໔. ທຸຕິຍອຄ຺ຄິສຸຕ຺ຕວຓ຺ຓນາ

໔໗. ຈຕຸຕ຺ເຖ ອຸຄ຺ຄຕສຣີຣສ຺ສາຕິ ໂສ ກິຣ ພ຺ຣາຫ຺ມຓມຫາສາໂລ ອຕ຺ຕຠາເວນປິ ໂຠເຄຫິປິ ອຸຄ຺ຄໂຕ ສາຣປ຺ປຕ຺ໂຕ ອໂຫສິ, ຕສ຺ມາ ອຸຄ຺ຄຕສຣີໂຣຕ຺ເວວ ປຎ຺ຎາຍິຕ຺ຖ. ອຸປກ຺ຂໂຏຕິ ປຈ຺ຈຸປຏ຺ຐິໂຕ. ຖູຓູປນີຕານີຕິ ຍູປສງ຺ຂາຕໍ ຖູຓໍ ອຸປນີຕານິ. ຍຎ຺ຎຕ຺ຖາຍາຕິ ວຘິຕ຺ວາ ຍຊນຕ຺ຖາຍ. ອຸປສງ຺ກມີຕິ ໂສ ກິຣ ສພ຺ພໍ ຕໍ ຍຎ຺ຎສມ຺ຠາຣໍ ສຊ຺ເຊຕ຺ວາ ຈິນ຺ເຕສິ – ‘‘ສມໂຓ ກິຣ ໂຄຕໂມ ມຫາປຎ຺ໂຎ, ກິໍ ນຸ ໂຂ ເມ ຍຎ຺ຎສ຺ສ ວຓ຺ຓໍ ກເຖສ຺ສຕິ ອຸທາຫຸ ອວຓ຺ຓໍ, ປຸຈ຺ຉິຕ຺ວາ ຊານິສ຺ສາມີ’’ຕິ ອິມິນາ ກາຣເຓນ ເຍນ ຠຄວາ ເຕນຸປສງ຺ກມິ. ອຄ຺ຄິສ຺ສ ອາທານນ຺ຕິ ຍຎ຺ຎຍຊນຕ຺ຖາຍ ນວສ຺ສ ມງ຺ຄລຄ຺ຄິໂນ ອາທິຍນໍ. ສພ຺ເພນ ສພ຺ພນ຺ຕິ ສພ຺ເພນ ສຸເຕນ ສພ຺ພໍ ສຸຕໍ ສເມຕິ ສໍສນ຺ທຕິ, ເອກສທິສໍ ໂຫຕີຕິ ທສ຺ເສຕິ. ສຕ຺ຖານີຕິ ວິຫິໍສນຏ຺ເຐນ ສຕ຺ຖານິ ວິຍາຕິ ສຕ຺ຖານິ. ສຍໍ ປຐມໍ ສມາຣມ຺ຠຕີຕິ ອຕ຺ຕນາວ ປຐມຕຣໍ ອາຣຠຕິ. ຫນ຺ຕຸນ຺ຕິ ຫນິຕຸໍ.

ປຫາຕພ຺ພາຕິ ປຣິຫຣິຕພ຺ພາ. ອໂຕຫຍນ຺ຕິ ອໂຕ ຫິ ມາຕາປິຕິໂຕ ອຍໍ. ອາຫຸໂຕຕິ ອາຄໂຕ. ສມ຺ຠູໂຕຕິ ອຸປ຺ປນ຺ໂນ. ອຍໍ ວຸຈ຺ຈຕິ, ພ຺ຣາຫ຺ມຓ, ຄຫປຕຄ຺ຄີຕິ ອຍໍ ປຸຕ຺ຕທາຣາທິຄໂຓ ຍສ຺ມາ, ຄຫປຕິ, ວິຍ ເຄຫສາມິໂກ ວິຍ ຫຸຕ຺ວາ ອຄ຺ຄຕິ ວິຈຣຕິ, ຕສ຺ມາ ຄຫປຕຄ຺ຄີຕິ ວຸຈ຺ຈຕິ. ອຕ຺ຕານນ຺ຕິ ຈິຕ຺ຕໍ. ທເມນ຺ຕີຕິ ອິນ຺ທ຺ຣິຍທມເນນ ທເມນ຺ຕິ. ສເມນ຺ຕີຕິ ຣາຄາທິສມເນນ ສເມນ຺ຕິ. ເຕສຎ຺ເຎວ ປຣິນິພ຺ພາປເນນ ປຣິນິພ຺ພາເປນ຺ຕິ. ນິກ຺ຂິປິຕພ຺ໂພຕິ ຍຖາ ນ ວິນສ຺ສຕິ, ເອວໍ ຐເປຕພ຺ໂພ. ອຸປວາຍຕນ຺ຕິ ອຸປວາຍຕຸ. ເອວຎ຺ຈ ປນ ວຕ຺ວາ ພ຺ຣາຫ຺ມໂຓ ສພ຺ເພສມ຺ປິ ເຕສໍ ປາຓານໍ ຊີວິຕໍ ທຕ຺ວາ ຍຎ຺ຎສາລໍ ວິທ຺ຘໍເສຕ຺ວາ ສຕ຺ຖຸ ສາສເນ ໂອປານຠູໂຕ ອໂຫສີຕິ.