໗. ເມຖຸນສຸຕ຺ຕວຓ຺ຓນາ

໕໐. ສຕ຺ຕເມ ອຸປສງ຺ກມີຕິ ຠຸຕ຺ຕປາຕຣາໂສ ທາສກມ຺ມກຣປຣິວຸໂຕ ອຸປສງ຺ກມິ. ຠວມ຺ປິໂນຕິ ຠວມ຺ປິ ນຸ. ພ຺ຣຫ຺ມຈາຣີ ປຏິຊານາຕີຕິ ‘‘ອຫໍ ພ຺ຣຫ຺ມຈາຣີ’’ຕິ ເອວໍ ພ຺ຣຫ຺ມຈຣິຍວາສໍ ປຏິຊານາຕີຕິ ປຸຈ຺ຉຕິ. ເອວໍ ກິຣສ຺ສ ອໂຫສິ – ‘‘ພ຺ຣາຫ຺ມຓສມເຍ ເວທໍ ອຸຄ຺ຄຓ຺ຫນ຺ຕາ ອຏ຺ຐຈຕ຺ຕາລີສ ວສ຺ສານິ ພ຺ຣຫ຺ມຈຣິຍໍ ຈຣນ຺ຕິ. ສມໂຓ ປນ ໂຄຕໂມ ອຄາຣໍ ອຊ຺ຌາວສນ຺ໂຕ ຕີສຸ ປາສາເທສຸ ຕິວິຘນາຏກຣຕິຍາ ອຠິຣມິ, ອິທານິ ກິໍ ນຸ ໂຂ ວກ຺ຂຕີ’’ຕິ ອິມມຕ຺ຖໍ ສນ຺ຘາເຍວໍ ປຸຈ຺ຉຕິ. ຕໂຕ ຠຄວາ ມນ຺ເຕນ ກຓ຺ຫສປ຺ປໍ ຄຓ຺ຫນ຺ໂຕ ວິຍ ອມິຕ຺ຕໍ ຄີວາຍ ປາເທນ ອກ຺ກມນ຺ໂຕ ວິຍ ອຕ຺ຕໂນ ສໍກິເລສກາເລ ຉພ຺ພສ຺ສານິ ປຘານຈຣິຍາຍ ຣຊ຺ຊສຸຂໍ ວາ ປາສາເທສຸ ນາຏກສມ຺ປຕ຺ຕິໍ ວາ ອາຣພ຺ຠ ວິຕກ຺ກມຕ຺ຕສ຺ສາປິ ອນຸປ຺ປນ຺ນຠາວໍ ສນ຺ຘາຍ ສີຫນາທໍ ນທນ຺ໂຕ ຍຎ຺ຫິ ຕໍ ພ຺ຣາຫ຺ມຓາຕິອາທິມາຫ. ຕຕ຺ຖ ທ຺ວຍໍທ຺ວຍສມາປຕ຺ຕິນ຺ຕິ ທ຺ວີຫິ ທ຺ວີຫິ ສມາປຊ຺ຊິຕພ຺ພຠາວໍ. ທຸກ຺ຂສ຺ມາຕິ ສກລວຏ຺ຏທຸກ຺ຂໂຕ. ສຎ຺ຊຄ຺ຆຕີຕິ ຫສິຕກຖໍ ກເຖຕິ. ສໍກີຬຕີຕິ ເກຬິໍ ກໂຣຕິ. ສໍເກຬາຍຕີຕິ ມຫາຫສິຕໍ ຫສຕິ. ຈກ຺ຂຸນາ ຈກ຺ຂຸນ຺ຕິ ອຕ຺ຕໂນ ຈກ຺ຂຸນາ ຕສ຺ສາ ຈກ຺ຂຸໍ ປຏິວິຊ຺ຌິຕ຺ວາ ອຸປນິຊ຺ຌາຍຕິ. ຕິໂຣກຸຏ຺ຏໍ ວາ ຕິໂຣປາກາຣໍ ວາຕິ ປຣກຸຏ຺ເຏ ວາ ປຣປາກາເຣ ວາ. ເທໂວຕິ ເອໂກ ເທວຣາຊາ. ເທວຎ຺ຎຕໂຣຕິ ອຎ຺ຎຕໂຣ ເທວປຸຕ຺ໂຕ. ອນຸຕ຺ຕຣໍ ສມ຺ມາສມ຺ໂພຘິນ຺ຕິ ອຣຫຕ຺ຕຎ຺ເຈວ ສພ຺ພຎ຺ຎຸຕຎ຺ຎາຓຎ຺ຈ.