຍຄວເສເນວ ອວິຊ຺ຊໍ ຠຊນ຺ຕີຕິ ອວິຊ຺ຊາຠາຄິໂນ. ອວິຊ຺ຊາຠາເຄ ອວິຊ຺ຊາໂກຏ຺ຐາເສ ວຕ຺ຕນ຺ຕີຕິປິ ອວິຊ຺ຊາຠາຄິໂນ. ຕຕ຺ຖ ທຸກ຺ຂປຏິຈ຺ຉາທກໍ ຕໂມ ສມຸທຍາທິປຏິຈ຺ຉາທກນ຺ຕິ ຈຕສ຺ໂສ ອວິຊ຺ຊາ. ປຸຣິມນເຍເນວ ຕາຫິ ສມ຺ປຍຸຕ຺ຕຘມ຺ມາປິ ອວິຊ຺ຊາຠາຄິໂນ. ຕາສຸ ຍາ ກາຈິ ເອກາ ອວິຊ຺ຊາ ອວິຊ຺ຊາ. ເສສາ ອວິຊ຺ຊາຠາຄິໂນຕິ. ເອວໍ ອວິຊ຺ຊາປິ ອວິຊ຺ຊາຍ ສມ຺ປຍຸຕ຺ຕຘມ຺ມາປິ ອວິຊ຺ຊາຠາຄິໂນຕ຺ເວວ ເວທິຕພ຺ພາ. ອິຘ ປນ ສມ຺ປຍຸຕ຺ຕຘມ຺ມາວ ອຘິປ຺ເປຕາ.

ປຸນ ອນຊ຺ໂຌຕ຺ຖຣຓຠາເວນ ກິເລສນ຺ຘກາຣໍ ວິທ຺ຘໍເສຕຸໍ ອສມຕ຺ຖຕາຍ ວິຊ຺ຊຸ ອຸປມາ ເອເຕສນ຺ຕິ ວິຊ຺ຊູປມາ. ນິສ຺ເສສໍ ວິທ຺ຘໍສນສມຕ຺ຖຕາຍ ວຊິຣໍ ອຸປມາ ເອເຕສນ຺ຕິ ວຊິຣູປມາ. ພາເລສຸ ຐິຕຕ຺ຕາ ຍຕ຺ຖ ຐິຕາ ຕທຸປຈາເຣນ ພາລາ. ປຓ຺ຑິເຕສຸ ຐິຕຕ຺ຕາ ປຓ຺ຑິຕາ. ພາລກຣຕ຺ຕາ ວາ ພາລາ, ປຓ຺ຑິຕກຣຕ຺ຕາ ປຓ຺ຑິຕາ. ກຓ຺ຫາຕິ ກາຬກາ, ຈິຕ຺ຕສ຺ສ ອປຠສ຺ສຣຠາວກຣຓາ. ສຸກ຺ກາຕິ ໂອທາຕາ, ຈິຕ຺ຕສ຺ສ ປຠສ຺ສຣຠາວກຣຓາ. ກຓ຺ຫາຠິຊາຕິເຫຕຸໂຕ ວາ ກຓ຺ຫາ; ສຸກ຺ກາຠິຊາຕິເຫຕຸໂຕ ສຸກ຺ກາ. ອິຘ ເຈວ ສມ຺ປຣາເຍ ຈ ຕເປນ຺ຕີຕິ ຕປນີຍາ. ນ ຕປນີຍາ ອຕປນີຍາ.

ອຘິວຈນທຸກາທໂຍ ຕໂຍ ອຕ຺ຖໂຕ ນິນ຺ນານາກຣຓາ; ພ຺ຍຎ຺ຊນເມເວຕ຺ຖ ນານໍ. ສິຣິວຑ຺ຒໂກ ຘນວຑ຺ຒໂກຕິ ອາທໂຍ ຫິ ວຈນມຕ຺ຕເມວ ອຘິກາຣໍ ກຕ຺ວາ ປວຕ຺ຕາ ອຘິວຈນາ ນາມ. ອຘິວຈນານໍ ປຖາ ອຘິວຈນປຖາ. ‘‘ອຠິສງ຺ຂໂຣນ຺ຕີຕິ ໂຂ, ຠິກ຺ຂເວ, ຕສ຺ມາ ສງ຺ຂາຣາ’’ຕິ (ສໍ. ນິ. ໓.໗໙) ເອວໍ ນິທ຺ຘາເຣຕ຺ວາ ສເຫຕຸກໍ ກຕ຺ວາ ວຸຈ຺ຈມານາ ອຠິລາປາ ນິຣຸຕ຺ຕິ ນາມ. ນິຣຸຕ຺ຕີນໍ ປຖາ ນິຣຸຕ຺ຕິປຖາ. ຕກ຺ໂກ ວິຕກ຺ໂກ ສງ຺ກປ຺ໂປຕິ (ຘ. ສ. ໗) ເອວໍ ເຕນ ເຕນ ປກາເຣນ ຎາປນໂຕ ປຎ຺ຎຕ຺ຕິ ນາມ. ປຎ຺ຎຕ຺ຕີນໍ ປຖາ ປຎ຺ຎຕ຺ຕິປຖາ. ເອຕ຺ຖ ຈ ເອກໍ ທຸກໍ ວຕ຺ວາປິ ອິຕເຣສໍ ວຈເນ ປໂຍຊນໍ ເຫຕຸໂຄຈ຺ຉເກ ວຸຕ຺ຕນເຍເນວ ເວທິຕພ຺ພໍ.

໑໐໙-໑໑໘. ນາມຣູປທຸເກ ນາມກຣຓຏ຺ເຐນ ນມນຏ຺ເຐນ ນາມນຏ຺ເຐນ ຈ ນາມໍ. ຣຸປ຺ປນຏ຺ເຐນ ຣູປໍ. ອຍເມຕ຺ຖ ສງ຺ເຂໂປ. ວິຕ຺ຖາໂຣ ປນ ນິກ຺ເຂປກຓ຺ເຑ ອາວິ ຠວິສ຺ສຕິ. ອວິຊ຺ຊາຕິ ທຸກ຺ຂາທີສຸ ອຎ຺ຎາຓໍ. ຠວຕຓ຺ຫາຕິ ຠວປຕ຺ຖນາ. ຠວທິຏ຺ຐີຕິ ຠໂວ ວຸຈ຺ຈຕິ ສສ຺ສຕໍ; ສສ຺ສຕວເສນ ອຸປ຺ປຊ຺ຊນທິຏ຺ຐິ. ວິຠວທິຏ຺ຐີຕິ ວິຠໂວ ວຸຈ຺ຈຕິ ອຸຈ຺ເຉທໍ; ອຸຈ຺ເຉທວເສນ ອຸປ຺ປຊ຺ຊນທິຏ຺ຐິ. ສສ຺ສໂຕ ອຕ຺ຕາ ຈ ໂລໂກ ຈາຕິ ປວຕ຺ຕາ ທິຏ຺ຐິ ສສ຺ສຕທິຏ຺ຐິ. ອຸຈ຺ຉິຊ຺ຊິສ຺ສຕີຕິ ປວຕ຺ຕາ ທິຏ຺ຐິ ອຸຈ຺ເຉທທິຏ຺ຐິ. ອນ຺ຕວາຕິ ປວຕ຺ຕາ ທິຏ຺ຐິ ອນ຺ຕວາທິຏ຺ຐິ. ອນນ຺ຕວາຕິ ປວຕ຺ຕາ ທິຏ຺ຐິ ອນນ຺ຕວາທິຏ຺ຐິ. ປຸພ຺ພນ຺ຕໍ ອນຸຄຕາ ທິຏ຺ຐິ ປຸພ຺ພນ຺ຕານຸທິຏ຺ຐິ. ອປຣນ຺ຕໍ ອນຸຄຕາ ທິຏ຺ຐິ ອປຣນ຺ຕານຸທິຏ຺ຐິ. ອຫິຣິກນ຺ຕິ ຍໍ ນ ຫິຣິຍຕິ ຫິຣິຍິຕພ຺ເພນາຕິ (ຘ. ສ. ໓໘໗) ເອວໍ ວິຕ຺ຖາຣິຕາ ນິລ຺ລຊ຺ຊຕາ. ອໂນຕ຺ຕປ຺ປນ຺ຕິ ຍໍ ນ ໂອຕ຺ຕປ຺ປຕິ ໂອຕ຺ຕປ຺ປິຕພ຺ເພນາຕິ ເອວໍ ວິຕ຺ຖາຣິໂຕ ອຠາຍນກອາກາໂຣ. ຫິຣິຍນາ ຫິຣີ, ໂອຕ຺ຕປ຺ປນາ ໂອຕ຺ຕປ຺ປໍ. ໂທວຈສ຺ສຕາທີສຸ ທຸກ຺ຂໍ ວໂຈ ເອຕສ຺ມິໍ ວິປ຺ປຏິກູລຄາຫິມ຺ຫິ ວິປຈ຺ຈນີກສາເຕ ອນາທເຣ ປຸຄ຺ຄເລຕິ ທຸພ຺ພໂຈ. ຕສ຺ສ ກມ຺ມໍ ໂທວຈສ຺ສໍ. ຕສ຺ສ ຠາໂວ ໂທວຈສ຺ສຕາ. ປາປາ ອສ຺ສທ຺ຘາທໂຍ ປຸຄ຺ຄລາ ເອຕສ຺ສ ມິຕ຺ຕາຕິ ປາປມິຕ຺ໂຕ; ຕສ຺ສ ຠາໂວ ປາປມິຕ຺ຕຕາ. ໂສວຈສ຺ສຕາ ຈ ກລ຺ຍາຓມິຕ຺ຕຕາ ຈ ວຸຕ຺ຕປຏິປກ຺ຂນເຍນ ເວທິຕພ຺ພາ.

໑໑໙-໑໒໓. ‘ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕິໂຍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕິໂຍ’ຕິ (ຘ. ສ. ໑໓໓໖) ເອວໍ ວຸຕ຺ຕາສຸ ອາປຕ຺ຕີສຸ ກຸສລຠາໂວ ອາປຕ຺ຕິກຸສລຕາ. ຕາຫິ ອາປຕ຺ຕີຫິ ວຸຏ຺ຐາເນ ກຸສລຠາໂວ ອາປຕ຺ຕິວຸຏ຺ຐານກຸສລຕາ. ສມາປຕ຺ຕີສຸ ກຸສລຠາໂວ ສມາປຕ຺ຕິກຸສລຕາ. ສມາປຕ຺ຕີນໍ ອປ຺ປນາປຣິຈ຺ເຉທປຎ຺ຎາເຍຕໍ ອຘິວຈນໍ. ສມາປຕ຺ຕີຫິ ວຸຏ຺ຐາເນ ກຸສລຠາໂວ ສມາປຕ຺ຕິວຸຏ຺ຐານກຸສລຕາ. ອຏ຺ຐາຣສສຸ ຘາຕູສຸ ກຸສລຠາໂວ ຘາຕຸກຸສລຕາ. ຕາສໍເຍວ ຘາຕູນໍ ມນສິກາເຣ ກຸສລຠາໂວ ມນສິກາຣກຸສລຕາ. ຈກ຺ຂາຍຕນາທີສຸ ກຸສລຠາໂວ ອາຍຕນກຸສລຕາ. ທ຺ວາທສງ຺ເຄ ປຏິຈ຺ຈສມຸປ຺ປາເທ ກຸສລຠາໂວ ປຏິຈ຺ຈສມຸປ຺ປາທກຸສລຕາ. ຕສ຺ມິໍ ຕສ຺ມິໍ ຐາເນ ກຸສລຠາໂວ ຐານກຸສລຕາ. ຐານນ຺ຕິ ກາຣຓໍ ວຸຈ຺ຈຕິ. ຕສ຺ມິຎ຺ຫິ ຕທາຍຕ຺ຕວຸຕ຺ຕິຕາຍ ຜລໍ ຕິຏ຺ຐຕິ ນາມ, ຕສ຺ມາ ຐານນ຺ຕິ ວຸຕ຺ຕໍ. ອຏ຺ຐາເນ ກຸສລຠາໂວ ອຏ຺ຐານກຸສລຕາ.

໑໒໔-໑໓໔. ອຸຊຸຠາໂວ ອຊ຺ຊໂວ. ມຸທຸຠາໂວ ມທ຺ທໂວ. ອຘິວາສນສງ຺ຂາໂຕ ຂມນຠາໂວ ຂນ຺ຕິ. ສຸຣຕສ຺ສ ຠາໂວ ໂສຣຈ຺ຈໍ. ສມ຺ໂມທກມຸທຸຠາວສງ຺ຂາໂຕ ສຂິລຠາໂວ ສາຂລ຺ຍໍ. ຍຖາ ປເຣຫິ ສທ຺ຘິໍ ອຕ຺ຕໂນ ຉິທ຺ທໍ ນ ໂຫຕິ ເອວໍ ຘມ຺ມາມິເສຫິ ປຏິສນ຺ຖຣຓໍ ປຏິສນ຺ຖາໂຣ. ອິນ຺ທ຺ຣິຍສໍວຣເຠທສງ຺ຂາໂຕ ມນຈ຺ຉຏ຺ເຐສຸ ອິນ຺ທ຺ຣິເຍສຸ ອຄຸຕ຺ຕທ຺ວາຣຠາໂວ ອິນ຺ທ຺ຣິເຍສຸ ອຄຸຕ຺ຕທ຺ວາຣຕາ. ປຏິຄ຺ຄຫຓປຣິໂຠຄວເສນ ໂຠຊເນ ມຕ຺ຕໍ ອຊານນຠາໂວ ໂຠຊເນ ອມຕ຺ຕຎ຺ຎຸຕາ. ອນນ຺ຕຣທຸໂກ ວຸຕ຺ຕປຏິປກ຺ຂນເຍນ ເວທິຕພ຺ໂພ. ສຕິວິປ຺ປວາສສງ຺ຂາໂຕ ມຸຏ຺ຐສ຺ສຕິຠາໂວ ມຸຏ຺ຐສ຺ສຈ຺ຈໍ. ອສມ຺ປຊານຠາໂວ ອສມ຺ປຊຎ຺ຎໍ. ສຣຕີຕິ ສຕິ. ສມ຺ປຊານາຕີຕິ ສມ຺ປຊຎ຺ຎໍ. ອປ຺ປຏິສງ຺ຂາເນ ອກມ຺ປນຏ຺ເຐນ ປຏິສງ຺ຂານສງ຺ຂາຕໍ ພລໍ ປຏິສງ຺ຂານພລໍ. ວີຣິຍສີເສນ ສຕ຺ຕ ໂພຊ຺ຌງ຺ເຄ ຠາເວນ຺ຕສ຺ສ ອຸປ຺ປນ຺ນໍ ພລໍ ຠາວນາພລໍ. ປຈ຺ຈນີກຘມ຺ເມ ສເມຕີຕິ ສມໂຖ. ອນິຈ຺ຈາທິວເສນ ວິວິເຘນ ອາກາເຣນ ປສ຺ສຕີຕິ ວິປສ຺ສນາ. ສມໂຖວ ຕໍ ອາກາຣໍ ຄເຫຕ຺ວາ ປຸນ ປວຕ຺ເຕຕພ຺ພສ຺ສ ສມຖສ຺ສ ນິມິຕ຺ຕວເສນ ສມຖນິມິຕ຺ຕໍ. ປຄ຺ຄາຫນິມິຕ຺ເຕປິ ເອເສວ ນໂຍ. ສມ຺ປຍຸຕ຺ຕຘມ຺ເມ ປຄ຺ຄຓ຺ຫາຕີຕິ ປຄ຺ຄາໂຫ. ນ ວິກ຺ຂິປຕີຕິ ອວິກ຺ເຂໂປ.

໑໓໕-໑໔໒. ສີລວິນາສິກາ ອສໍວຣສງ຺ຂາຕາ ສີລສ຺ສ ວິປຕ຺ຕິ ສີລວິປຕ຺ຕິ. ສມ຺ມາທິຏ຺ຐິວິນາສິກາ ມິຈ຺ຉາທິຏ຺ຐິສງ຺ຂາຕາ ທິຏ຺ຐິຍາ ວິປຕ຺ຕິ ທິຏ຺ຐິວິປຕ຺ຕິ. ໂສຣຈ຺ຈເມວ ສີລສ຺ສ ສມ຺ປາທນໂຕ ສີລປຣິປູຣຓໂຕ ສີລສ຺ສ ສມ຺ປທາຕິ ສີລສມ຺ປທາ. ທິຏ຺ຐິປາຣິປູຣິຠູຕໍ ຎາຓໍ ທິຏ຺ຐິຍາ ສມ຺ປທາຕິ ທິຏ຺ຐິສມ຺ປທາ. ວິສຸທ຺ຘິຠາວໍ ສມ຺ປຕ຺ຕາ ສີລສງ຺ຂາຕາ ສີລສ຺ສ ວິສຸທ຺ຘິ, ສີລວິສຸທ຺ຘິ. ນິພ຺ພານສງ຺ຂາຕໍ ວິສຸທ຺ຘິໍ ປາເປຕຸໍ ສມຕ຺ຖາ, ທສ຺ສນສງ຺ຂາຕາ, ທິຏ຺ຐິຍາ ວິສຸທ຺ຘິ ທິຏ຺ຐິວິສຸທ຺ຘິ. ທິຏ຺ຐິວິສຸທ຺ຘິ ໂຂ ປນ ຍຖາທິຏ຺ຐິສ຺ສ ຈ ປຘານນ຺ຕິ ກມ຺ມສ຺ສກຕຎ຺ຎາຓາທິສງ຺ຂາຕາ ທິຏ຺ຐິວິສຸທ຺ຘິ ເຈວ ຍຖາທິຏ຺ຐິສ຺ສ ຈ ອນຸຣູປທິຏ຺ຐິສ຺ສ ກລ຺ຍາຓທິຏ຺ຐິສ຺ສ ຕໍສມ຺ປຍຸຕ຺ຕເມວ ປຘານໍ. ສໍເວໂຄຕິ ຊາຕິອາທີນິ ປຏິຈ຺ຈ ອຸປ຺ປນ຺ນຠຍສງ຺ຂາຕໍ ສໍວິຊ຺ຊນໍ. ສໍເວຊນິຍຏ຺ຐານນ຺ຕິ ສໍເວຄຊນກໍ ຊາຕິອາທິກາຣຓໍ. ສໍວິຄ຺ຄສ຺ສ ຈ ໂຍນິໂສປຘານນ຺ຕິ ເອວໍ ສໍເວຄຊາຕສ຺ສ ອຸປາຍປຘານໍ. ອສນ຺ຕຸຏ຺ຐິຕາ ຈ ກຸສເລສຸ ຘມ຺ເມສູຕິ ກຸສລຘມ຺ມປູຣເຓ ອສນ຺ຕຸຏ຺ຐິຠາໂວ. ອປ຺ປຏິວານິຕາ ຈ ປຘານສ຺ມິນ຺ຕິ ອຣຫຕ຺ຕໍ ອປຕ຺ວາ ປຘານສ຺ມິໍ ອນິວຕ຺ຕນຕາ ອໂນສກ຺ກນຕາ. ວິຊານນໂຕ ວິຊ຺ຊາ. ວິມຸຈ຺ຈນໂຕ ວິມຸຕ຺ຕິ. ຂເຍ ຎາຓນ຺ຕິ ກິເລສກ຺ຂຍກເຣ ອຣິຍມຄ຺ເຄ ຎາຓໍ. ອນຸປ຺ປາເທ ຎາຓນ຺ຕິ ປຏິສນ຺ຘິວເສນ ອນຸປ຺ປາທຠູເຕ ຕໍຕໍມຄ຺ຄວຊ຺ຌກິເລສານໍ ອນຸປ຺ປາທປຣິໂຍສາເນ ອຸປ຺ປນ຺ເນ ອຣິຍຜເລ ຎາຓໍ. ອຍໍ ມາຕິກາຍ ອນຸປຸພ຺ພປທວຓ຺ຓນາ.

ທຸກມາຕິກາປທວຓ຺ຓນາ ນິຏ຺ຐິຕາ.