໒. ປຸຣິສຄຕິສຸຕ຺ຕວຓ຺ຓນາ

໕໕. ທຸຕິເຍ ປຸຣິສຄຕິໂຍຕິ ປຸຣິສສ຺ສ ຎາຓຄຕິໂຍ. ອນຸປາທາປຣິນິພ຺ພານນ຺ຕິ ອປຈ຺ຈຍນິພ຺ພານໍ. ໂນ ຈສ຺ສາຕິ ອຕີເຕ ອຕ຺ຕຠາວນິພ຺ພຕ຺ຕກໍ ກມ຺ມໍ ໂນ ເຈ ອຠວິສ຺ສ. ໂນ ຈ ເມ ສິຍາຕິ ເອຕຣຫິ ເມ ອຍໍ ອຕ຺ຕຠາໂວ ນ ສິຍາ. ນ ຠວິສ຺ສຕີຕິ ເອຕຣຫິ ເມ ອນາຄຕຕ຺ຕຠາວນິພ຺ພຕ຺ຕກໍ ກມ຺ມໍ ນ ຠວິສ຺ສຕິ. ນ ຈ ເມ ຠວິສ຺ສຕີຕິ ອນາຄເຕ ເມ ອຕ຺ຕຠາໂວ ນ ຠວິສ຺ສຕິ. ຍທຕ຺ຖິ ຍໍ ຠູຕນ຺ຕິ ຍໍ ອຕ຺ຖິ ຍໍ ຠູຕໍ ປຈ຺ຈຸປ຺ປນ຺ນກ຺ຂນ຺ຘປຎ຺ຈກໍ. ຕໍ ປຊຫາມີຕິ ອຸເປກ຺ຂໍ ປຏິລຠຕີຕິ ຕໍ ຕຕ຺ຖ ຉນ຺ທຣາຄປ຺ປຫາເນນ ປຊຫາມີຕິ ວິປສ຺ສນຸເປກ຺ຂໍ ປຏິລຠຕິ. ຠເວ ນ ຣຊ຺ຊຕີຕິ ອຕີເຕ ຂນ຺ຘປຎ຺ຈເກ ຕຓ຺ຫາທິຏ຺ຐີຫິ ນ ຣຊ຺ຊຕິ. ສມ຺ຠເວ ນ ຣຊ຺ຊຕີຕິ ອນາຄເຕປິ ຕເຖວ ນ ຣຊ຺ຊຕິ. ອຕ຺ຖຸຕ຺ຕຣິ ປທໍ ສນ຺ຕນ຺ຕິ ອຸຕ຺ຕຣິ ສນ຺ຕໍ ນິພ຺ພານປທໍ ນາມ ອຕ຺ຖິ. ສມ຺ມປ຺ປຎ຺ຎາຍ ປສ຺ສຕີຕິ ຕໍ ສຫວິປສ຺ສນາຍ ມຄ຺ຄປຎ຺ຎາຍ ສມ຺ມາ ປສ຺ສຕິ. ນ ສພ຺ເພນ ສພ຺ພນ຺ຕິ ເອກຈ຺ຈານໍ ກິເລສານໍ ອປ຺ປຫີນຕ຺ຕາ ສຈ຺ຈປຏິຈ຺ຉາທກສ຺ສ ຕມສ຺ສ ສພ຺ພໂສ ອວິທ຺ຘໍສິຕຕ຺ຕາ ນ ສພ຺ພາກາເຣນ ສພ຺ພໍ. ຫຎ຺ຎມາເນຕິ ສຓ຺ຑາເສນ ຄເຫຕ຺ວາ ມຸຏ຺ຐິກາຍ ໂກຏ຺ຏິຍມາເນ. ອນ຺ຕຣາປຣິນິພ຺ພາຍີຕິ ອຸປປຕ຺ຕິສມນນ຺ຕຣໂຕ ປຏ຺ຐາຍ ອາຍຸໂນ ເວມຊ຺ຌໍ ອນຕິກ຺ກມິຕ຺ວາ ເອຕ຺ຖນ຺ຕເຣ ກິເລສປຣິນິພ຺ພາເນນ ປຣິນິພ຺ພຸໂຕ ໂຫຕິ. ອນຸປຫຈ຺ຈ ຕລນ຺ຕິ ອາກາສຕລໍ ອນຸປຫຈ຺ຈ ອນຕິກ຺ກມິຕ຺ວາ, ຠູມິໍ ອປ຺ປຕ຺ວາ ອາກາເສເຍວ ນິພ຺ພາເຍຍ຺ຍາຕິ ອິມາຫິ ຕີຫິ ອຸປມາຫິ ຕໂຍ ອນ຺ຕຣາປຣິນິພ຺ພາຍີ ທສ຺ສິຕາ.

ອຸປຫຈ຺ຈປຣິນິພ຺ພາຍີຕິ ອາຍຸເວມຊ຺ຌໍ ອຕິກ຺ກມິຕ຺ວາ ປຈ຺ຉິມໂກຏິໍ ອປ຺ປຕ຺ວາ ປຣິນິພ຺ພຸໂຕ ໂຫຕິ. ອຸປຫຈ຺ຈ ຕລນ຺ຕິ ຊລມານາ ຄນ຺ຕ຺ວາ ອາກາສຕລໍ ອຕິກ຺ກມິຕ຺ວາ ປຖວີຕລໍ ວາ ອຸປຫນິຕ຺ວາ ປຖວິຍໍ ປຕິຕມຕ຺ຕາວ ນິພ຺ພາເຍຍ຺ຍ. ອສງ຺ຂາເຣນ ອປ຺ປໂຍເຄນ ກິເລເສ ເຂເປຕ຺ວາ ປຣິນິພ຺ພາຍີຕິ ອສງ຺ຂາຣປຣິນິພ຺ພາຍີ. ສສງ຺ຂາເຣນ ສປ຺ປໂຍເຄນ ກິເລເສ ເຂເປຕ຺ວາ ປຣິນິພ຺ພາຍີຕິ ສສງ຺ຂາຣປຣິນິພ຺ພາຍີ. ຄຈ຺ຉນ຺ຕິ ນິຣາຣກ຺ຂໍ ອຣຎ຺ຎໍ. ທາຍນ຺ຕິ ສາຣກ຺ຂໍ ອຠຍຕ຺ຖາຍ ທິນ຺ນໍ ອຣຎ຺ຎໍ. ເສສເມຕ຺ຖ ອຸຕ຺ຕານຕ຺ຖເມວ. ອິມສ຺ມິໍ ສຸຕ຺ເຕ ອຣິຍປຸຄ຺ຄລາວ ກຖິຕາຕິ.