໑໑. ໂກຘນສຸຕ຺ຕວຓ຺ຓນາ

໖໔. ເອກາທສເມ ສປຕ຺ຕກນ຺ຕາຕິ ສປຕ຺ຕານໍ ເວຣີນໍ ກນ຺ຕາ ປິຍາ ເຕຫິ ອິຈ຺ຉິຕປຕ຺ຖິຕາ. ສປຕ຺ຕກຣຓາຕິ ສປຕ຺ຕານໍ ເວຣີນໍ ອຕ຺ຖກຣຓາ. ໂກຘປເຣໂຕຕິ ໂກຘານຸຄໂຕ. ປຈຸຣຕ຺ຖຕາຍາຕິ ພຫຸອຕ຺ຖຕາຍ ພຫຸຫິຕຕາຍ. ອນຕ຺ຖມ຺ປີຕິ ອວຸທ຺ຘິມ຺ປິ. ອຕ຺ໂຖ ເມ ຄຫິໂຕຕິ ວຸຑ຺ຒິ ເມ ຄຫິຕາ.

ອໂຖ ອຕ຺ຖໍ ຄເຫຕ຺ວານາຕິ ອໂຖ ວຸທ຺ຘິໍ ຄເຫຕ຺ວາ. ອນຕ຺ຖໍ ອຘິປຊ຺ຊຕີຕິ ອນຕ຺ໂຖ ເມ ຄຫິໂຕຕິ ສລ຺ລກ຺ເຂຕິ. ວຘໍ ກຕ຺ວານາຕິ ປາຓາຕິປາຕກມ຺ມໍ ກຕ຺ວາ. ໂກຘສມ຺ມທສມ຺ມຕ຺ໂຕຕິ ໂກຘມເທນ ມຕ຺ໂຕ, ອາທິນ຺ນຄຫິຕປຣາມຏ຺ໂຐຕິ ອຕ຺ໂຖ. ອາຍສກ຺ຍນ຺ຕິ ອຍສຠາວໍ, ອຍໂສ ນິຍໂສ ໂຫຕີຕິ ອຕ຺ໂຖ. ອນ຺ຕຣໂຕ ຊາຕນ຺ຕິ ອພ຺ຠນ຺ຕເຣ ອຸປ຺ປນ຺ນໍ. ອຕ຺ຖໍ ນ ຊານາຕີຕິ ວຸທ຺ຘິອຕ຺ຖໍ ນ ຊານາຕິ. ຘມ຺ມໍ ນ ປສ຺ສຕີຕິ ສມຖວິປສ຺ສນາຘມ຺ມໍ ນ ປສ຺ສຕິ. ອນ຺ຘຕມນ຺ຕິ ອນ຺ຘຠາວກຣໍ ຕມໍ ພຫລຕມໍ. ສຫເຕຕິ ອຠິຠວຕິ.

ທຸມ຺ມງ຺ກຸຍນ຺ຕິ ທຸມ຺ມງ຺ກຸຠາວໍ ນິຕ຺ເຕຊຕໍ ທຸພ຺ພຓ຺ຓມຸຂຕໍ. ຍໂຕ ປຕາຍຕີຕິ ຍທາ ນິພ຺ພຕ຺ຕຕິ. ນ ວາໂຈ ໂຫຕິ ຄາຣໂວຕິ ວຈນສ຺ສປິ ຄຣຸຠາໂວ ນ ໂຫຕິ. ນ ທີປໍ ໂຫຕິ ກິຎ຺ຈນນ຺ຕິ ກາຈິ ປຕິຏ຺ຐາ ນາມ ນ ໂຫຕິ. ຕປນີຍານີຕິ ຕາປຊນການິ. ຘມ຺ເມຫີຕິ ສມຖວິປສ຺ສນາຘມ຺ເມຫິ. ອາຣກາຕິ ທູເຣ. ພ຺ຣາຫ຺ມຓນ຺ຕິ ຂີຓາສວພ຺ຣາຫ຺ມຓໍ. ຍາຍ ມາຕຸ ຠໂຕຕິ ຍາຍ ມາຕຣາ ຠໂຕ ໂປສິໂຕ. ປາຓທທິໍ ສນ຺ຕິນ຺ຕິ ຊີວິຕທາຍິກໍ ສມານໍ. ຫນ຺ຕິ ກຸທ຺ໂຘ ປຸຖຸຕ຺ຕານນ຺ຕິ ກຸທ຺ໂຘ ປຸຄ຺ຄໂລ ປຸຖຸ ນານາກາຣເຓຫິ ອຕ຺ຕານໍ ຫນ຺ຕິ. ນານາຣູເປສຸ ມຸຈ຺ຉິໂຕຕິ ນານາຣມ຺ມເຓສຸ ອຘິມຸຈ຺ຉິໂຕ ຫຸຕ຺ວາ. ຣຊ຺ຊຸຍາ ພຊ຺ຌ ມີຍນ຺ຕີຕິ ຣຊ຺ຊຸຍາ ພນ຺ຘິຕ຺ວາ ມຣນ຺ຕິ. ປພ຺ພຕາມປິ ກນ຺ທເຣຕິ ປພ຺ພຕກນ຺ທເຣປິ ປຕິຕ຺ວາ ມຣນ຺ຕິ.

ຠູນຫຈ຺ຈານີຕິ ຫຕວຸທ຺ຘີນິ. ອິຕາຍນ຺ຕິ ອິຕິ ອຍໍ. ຕໍ ທເມນ ສມຸຈ຺ຉິນ຺ເທຕິ ຕໍ ໂກຘໍ ທເມນ ຉິນ຺ເທຍ຺ຍ. ກຕເຣນ ທເມນາຕິ? ປຎ຺ຎາວີຣິເຍນ ທິຏ຺ຐິຍາຕິ ວິປສ຺ສນາປຎ຺ຎາຍ ເຈວ ວິປສ຺ສນາສມ຺ປຍຸຕ຺ເຕນ ກາຍິກເຈຕສິກວີຣິເຍນ ຈ ມຄ຺ຄສມ຺ມາທິຏ຺ຐິຍາ ຈ. ຕເຖວ ຘມ຺ເມ ສິກ຺ເຂຖາຕິ ຍຖາ ອກຸສລໍ ສມຸຈ຺ຉິນ຺ເທຍ຺ຍ, ສມຖວິປສ຺ສນາຘມ຺ເມປິ ຕເຖວ ສິກ຺ເຂຍ຺ຍ. ມາ ໂນ ທຸມ຺ມງ຺ກຸຍໍ ອຫູຕິ ມາ ອມ຺ຫາກໍ ທຸມ຺ມງ຺ກຸຠາໂວ ອໂຫສີຕິ ອິມມຕ຺ຖໍ ປຕ຺ຖຍມານາ. ອນາຍາສາຕິ ອນຸປາຍາສາ. ອນຸສ຺ສຸກາຕິ ກຕ຺ຖຈິ ອຸສ຺ສຸກ຺ກໍ ອນາປນ຺ນາ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອພ຺ຍາກຕວຄ຺ໂຄ ຉຏ຺ໂຐ.