໑໐. ຠຣິຍາສຸຕ຺ຕວຓ຺ຓນາ

໖໓. ທສເມ ເກວຏ຺ຏາ ມຎ຺ເຎ ມຈ຺ຉວິໂລເປຕິ ເກວຏ຺ຏານໍ ມຈ຺ຉປຈ຺ຉິໍ ໂອຕາເຣຕ຺ວາ ຐິຕຏ຺ຐາເນ ຊາເລ ວາ ອຸທກໂຕ ອຸກ຺ຂິຕ຺ຕມຕ຺ເຕ ມຈ຺ຉຄ຺ຄາຫການໍ ມຫາສທ຺ໂທ ໂຫຕິ, ຕໍ ສນ຺ຘາເຍຕໍ ວຸຕ຺ຕໍ. ສຸຊາຕາຕິ ວິສາຂາຍ ກນິຏ຺ຐາ. ສາ ເນວ ສສ຺ສຸໍ ອາທິຍຕີຕິ ສສ຺ສຸຍາ ກຕ຺ຕພ຺ພວຕ຺ຕໍ ນາມ ອຕ຺ຖິ, ຕໍ ນ ກໂຣຕິ, ສສ຺ສູຕິປິ ນໍ ນ ຄເຓຕິ. ນ ສສຸຣໍ ອາທິຍຕີຕິ ວຈນໍ ນ ຄຓ຺ຫາຕິ. ເອວໍ ອນາທຣຕາຍປິ ອຄ຺ຄຫເຓນປິ ນ ອາທິຍຕິ ນາມ. ເສເສສຸປິ ເອເສວ ນໂຍ. ເອວໍ ອນາຖປິຓ຺ຑິໂກ ສຸຓິສາຍ ອາຈາຣໍ ຄເຫຕ຺ວາ ສຕ຺ຖຸ ປຸຣໂຕ ນິສີທິ. ສາປິ ສຸຊາຕາ ‘‘ກິໍ ນຸ ໂຂ ອຍໍ ເສຏ຺ຐິ ທສພລສ຺ສ ສນ຺ຕິເກ ມຍ຺ຫໍ ຄຸຓໍ ກເຖສ຺ສຕິ ອຸທາຫຸ ອຄຸຓ’’ນ຺ຕິ ຄນ຺ຕ຺ວາ ອວິທູເຣ ສທ຺ທໍ ສຸຓນ຺ຕີ ອຏ຺ຐາສິ. ອຖ ນໍ ສຕ຺ຖາ ເອຫິ ສຸຊາເຕຕິ ອາມນ຺ເຕສິ.

ອຫິຕານຸກມ຺ປິນີຕິ ນ ຫິຕານຸກມ຺ປິນີ. ອຎ຺ເຎສູຕິ ປຣປຸຣິເສສຸ. ອຕິມຎ຺ຎເຕຕິ ໂອມານາຕິ ມານວເສນ ອຕິມຎ຺ຎຕິ. ຘເນນ ກີຕສ຺ສາຕິ ຘເນນ ກີຕາ ອສ຺ສ. ວຘາຍ ອຸສ຺ສຸກາ ວຘິຕຸໍ ອຸສ຺ສຸກ຺ກມາປນ຺ນາ. ຍໍ ອິຕ຺ຖິຍາ ວິນ຺ທຕິ ສາມິໂກ ຘນນ຺ຕິ ອິຕ຺ຖິຍາ ສາມິໂກ ຍໍ ຘນໍ ລຠຕິ. ອປ຺ປມ຺ປິ ຕສ຺ສ ອປຫາຕຸມິຈ຺ຉຕີຕິ ໂຖກໂຕປິ ອສ຺ສ ຫຣິຕຸໍ ອິຈ຺ຉຕິ, ອຸທ຺ຘເນ ອາໂຣປິຕອຸກ຺ຂລິຍໍ ປກ຺ຂິປິຕພ຺ພຕຓ຺ຑຸລໂຕປິ ໂຖກໍ ຫຣິຕຸເມວ ວາຍມຕິ. ອລສາຕິ ນິສິນ຺ນຏ຺ຐາເນ ນິສິນ຺ນາວ ຐິຕຏ຺ຐາເນ ຐິຕາວ ໂຫຕິ. ຜຣຸສາຕິ ຂຣາ. ທຸຣຸຕ຺ຕວາທິນີຕິ ທຸພ຺ຠາສິຕຠາສິນີ, ກກ຺ຂຬໍ ວາຬກຖເມວ ກເຖຕິ. ອຸຏ຺ຐາຍການໍ ອຠິຠຸຍ຺ຍ ວຕ຺ຕຕີຕິ ເອຕ຺ຖ ອຸຏ຺ຐາຍການນ຺ຕິ ພຫຸວຈນວເສນ ວິຣິຍຸຏ຺ຐານສມ຺ປນ຺ໂນ ສາມິໂກ ວຸຕ຺ໂຕ, ຕສ຺ສ ຕໍ ອຸຏ຺ຐານສມ຺ປຕ຺ຕິໍ ອຠິຠວິຕ຺ວາ ເຫຏ຺ຐາ ກຕ຺ວາ ວຕ຺ຕຕິ. ປໂມທຕີຕິ ອາໂມທິຕປໂມທິຕາ ໂຫຕິ. ໂກເລຍ຺ຍກາຕິ ກຸລສມ຺ປນ຺ນາ. ປຕິພ຺ພຕາຕິ ປຕິເທວຕາ. ວຘທຓ຺ຑຕຊ຺ຊິຕາຕິ ທຓ຺ຑກໍ ຄເຫຕ຺ວາ ວເຘນ ຕຊ຺ຊິຕາ, ‘‘ຆາເຕສ຺ສາມິ ນ’’ນ຺ຕິ ວຸຕ຺ຕາ. ທາສີສມນ຺ຕິ ສາມິກສ຺ສ ວຕ຺ຕປູຣິກາ ທາສີຕິ ມໍ ຠຄວາ ຘາເຣຕູຕິ ວຕ຺ວາ ສຣເຓສຸ ປຕິຏ຺ຐາສິ.