໔. ເທວຕາວຄ຺ໂຄ

໕. ປຐມມິຕ຺ຕສຸຕ຺ຕວຓ຺ຓນາ

໓໖. ຈຕຸຕ຺ຖສ຺ສ ປຎ຺ຈເມ ທຸທ຺ທທນ຺ຕິ ທຸປ຺ປຣິຈ຺ຈຊໍ ມຫາຣຫໍ ຠຓ຺ຑກໍ. ທຸກ຺ກຣໍ ກໂຣຕີຕິ ກາຕຸໍ ອສຸກຣໍ ກມ຺ມໍ ກໂຣຕິ. ທຸກ຺ຂມໍ ຂມຕີຕິ ສຫາຍສ຺ສ ອຕ຺ຖາຍ ທຸຣຘິວາສໍ ອຘິວາເສຕິ. ຄຸຍ຺ຫມສ຺ສ ອາວິກໂຣຕີຕິ ອຕ຺ຕໂນ ຄຸຍ຺ຫໍ ຕສ຺ສ ອາວິກໂຣຕິ. ຄຸຍ຺ຫມສ຺ສ ປຣິຄຸຫຕີຕິ ຕສ຺ສ ຄຸຍ຺ຫໍ ອຎ຺ເຎສໍ ນາຈິກ຺ຂຕິ. ຂີເຓນ ນາຕິມຎ຺ຎຕີຕິ ຕສ຺ສ ໂຠເຄ ຂີເຓ ເຕນ ຂເຍນ ຕໍ ນາຕິມຎ຺ຎຕິ, ຕສ຺ມິໍ ໂອມານໍ ອຕ຺ຕນິ ຈ ອຕິມານໍ ນ ກໂຣຕິ.

໖. ທຸຕິຍມິຕ຺ຕສຸຕ຺ຕວຓ຺ຓນາ

໓໗. ຉຏ຺ເຐ ວຕ຺ຕາຕິ ວຈນກຸສໂລ. ວຈນກ຺ຂໂມຕິ ວຈນໍ ຂມຕິ, ທິນ຺ນໍ ໂອວາທໍ ກໂຣຕິ. ຄມ຺ຠີຣນ຺ຕິ ຄຸຍ຺ຫໍ ຣຫສ຺ສໍ ຌານນິສ຺ສິຕໍ ວິປສ຺ສນາມຄ຺ຄຜລນິພ຺ພານນິສ຺ສິຕໍ.

໗. ປຐມປຏິສມ຺ຠິທາສຸຕ຺ຕວຓ຺ຓນາ

໓໘. ສຕ຺ຕເມ ອິທໍ ເມ ເຈຕໂສ ລີນຕ຺ຕນ຺ຕິ ອຸປ຺ປນ຺ເນ ເຈຕໂສ ລີນຕ຺ເຕ ‘‘ອິທໍ ເມ ເຈຕໂສ ລີນຕ຺ຕ’’ນ຺ຕິ ຍຖາສຠາວໂຕ ຊານາຕິ. ອຊ຺ຌຕ຺ຕໍ ສໍຂິຕ຺ຕໍ ນາມ ຖິນມິທ຺ຘານຸຄຕໍ. ພຫິທ຺ຘາ ວິກ຺ຂິຕ຺ຕໍ ນາມ ປຎ຺ຈສຸ ກາມຄຸເຓສຸ ວິກ຺ຂິຕ຺ຕໍ. ເວທນາຕິອາທີນິ ປປຎ຺ຈມູລວເສນ ຄຫິຕານິ. ເວທນາ ຫິ ຕຓ຺ຫາຍ ມູລໍ ສຸຂວເສນ ຕຓ຺ຫຸປ຺ປຕ຺ຕິໂຕ, ສຎ຺ຎາ ທິຏ຺ຐິຍາ ມູລໍ ອວິຠູຕາຣມ຺ມເຓ ທິຏ຺ຐິອຸປ຺ປຕ຺ຕິໂຕ, ວິຕກ຺ໂກ ມານສ຺ສ ມູລໍ ວິຕກ຺ກວເສນ ອສ຺ມີຕິ ມານຸປ຺ປຕ຺ຕິໂຕ. ສປ຺ປາຍາສປ຺ປາເຍສູຕິ ອຸປກາຣານຸປກາເຣສຸ. ນິມິຕ຺ຕນ຺ຕິ ກາຣຓໍ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ເທວຕາວຄ຺ໂຄ ຈຕຸຕ຺ໂຖ.