໓. ຕິສ຺ສພ຺ຣຫ຺ມາສຸຕ຺ຕວຓ຺ຓນາ

໕໖. ຕຕິເຍ ຠິກ຺ຂຸນິໂຍຕິ ມຫາປຊາປຕິຍາ ປຣິວາຣາ ປຎ຺ຈສຕາ ຠິກ຺ຂຸນິໂຍ. ວິມຸຕ຺ຕາຕິ ປຎ຺ຈຫິ ວິມຸຕ຺ຕີຫິ ວິມຸຕ຺ຕາ. ອນຸປາທິເສສາຕິ ອຸປາທານເສສໍ ອຏ຺ຐເປຕ຺ວາ ປຎ຺ຈຫິ ວິມຸຕ຺ຕີຫິ ອນວເສສາຫິປິ ວິມຸຕ຺ຕາ. ສອຸປາທິເສເສ ວາ ສອຸປາທິເສໂສຕິ ສອຸປາທານເສເສ ປຸຄ຺ຄເລ ‘‘ສອຸປາທານເສໂສ ອຍ’’ນ຺ຕິ. ອິຕຣສ຺ມິມ຺ປິ ເອເສວ ນໂຍ. ຕິສ຺ໂສຕິ ເຖຣສ຺ສ ສທ຺ຘິວິຫາຣິກພ຺ຣຫ຺ມາ. ອນຸໂລມິການີຕິ ປຏິປຕ຺ຕິຍາ ອນຸໂລມານິ ວິວິຕ຺ຕານິ ອນ຺ຕິມປຣິຍນ຺ຕິມານິ. ອິນ຺ທ຺ຣິຍານີຕິ ສທ຺ຘາທີນິ ວິປສ຺ສນິນ຺ທ຺ຣິຍານິ. ສມນ຺ນານຍມາໂນຕິ ສມນ຺ນາຫາເຣ ຐປຍມາໂນ. ນ ຫິ ປນ ເຕຕິ ອິທໍ ກສ຺ມາ ອາຣຠິ? ສຕ຺ຕມສ຺ສ ປຸຄ຺ຄລສ຺ສ ທສ຺ສນຕ຺ຖໍ. ສຕ຺ຕໂມ ຫິ ສທ຺ຘານຸສາຣິປຸຄ຺ຄໂລ ນ ທສ຺ສິໂຕ. ອຖ ຠຄວາ ພລວວິປສ຺ສກວເສນ ຕໍ ທສ຺ເສນ຺ໂຕ ເອວມາຫ. ຕຕ຺ຖ ສພ຺ພນິມິຕ຺ຕານນ຺ຕິ ສພ຺ເພສໍ ນິຈ຺ຈນິມິຕ຺ຕາທີນໍ. ອນິມິຕ຺ຕນ຺ຕິ ພລວວິປສ຺ສນາສມາຘິໍ.